TAKAYAƔ NAALƐ ÑƖŊGA ŊGA PƆƆLƖ MA
TIMOOTEE
YƆ
Sɛtʋ
1
1-2 Timootee! Ma Pɔɔlɩ mamaɣnɩ-ŋ takayaɣ kanɛ. Ɛsɔ liu wɛnɩ se mɛnkɛ Krɩstʋ Yesu *tiyiyu nɛ meheyi ɛyaa wezuu ŋgʋ ɛɖʋwa se ɛhaɣ-ɖʋ ɖa nɛ Krɩstʋ Yesu ɛnʋ ɖɛ-kpɛndʋʋ taa yɔ kʋ-tɔm. Man-pɩɣa kʋsɔɔlaɣ! Mɛnsɛ-ŋ: Caa Ɛsɔ nɛ ɖa-Kɩpaɣlʋ Krɩstʋ Yesu palabɩ-ŋ lootiye nɛ pana ña-pʋtɔdɩyɛ nɛ pɛhɛzɩ ña-laŋɩyɛ.
Pɔɔlɩ sam Ɛsɔ nɛ eyele se pɩla Timootee hʋnʋm yɔ
3 Mansaŋ Ɛsɔ se malakɩ ɛ-tʋmɩyɛ nɛ laŋɩyɛ kɩbanɖɛ ɛzɩ mɔn-cɔzɔnaa kalabʋ yɔ. Paa wɩsɩ yaa ɖoo yaa alɩwaatʋ ndʋ mɛnsɛɣ-ɩ yɔ, mansaŋ-ɩ ñɔ-yɔɔ. 4 Mɔntɔzʋʋ ñe-wiluu yɔɔ nɛ piyele pɩlakɩ-m liu kpem se mantasɩ-ŋ naʋ nɛ ma-laŋɩyɛ tɛzɩ hʋlʋmʋʋ. 5 Mɔntɔzʋʋ ɖɔɖɔ ɛzɩma mbʋ ŋwɛnɩ lidaʋ Ɛsɔ yɔɔ nɛ tɛɛ nɛ pʋ-yɔɔ lɩmaɣza fɛyɩ kɩ-taa yɔ. Lidaʋ ŋgʋ, ñe-neze Loyisi kacalɩnɩ-kʋ wɛnaʋ, ɛlɛ wayɩ lɛ, ño-ɖoo Eniisi nɛ lɛɛlɛɛyɔ manaɣʋ yɔ, pɩtalɩnɩ-ŋ. 6 Pʋ-yɔɔ mɔntɔzʋʋ-ŋ se ŋla nɛ kʋjɔʋ ŋgʋ Ɛsɔ labɩ-ŋ alɩwaatʋ ndʋ mantɩnɩ ñɔ-yɔɔ nesi yɔ, kɩpaɣlɩ camɩyɛ. 7 Mbʋ pʋyɔɔ yɔ, Kalɩzaɣ ŋga Ɛsɔ ha-ɖʋ yɔ, kaayeki se ɖɩwɛɛ ninika, ɛlɛ, keyeki se ɖɩwɛnɩ ɖoŋ nɛ sɔɔlɩm nɛ tɩ ɖɔkʋʋ.
8 Pʋ-yɔɔ lɛ, fɛyɛ ɛtaakpa-ŋ nɛ ɖa-Kɩpaɣlʋ yɔɔ aseɣɖe lɩzʋʋ yaa weyi ma paɖʋ salaka ɛ-yɔɔ yɔ mɔ-yɔɔ. Ɛlɛ, Yesu Laŋhɛzɩyɛ Tɔm yɔɔ lɛ, tisi nɛ pɩtɩŋnɩ ɖoŋ weyi Ɛsɔ ha-ŋ yɔ ɛ-yɔɔ nɛ ŋtɔɔ kʋñɔŋ ɖɔɖɔ ɛzɩ ma yɔ. 9 Ɛnʋ yabɩnɩ ɖa-ñʋʋ nɛ ɛyaa-ɖʋ se ɖɩkɛ ɛ-ñɩma. Pɩtɛkɛ tʋma wena ɖɩlaba yɔ a-yɔɔ ɛlabɩ-ɖʋ mbʋ. Ɛlɛ, pʋcɔ ɛla kedeŋa lɛ, ɛɛɖʋwa se ɛtɩŋɩɣnɩ Krɩstʋ Yesu yɔɔ nɛ ɛlabɩ-ɖʋ lootiye. 10 Ɖa-Ñʋʋ Yaɖʋ Krɩstʋ Yesu kɔm yebina nɛ ɖɩnaɣ-ɖɩ lɛɛlɛɛyɔ. Mbʋ pʋyɔɔ yɔ, ɛwabɩ sɩm nɛ piyele ɛtɩŋnɩ Laŋhɛzɩyɛ Tɔm yɔɔ nɛ ɛwɩlɩ wezuu pɩɩtɛŋ.
11 Tɩ-tɔm taa Ɛsɔ ɖʋ-m se mɛnkɛ Yesu *tiyiyu nɛ mɛntɛ mɛnkɛ wɩlɩyʋ nɛ mɛntɛ mɛnkɛ ti-susiyu. 12 Pʋ-yɔɔ mɔntɔkɩ kʋñɔŋ kʋnɛ yɔ. Ɛlɛ, fɛyɛ ɛɛkpaɣ-m nɛ kʋ, mbʋ pʋyɔɔ yɔ, mansɩm weyi ɛ-yɔɔ mɛwɛnɩ lidaʋ yɔ nɛ mana siŋŋ se ɛpɩzɩɣ ɛcɔnɩ mbʋ ɛɖʋzɩ me-nesi taa yɔ pʋ-yɔɔ nɛ pʋkɔɔ pɩsɩnɩ kɩyakʋ ŋgʋ ɛɖʋwa yɔ. 13 Yele nɛ toovenim tɔm ndʋ meheyi-ŋ yɔ, tɩkɛnɩ ña-nʋmɔʋ lidaʋ wɛnaʋ nɛ sɔɔlɩm mba ŋwɛnɩ ña nɛ Krɩstʋ Yesu mɩ-kpɛndʋʋ taa yɔ pa-taa. 14 Ɖɔkɩ pʋyʋ kɩbanʋ weyi Ɛsɔ tɩŋnɩ ɛ-Kalɩzaɣ ŋga kɛwɛ ɖa-taa yɔ kɔ-yɔɔ nɛ ɛɖʋzɩ ñe-nesi taa yɔ nesi naalɛ kpam.
15 Ɛzɩ ŋtɛm naʋ yɔ, Aazii egeetiye taa ñɩma tɩŋa payɩ ha-m siɣye, pa-taa yɔ: Fiijɛɛlɩ nɛ Ɛrmoojɛɛnɩ. 16 Pɩkazɩ Onezifɔɔrɩ lɛ, Kɩpaɣlʋ ɛna ɛ-hɔʋ taa ñɩma pʋtɔdɩyɛ. Mbʋ pʋyɔɔ yɔ, ɛɛpam hɛzʋʋ ma-laŋɩyɛ, fɛyɛ takpa-ɩ mɔ-yɔɔ se mɛwɛ salaka taa. 17 Halɩ alɩwaatʋ ndʋ ɛkɔm Room yɔ, ɛñɩnɩ-m ɛzɩ ɛzɩyɛ taa pɩɣa yɔ nɛ ɛkɔɔ ɛna-m. 18 Pʋ-yɔɔ lɛ, Kɩpaɣlʋ eyele nɛ Ɛsɔ na ɛ-pʋtɔdɩyɛ kɩyakʋ ŋgʋ ɛɖʋwa yɔ. Ŋsɩm ɖɔɖɔ tʋma wena atɩŋa payɩ ɛlabɩ-m Efɛɛzɩ yɔ nɛ pɩkɩlɩ lɛlaa tɩŋa.