Ɛsɔ sɛʋ tɔm
2
1 Lɛɛlɛɛyɔ, mbʋ mancalɩɣ ɛyaa heyuu yɔ lɛ se: pɛsɛɛ Ɛsɔ nɛ petendi-i nɛ pasam-ɩ ɛyaa kpeekpe yɔɔ. 2 Ɩla mbʋ ɖɔɖɔ awiya nɛ ñʋŋ tɩnaa patɩŋa payɩ pɔ-yɔɔ nɛ ɖɩpɩzɩ ɖɩcaɣ wezuu laŋhɛzɩyɛ taa fɛɛɛ nɛ ɖɩña Ɛsɔ camɩyɛ nɛ ɖɩla mbʋ pʋmʋnaa yɔ. 3 Mbʋ wɛnɩ ɖeu nɛ pɩkɛdɩnɩ ɖa-ñʋʋ yaɖʋ Ɛsɔ 4 Mbʋ pʋyɔɔ yɔ, e-liu wɛɛ se pɩya ɛyaa tɩŋa payɩ ñʋʋ nɛ patɩlɩ toovenim. 5 Mbʋ pʋyɔɔ yɔ, Ɛsɔ kʋɖʋm koŋ wɛna nɛ ceyiyu kʋɖʋm koŋ ñɛwɛɛ Ɛsɔ ɛnʋ nɛ ɛyaa pɛ-hɛkʋ taa nɛ patɩŋɩɣnɩ ɛ-yɔɔ. Ɛnʋ lɛ Krɩstʋ Yesu. 6 Ɛkpaɣ ɛ-maɣmaɣ ɛ-tɩ nɛ ɛhɛyɩ ɛyaa yɔɔ se puholi patɩŋa payɩ: mbʋ lɩzɩnɩ aseɣɖe alɩwaatʋ ndʋ Ɛsɔ ɖʋwa yɔ se Ɛsɔ ɛnʋ e-liu wɛɛ se ɛya ɛyaa tɩŋa payɩ ñʋʋ. 7 Pʋ-yɔɔ palɩzɩ man-tɩ tɩŋa se mɛnkɛ Ɛsɔtɔm susiyu nɛ mɛntɛ mɛnkɛ Krɩstʋ *tiyiyu. Mɔyɔɔdʋʋ toovenim, maacɛtɩɣ. Paɖʋ-m se mawɩlɩ mba pɛtɛkɛ Yuda ñɩma yɔ toovenim nɛ lidaʋ pɔ-tɔm.
8 Pʋ-yɔɔ me-liu wɛɛ se abalaa ɛsɛɣ Ɛsɔ paa le lɛ, pakpazɩ pe-nesi ɛsɔdaa. Ɛlɛ kɩwɛɛkɩm nabʋyʋ ɛtaawɛɛ pɔ-yɔɔ. Nɔɔyʋ pana ɛtaakpanɩ lɛlʋ, you ɛtaawɛɛ ɖɔɖɔ.
9 Me-liu wɛɛ ɖɔɖɔ se halaa esuu wondu ɛzɩma mbʋ pʋmʋnaa yɔ, pataaɖɛlɛsɩ niye, pataakɩlɩ pa-tɩ canʋʋ. Pataakɩlɩ canʋʋ pɔ-ñɔsɩ, pataalɛɛ ñɩɣlɩm nɩŋgbacaɣlɩnaa yaa lɩtʋ ndʋ tɩwɛ liidiye yɔ, pataasuu wondu ndʋ tɩkɩlɩ liidiye yɔ. 10 Ɛlɛ, pala tʋma kɩbana ɛzɩ pʋmʋnaʋ se halaa mba pɔtɔŋ pa-tɩ se pañaŋ Ɛsɔ yɔ pala yɔ. 11 Pʋwɛɛ se halaa esu nɛ petisi pa-tɩ kpem alɩwaatʋ ndʋ pɛkpɛlɩkɩɣ-wɛ Ɛsɔtɔm yɔ. 12 Maahaɣ halʋ nʋmɔʋ se ɛwɩlɩ abalaa yaa ɛwɛnɩ ɖoŋ pɔ-yɔɔ. Pʋwɛɛ se esu. 13 Mbʋ pʋyɔɔ yɔ, *Aɖam Ɛsɔ calɩnɩ labʋ kedeŋa yɔɔ. Pʋwayɩ lɛ, ɛla Ɛɛvɩ. 14 Pɩtɛkɛ Aɖam pɛcɛtaa, ɛlɛ, halʋ pɛcɛtaa nɛ eyele ɖɔm mbʋ Ɛsɔ ɖʋwa yɔ pʋ-yɔɔ. 15 Paa mbʋ yɔ, halaa lʋlʋʋ piya nɛ Ɛsɔ ya pa-ñʋʋ. Ɛlɛ, pʋwɛɛ se pɛwɛnɩ lidaʋ ɛ-yɔɔ tam mbʋ nɛ pɔsɔɔlɩ ɛyaa nɛ pɛwɛɛ cɩɖɩcɩɖɩ Ɛsɔ ɛnʋ ɛ-ɛsɩndaa. Pataaɖɛlɛsɩ niye.