Wɩlʋʋ 7

*Izrɛɛlɩ ñɩma kutokiŋ mɩnʋʋ nɛ nɩɩnaza nɛ naanza tɔm

¹ Pʋwayɩ lɛ, mana Ɛsɔ tiyiyaa naanza, pasɩŋ kedeŋa hɔɔlɩŋ naanza kʋlɔmɩŋ taa. Paakpa kedeŋa yɔɔ heɣlim naanza mbʋ pʋwɛɛ yɔ se pɩtaama tataa yaa teŋgu yɔɔ yaa tɩʋ nakʋyʋ yɔɔ. ² Mana ɖɔɖɔ Ɛsɔ tiyiyu lɛlʋ, ɛlɩnɩ wɩsɩ ɖɩlɩyɛ nɛ ɛkpaɣ. Ɛɖɔkɩ Ɛsɔ wezuu tʋ nesi ñɩɣʋ. Peeye eholuuni Ɛsɔ tiyiyaa naanza mba paha-wɛ ɖoŋ se pɛwɛɛkɩ mbʋ pʋwɛ tataa nɛ teŋgu taa yɔ se: ³ “Ɩtaawɛɛkɩ tataa yaa teŋgu taa yaa tɩŋ yɔɔ nabʋyʋ nɛ pʋkɔɔ pɩsɩnɩ alɩwaatʋ ndʋ ɖɩñɩɣ nesi ɖɛ-Ɛsɔ tʋmlaɖaa kila taa yɔ.” ⁴ Peeye manɩ mba pañɩɣ pe-kila taa nesi yɔ pa-ñʋʋ. Pɛkpɛndɩ kutokiŋ mɩnʋʋ nɛ nɩɩnaza nɛ naanza. Pɛwɛ Izrɛɛlɩ cejewee tɩŋa taa: ⁵ Yuda liɖe taa lɛ, ɛyaa kutokiŋ hiu nɛ naalɛ kila taa pañɩɣ nesi. Rubɛɛnɩ ñɩnɖɛ taa kutokiŋ hiu nɛ naalɛ, Gaadɩ ñɩnɖɛ taa kutokiŋ hiu nɛ naalɛ. ⁶ Asɛɛrɩ ñɩnɖɛ taa kutokiŋ hiu nɛ naalɛ, Nɛftalii ñɩnɖɛ taa kutokiŋ hiu nɛ naalɛ, Manaasee ñɩnɖɛ taa kutokiŋ hiu nɛ naalɛ. ⁷ Siimeyɔɔ ñɩnɖɛ taa kutokiŋ hiu nɛ naalɛ, *Leevi ñɩnɖɛ taa kutokiŋ hiu nɛ naalɛ, Isakaarɩ ñɩnɖɛ taa kutokiŋ hiu nɛ naalɛ. ⁸ Zabulɔɔ ñɩnɖɛ taa kutokiŋ hiu nɛ naalɛ, *Yozɛɛfʋ ñɩnɖɛ taa kutokiŋ hiu nɛ naalɛ, Bɛnjamɛɛ ñɩnɖɛ taa ɖɔɖɔ kutokiŋ hiu nɛ naalɛ.

Samaɣ sɔsɔɔ tɔm

⁹ Pʋwayɩ mantasɩ cɔnaʋ lɛ, manaɣ ɛyaa samaɣ nakɛyɛ, kɔɖɔwa pɩtɩɩfɛyɩ, kɛfɛyɩ kalʋʋ: ajɛɛ kpeekpe nɛ cejewee tɩŋa taa ɛyaa nɛ samaɣ tɩŋa nɛ kʋnʋmɩŋ tɩŋa. Pasɩŋ kewiyaɣ kpelaɣ nɛ Heɣa pɛ-ɛsɩndaa. Posu tokonaa kʋhʋlʋmaa waa waa nɛ pɔɖɔkɩ paatʋ pe-nesi taa ¹⁰ nɛ poholuu ɖoŋ se: “Ɖɛ-Ɛsɔ weyi ɛcaɣ kewiyaɣ kpelaɣ yɔɔ yɔ nɛ Heɣa pɔ-cɔlɔ ñʋʋ yabʋ lɩɣna!” ¹¹ Ɛsɔ tiyiyaa tɩŋa kɔcɔ kewiyaɣ kpelaɣ nɛ *sɔsaa nɛ kpɩna ana a-naanza kondiko. Peeye poluŋ Ɛsɔ tɛɛ kɛ-ɛsɩndaa nɛ paka pɛ-ɛza nɛ tɛtʋ nɛ pasaŋ-ɩ ¹² se: “Pɩla mbʋ! Ɖɛ-Ɛsɔ ɛtɩɣyɩ samtʋ nɛ koboyaɣ nɛ lɔŋsɩnɖɛ nɛ ɛsɩmɩyɛ nɛ hɩɖɛ ɖʋʋ nɛ ɖoŋ nɛ abalɩtʋ pɩnzɩ ɛgbaŋ ɛgbaŋ! Pɩla mbʋ!”

¹³ Peeye *sɔsaa taa lɛlʋ pɔzɩ-m se: “Mba lɛ mba posu tokonaa kʋhʋlʋmaa waa waa yɔ. Palɩnɩ le?” ¹⁴ Ɛlɛ moncosi-i se: “Ɖajaa! Ñasɩmna.” Peeye eheyi-m se: “Mba tɔɔnɩ kʋñɔŋ sɔsɔʋ. Pɔcɔtɩ po-tokonaa kitibaa waa waa nɛ pahʋlɩsɩ-wɛ Heɣa calɩm taa. ¹⁵ Pʋ-yɔɔ pasɩŋ Ɛsɔ kewiyaɣ kpelaɣ ɛsɩndaa nɛ palakɩ-ɩ tʋmɩyɛ wɩsɩ nɛ ɖoo ɛ-ɖɩɣa taa. Weyi ɛcaɣ kɔ-yɔɔ yɔ, ɛkɔŋ pɔ-yɔɔ kenduu. ¹⁶ Ñɔɔsɩ ɛɛtasɩɣ-wɛ wɩʋ nɛ lɔkɔtʋ ɛɛtasɩɣ-wɛ ɖɔkʋʋ kaʋ. Wɩsɩ ɛɛtasɩɣ-wɛ ñaɣʋ yaa soŋaɣ nakɛyɛ ɛɛtasɩɣ-wɛ kpaʋ kaʋ. ¹⁷ Mbʋ pʋyɔɔ yɔ, Heɣa ŋga kɛwɛ kewiyaɣ kpelaɣ hɛkʋ taa yɔ, keɖiyiɣ-wɛ nɛ kowoni-wɛ wezuu lɩm hiɖe cɔlɔ nɛ Ɛsɔ hɛzɩ pɛ-ɛzɩtɛɣlɩm tɩŋa.”