Wɩlʋʋ 2

Tɔm ndʋ peheyiɣ Efɛɛzɩ Krɩstʋ ɛgbɛyɛ taa ñɩma yɔ

¹ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Efɛɛzɩ Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma mɔnɖɔkɩ tɩɩnzɩ nzɩ sɩ-lʋbɛ me-nesi kɩbanzɩ taa nɛ mɔnɖɔŋ sika kanɖʋnaa mba pa-lʋbɛ pɛ-hɛkʋ taa yɔ, mɔntɔŋna se: ² mansɩm mbʋ ñɛ-ɛgbɛyɛ taa ñɩma lakɩ yɔ nɛ pa-pana ñaɣʋ nɛ ɛzɩma mbʋ pɔɖɔkʋʋ pa-tɩ yɔ. Manawa se paacaɣ se pa nɛ kañadɩnaa pɛkpɛndɩ. Pamaɣzɩ mba pɔtɔŋ se pɛkɛ Yesu tiyiyaa yɔ nɛ pana se pɛkɛ cɛtɩyaa. ³ Pɔɖɔkɩ pa-tɩ nɛ pala kʋñɔŋ mɔ-yɔɔ nɛ pɩtɛɖɛɛ-wɛ. ⁴ Ɛlɛ, ndʋ man-taa wɛnɩ-wɛ yɔ lɛ se: patatasɩ-m sɔɔlʋʋ ɛzɩ ɖooo paasɔɔlʋʋ-m yɔ. ⁵ Pʋ-yɔɔ lɛ, pɔtɔzɩ ɖenɖe pucoɖi-wɛ yɔ, pɛlɛɣzɩ wɛtʋ nɛ pala mbʋ palakaɣ kajalaɣ taa yɔ. Pɩtɛkɛ mbʋ, mɔnkɔŋ pɔ-cɔlɔ nɛ mɛlɛɣ pa-kanɖʋ. ⁶ Piyele mbʋ palaba nɛ pʋwɛ ɖeu yɔ lɛ se: paacaɣ mbʋ Niikolaa ñɩma lakɩ yɔ kpem ɛzɩ ma ɖɔɖɔ yɔ.

⁷ ‘Weyi ɛwɛnɩ nɩŋgbaaŋ lɛ, ɛnɩɩ ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!

‘Weyi ɛwakɩ yɔ, mahaɣ-ɩ waɖɛ se ɛtɔɔ tɩʋ ŋgʋ kʋwɛ Ɛsɔ kaɖaɣ taa nɛ kɩhaɣ wezuu yɔ ki-pee.’ ”

Tɔm ndʋ peheyiɣ Smiirnɩ Krɩstʋ ɛgbɛyɛ taa ñɩma yɔ

⁸ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Smiirnɩ Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma mɛnkɛ Nʋmɔɖɛyʋ nɛ Ɛɖɩɣyɛ nɛ maasɩba nɛ menfe yɔ, mɔntɔŋna se: ⁹ mana ñɛ-ɛgbɛyɛ taa ñɩma siziŋ nɩʋ nɛ pa-kʋñɔndʋtʋ. Ŋgʋ, pɛkɛ ñɩm tɩnaa! Manɩ tɔm ɛzaɣtʋ ndʋ mba pɛcɛtɩɣ se pɛkɛ Yuda ñɩma yɔ, pɔyɔɔdɩ-wɛ yɔ: pɛkɛ *Kañadʋ Satanɩ ɛgbɛyɛ taa ñɩma! ¹⁰ Sɔɔndʋ ɛtaakpa-wɛ nɛ kʋñɔŋ ŋgʋ pɔkɔŋ tɔɔʋ yɔ. Nɩɩ se eleeu kɔŋ ñɛ-ɛgbɛyɛ taa ñɩma nabɛyɛ ɖʋʋ salaka se ɛtakɩ-mɩ nɛ ɛna. Ɩkɔŋ nɩʋ siziŋ kɩyakɩŋ hiu. Ɩla mbʋ pʋpɔzʋʋ yɔ nɛ pʋkɔɔ pɩsɩnɩ mɩ-sɩm wiye nɛ maha-mɩ wezuu hulaɣ.

¹¹ ‘Weyi ɛwɛnɩ nɩŋgbaaŋ lɛ, ɛnɩɩ ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!

‘Weyi ɛwakɩ yɔ, sɩm naalɛ ñɩmbʋ ɛɛnaɣ ɛ-yɔɔ kaʋ.’ ”

Tɔm ndʋ peheyiɣ Pɛɛrgam Krɩstʋ ɛgbɛyɛ taa ñɩma yɔ

¹² Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Pɛɛrgam Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Weyi ma mɛwɛnɩ sɩɣa ŋga kɔ-nɔɔ taa cʋlʋtaa nɛ kapɩɣ cenje yɔ, mɔntɔŋna se: ¹³ Mansɩm ɖenɖe ñɛ-ɛgbɛyɛ taa ñɩma wɛɛ yɔ: peeye Satanɩ kewiyaɣ kpelaɣ wɛɛ. Pɔɖɔkɩ ma-hɩɖɛ kpam nɛ pɔtɔlɔ lidaʋ ŋgʋ pɛwɛnɩ mɔ-yɔɔ yɔ, halɩ pɩkpɛndɩnɩ kɩyakɩŋ weyi ɩ-taa pakʋ ma-aseɣɖe tʋ Antiipaa yɔ. Ɛlakaɣ mbʋ ɛɖʋwa yɔ. Ɖenɖe *Kañadʋ Satanɩ wɛɛ yɔ, peeye pɩtɩŋa payɩ pɩɩlaba mbʋ. ¹⁴ Ɛlɛ, man-taa wɛnɩ-wɛ natʋyʋ: pɛ-tɛ ɛyaa nabɛyɛ tisiɣ tɔm ndʋ *Balaam wɩlaɣ yɔ. Balaam wɩlaɣ Balaakɩ ɛzɩma mbʋ ɛɛla nɛ *Izrɛɛlɩ ñɩma tɔɔ kɩlaʋ nandʋ nɛ pala hayitu nɛ piyele pɔtɔlɩ Ɛsɔ nʋmɔʋ taa yɔ. ¹⁵ Ɖɔɖɔ lɛ, nabɛyɛ wɛɛ nɛ petisiɣ tɔm ndʋ Niikolaa ñɩma wɩlɩɣ yɔ ɖɔɖɔ mbʋ. ¹⁶ Pʋ-yɔɔ lɛ, pɛlɛɣzɩ wɛtʋ. Pɩtɛkɛ mbʋ, mɔnkɔŋ pɛ-tɛ kɩyakɩŋ ɩnɛ ɩ-taa nɛ moyoni-wɛ nɛ sɩɣa ŋga kalɩɣnɩ mɔ-nɔɔ taa yɔ.

¹⁷ ‘Weyi ɛwɛnɩ nɩŋgbaaŋ lɛ, ɛnɩɩ tɔm ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!

‘Weyi ɛwakɩ yɔ, mahaɣ-ɩ tɔɔnaɣ ŋga kalɩɣnɩ ɛsɔdaa nɛ payaɣ-kɛ se maanɩ yɔ. Mahaɣ-ɩ ɖɔɖɔ pɩyɛ kʋhʋlʋmɩyɛ. Pama ɖɩ-yɔɔ hɩɖɛ kɩfaɖɛ, nɔɔyʋ tasɩm-ɖɩ nɛ pɩtasɩnɩ weyi pɛcɛlɩɣ-ɩ-ɖɩ yɔ.’ ”

Tɔm ndʋ peheyiɣ Tiyaatiiri Krɩstʋ ɛgbɛyɛ taa ñɩma yɔ

¹⁸ Ɛyʋ ɛnʋ ɛtasɩ-m heyuu se: “Ma Ɛsɔ *tiyiyu weyi ɛcɔŋnɩ Tiyaatiiri Krɩstʋ ɛgbɛyɛ taa ñɩma yɔɔ yɔ takayaɣ nɛ ŋheyi-i se:

‘Ma Ɛsɔ Pɩyalʋ, weyi ma mɛ-ɛza ɖeɣ miŋ pelu pelu ɛzɩ miŋ nzʋlʋmɩyɛ nɛ ma-naŋgbanzɩ wɛɛ ɛzɩ ñɩɣyʋʋ kasɩnzɩŋa ñɩŋgʋ yɔ, mɔntɔŋna se: ¹⁹ mansɩm mbʋ ñɛ-ɛgbɛyɛ taa ñɩma lakɩ yɔ, nɛ ɛzɩma mbʋ pɛwɛnɩ sɔɔlɩm yɔ, nɛ ɛzɩma mbʋ pɛwɛnɩ lidaʋ yɔ, nɛ ɛzɩma mbʋ pɔɖɔkʋʋ pa-tɩ yɔ. Mansɩm ɖɔɖɔ se mbʋ ɩlakɩ lɛɛlɛɛyɔ yɔ, pɩkɩlɩ ɖooo mbʋ ɩlakaɣ yɔ ɖɔʋ. ²⁰ Ɛlɛ, ndʋ man-taa wɛnɩ-mɩ yɔ lɛ se: iyeki halʋ weyi payaɣ se Yezaabɛɛlɩ nɛ ɛtɔŋ se ɛkɛ *lɔɔyaɣ tʋ yɔ. Ŋgʋ, ɛwɩlɩɣ nɛ eyiliɣ man-tʋmlaɖaa se pala hayitu nɛ pɔtɔɔ kɩlaʋ nandʋ. ²¹ Maha-ɩ alɩwaatʋ se ɛlɛɣzɩ wɛtʋ, ɛlɛ, ɛɛcaɣ se eyele ɛ-hayitu lakasɩ. ²² Na! Manɖʋʋ-ɩ kʋdɔŋ nɛ ɛnɩɩ siziŋ siŋŋ nɛ pɩkpɛndɩnɩ mba pa nɛ ɩ palakɩ acɛyɛ yɔ. Ye peyebi pa-lakasɩ nzɩ yɔ, kalɩpiɖeke. ²³ Mɔnkɔŋ kʋʋ halʋ ɛnʋ e-piya nɛ piyele ma-agbaa tɩŋa taa ñɩma tɩlɩ se ma lɛ weyi ɛtazɩɣ ɛyaa lɩmaɣza nɛ mbʋ pʋwɛ pa-taa yɔ pa-taa. Mɔnkɔŋ hɛyʋʋ paa mɩ-taa weyi mbʋ ɛlaba yɔ pʋ-yɔɔ.

²⁴ ‘Ɛlɛ, meheyiɣ Tiyaatiiri ñɩma mba mɩ ɩɩɖɔŋ tɔm ndʋ tɩ-yɔɔ ɛzɩ lɛlaa yɔ nɛ ɩtatazɩ *Kañadʋ Satanɩ ñɩndʋ ndʋ lɛlaa mba pɔtɔŋ se tɩ-taa wɛ cukaŋ yɔ tɩ-taa yɔ se maatasɩɣ-mɩ sɔzʋʋ sʋʋtʋ natʋyʋ. ²⁵ Ɛlɛ, ɩɖɔkɩ mbʋ ɩwɛna yɔ kpam nɛ pʋkɔɔ pɩsɩnɩ kɩyakʋ ŋgʋ mɔnkɔŋ yɔ.

^26-27 ‘Weyi ɛwakɩ nɛ ɛɖɔkɩ ɛ-tɩ man-tʋma taa kpam nɛ pʋkɔɔ pɩtalɩ tɩnaɣ yɔɔ yɔ, mahaɣ-ɩ ɖoŋ se ɛcɔnɩ ajɛɛ taa ñɩma yɔɔ ɛzɩ man-Caa haʋ-m ɖɔɖɔ yɔ. Eɖiyiɣ-wɛ nɛ ñɩɣyʋʋ ɖaʋ nɛ ɛmɩzɩ-wɛ ɛzɩ pɔyɔkʋʋ cʋʋ pɛŋ yɔ. ²⁸ Mɔnkɔŋ-ɩ haʋ ɖɔɖɔ tɩmbalʋʋ.

²⁹ ‘Weyi ɛwɛnɩ nɩŋgbaaŋ lɛ, ɛnɩɩ tɔm ndʋ Ɛsɔ Kalɩzaɣ heyiɣ Krɩstʋ agbaa taa ñɩma yɔ!’ ”