Ɩsɔ́ɔ wɛɛgɛ́ɛ Ɩbrám yɩ́ɖɛ bɩbɩ́sɩ Ibrahím
17
1 Sáátɩ wenkí Ɩbrám wooyuú bɩ́ɩ́zɩ nɩɩ́nʊ́wá nɛkɛ́rɛ fɛ́yɩ́ (99) nɛ́,
ngɛ Ɖádʊ́ʊ Ɩsɔ́ɔ waaɖʊ ɩlɩ́ɩ ɩrɔɔzɩ́ ifééri yɩ sɩsɩ:
«Mɔ́ɔ́ gɛ Ɩsɔ́ɔ yíko rɩ́ŋa-dʊ́ʊ.
Bɩlɛ́ nɛ́,
fu ma,
nvu toovonúm.
2 Mána nya ɖénɖíi keɖiyá na mava nya lʊrʊ́ʊ ɖabata.»
3 Ngɛ Ɩbrám woovu ilóódi-rɔɔzɩ́,
ɩbá ɩnyɩ́ɩ́rɛ adɛ.
4 Ngɛ Ɩsɔ́ɔ sɩsɩ:
«Mɔ́ɔ́ sɩ malá ɖɛ́dɛ́ɛ keɖiyá kɛḿ kadaá wenbí nɛ́ nɖɔ́:
nyánbɩsɩ́ laadásɩ ɖabata-dɛ́ɛ ɩráa ɩjaa kʊ́bɔnɩ́.
5 Bádándayaa nya sɩsɩ Ɩbrám,
sɩ bayáa nya gɛ sɩsɩ Ibrahíma;
káma,
ménÿelíi nbɩ́sɩ laadásɩ ɖabata-dɛ́ɛ ɩráa ɩjaa kʊ́bɔnɩ́.
6 Ménÿelíi nlʊ́rʊ bɩlʊ́rʊ bɩbá bɩɖɔ́ɔ.
Lʊrʊ́ʊ bɩḿ bɩdaá gɛ yíriwá ɖabata sɩ ɩlɩɩná.
Badaá ɖʊɖɔ gɛ bɩ́nlɩzɩ́ɩ wúrowá.
7 Mɔ́nɖɔkɩ́ mána nya ɖɛ́dɛ́ɛ keɖiyá kɔcɔ́ɔ bɩlɛ́ mána nya na nyébíya‑bíya ɖɔ́lɔ́wʊ́táá sinje hálɩ ceré.
Bɩlɛ́ nɛ́,
mɛ́gɛ́ɛ na nyána nyébíya‑bíya mɩ́dɛ́ɛ Ɩsɔ́ɔ.
8 Kanáanɩ laadɔ́ɔ nyɔ́jɔɔ́ɔ kadaá ɩgɔ́ńdɩ ɖɔ́ nɛ́,
mánváa karɩ́ŋa nyána nyébíya‑bíya,
nyɔ́ɔ́gɔ́nɩ nyɔ́wɔ́rɔ́ nɛ́,
kabɩ́sɩ bɛdɛ́ɛ ńga sinje hálɩ ceré,
bɩka mɛ́gɛ́ɛ bɛdɛ́ɛ Ɩsɔ́ɔ.»
9 Ngɛ Ɩsɔ́ɔ waadásɩ ɩtɔ́ yɩ sɩsɩ:
«Nyɔ́ɔ́ nyána nyógutoluú-dɛ bíya,
kpɔɔ sinje hálɩ bɩɖɛ́ɛ,
ɩɖɔ́kɩ keɖiyá mána mɩ́ɩ ɖééɖí kɛ nɛ́.
10 Ɖɛ́dɛ́ɛ keɖiyá wɔɔbɔ́ɔ́zɩ wenbí sɩsɩ ɩ́la bɩ nɛ́ nɖɔ́:
Mɩ́dáá báa weení gɛ ɩgɛ́ɛ abaalʊ́,
bɩɩbɔ́ɔ́zɩ bɛbɛlɩ́ yɩ.
11 Bɛlɩ́ɩ kɛ́ɛ na mána mɩ́ɩ ɖɛ́dɛ́ɛ keɖiyá-dɛ́ɛ ɖaazɩ́tɩ.
12 Kpɔɔná sinje hálɩ míbíya-bíya-jɔ́;
bú abaalʊ́ báa weení gɛ baalʊ́rʊ yɩ,
ɩdɛ́ɛ wɛ́ lutoozo wɩ́rɛ nɛ́,
asée bɛbɛlɩ́ yɩ.
Bɩlɛ́ ɖʊɖɔ gɛ yomáa mɩ́ɩ́mʊ́ wɛ bɛdɛkɛ́ɛ mɩ́dɛ́ɛ yíri nɛ́,
asée bɛbɛlɩ́ wɛ.
13 Bɛlɩ́ɩ bɩḿ bɩgɛ́ɛ na ɖɛ́dɛ́ɛ keɖiyá-dɛ́ɛ ɖaazɩ́tɩ mɩ́rɩ́ŋa mɩ́dɔnɩ́nɩ-rɔɔzɩ́ sinje hálɩ ceré.
14 A bɩɩga ɩrʊ́ weení gɛ bɛdɛbɛlɩ́ yɩ nɛ́,
wenbí ńŋɩnáa idofu keɖiyá-dɛ́ɛ mará nɛ́,
bánlɩzɩ́ɩ yɩ koobíre-daá.»
15 Ngɛ Ɩsɔ́ɔ wɔɔdɔ́tɔḿ Ibrahím sɩsɩ:
«Lɛlɛɛɖɔ́,
nkokúti nÿáa nɖɛɛlʊ́ sɩsɩ Saaráyɩ;
yaa yɩ sɩsɩ Saráab.
16 Mánɖʊ́ʊ yɩ alɩbáráka meyéle ɩlʊ́rʊ nya bú abaalʊ́,
maɖʊ yɩ alɩbáráka ɩbɩ́sɩ yíriwá ɖabata-dɛ́ɛ ɩráa nize.
Ɩdɛ́ɛ lʊrʊ́ʊ-daá,
bɩ́ngɔnɩ́ bɩlɩzɩ́ wúrowá.»
17 Ibrahím waanɩ́ɩ Ɩsɔ́ɔ waaŋmátɩ yɩ bɩlɛ́ nɛ́,
ngɛ waabála ifu ilóódi-rɔɔzɩ́ ɩsála kɔdɔ́ŋa;
káma,
ɩwɛ wánŋmatɩ́ iwenbiré-daá sɩsɩ:
«Mɔ́ɔ́ abaalʊ́ kʊ́bɔnɩ́,
mɔ́wɛná bɩ́ɩ́zɩ nɩɩ́nʊ́wá (100) nɛ́,
we gɛ sɩ malá na mogúti malʊ́rʊ.
Ngʊ́ mɛɖɛɛlʊ́ ɩlɛ́ wáńláḿ ábɔ́nɩ́ ɖʊɖɔ ɩwɛná bɩ́ɩ́zɩ nɩɩ́náázá na saaláa (90).
We gɛ sɩ ɩlá na bɔtɔ́ sɩsɩ waalʊ́rʊ bú.»
18 Ngɛ Ibrahím woobúsi Ɩsɔ́ɔ sɩsɩ:
«Aaa… A bɩgɛ́ɛ nyɔ́ɔ́ɖɔ́kɩ móbú Asʊmáyɩ́la,
bɩɩɖɔ́ɔ.»
19 Ngɛ Ɩsɔ́ɔ sɩsɩ:
«Aayɩ́,
nɖɛɛlʊ́ Saráa wánlʊrʊnáa nya bú abaalʊ́;
na nva yɩ yɩ́ɖɛ sɩsɩ Ɩsaáka.
Mɔ́nɖɔkɩ́ mána nya ɖɛ́dɛ́ɛ keɖiyá kɔcɔ́ɔ mána yɩ ɖɔ́lɔ́wʊ́táá;
kɔcɔ́ɔ bɩlɛ́ hálɩ ibíya-bíya-jɔ́.
Keɖiyá kɛḿ,
kɛdɛ́ndɛŋ́.
20 Tɩlɛ́ tɩbaasí,
sʊlʊ́ńdɩ nyáázʊ́lʊ tɩ Asʊmáyɩ́la-rɔɔzɩ́ nɛ́,
máánɩ́ɩ tɩ.
Mánɖʊ́ʊ yɩ alɩbáráka ɩlʊ́rʊ bɩlʊ́rʊ páá;
wánlʊrʊ́ʊ bíya fuú na nɔɔ́lɛ,
babɩ́sɩ wúrowá,
bɩka ɩbɩ́sɩ ɩráa zamɔ́ɔ ɩjaa kʊ́bɔnɩ́.
21 Amá,
a bɩɩga ɖɛ́dɛ́ɛ keɖiyá,
sɩ mɔɖɔ́kɩ kɛ gɛ kɔcɔ́ɔ mána Ɩsaáka ɩmʊ́ ɖɔ́lɔ́wʊ́táá.
Sɩ busúlu bɩ́nɩ ńŋɩnáa ɖɔ́ nɛ́ gɛ nɖɛɛlʊ́ Saráa sɩ ɩlʊrʊná nya bú ɩmʊ́.»
22 Sáátɩ wenkí Ɩsɔ́ɔ waaŋmatɩná Ibrahím bɩtɛ́ nɛ́,
ngɛ wɛɛɖɛ́ɛ iyéle yɩ.
23 Ngɛ Ibrahím wooyóózi ɩ́na ibiyaalʊ́ Asʊmáyɩ́la na yomáa wenbá barɩ́ŋa baalʊ́rʊ wɛ ɩɖaána-daá nɛ́,
na wenbá barɩ́ŋa waamʊ wɛ na liideé nɛ́;
weení ɩrɩ́ŋa ɩwɛ ɩɖaána-daá gɛ ɩgɛ́ɛ abaalʊ́ nɛ́,
ɩbɛlɩ́ wɩ́rɛ ɖɩḿ ńŋɩnáa wenbí Ɩsɔ́ɔ wɔɔdɔ́ yɩ nɛ́.
24 Ibrahím-dɛ́ɛ bɩ́ɩ́zɩ nɩɩ́nʊ́wá nɛkɛ́rɛ fɛ́yɩ́ (99) gɛ bɛɛbɛlɩ́ yɩ,
25 bɩɩga ibiyaalʊ́ Asʊmáyɩ́la nɛ́,
ɩlɛ́ ɩdɛ́ɛ bɩ́ɩ́zɩ fuú na nasúdoozo gɛ bɛɛbɛlɩ́ yɩ.
26-27 Sɩ bɛbɛlɩ́ Ibrahím nɛ́,
ɩ́na ibiyaalʊ́ Asʊmáyɩ́la na weení ɩrɩ́ŋa ɩdanbá ɩwɛ ɩɖaána-daá ɩgɛ́ɛ abaalʊ́ nɛ́:
bɩɩlá ɩdɛ́ɛ yomáa waamʊ wɛ ɩgɔma-jɔ́ nɛ́,
na wenbá barɩ́ŋa baalʊ́rʊ wɛ ɩdɛ́ɛ nɛ́ gɛ booyóózi bɛbɛlɩ́ wɩ́rɛ ɖɩḿ.