Naanɩ́ na ɖɩbáázɩ Ɩsɔ́ɔ-dɛ́ɛ Tɔ́m nɛ́
Tákaraɖá Yeésu-dɛ́ɛ wanbaaráa wenbá bánÿaá wɛ ɖʊɖɔ sɩsɩ Krísto ńba nɛ́ ɖɔ́kɛɛná sɩsɩ kɩdaá tɔ́m kɛ́ɛ na Ɩsɔ́ɔ-dɛ́ɛ tɔ́m nɛ́, keɖiyísi nasɩ́lɛ-dɛ́ɛ tɔ́m gɛ: Keɖiyá Kɩ́bɩńga na Keɖiyá Kɩ́falɔɔ́. Kɩdɛ́ɛ fɔɔlʊʊ́ kaɖaa ńgɩ gɛ bánÿaá sɩsɩ Keɖiyá Kɩ́bɩńga-dɛ́ɛ tákaraɖá. Fɔɔlʊʊ́ sɩɩlɛ ńgɩ gɛ bánÿaá sɩsɩ Keɖiyá Kɩ́falɔɔ́-dɛ́ɛ tákaraɖá; bánÿaá kɩ ɖʊɖɔ sɩsɩ Njííla-dɛ́ɛ tákaraɖá.
Amá, tákaraɖá kɩna ɖáálɩ́zɩ́ kɩ ɖɔ́ nɛ́, kɩlɛ́ kɩwɛná fɔɔlɩ́nɩ natúdoozo gɛ: Fɔɔlʊʊ́ kaɖaa ńgɩ gɛ Bɩgabaazɩya-dɛ́ɛ tákaraɖá; Keɖiyá Kɩ́bɩńga-dɛ́ɛ tákaraɖá kaɖaa ńgɩ nbɩlɛ́. Fɔɔlʊʊ́ sɩɩlɛ ńgɩ gɛ Keɖiyá Kɩ́falɔɔ́, bánÿaá kɛ ɖʊɖɔ sɩsɩ Njííla nɛ́-dɛ́ɛ tákaraɖáwá rɩ́ŋa. Bɩka fɔɔlʊʊ́ toozo ńgɩ gɛ Ɩsɔ́ɔ-dɛ́ɛ tɔ́m ndɩ-ndɩ baalɩzɩ́ baŋmáa Ajamíya-daá nɛ́. Wenbá baasɩ Tem baaŋmaaná Róóma-dɛ́ɛ ŋmáádɩ bíya-dɛ́ɛ kalɩ́ɩ, bɩka banyɩ Laarúbu-dɛ́ɛ ŋmáádɩ bíya kalɩ́ɩ nɛ́, bɛlɛ́ bɔrɔ gɛ baaɖʊ Ajamíya-dɛ́ɛ fɔɔlʊʊ́ kɩḿ. Ɩsɔ́ɔ-dɛ́ɛ tɔ́m tɩwɛ Keɖiyá Kɩ́falɔɔ́-daá nɛ́, tɩdaá gɛ ɩrʊ́ wánbɩɩzɩ́ ɩkáná wentí tɩrɩ́ŋa baaŋmaaná Ajamíya nɛ́. Keɖiyá Kɩ́falɔɔ́-dɛ́ɛ fɔɔlʊʊ́ wɛ́ndɛ́m nɛ́, naanɩ́ Ajamíya-dɛ́ɛ ńgɩ ɩbáázɩ nɛ́, baaɖʊ tákaraɖáwá natɩ́rɩ tɩ́nbɩɩzɩ́ tɩsɩná weení wángalɩ́ɩ nɛ́ ɩbá ɩnɩ́ɩ wentí wángalɩ́ɩ nɛ́ tugutoluú kazɔ́ɔ. Tákaraɖáwá tɩḿ tɩdaá, ɖánnáa wenkí kɩ́nlɩzɩ́ɩ Tɔ́m Bíya Kʊ́bɔnáa Kutoluú nɛ́, na tákaraɖáwá wentíwá tɩrɔ baalɩzɩ́ caanawʊ́ laadásɩ na tɛ́ɛ́dɩwá ndɩ-ndɩ nɛ́.
Tɩlɩ́ɖa kʊ́bɔnáa bánjáádɩ páá nɛ́ waabá bacáárɩ badɩ hálɩ bana tákaraɖáwá kɩ́bɩnbɩńdɩ wentí tɩdaá baaɖáa Ɩsɔ́ɔ-dɛ́ɛ tɔ́m ŋmaá nɛ́ basɩ́ɩ. Éburu kʊnʊm-daá gɛ baaɖáa Bɩgabaazɩya-dɛ́ɛ tákaraɖá-daá tɔ́m ŋmáádɩ. Baaɖáa Keɖiyá kɩ́falɔɔ́-dɛ́ɛ tákaraɖáwá ŋmáádɩ nɛ́, Gɩrɛ́ɛkɩ kʊnʊm-daá gɛ baaŋmaa ná tɩ.
Ngɛ tɩlɩ́ɖa kʊ́bɔnáa bánjáádɩ nɛ́, waawɩ́lɩ sɩsɩ bɩ́ɩ́zɩ niídoozo na nasʊ́nʊ́wá kaɖaa ńzɩ Yeésu-dɛ́ɛ sɩ́m wɔ́rɔ́ gɛ baaŋmáa tɩ. Ɩráa wenbá baabá bana Yeésu na baazá nɛ́, bɩtasɩná wenbá baana Yeésu ɩmʊ́ ɩdɛ́ɛ wanbaaráa, yáá bána wɛ baalá tɩmɛ́rɛ nɛ́, baaŋmaaná tɩ.
Tákaraɖáwá tɩḿ tɩdaá kɩ́bɩnbɩńdɩ, a sɩ bacáa sáátɩ bɛɛbɛ́ɛ́ŋ batásɩ tɩ ŋmaá nɛ́, ɖánganáa nyazɩ bɩ́nɩ nɩɩ́nʊ́wá ńnɩ́ nyɛ́nɖɛɛ́ bɩ́nɩ kákpáŋa ńnɩ́ bɩlɛ́ Yeésu-dɛ́ɛ sɩ́m wɔ́rɔ́. Bánbɩɩzɩ́ bana tɩ nyazɩ Mɩ́sɩra laadɔ́ɔ, yáá Etiyopíya, yáá Italíi, yáá Israyɛ́ɛlɩ laadásɩ-dɛ́ɛ tákaraɖáwá ɖaazɩɩɖɛ́. Amá, ɩlɛɛzʊ́ʊ sɩ ɩna kɩ ɖɔ́ nɛ́, Yeésu Krísto-dɛ́ɛ Laabáárʊ Kífeńgi Yʊháánɩ waaŋmáa kɩ nɛ́-dɛ́ɛ kʊjʊʊ́ kaɖaa ńgɩ, tarɩ́ɩ kaɖaa ńgɩ hálɩ fuú na natúdoozo ńgɩ nbɩlɛ́ (Yʊh 3.7-14); Zenɛ́ɛvɩ tɛ́ɛ́dɩ-daá gɛ baagáná kɩ. Gɩrɛ́ɛkɩ kʊnʊm-daá gɛ baaŋmaaná, bɩka tɩɩwʊ́ bánÿaá kɩ Papiríisi nɛ́ gɛ baalaná wenkí kɩrɔ bánŋmaá nɛ́.
Bɩdɛ́ɛ sáátɩ, Róóma ńba wénɖíi kʊ kʊ́bɔńdɩ laadɔ́ɔ rɩ́ŋa-rɔ nɛ́, kʊnʊm wenkí baazɩ́ɩ́zɩ bánŋmatɩ́ kɩ báa lé nɛ́ nbɩlɛ́. Amá, Yeésu anɖébi Ísá-dɛ́ɛ kʊnʊm wenkí ɩlɛ́ waaŋmátɩ kɩ nɛ́ gɛ bánÿaá sɩsɩ Arameyɛ́n; kʊnʊm wenkí Yahúúɖuwá wánŋmatɩ́ kɩ Yeésu-dɛ́ɛ sáátɩ nɛ́ nbɩlɛ́. Bɩɩgɔ́nɩ bʊwɔ́rɔ́ nɛ́, ngɛ baabáázɩ Ɩsɔ́ɔ-dɛ́ɛ tɔ́m tɩḿ lɩzɩ́ɩ na kʊnʊmɩ́nɩ ndɩ‑ndɩ-daá. Bɩlɛ́ biiyele ná ɩráa ɖabata ɩbɩ́ɩ́zɩ bakála Ɩsɔ́ɔ-dɛ́ɛ tɔ́m tɩḿ badɩtɩŋa bagʊnʊmɩ́nɩ-daá bɩka banɩ́ɩ bugutoluú kazɔ́ɔ.
Naanɩ́ bɩtála bɩ́nɩ kákpáŋa ńnɩ́ nɛ́ gɛ baaɖáa Ɩsɔ́ɔ-dɛ́ɛ tɔ́m tɩḿ lɩzɩ́ɩ kʊnʊm bánÿaá kɩ Siriyáakɩ nɛ́ kɩdaá, bɩka Laarúbuwá bɛgɛ́ɛ Krísto ńba nɛ́ wánlanáa tɩ tɩmɛ́rɛ. Bánŋmatɩ́ Ɩsɔ́ɔ-dɛ́ɛ tɔ́m-dɛ́ɛ lɩzɩ́ɩ kʊnʊmɩ́nɩ-daá-dɛ́ɛ tɔ́m nɛ́, baawɩ́lɩ sɩsɩ baalɩzɩ́ tɩ na Pɛ́ɛrɩsɩ laadɔ́ɔ-dɛ́ɛ kʊnʊm-daá naanɩ́ bɩtála bɩ́nɩ kákpɩ́ɩ́zɩ nasɩ́lɛ ńnɩ́; amá, bádándanáa bɩlɛ́ bɩdɛ́ɛ tákaraɖáwá ɖʊɖɔ lɛlɛɛɖɔ́-daá. Amá, kɩ́bɩnbɩńdɩ baalɩzɩ́ tɩ na Laarúbu kʊnʊm-daá bánbɩɩzɩ́ bana tɩ nɛ́, bɩ́nɩ kákpɩ́ɩ́zɩ nasɩ́náázá ńnɩ́ bɩkpɔ́ɔ bɩɖɛ́ɛ bɩlɛ́ gɛ baalɩzɩ́ tɩlɛ́.
Ńŋɩnáa ɩráa rɩ́ŋa tánbɩɩzɩ bakála kʊnʊmɩ́nɩ kaɖaa‑kaɖaa ńdɩ wentí tɩdaá baaŋmaaná Ɩsɔ́ɔ-dɛ́ɛ Tɔ́m nɛ́, ɖáábá ɖɩcáárɩ ɖádɩ ɖɩlɩzɩ́ wenbí nɔ́ɔ́ baaŋmátɩ kʊnʊmɩ́nɩ tɩḿ tɩdaá nɛ́ bɩbá bɩya kazɔ́ɔ, bɩka ŋmatɩrɛ ibó ńŋɩnáa Tem bú tɩtɩŋa ɩ́tá ɩŋmátɩ wenbí nɛ́. Na ɖɔ́ɔ́ Tem bíya rɩ́ŋa ɖɩbɩ́ɩ́zɩ ɖɩkála tɩ, ɖɩnɩ́ɩ bugutoluú bɩka ɖɩkpɔ́ɔ tɔ́m Ɩsɔ́ɔ wénveerím ɖáa tɩ nɛ́ ɖɩlaná tɩmɛ́rɛ ɖɛ́dɛ́ɛ weezuú cɔwʊrɛ-daá nɛ́-rɔ gɛ ɖáálá konkárɩ́ kɩḿ.