Basɩ́tɩ i

Basɩ́tɩ

Ɩsɔ́ɔ-dɛ́ɛ Tɔ́m Tákaraɖá kɩna kɩdaá,

ɖánnáa Keɖiyá Kɩ́bɩńga-dɛ́ɛ tákaraɖá kaɖaa ńgɩ bánÿaá kɩ sɩsɩ Bɩgabaazɩya-dɛ́ɛ tákaraɖá nɛ́,

na Keɖiyá Kɩ́falɔɔ́-dɛ́ɛ tákaraɖáwá rɩ́ŋa;

tɩlɛ́ tɩgɛ́ɛ ákoowú na lʊbɛ (27) gɛ.

Baadára tákaraɖá báa wenkí-daá tɔ́m fɔɔlɩ́nɩ ndɩ‑ndɩ ɖánÿaá tɩ sɩsɩ kʊjʊ́nɩ.

Bɩka batára kʊjʊʊ́ báa wenkí tɔ́m bɔwá ndɩ‑ndɩ ɖánÿaá alɛ́ sɩsɩ tarɩ́ɩ.

Akɔ́ntaá bíya 1, 2, 3 hálɩ ngbɔ́ɔ nɖɛ́ɛ gɛ baaŋmáa bɩbá bikíi baɖaazɩná kʊjʊʊ́ báa wenkí;

bɩka batáŋmáa ɖʊɖɔ bɛdɛ́ɛ kúmuúsi baɖaazɩná tarɩ́ɩwá kʊjʊʊ́ báa wenkí-daá.

A ɖángalɩ́ɩ kɩdaá tɔ́m,

ɖánnáa ɖaazɩ́tɩwá ndɩ‑ndɩ yáá ŋmáádɩ-bíya,

yáá akɔ́ntaá-bíya nɛbɛ́rɛ baŋmaráa na tɔ́m bíya nɛbɛ́rɛ.

Baaɖʊ wɛ gɛ sɩsɩ na kalɩ́ɩ ɩ́kalá ɖáa káálɛ,

yáá sɩsɩ na balɩzɩ́ ɖáa tɔ́m-bú ɩmʊ́ igutoluú,

káma,

ɩjɔɔ́ɔ káálɛ nɩɩ́ yáá ɩgɛ́ɛ ɩgɔm.

Ɖaazɩ́tɩwá,

na ŋmáádɩ-bíya na akɔ́ntaá-bíya bɛḿ nɖɔ́,

báa weení na ɩdɩmɛ́rɛ wenɖé wánlám nɛ́:

. Toḿka – Kɛlɛ́ kánwɩlɩ́ɩ sɩsɩ kalaɖʊ́ ɩ́sɩŋ naanɩ́ ɩmɔ́ɔ ɩbáázɩ.

, Tángʊ́jʊʊ́ – Kɩlɛ́ kɩ́nwɩlɩ́ɩ sɩsɩ kalaɖʊ́ ɩ́fʊʊzɩ cɩ́kɔ na ɩmɔ́ɔ ɩbáázɩ.

; Toḿka tángʊ́jʊʊ́-rɔ – Kɛlɛ́ kánwɩlɩ́ɩ sɩsɩ kalaɖʊ́ ɩ́fʊʊzɩ bʊtʊʊ́ bʊɖɔ́ɔ na ɩmɔ́ɔ ɩbáázɩ.

: Toḿsi nasɩ́lɛ – Sɩlɛ́ sɩ́nwɩlɩ́ɩ sɩsɩ ɩrʊ́ sɩ ɩtɩ́ yɩrá naárɛ yáá sɩ ɩtɩ́ tɔ́m natɩ́rɩ.

« » Cʊ́kɔlásɩ – Tɔ́m naárʊ waaŋmátɩ ngɛ bándɩ́m tɩ nɔ́ɔ́ nɛ́ gɛ bánɖʊ́ʊ bɔlɔwʊtáá.

“ ” Cɛkɩrásɩ – A babamáa naárʊ-dɛ́ɛ tɔ́m tɩ́m,

ngɛ ɩlɛ́ ɖʊɖɔ sɩ ɩtɩ́ naárʊ ɖʊɖɔ,

tɩlɛ́ gɛ bánɖʊ́ʊ cʊ́kɔlásɩ lɔwʊtáá.

‘ ’ Cɛkɩrɔɔ́ – A bándɩ́m naárʊ-dɛ́ɛ tɔ́m,

ngɛ ɩlɛ́ ɖʊɖɔ wándɩ́m naárʊ-dɛ́ɛ ńdɩ,

ngɛ sɩɩlɛ ńnɩ́ sɩ ɩtɩ́ toozo ńnɩ́-dɛ́ɛ tɔ́m ɖʊɖɔ nɔ́ɔ́,

tɩlɛ́ gɛ bánɖʊ́ʊ ńna.

( ) Kpiriɖáa – Bɛlɛ́ béngbiriki kʊ tɔ́m boozúúri tɩ ŋmatɩrɛ neɖére-daá na bɩsɩná ɩrʊ́ ɩnɩ́ɩ kazɔ́ɔ nɛ́.

[ ] Kpiriɖáa bazɩɩzɛ́ɛ nɛ́ – Baaɖáa Ɩsɔ́ɔ-dɛ́ɛ tɔ́m ŋmáádɩ kaɖaa‑kaɖaa nɛ́,

tɩɩwʊ́ bánÿaá kɩ Papiríisi nɛ́ gɛ baalaná lénlé bánŋmaá nɛ́.

Bʊwɔ́rɔ́ kpeteree gɛ bɔɔgɔ́nɩ babáázɩ tɔná-rɔ ŋmáádɩ.

Tákaraɖáwá wɔɔgɔ́nɩ tɩlɩ́ɩ gɛ ŋmaaráa sɩ babɩsɩná tɩ baŋmáa tɩlɛ́ tɩrɔ nɛ́,

ŋmáádɩwá natɩ́rɩ wáńbaazɩ ɖɩ́m.

Amá,

wenbá bɛdɛ́ɛ ńdɩ-rɔ ŋmáádɩ tɩḿ tʊwɛ tɩdaɖɩ́ nɛ́,

tɩlɛ́ gɛ baaɖʊ kpiriɖáa bazɩɩzɛ́ɛ nɛ́ badaá.

* Wɩlɔɔ́ – Wɩlɔɔ́ kana kánwɩlɩ́ɩ sɩsɩ tɔ́m bú weení ɩjáŋ ɩwɛ kaazá-daá nɛ́,

baaŋmátɩ ɩdɔ́m tákaraɖá kɩ́nlɩzɩ́ɩ tɔ́m bíya kʊ́bɔnáa kutoluú nɛ́ kɩdaá.

A ɖóóbó ńna,

ɖánganáa wenbí ɩgɛ́ɛ nɛ́.

^a,

^b,

^c Ŋmáádɩ-bíya bana ɖɔ́ – A nyángalɩ́ɩ gɛ nyááná badaá naárʊ ɩŋmaráa na tɔ́m bú naárʊ-dɛ́ɛ kɛdɛɛzɩya-dɛ́ɛ ɩsɔ́ɔ́dááyɔ́ɔ^a,

bugutoluú sɩsɩ sɩ bakálɩ́zɩ́ tɔ́m bú ɩmʊ́ igutoluú tákaraɖá bú-dɛ́ɛ bɩdɛ,

cɛɛrɔɔ́ baagáárɩ kɛ nɛ́ kɛdɛɛzɩ́ nbɩlɛ́.

A ɖóóvúlú Ɩsɔ́ɔ-dɛ́ɛ tɔ́m tákaraɖá,

kalɩ́ɩ-daá,

ɖánnáa sɩsɩ naanɩ́ babáázɩ tɔ́m natɩ́rɩ nɛ́,

baagáárɩ kaarɔɔ́ nɛkɛ́rɛ kalára kamɩlɩná tɔ́m bɔwʊ́ɖɛyɔ́ɔ neɖére.

Tɔ́m tɩḿ baaŋmáa tɩ bɩdaá nɛ́,

tínveerím ɖáa wentí tɩdɔ́m sɩ baŋmátɩ bɩdɛɛzɩ́ nɛ́ gɛ.

Kaarásɩ sɩḿ sɩdaá nasɩ́rɩ-dɛɛzɩ́,

baaŋmáa cɛɛrɔɔ́ sɩ́ɩ́lɛ ńga;

kɛlɛ́ kánwɩlɩ́ɩ kʊ tákaraɖáwá wentí tɩdaá baaŋmátɩ tɔ́m tɩḿ ɖʊɖɔ nɛ́.

A ɖɛ́ɛ́bɛ́ɛ́ŋná kaarásɩ sɩna,

ɖánnáa sɩsɩ Maatéwu-dɛ́ɛ tákaraɖá-daá gɛ bɩgɛ́ɛ,

amá, bánbɩɩzɩ́ bakáná tɔ́m tɩ́m nɔ́ɔ́ Lúka-dɛ́ɛ tákaraɖá-daá ɖʊɖɔ, kʊjʊʊ́ tóózo ńgɩ-daá.

Ɖaazɩ́tɩwá natɩ́rɩ-dɛ́ɛ kalɩ́ɩ Ɩsɔ́ɔ-dɛ́ɛ Tɔ́m Tákaraɖá-daá

Mrk 9.41 – Maárɩkɩ-dɛ́ɛ kʊjʊʊ́ kééníré ńgɩ,

tarɩ́ɩ nɛɛ́lɛ na nakɩ́rɩ ńgɩ.

Lúk 3.23-38 – Lúka-dɛ́ɛ kʊjʊʊ́ toozo ńgɩ,

tarɩ́ɩ ákoowú na natúdoozo hálɩ ákoosaaláa na lutoozo ńgɩ.

Lúk 6.27-28, 32-36 – Lúka-dɛ́ɛ kʊjʊʊ́ loɖo ńgɩ,

tarɩ́ɩ ákoowú na lʊbɛ hálɩ ákoowú na lutoozo;

na ákoosaaláa na natɩ́lɛ hálɩ ákoosaaláa na loɖo ńgɩ.

1Tm 6.9-10 – Wasɩ́ɩ́ka kaɖaa ńga baaŋmáa kɛ Timotée nɛ́:

kʊjʊʊ́ loɖo ńgɩ,

tarɩ́ɩ kééníré hálɩ fuú ńgɩ.