Wɩlʋʋ 3

Tɔm ndʋ peheyiɣ Saardɩ Krɩstʋ ɛgbɛyɛ taa ñɩma yɔ

¹ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Saardɩ Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma mɛwɛnɩ Ɛsɔ kalɩzasɩ nzɩ sɩ-lʋbɛ nɛ tɩɩnzɩ nzɩ sɩ-lʋbɛ yɔ, mɔntɔŋna se: mansɩm mbʋ ñɛ-ɛgbɛyɛ taa ñɩma lakɩ yɔ: pa-hɩɖɛ sɛwa se pɛwɛ wezuu, ɛlɛ, pasɩba. ² Pefe nɛ peyele mbʋ pɩkazɩ-wɛ yɔ, pɩkpa ɖoŋ nɛ pɩtaatɛzɩ sɩbʋ: manawa se mbʋ palakɩ yɔ, mɛ-Ɛsɔ ɛsɩndaa lɛ, pɩtamʋna. ³ Pʋ-yɔɔ lɛ, pɔtɔzɩ tɔm ndʋ peheyi-wɛ yɔ nɛ ɛzɩma mbʋ petisi-tʋ yɔ pɔ-yɔɔ. Pɔɖɔkɩ-tʋ nɛ pɛlɛɣzɩ wɛtʋ. Ye patacaɣ pɛ-ɛza yɔɔ yɔ, mɔnkɔŋ ɛzɩ mɩlʋ yɔ nɛ montudi-wɛ, paasɩŋ alɩwaatʋ ndʋ tɩ-yɔɔ mɔnkɔŋ yɔ. ⁴ Pɩtɛ, nabɛyɛ wɛ mɩ-tɛ Saardɩ peeye nɛ petepisi po-wondu. Pɔkɔŋ suu wondu kʋhʋlʋmʋtʋ nɛ ma nɛ wɛ ɖɩɖɔ, mbʋ pʋyɔɔ yɔ, pamʋnɩ mbʋ.

⁵ ‘Weyi ɛwakɩ yɔ, ɛkɔŋ suu wondu kʋhʋlʋmʋtʋ mbʋ. Maahɩzɩɣ ɛ-hɩɖɛ wezuu takayaɣ taa. Mɔnkɔŋ kaɖʋʋ man-Caa nɛ e-*tiyiyaa pɛ-ɛsɩndaa se pʋdʋ kɛ ma-ñɩnʋ.

⁶ ‘Weyi ɛwɛnɩ nɩŋgbaaŋ lɛ, ɛnɩɩ tɔm ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!’ ”

Tɔm ndʋ peheyiɣ Filaadɛlfii Krɩstʋ ɛgbɛyɛ taa ñɩma yɔ

⁷ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Filaadɛlfii Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma mɛnkɛ Ɛsɔ ñɩnʋ nɛ toovenim tʋ nɛ mɔnɖɔkɩ wiyaʋ sɔsɔ Daaviidi nɔnɔɔ ñɩmɩyɛ nɛ ye mantʋlaa, nɔɔyʋ ɛɛpɩzɩɣ ɛɖɩɣ nɛ ye manɖɩɣaa, nɔɔyʋ ɛɛpɩzɩɣ ɛtʋlɩ yɔ, mɔntɔŋna se: ⁸ mansɩm mbʋ ñɛ-ɛgbɛyɛ taa ñɩma lakɩ yɔ. Na: mantʋlɩ nɔnɔɔ ŋga nɔɔyʋ ɛɛpɩzɩɣ ɛɖɩɣ yɔ ñɛ-ɛsɩndaa. Mbʋ pʋyɔɔ yɔ, pɛwɛnɩ ɖoŋ pazɩ, ɛlɛ, pɔɖɔkɩ mɔn-tɔm nɛ pɛtɛkpɛzɩ se patasɩm-m. ⁹ Na! Mɔnkɔŋ ɖʋzʋʋ *Kañadʋ Satanɩ ɛgbɛyɛ taa ñɩma nabɛyɛ pe-nesi taa. Pɔtɔŋ se pɛkɛ Yuda ñɩma, ɛlɛ, pɛtɛkɛ mbʋ, pɛkɛ cɛtɩyaa. Na! Mɔnkɔŋ yebu nɛ pɔkɔɔ poluŋ pɛ-tɛɛ nɛ pɔyɔɔdɩnɩ pɔ-nɔsɩ se mɔnsɔɔlɩ-wɛ. ¹⁰ Ɛzɩma mbʋ meheyi-wɛ se pɔɖɔkɩ pa-tɩ nɛ petisi pɔɖɔkɩ tɔm ndʋ yɔ, ma ɖɔɖɔ mɔnɖɔkʋʋ-wɛ. Mɔnɖɔkʋʋ-wɛ alɩwaatʋ ndʋ pʋkɔŋ takʋʋ kedeŋa kpeekpe yɔɔ ɛyaa se pɩna pa-wayɩ yɔ. ¹¹ Pɩkazɩ pazɩ, mɔnkɔŋ. Pɔɖɔkɩ mbʋ pɛwɛna yɔ kpam nɛ nɔɔyʋ ɛtaakɔɔ ɛlɛɣ pa-wabʋ hulaɣ.

¹² ‘Weyi ɛwakɩ yɔ, meyeki nɛ ɛkɛ mɛ-Ɛsɔ ɖɩɣa taa sisika, ɛɛtasɩɣ lɩʋ. Mamaɣ ɛ-yɔɔ mɛ-Ɛsɔ ɛnʋ ɛ-hɩɖɛ nɛ ɛ-tɛtʋ ñɩnɖɛ: ndʋʋ lɛ Yeruusalɛm kɩfalʋʋ ŋgʋ kɩlɩɣnɩ ɛsɔdaa mɛ-Ɛsɔ cɔlɔ nɛ kitiki yɔ. Mamaɣ ɛ-yɔɔ ɖɔɖɔ ma-hɩɖɛ kɩfaɖɛ.

¹³ ‘Weyi ɛwɛnɩ nɩŋgbaaŋ lɛ, ɛnɩɩ tɔm ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!’ ”

Tɔm ndʋ peheyiɣ Laodisee Krɩstʋ ɛgbɛyɛ taa ñɩma yɔ

¹⁴ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Laodisee Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma payaɣ se Pɩla Mbʋ nɛ mɛnkɛ aseɣɖe tʋ weyi ɛlakɩ mbʋ pʋpɔzʋʋ yɔ nɛ ɛtɛ ɛkɛ toovenim tʋ yɔ, weyi ma mɛnkɛ mbʋ pɩtɩŋa payɩ Ɛsɔ laba yɔ pi-kiɖe yɔ, mɔntɔŋnɩ se: ¹⁵ mansɩm mbʋ ñɛ-ɛgbɛyɛ taa ñɩma lakɩ yɔ: pɛfɛyɩ niŋkaɣ, pɛfɛyɩ ɖɔɖɔ miŋ. Ye paatɩɩwɛ niŋkaɣ yaa miŋ yɔ! ¹⁶ Ye mbʋ, ɖenɖe pɛwɛ hɛkʋ nɛ hɛkʋ, pɛfɛyɩ niŋkaɣ yaa pɛfɛyɩ miŋ yɔ, mɔntɔʋ-wɛ nɛ mɔ-nɔɔ. ¹⁷ Pɔtɔŋ se pɛkɛ ñɩm tɩnaa, pehiɣ ñɩm nɛ nabʋyʋ ɛɛtɛɖɩɣ-wɛ. Ŋgʋ, patatɩlɩ se pɛwɛ kɛtɛɖaɣ taa nɛ pɛwɛɛ pʋtɔdɩyɛ nɛ pɛkɛ kʋñɔndɩnaa nɛ payʋlʋmɩ nɛ pɛwɛɛ tombolo. ¹⁸ Pʋ-yɔɔ mantasɩɣ-wɛ tɔm se pɔkɔɔ mɔn-cɔlɔ nɛ paya sika ŋga pɔhɔbɩ-kɛ miŋ nɛ kañɩlɩzɩɣ camɩyɛ yɔ nɛ papɩsɩ ñɩm tɩnaa. Pɔkɔɔ paya wondu kʋhʋlʋmʋtʋ nɛ posuu nɛ pataawɛɛ tombolo nɛ pana pɛ-fɛyɛ. Pɔkɔɔ paya ɖɔɖɔ kɔyɛ nɛ pelizi pɛ-ɛza taa nɛ papɩzɩ pana. ¹⁹ Ma lɛ, mɔhɔŋ mba patɩŋa payɩ mɔnsɔɔlɩ-wɛ yɔ pa-nɩŋgbaaŋ nɛ mansɩɣzɩ-wɛ lɔŋ. Pʋ-yɔɔ lɛ, pakpa pa-tɩ nɛ pɛlɛɣzɩ wɛtʋ. ²⁰ Pewelesi nɛ panɩɩ: mansɩŋ nɔnɔɔ taa nɛ mamakɩ pɔɔyʋʋ. Ye nɔɔyʋ ɛnɩ man-taŋ nɛ ɛtʋlɩ yɔ, mansʋʋ ɛ-tɛ nɛ ma nɛ ɩ ɖɩkpɛndɩ ɖɩtɔɔ.

²¹ ‘Weyi ɛwakɩ yɔ, meyeki nɛ ma nɛ ɩ ɖɩcaɣ men-kewiyaɣ kpelaɣ yɔɔ ɛzɩ ma mawabʋ nɛ ma nɛ man-Caa ɖɩcaɣ ɛ-ñɩŋga yɔɔ yɔ.

²² ‘Weyi ɛwɛnɩ nɩŋgbaaŋ lɛ, ɛnɩɩ tɔm ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!’ ”