Naanɩ́ na ɖɩbáázɩ 2

Naanɩ́ ɖɩbáázɩ Keɖiyá kɩ́falɔɔ́-dɛ́ɛ Tákaraɖá nɛ́

Keɖiyá kɩ́falɔɔ́-dɛ́ɛ tákaraɖá kɛ́ɛ wenbí nɛ́

Ńŋɩnáa ɖáagágala Bɩgabaazɩya-dɛ́ɛ tákaraɖá-daá nɛ́, Ɩsɔ́ɔ weegeti ná anɖébiwá na ɩráa ɖabata baŋmáa Israyɛ́ɛlɩ zamɔ́ɔ wenkí ɩmʊ́ Ɩsɔ́ɔ waalɩzɩ́ kɩ ɩsɩ́ɩ ɩdɩ nɛ́ kɩdɛ́ɛ tɔ́m, bɩka ikéti wɛ ɖʊɖɔ baŋmátɩ bakpɩ́ɩ́rɩ ɩráa baɖáŋ Mesíya (Lɛɛrʊ́) weení Ɩsɔ́ɔ sɩ ikédiri yɩ nɛ́ ɩdɛ́ɛ kɔnɖɛ́. Bɩlɛ́ bɩdɛ́ɛ ŋmáádɩwá gɛ ɖánnáa Keɖiyá kɩ́bɩńga-dɛ́ɛ tákaraɖáwá-daá.

Yeésu wɔɔgɔ́nɩ nɛ́, ɩdɛ́ɛ wenbí wɔɔjɔɔná bɩ nɛ́, na tɔ́mwá wentí tɩrɩ́ŋa waawɩ́lɩ nɛ́, bɩdaá gɛ Yahúúɖuwá waananá sɩsɩ wentí tɩrɩ́ŋa baaŋmátɩ Mesíya weení Ɩsɔ́ɔ sɩsɩ wéngediríi yɩ ɩkɔ́nɩ ɩlɛ́ɛ ɩráa nɛ́-dɛ́ɛ tɔ́m rɩ́ŋa woogóódi. Tákaraɖáwá baaŋmáa tɩ ɩrɔ nɛ́ gɛ bánÿaá sɩsɩ Keɖiyá kɩ́falɔɔ́-dɛ́ɛ tákaraɖáwá. Amá, na bɩrɩ́ŋa, Yahúúɖuwá-daá nɛbɛ́rɛ tetísi tɔ́m tɩḿ, ngɛ hálɩ na sinje, bɛdɛɛzɩwɛ baɖamáa Mesíya ɩmʊ́. Wenbá beedísi ngɛ baava toovonúm nɛ́ gɛ bánÿaá sɩsɩ Krísto ńba.

Keɖiyá kɩ́falɔɔ́-dɛ́ɛ tákaraɖáwá wánŋmatɩ́ Yeésu anɖébi Ísá-dɛ́ɛ wenbí bɩrɩ́ŋa wɔɔjɔɔná bɩ adɛ laadɔ́ɔ-rɔ, na wentí tɩrɩ́ŋa waawɩ́lɩ nɛ́; tɩ́nŋmatɩ́ ɖʊɖɔ wenbí Yeésu ɩmʊ́ ɩdɛ́ɛ koduuziya wɔɔjɔɔná bɩ kɛdɛ́ɛ kabaazɩya-daá, na wentí tɩrɩ́ŋa koduuziya kɛḿ kaawɩ́lɩ nɛ́, bɩtasɩná nŋɩ́nɩ́ kɛdɛ́ɛ ɩráa woovuná yɩ na toovonúm nɛ́ bɩdɛ́ɛ tɔ́m gɛ.

Wenbíwá bʊwɛ Keɖiyá kɩ́falɔɔ́ (Njííla)-dɛ́ɛ tákaraɖá-daá nɛ́ nɖɔ́

Tákaraɖáwá ndɩ‑ndɩ baaŋmáa tɩ tɩwɛ Keɖiyá kɩ́falɔɔ́-dɛ́ɛ Tákaraɖá-daá nɛ́, kɛ́ɛ tɩrɔ ákoowú na lʊbɛ (27) gɛ, bɩka batára tɩ bɔwá‑bɔwá náádoozo: bɛɛ Laabáárʊ kífeńgi-dɛ́ɛ tákaraɖáwá-dɛ́ɛ bɔwʊ́ɖɛ, Krísto ńba kaɖaa ńba-dɛ́ɛ tɔ́m-dɛ́ɛ tákaraɖáwá-dɛ́ɛ bɔwʊ́ɖɛ, na tákaraɖáwá tɩgɛ́ɛ wasɩ́ɩ́kawá nɛ́-dɛ́ɛ bɔwʊ́ɖɛ.

Laabáárʊ kífeńgi-dɛ́ɛ tákaraɖáwá-dɛ́ɛ bɔwʊ́ɖɛ

Njííla kutoluú gɛ sɩsɩ Laabáárʊ kífeńgi. Ɩsɔ́ɔ-dɛ́ɛ tɔ́m Yeésu wɔɔgɔ́nɩ ifééri tɩ ɩráa nɛ́ gɛ ɩdɩtɩŋa waayáa sɩsɩ Ɩsɔ́ɔ-dɛ́ɛ kowúrɔ́ɔ-dɛ́ɛ Laabáárʊ kífeńgi. Bɩlɛ́ bʊwɔ́rɔ́ nɛ́, ɩdɛ́ɛ wanbaaráa waaŋmáa tɔ́m tɩḿ tákaraɖáwá-daá, baŋmáa Yeésu ɩmʊ́ ɩdɛ́ɛ weezuú wɔɔjɔɔná kɩ nɛ́-dɛ́ɛ tɔ́m, na wentíwá waawɩ́lɩ ɩráa nɛ́ bɩdɛ́ɛ tɔ́m. Tákaraɖáwá tɩḿ gɛ booyóózi bayáa sɩsɩ Yeésu Mesíya-dɛ́ɛ Laabáárʊ kífeńgi-dɛ́ɛ tákaraɖáwá. Tákaraɖáwá tɩḿ tɩgɛ́ɛ natɩ́náázá gɛ. Yeésu-dɛ́ɛ wanbaaráa wenbá boovu yɩ, bɩka ɩkpɛ́lɛ́ŋ wɛ nɛ́, na wenbá bána wanbaaráa bɛḿ baalá tɩmɛ́rɛ nɛ́, baaŋmaaná tɩ. Wanbaaráa bɛḿ gɛ Maatéwu, na Maárɩkɩ, na Lúka, na Yʊháánɩ.

Krísto ńba kaɖaa ńba-dɛ́ɛ tɔ́m-dɛ́ɛ bɔwʊ́ɖɛ

Krísto ńba kaɖaa ńba-dɛ́ɛ tɔ́m-dɛ́ɛ bɔwʊ́ɖɛ gɛ bánÿaá sɩsɩ: «Yeésu Krísto-dɛ́ɛ tɩndɩnáa-dɛ́ɛ tɩmɛ́-dɛ́ɛ tákaraɖá». Kɩlɛ́ kɩ́nŋmatɩ́ tɩmɛ́ weená wanbaaráa wenbá Yeésu waalɩzɩ́ wɛ ɩfa wɛ yɩ́ɖɛ sɩsɩ Tɩndɩnáa nɛ́, waalá yɛ Yeésu-dɛ́ɛ ɩsɩɖáa-daá fém wɔ́rɔ́ nɛ́-dɛ́ɛ tɔ́m gɛ, na Yeésu ɩmʊ́ ɩdɛ́ɛ koduuziya-dɛ́ɛ baazɩ́ na wenbí kaalá nɛ́ bɩdɛ́ɛ tɔ́m.

Tákaraɖáwá tɩgɛ́ɛ wasɩ́ɩ́kawá nɛ́-dɛ́ɛ bɔwʊ́ɖɛ

Tákaraɖáwá ákoowú na natɩ́lɛ (22) bɩɩga tɩ nɛ́, kɛ́ɛ wasɩ́ɩ́kawá baaŋmáa tɩ wenbá baava Yeésu toovonúm nɛ́ gɛ. Wenbá baaŋmáa wasɩ́ɩ́kawá tɩḿ nɛ́ wánŋmatɩnáa Krísto ńba toovonúm ɩrʊ́ wánváa Yeésu nɛ́ bɩdɛ́ɛ tɔ́m gɛ; bánwɩlɩ́ɩ wɛ nŋɩ́nɩ́ bɩmɔɔ́na bɔcɔɔná Krísto-dɛ́ɛ nɩ́bááwʊ-daá nɛ́, bɩka bándasɩ́ Krísto ńba tɔ́m, bángbaazɩ́ wɛ ɖóni bɛdɛ́ɛ bovóo Yeésu nɛ́ bɩdɛ́ɛ nɩ́bááwʊ-daá.