Wɩlʋʋ 6

Pɛkpɛzʋʋ nesi ñɩɣʋ loɖo yɔ

¹ Mantasɩ cɔnaʋ lɛ, mana Heɣa kpɛzɩ nesi ñɩɣʋ mbʋ pʋ-lʋbɛ taa kajalaɣ ñɩmbʋ nɛ manɩɣ kpɩna ana a-naanza a-taa lɛɛɖɛ yɔɔdʋʋ ɛzɩ tɛʋ nazʋʋ yɔ se: “Kɔɔ!” ² Peeye mana kpaŋnɔ kʋhʋlʋm nɔɔyʋ. Weyi ɛcaɣ-ɩ yɔ, ɛɖɔkɩ tɔʋ nɛ mana pɛcɛlɩ-ɩ wabʋ hulaɣ nɛ ɛɖɛɛ ɛzɩ waɖʋ yɔ se ɛwɛɛ wabʋ yɔɔ.

³ Pʋwayɩ lɛ, kɛkpɛzɩ nesi ñɩɣʋ naalɛ ñɩmbʋ nɛ manɩɣ kpɩna ana a-taa naalɛ ñɩnɖɛ tɔŋ se: “Kɔɔ!” ⁴ Peeye kpaŋnɔ lɛlʋ lɩwa, ɛsɛ ɛzɩ miŋ yɔ. Weyi ɛcaɣ-ɩ yɔ, pɛcɛlɩ-ɩ sɩɣa sɔsɔɔ nakɛyɛ nɛ paha-ɩ ɖoŋ se ɛla nɛ ɛyaa ɛtaatasɩ wɛʋ laŋhɛzɩyɛ taa kedeŋa yɔɔ nɛ piyele pakʋ ɖama.

⁵ Pʋwayɩ lɛ, kɛkpɛzɩ nesi ñɩɣʋ tozo ñɩmbʋ nɛ manɩɣ tozo ñɩnɖɛ tɔŋ se: “Kɔɔ!” Mɔncɔnaa lɛ, mana kpaŋnɔ kɩkpɛdʋ nɔɔyʋ. Weyi ɛcaɣ-ɩ yɔ, ɛɖɔkɩ ñɩɣyʋʋ kɩmaɣzʋʋ e-nesi taa ⁶ nɛ manɩɣ pʋyɔɔdʋʋnɩ kpɩna ana a-naanza a-hɛkʋ taa se: “Payakɩ mɩla kiiloo kɩyakʋ kʋɖʋmʋʋ tʋmɩyɛ liidiye nɛ saamɩla kiiloonaa naadozo kɩyakʋ kʋɖʋmʋʋ tʋmɩyɛ liidiye ɖɔɖɔ. Piyele num nɛ sʋlʋm lɛ, taawɛɛkɩ-wɛ.”

⁷ Pʋwayɩ lɛ, kɛkpɛzɩ nesi ñɩɣʋ naanza ñɩmbʋ nɛ manɩɣ kpɩnɛ naanza ñɩnɖɛ ñɔtɔŋ se: “Kɔɔ!” ⁸ Mɔncɔnaa lɛ, mana kpaŋnɔ nɔɔyʋ, epiyaa ɛzɩ tɩŋ hatʋ yɔ. Weyi ɛcaɣ-ɩ yɔ, payaɣ-ɩ se Sɩm nɛ ɖenɖe sɩɖaa wɛɛ yɔ pɩtɩŋɩɣ ɛ-wayɩ. Patayɩ kedeŋa tɔm naanza yɔ, paha-wɛ ɖoŋ kʋɖʋmʋʋ yɔɔ se pakʋ kɩ-taa ɛyaa. Pakʋʋ-wɛ nɛ sɩɣa nɛ ñɔɔsɩ nɛ kʋdɔmɩŋ nɛ tɛtɛ kpɩna wena awɛ kedeŋa yɔɔ yɔ.

⁹ Pʋwayɩ lɛ, Heɣa ŋga kɛkpɛzɩ nesi ñɩɣʋ kagbaanzɩ ñɩmbʋ nɛ manaɣ lone nɖɩ palaɣ ɖɩ-taa yɔ, ɖɩ-tɛɛ mba paakʋ-wɛ yɔ pa-ciyamnaa. Ɛsɔtɔm nɛ aseɣɖe nɖɩ palɩzaa yɔ, pɔ-yɔɔ paakʋ-wɛ. ¹⁰ Pa-ciyamnaa makaɣ kubusi ɖoŋ se: “Hayɩ Caa cɩɖɩcɩɖɩ tʋ nɛ toovenim tʋ! Ɖooye ŋcaɣ se ŋkʋyɩ kedeŋa yɔɔ ñɩma mba pakʋ-ɖʋ yɔ pɔ-yɔɔ nɛ ŋhʋnɩ-wɛ nɛ ŋhɔ pa-nɩŋgbaaŋ?” ¹¹ Peeye pɛcɛlɩ paa pa-taa weyi toko kʋhʋlʋmʋʋ kitibuu waaa. Ɛlɛ, peheyi-wɛ se pɛwɛɛ pe-ɖeɖe nɛ pʋkɔɔ pɩsɩnɩ alɩwaatʋ ndʋ pɛtɛzɩ kʋʋ pa-taabalaa nɛ mba pa nɛ wɛ palakɩ tʋmɩyɛ, nɛ pɩɩwɛɛ se pakʋ-wɛ ɛzɩ mba yɔ.

¹² Mantasɩ cɔnaʋ lɛ, mana kɛkpɛzɩ nesi ñɩɣʋ loɖo ñɩmbʋ, peeye tɛtʋ ñamsɩ siŋŋ nɛ wɩsɩ piyi ɛzɩ kʋñɔŋ wondu yɔ nɛ fenaɣ sɛɛ katɩŋa payɩ ɛzɩ calɩm yɔ. ¹³ Tɩɩnzɩ kpɛzaɣnɩ ɛsɔdaa nɛ sɩtɔlʋʋ tataa ɛzɩ heɣlim sɔsɔm ñamsʋʋ hiyuu ɖoŋ nɛ ki-hiwee kazɩŋ tɔʋ yɔ. ¹⁴ Ɛsɔtɔnʋʋ pazɩ mʋʋʋ ɛzɩ pekpiyuu ñalʋʋ yɔ nɛ pʋŋ tɩŋa nɛ tɛtʋ ndʋ ndʋ lɩm cɔ-tʋ kondiko yɔ, pɛkpɛzɩɣ po-lona taa. ¹⁵ Piyele kedeŋa yɔɔ awiya sɔsɔna nɛ ñʋŋ tɩnaa nɛ sɔɔjanaa ñʋŋ tɩnaa nɛ ñɩm tɩnaa nɛ ɖoŋ tɩnaa nɛ yomaa nɛ mba pɛwɛ pa-tɩ yɔɔ yɔ, patɩŋa payɩ pɛmɛlɩɣ pɔŋ nɛ pʋŋ ɛwasɩ pa-taa. ¹⁶ Peheyaɣ pʋŋ nɛ ɛwasɩ se: “Ɩkpɛzɩ ɩɖa ɖɔ-yɔɔ nɛ ihuuzi ɖɔ-yɔɔ nɛ weyi ɛcaɣ kewiyaɣ kpelaɣ yɔɔ yɔ, ɛtaana-ɖʋ. Ɖɔɖɔ lɛ, Heɣa pana ɛtaakpanɩ-ɖʋ. ¹⁷ Mbʋ pʋyɔɔ yɔ, kɩyakʋ sɔsɔʋ ŋgʋ pa-pana kpaɣ yɔ, kɩtalaa. Apɩzɩɣ ɛlɩɩ pɩ-taa?”