Yesu ɛgbɛyɛ taa ñɩma yɔɔ cɔnɩyaa tɔm
3
1 Tɔm ndʋ meheyiɣ-mɩ yɔ, tɩkɛ toovenim. Ndʋ lɛ se: ye nɔɔyʋ ɛcaɣ se ɛkɛ Yesu ɛgbɛyɛ taa ñɩma yɔɔ cɔnɩyʋ yɔ, tʋmɩyɛ kɩbanɖɛ pʋdʋ liu wɛɛ. 2 Pʋwɛɛ se weyi ɛlakɩ tʋmɩyɛ nɖɩ yɔ, kawanaɣ nakɛyɛ ɛtaawɛɛ ɛ-yɔɔ. Ɛwɛnɩ halʋ kʋɖʋm koŋ, ɛ-ɛza ekuli. Ɛkɛ ɛyʋ weyi ɛmaɣzɩɣ nɛ pʋcɔ ɛla pʋyʋ yɔ, ɛla mbʋ pʋmʋnaa yɔ, ɛmʋ agɔma camɩyɛ. Pʋwɛɛ se ɛtɩlɩ ɛzɩma mbʋ pawɩlɩɣ Ɛsɔtɔm yɔ. 3 Pɩtamʋnɩ se ɛkɛ sʋlʋm kpaŋɩyʋ, ɛtaawɛɛ helu helu. Ɛlɛ, pʋwɛɛ se ɛwɛɛ leleŋ, ɛtaakɛ tɔm cayʋ, ɛtaawɛɛ liidiye laɣzaɣ. 4 Pʋwɛɛ se ɛ-maɣmaɣ ɛpɩzɩ ɛcɔnɩ ɛ-hɔʋ taa ñɩma yɔɔ camɩyɛ nɛ ɛkpɛlɩkɩ e-piya nɛ siluzi sɩ-tɩ ɛ-tɛɛ nɛ sɩñam-ɩ ɖeu siŋŋ. 5 Mbʋ pʋyɔɔ yɔ, ye ɛyʋ ɛɛpɩzɩɣ ɛ-maɣmaɣ ɛ-hɔʋ taa ñɩma yɔɔ cɔnaʋ lɛ, ɛzɩma ɛpɩzɩɣ ɛcɔnɩ Ɛsɔ ɛgbɛyɛ taa ñɩma yɔɔ yɔ? 6 Pɩtamʋnɩ se ɛkɛ ɛyʋ weyi ɛpɩsɩ Krɩstʋ tʋ nɛ piteleɖida yɔ. Pɩtɛkɛ mbʋ, nabʋyʋ taa ɛkɔŋ ɛkpazɩ ɛ-tɩ nɛ Ɛsɔ hʋnɩ-ɩ nɛ ɛkʋ ɛ-tɔm ɛzɩ ɛkʋʋ Satanɩ ñɩndʋ yɔ. 7 Pʋwɛɛ ɖɔɖɔ se mba pɛtɛkɛ Yesu ɛgbɛyɛ taa ñɩma yɔ, palɩzɩ ɛ-yɔɔ aseɣɖe kɩbanɖɛ. Pɩtɛkɛ mbʋ, pɛpɛɛŋɩɣ-ɩ tɛtɛ nɛ Satanɩ kaamʋʋ kɔɔ kɩnanɩ-ɩ kpaʋ.
Mba palɩzɩɣ-wɛ se patayɩɣ kʋñɔndɩnaa mbʋ paha-wɛ yɔ
8 Pʋwɛɛ se mba pɛkɛɣ tayɩyaa Yesu ɛgbɛyɛ taa yɔ, pɛkɛ ɛyaa kʋtʋʋzaa, pataawɛnɩ nɔsɩ naalɛ naalɛ. Pɩfɛyɩ se pɔñɔɔ sʋlʋm nɛ pɩkɩlɩ-wɛ yaa pomuli lɛlaa se pehiɣ kɛzɛɣ. 9 Pʋwɛɛ se pɔɖɔkɩ lidaʋ tɔm ndʋ Ɛsɔ lɩzaa ɛwɩlɩ ɛ-ñɩma yɔ. Ɛlɛ, pa-lɩmaɣza ɛtaacɛyɩ-wɛ pe-wezuu caɣʋ taa. 10 Pʋwɛɛ se pacalɩ-wɛ maɣzʋʋ nɛ ye patana kawanaɣ nakɛyɛ pɔ-yɔɔ lɛ, peyebi-wɛ nɛ pɛkɛ tayɩyaa. 11 Pʋwɛɛ se pa-halaa ɛkɛ ɖɔɖɔ ɛyaa kʋtʋʋzaa. Pataayɔɔdʋʋ ɛyaa tɔm, pɛ-ɛza ekuli nɛ pala paa ɛbɛ ɛzɩ pʋpɔzʋʋ yɔ. 12 Pʋwɛɛ se weyi ɛkɛ tayɩyʋ yɔ, ɛwɛnɩ halʋ kʋɖʋm koŋ. Pʋwɛɛ se ɛpɩzɩ ɛcɔnɩ e-piya nɛ ɛ-hɔʋ taa ñɩma lɛlaa pɔ-yɔɔ camɩyɛ. 13 Mbʋ pʋyɔɔ yɔ, tayɩyaa mba palakɩ pa-tʋmɩyɛ camɩyɛ yɔ, paɖʋʋ-wɛ hɩɖɛ, pa-laŋɩyɛ ɛɛmaɣnɩ pʋyʋ Ɛsɔ ɛsɩndaa. Mbʋ pʋyɔɔ yɔ, pɛwɛnɩ lidaʋ Krɩstʋ Yesu yɔɔ.
Tɔm ndʋ tɩɩwɛ mɛsaɣ tɛɛ nɛ Ɛsɔ wɩlɩ-ɖʋ-tʋ yɔ
14 Mamaɣ-ŋ takayaɣ kanɛ, ɛlɛ, mamaɣzɩɣ se mɔnkɔŋ ñɛ-tɛ alɩwaatʋ tʋnɛ tɩ-taa. 15 Ye mɔntɔkɔɔ lɔŋ yɔ, takayaɣ kanɛ kawɩlɩɣnɩ-ŋ ɛzɩma mbʋ pʋwɛɛ se pɔɖɔ Ɛsɔ hɔʋ taa yɔ. Ŋgʋ lɛ Ɛsɔ weyi ɛwɛ wezuu yɔ ɛ-ɛgbɛyɛ. Ŋgʋ ɖɔɖɔ lɛ toovenim tɔm tilimiye nɛ ti-sisika. 16 Toovenim lɛ, tɔm ndʋ tɩɩwɛ mɛsaɣ tɛɛ nɛ Ɛsɔ wɩlɩ-ɖʋ-tʋ nɛ ɖɩtɩŋɩɣnɩ tɩ-yɔɔ nɛ ɖɩlakɩ mbʋ e-liu wɛɛ yɔ, tɩpaɣlaa kamaɣ fɛyɩ! Ndʋ lɛ se:
weyi ɛwɛ ɛsɔdaa yɔ, etiba nɛ ɛpɩsɩ ɛyʋ.
Ɛsɔ Kalɩzaɣ wɩlaa se ɛtʋʋzaa,
Ɛsɔ tiyiyaa na-ɩ.
Posusi ɛ-tɔm paa le,
ɛyaa sakɩyɛ wɛnɩ lidaʋ ɛ-yɔɔ,
Ɛsɔ kpazɩ-ɩ koboyaɣ taa.