TAKAYAƔ KAJALAƔ ÑƖŊGA ŊGA PƆƆLƖ MA
TIMOOTEE
YƆ
1
1-2 Timootee! Ma Pɔɔlɩ mamaɣnɩ-ŋ takayaɣ kanɛ. Ɖa-ñʋʋ yaɖʋ Ɛsɔ nɛ Krɩstʋ Yesu weyi ɖɩtaɣ liu yɔ pahanɩ-m nɔɔ se mɛnkɛ Krɩstʋ Yesu *tiyiyu. Ña lɛ man-pɩɣa siŋŋ, mbʋ pʋyɔɔ yɔ, ña ɖɔɖɔ ŋwɛnɩ lidaʋ ɛ-yɔɔ. Mɛnsɛ-ŋ: Caa Ɛsɔ nɛ ɖa-Kɩpaɣlʋ Krɩstʋ Yesu palabɩ-ŋ lootiye nɛ pana ña-pʋtɔdɩyɛ nɛ pɛhɛzɩ ña-laŋɩyɛ.
Ɛzɩma mbʋ pʋwɛɛ se ɛyʋ ɛɖɔkɩ ɛ-tɩ nɛ cɛtɩm tɔm yɔ
3 Ɛzɩ maaheyuu-ŋ alɩwaatʋ ndʋ mɛnɖɛɣaɣ Masedonii se ŋcaɣ Efɛɛzɩ yɔ, caɣ mbʋ. Peeye ŋheyiɣ ɛyaa mba pɛwɛ peeye nɛ pawɩlɩɣ tɔm ndʋ tɩwɛ ndɩ nɛ ɖa-ñɩndʋ yɔ se pasɩɩ tɩnaɣ. 4 Heyi-wɛ ɖɔɖɔ se pataanɩnɩ mʋya nɛ pɔ-cɔzɔnaa hɩla wena afɛyɩ kalʋʋ yɔ pɔ-tɔm. Mbʋ lɩzɩɣnɩ puuyaɣ. Pɩɩsɩŋnɩ mbʋ Ɛsɔ ɖʋwa se ɛlakɩ yɔ se puwobini ɛsɩndaa. Ɛlɛ, lidaʋ yɔɔ pɩtɩŋɩɣna nɛ puwobini ɛsɩndaa. 5 Ŋheyiɣ-wɛ mbʋ se pɛwɛnɩ sɔɔlɩm mbʋ pɩlɩnɩ hɔyɛ kɩbanɖɛ nɛ lɩmaɣza kɩbana nɛ lidaʋ siŋŋ pa-taa yɔ. 6 Nabɛyɛ kizi sɔɔlɩm tɔm ndʋ nɛ pɛ-ɛza sɛnɩ tɔm ndʋ tɩɩwazɩɣ pʋyʋ kpem yɔ tɩ-yɔɔdʋʋ. 7 Pacaɣ se pɛkɛ *Mooyiizi paɣtʋ wɩlɩyaa sɔsaa. Ɛlɛ, paanɩɣ tɔm ndʋ pa-maɣmaɣ pɔyɔɔdʋʋ yɔ yaa ndʋ tɩ-yɔɔ pɛwɛ ɖoŋ yɔ tɩ-tɔbʋʋ.
8 Ɖɩtɛm naʋ se *Mooyiizi paɣtʋ wɛ ɖeu. Ɛlɛ, pʋwɛɛ se palabɩnɩ-tʋ tʋmɩyɛ ɛzɩ pʋpɔzʋʋ yɔ. 9 Pʋwɛɛ se ɖɩtɩlɩ se: pɩtɛkɛ mba palakɩ mbʋ pʋtʋʋzaa yɔ paɖʋ paɣtʋ. Ɛlɛ, mba paaɖɔŋ tɩ-yɔɔ yɔ nɛ kaañamtʋ tɩnaa nɛ mba pɛpɛɛŋɩɣ Ɛsɔ tɛtɛ yɔ nɛ kɩwɛɛkɩm laɖaa nɛ mba paalakɩ mbʋ Ɛsɔ liu wɛɛ yɔ yaa paañaŋ ɛ-ñɩm yɔ nɛ mba pakʋʋ pa-caanaa yaa po-ɖoonaa yɔ nɛ ɛyaa kʋyaa paɖʋ-tʋ. 10 Paɖʋ-tʋ ɖɔɖɔ hayitu laɖaa nɛ abalaa yaa halaa mba pacaɣ ɖama yɔ nɛ yomaa pɛdɩyaa nɛ cɛtɩyaa nɛ mba paalakɩ mbʋ poɖuwaa se palakɩ yɔ nɛ lakasɩ lɛɛsɩ nzɩ sɩtɩŋa payɩ sɩwɛɛkɩɣ tɔm kɩbandʋ ndʋ pawɩlɩɣ-ɖʋ yɔ sɩ-laɖaa. 11 Tɔm kɩbandʋ ndʋ, tɩwɛ Laŋhɛzɩyɛ Tɔm ndʋ tɩkɛ koboyaɣ yɔ tɩ-taa. Ɛsɔ weyi ɛwɛ laŋhɛzɩyɛ taa yɔ, ɛɖʋzɩnɩ Laŋhɛzɩyɛ Tɔm ndʋ me-nesi taa.
Pɔɔlɩ saŋʋʋ ɖa-Kɩpaɣlʋ se ɛlabɩ-ɩ lootiye yɔ
12 Mansaŋ ɖa-Kɩpaɣlʋ Krɩstʋ Yesu weyi ɛha-m ɖoŋ se malabɩnɩ ɛ-tʋmɩyɛ yɔ. Mansaŋ-ɩ ɛzɩma mbʋ ɛnawa se malakɩ mbʋ pʋpɔzʋʋ yɔ nɛ ɛlɩzɩ-m se mɛnkɛ ɛ-tʋmlaɖʋ yɔ pʋ-yɔɔ. 13 Ŋgʋ, maawɛɛkɩ ɛ-hɩɖɛ nɛ mɛwɛɛ ɛ-wayɩ kaŋ kaŋ nɛ mantʋʋ-ɩ ɖɔɖɔ. Ɛlɛ, ɛna man-pʋtɔdɩyɛ, mbʋ pʋyɔɔ yɔ, mantaatɩlɩ mbʋ malakaɣ yɔ. Mbʋ pʋyɔɔ yɔ, mantaawɛnɩ lidaʋ ɛ-yɔɔ. 14 Peeye ɖa-Kɩpaɣlʋ Krɩstʋ Yesu ɛnʋ ɛlabɩ-m lootiye siŋŋ nɛ eyele mɛwɛnɩ lidaʋ nɛ sɔɔlɩm mba palɩnɩ ɛ-cɔlɔ yɔ. 15 Tɔm ndʋ meheyiɣ-mɩ yɔ, tɩkɛ toovenim. Tɩmʋnaa se ɛyaa tɩŋa payɩ etisi-tʋ nɛ pa-laŋa tɩŋa. Ndʋ lɛ se Krɩstʋ Yesu kɔm kedeŋa yɔɔ se ɛya kɩwɛɛkɩm laɖaa ñʋʋ. Pa-taa lɛ, ma-maɣmaɣ pɩwabɩnaa. 16 Pʋ-yɔɔ ɛna man-pʋtɔdɩyɛ se ɛwɩlɩ-mɩ ɛzɩma mbʋ ɛɖɔkʋʋ ɛ-hɔyɛ kpem yɔ. Ɛlabɩ mbʋ se mba patɩŋa payɩ pɔkɔŋ wɛnaʋ lidaʋ ɛ-yɔɔ nɛ pehiɣ wezuu pɩɩtɛŋ yɔ pana. 17 Ɛyaa tɩŋa payɩ ɛsam-ɩ nɛ paɖʋ-ɩ hɩɖɛ tam yɔɔ. Mbʋ pʋyɔɔ yɔ, ɛnʋ lɛ Wiyaʋ sɔsɔ weyi e-kewiyaɣ tɔɔʋ fɛyɩ tɩnaɣ yɔ, ɛɛsɩkɩ, nɔɔyʋ ɛɛnaɣ-ɩ, e-ɖeke koŋ lɛ Ɛsɔ tam yɔɔ! Pɩla mbʋ!
18 Man-pɩɣa Timootee, manɖʋzʋʋ tɔm ndʋ mamaɣ takayaɣ kanɛ ka-taa yɔ ñe-nesi taa ɛzɩ paayɔɔdʋʋ tɔm ndʋ tɩlɩnɩ Ɛsɔ cɔlɔ yɔ ñɔ-yɔɔ yɔ. Pʋwɛɛ se ŋtɩŋnɩ tɩ-yɔɔ nɛ ŋlʋ lʋbɩyɛ nɖɩ ɖɩmʋnaa yɔ 19 nɛ ŋwɛnɩ lidaʋ Ɛsɔ yɔɔ mbʋ nɛ ña-lɩmaɣza caɣ a-ɖeɖe. Nabɛyɛ lɩmaɣza taacaɣ a-ɖeɖe nɛ pa-laŋa wɛɛ kpɩzɩŋ nɛ lidaʋ ŋgʋ paawɛna yɔ kɩla asayʋʋ. 20 Pa-taa lɛ Imenee nɛ Alɛksandrɩ mba mankpaɣ manɖʋzɩ *Kañadʋ Satanɩ nesi taa yɔ. Peeye panaɣ se pɩtamʋnɩ se pɛwɛɛkɩ Ɛsɔ hɩɖɛ.