Wɩlʋʋ 4

Poluŋuu Ɛsɔ tɛɛ ɛsɔdaa yɔ

¹ Pʋwayɩ lɛ, mɔncɔna nɛ manaɣ nɔnɔɔ nakɛyɛ ɛsɔdaa, katʋlaa nɛ manɩɣ pʋyɔɔdʋʋnɩ-m ɛzɩ pɩcalʋʋ-m yɔɔdɩnaʋ ɛzɩ pahʋlʋʋ ɛgandɩyɛ yɔ se: “Kpa cɩnɛ nɛ mawɩlɩ-ŋ mbʋ pʋkɔŋ labʋ pʋnɛ pʋ-wayɩ yɔ.” ² Kpaagbaa mbʋ lɛ, Ɛsɔ Kalɩzaɣ tii mɔ-yɔɔ nɛ manaɣ kewiyaɣ kpelaɣ nakɛyɛ ɛsɔdaa peeye. Nɔɔyʋ caɣ kɔ-yɔɔ. ³ Pʋdʋ ñɩlɩzaɣ pelu pelu ɛzɩ ñɩɣlɩm pɩyɛ nɖɩ ɖɩwɛ maɖʋ maɖʋ nɛ ɖɩwɛɛ kpʋzʋyɛɛ yɔ. Tɩŋgaɣyʋʋ nakʋyʋ kɔcɔ kewiyaɣ kpelaɣ ŋga kondiko. Kɩñɩlɩzɩɣ ɛzɩ ñɩɣlɩm pɩyɛ nɖɩ ɖɩwɛ yuulee ɛzɩ tɩŋ hatʋ yɔ. ⁴ Kewiyaɣ kpelisi nɩɩlɛ nɛ naanza kɔcɔ kewiyaɣ kpelaɣ ŋga kondiko nɛ *sɔsaa nɩɩlɛ nɛ naanza nabɛyɛ caɣ sɩ-yɔɔ. Posu wondu kʋhʋlʋmʋtʋ nɛ paba sika hulisi. ⁵ Tɛʋ ñɩlɩzʋʋ nɛ kɔkɔɖɛ nɛ tɛʋ nazʋʋ palɩɣaɣnɩ kewiyaɣ kpelaɣ ŋga kɛwɛ hɛkʋ taa yɔ kɔ-yɔɔ. Pɔsɔbɩ kanɖʋnaa lʋbɛ mba panaɣ camɩyɛ yɔ kɛ-ɛsɩndaa: mba lɛ Ɛsɔ kalɩzasɩ lʋbɛ. ⁶ Nabʋyʋ kɛwɛ kewiyaɣ kpelaɣ ŋga kɛ-ɛsɩndaa ɖɔɖɔ. Pʋwɛ ɛzɩ teŋgu yɔ nɛ pɩñɩlɩzɩɣ ɛzɩ ñɩñʋʋ yɔ. Pɩnɩɣzɩnɩ pɩyɛ kʋhʋlʋmɩyɛ nɖɩ ɖɩñɩlɩzɩɣ pelu pelu yɔ.

Kewiyaɣ kpelaɣ ŋga, kɛ-hɛkʋ taa nɛ kɔ-cɔlɔ kpɛɛɛ lɛ, kpɩna naanza naayɛ kɛwɛɛ, awɛnɩ ɛza tɔtɔ, taa nɛ wayɩ. ⁷ Kajalaɣ ñɩnɖɛ wɛ ɛzɩ tɔɔyʋʋ yɔ, naalɛ ñɩnɖɛ ñɛwɛɛ ɛzɩ neɣye yɔ, tozo ñɩnɖɛ ɛsɩndaa ñɛwɛɛ ɛzɩ ɛyʋ yɔ nɛ naza ñɩnɖɛ ñɛwɛɛ ɛzɩ keziye nɖɩ ɖɩɖɔŋ kʋyʋʋ yɔ. ⁸ Kpɩna ana, a-naanza aawɛnɩ keŋ loɖo loɖo. Aawɛnɩ ɛza yʋʋʋ a-taa nɛ a-yɔɔ nɛ awɛɛ ateɣ hendu wɩsɩ nɛ ɖoo se:

“Cɩɖɩcɩɖɩ, cɩɖɩcɩɖɩ

Ɛsɔ wɛnɩ cɩɖɩcɩɖɩ.

Kɩpaɣlʋ Ɛsɔ Ɖoŋ Tɩŋa Tʋ

weyi ɛɛwɛɛ yɔ,

ɛnʋ wɛna,

ɛkaɣ kɔm nee.”

⁹ A-naanza asaŋ weyi ɛcaɣ kewiyaɣ kpelaɣ yɔɔ nɛ ɛwɛɛ wezuu pɩnzɩ ɛgbaŋ ɛgbaŋ yɔ nɛ aɖʋʋ-ɩ hɩɖɛ nɛ asɛɣ-ɩ. Alɩwaatʋ ndʋ alakɩ mbʋ yɔ, ¹⁰ *sɔsaa mba pa-nɩɩlɛ nɛ naanza paba ñoluŋuu weyi ɛwɛ wezuu pɩnzɩ ɛgbaŋ ɛgbaŋ yɔ ɛ-ɛsɩndaa. Ɛcaɣ kewiyaɣ kpelaɣ yɔɔ nɛ pasaŋ-ɩ nɛ pɔlɔʋ po-hulisi kewiyaɣ kpelaɣ ɛsɩndaa nɛ pɔtɔŋ se:

¹¹ “Hayɩ Kɩpaɣlʋ yee, ɖɛ-Ɛsɔ,

ŋmʋnaa se ña-hɩɖɛ ɛsɛɛ,

paɖʋ-ŋ pɩ-taa yee

pɛcɛlɩ-ŋ ɖoŋ nee.

Ñalabɩnɩ pɩtɩŋa payɩ

ñe-liu wɛna nɛ pala pɩtɩŋa nɛ pʋwɛɛ.”