22
1 “Man-caanaa nɛ man-ɖalaa mɩ! Lɛɛlɛɛyɔ, mahʋʋ mɔn-tɔm, iwelesi nɛ ɩnɩɩ.” 2 Pɔɔlɩ tɩkuli ɛ-nɔɔ nɛ panɩɩ se pɛ-tɛ Ebree taa ɛyɔɔdɩnɩ-wɛ lɛ, pɛtɛzɩ sum ɖiɣ ɖiɣ. Peeye eheyi-wɛ se: 3 “Ma lɛ, mɛnkɛ Yuda tʋ, palʋlɩ-m Taarsɩ Siliisii ɛjaɖɛ taa. Ɛlɛ, Yeruusalɛm cɩnɛ mancaɣ abalʋ weyi payaɣ se Gamaalɩyɛɛlɩ yɔ ɛ-cɔlɔ nɛ ɛkpɛlɩkɩ-m ɛzɩma mbʋ pʋwɛɛ se mɔnɖɔ ɖɔ-cɔzɔnaa paɣtʋ yɔɔ ɖeyi ɖeyi yɔ nɛ mɔnkɔɔ manpaɣlɩ. Mɛ-ɛzɩyɛ kɛsɛnɩ Ɛsɔ tʋmɩyɛ ɛzɩ mɩtɩŋa mɩ-ñɩna sɛʋnɩ-ɖɩ sɔnɔ yɔ. 4 Maawɛ mba pɔɖɔŋ Yesu nʋmɔʋ taa yɔ pa-wayɩ kaŋ kaŋ nɛ mañɩnɩɣ se mankʋ-wɛ. Maakpa halaa nɛ abalaa nɛ mɔhɔkɩ-wɛ nɛ manɖʋ salaka. 5 Tɔm ndʋ mɔyɔɔdʋʋ ɛzʋnɔ yɔ, *cɔjɔnaa ñʋʋ tʋ nɛ tɔm hʋyaa *sɔsaa papɩzɩɣ palɩzɩ ma-aseɣɖe. Halɩ maawobi mamʋ takayɩsɩ pa-maɣmaɣ pɔ-cɔlɔ se mowoni ɖɛ-tɛ ñɩma cɔlɔ Damaasɩ nɛ pɩsɛɣ mankpa patɩŋa nɛ mɔnkɔnɩ-wɛ Yeruusalɛm cɩnɛ nɛ pɔhɔ pa-nɩŋgbaaŋ.”
Pɔɔlɩ kɛdʋʋ ɛ-wɛtʋ lɛɣzʋʋ tɔm yɔ
(Tʋma 9.1-19; 26.12-18)
6 Pɔɔlɩ tasɩ yɔɔdʋʋ se: “Pʋ-yɔɔ mankpaɣ nʋmɔʋ nɛ mɔnkɔɔ mɔñɔtɩnɩ Damaasɩ. Pʋkɔm ɛzɩ wɩsɩ siɣu yɔ lɛ, ñalɩmɩyɛ sɔsɔɖɛ naɖɩyɛ tɩlɩʋnɩ ɛsɔdaa yem nɛ ɖitii mɔ-yɔɔ. 7 Peeye mɔntɔlɩ tataa kpʋʋʋ nɛ manɩɣ pʋyɔɔdʋʋnɩ-m se: ‘Sɔɔlɩ! Sɔɔlɩ! Pɩlabɩ ɛzɩma nɛ ŋwɛɛ ma-wayɩ kaŋ kaŋ mbʋ?’ 8 Ɛlɛ mɔnpɔzɩ se: ‘Kɩpaɣlʋ! Ña anɩ?’ Pucosi-m se: ‘Ma Nazarɛɛtɩ tʋ Yesu weyi ŋwɛ ɛ-wayɩ kaŋ kaŋ yɔ.’
9 Mba ma nɛ wɛ ɖɩɩwɛ peeye yɔ, pana ñalɩmɩyɛ nɖɩ ɖɔɖɔ. Ɛlɛ, patanɩɩ weyi ɛyɔɔdaɣnɩ-m yɔ ɛ-nɔɔ. 10 Peeye mɔnpɔzaa se: ‘Kɩpaɣlʋ! Ɛbɛ pʋwɛɛ se mala?’ Ɛlɛ cosi-m se: ‘Kʋyɩ ŋwolo Damaasɩ, peeye peheyiɣ-ŋ mbʋ pɩtɩŋa Ɛsɔ ɖʋwa se ŋla yɔ.’ 11 Ñalɩmɩyɛ sɔsɔɖɛ nɖɩ, ɖɩɩyʋlɩsɩ mɛ-ɛza nɛ maatasɩɣ naʋ. Ɛlɛ, man-taabalaa ɖɔkɩ me-nesi taa nɛ pɔhɔm-m nɛ powoni Damaasɩ.
12 Abalʋ nɔɔyʋ kɛwɛ peeye, payaɣ-ɩ se Anaanɩyaasɩ. Ɛɖɔŋ Ɛsɔ paɣtʋ yɔɔ camɩyɛ nɛ Yuda ñɩma tɩŋa lɩzɩɣ ɛ-yɔɔ aseɣɖe kɩbanɖɛ. 13 Ɛnʋ kɔmnɩ mɔn-cɔlɔ nɛ eheyi-m se: ‘Man-taabalʋ Sɔɔlɩ! Ñɛ-ɛza ekuli nɛ ŋna!’ Kpaagbaa mbʋ lɛ, mɛ-ɛza tɩkuli nɛ manaɣ-ɩ. 14 Ɛlɛ ɛtasɩ-m heyuu se ɖɔ-cɔzɔnaa Ɛsɔ lɩzɩ-m ɖooo lɔŋ se mantɩlɩ mbʋ e-liu wɛɛ yɔ nɛ mana Weyi Ɛtʋʋzaa yɔ nɛ manɩɩ ɛlɛ nɔɔ taa tɔm. 15 Mbʋ pʋyɔɔ yɔ, ma pʋwɛɛ se mɛnkɛnɩ ɛlɛ aseɣɖe tʋ nɛ monsusi ɛyaa tɩŋa mbʋ pɩtɩŋa manawa nɛ manɩɩ yɔ pʋ-tɔm. 16 Anaanɩyaasɩ tɛm-m heyuu mbʋ lɛ, ɛpɔzɩ-m se lɛɛlɛɛyɔ, ɛbɛ manɖaŋaa ɖɔɖɔ yɔ? Pʋwɛɛ se mowolo palabɩ-m *lɩm sɔʋ sɔnzɩ nɛ mentendi Kɩpaɣlʋ nɛ ɛñalɩ-m man-kɩwɛɛkɩm.”
Pɔɔlɩ kɛdʋʋ mbʋ piyeba nɛ ewolo mba pɛtɛkɛ Yuda ñɩma yɔ pɔ-cɔlɔ yɔ
17 Pɔɔlɩ tasɩ yɔɔdʋʋ ɖɔɖɔ se: “Mɔnkɔm manpɩsɩ Yeruusalɛm lɛ, mowolo Ɛsɔ ɖɩɣa taa nɛ mɛnsɛɣ-ɩ. Pɩkɛdaa lɛ, pɩlabɩ-m ɛzɩ ɖoziye yɔ 18 nɛ mana Kɩpaɣlʋ nɛ eheyiɣ-m se: ‘Kʋyɩ kpaka nɛ ŋlɩɩ Yeruusalɛm tɛtʋ wayɩ lɔŋ, mbʋ pʋyɔɔ yɔ, Yuda ñɩma ɛɛkaɣ tisuu mɔn-tɔm ndʋ ŋheyiɣ-wɛ yɔ.’ 19 Ɛlɛ moncosi se: ‘Kɩpaɣlʋ! Naa pa-maɣmaɣ pɛtɛm sɩm se mɔncɔwaɣnɩ Yuda ñɩma Ɛsɔ ɖɩsɛyɛ ndɩ ndɩ taa nɛ mankpaɣ mba pɛwɛnɩ lidaʋ ñɔ-yɔɔ yɔ nɛ mamakɩ-wɛ nɛ maɖʋʋ-wɛ salaka! 20 Alɩwaatʋ ndʋ pakʋ ña-aseɣɖe tʋ Etiyɛɛnɩ yɔ, ma ɖɔɖɔ maawɛ peeye nɛ mantɩnɩ pa-taa mba pakʋwaɣ-ɩ yɔ pɔ-yɔɔ. Maaɖaŋnɩ-wɛ po-wondu.’ 21 Peeye eheyi-m se: ‘Kʋyɩ! Mentiyiɣ-ŋ poliŋ, mba pɛtɛkɛ Yuda ñɩma yɔ pɔ-cɔlɔ.’ ”
Pɔɔlɩ yɔɔdʋʋ se ɛkɛ Room tʋ yɔ
22 Ɛyaa samaɣ welesaɣnɩ Pɔɔlɩ nɛ pʋkɔɔ pɩsɩnɩ alɩwaatʋ ndʋ ɛyɔɔdɩ tɔm pee ana yɔ. Peeye papazɩ kubusi mabʋ se: “Abalʋ ɛnɛ, pakʋsɩ-ɩ kedeŋa yɔɔ! Pɩtamʋnɩ se ɛtasɩ caɣʋ wezuu!” 23 Pamakaɣ kubusi nɛ pɔlɔʋ po-wondu ɛsɔdaa nɛ pakʋsʋʋ mʋzʋʋ se pɩwɩlɩ se pɩkɩlɩ-wɛ wɩzʋʋ. 24 Peeye Room sɔɔjanaa ñʋʋ tʋ sɔsɔ ha nɔɔ se pasʋnɩ Pɔɔlɩ pa-pɩlɩʋ taa nɛ polu-i agbazɛɛ nɛ ɛyɔɔdɩ nɛ panɩɩ mbʋ pʋ-yɔɔ ɛyaa samaɣ wɛɛ kamakɩnɩ-ɩ kubusi mbʋ yɔ. 25 Pɔkɔm pɔhɔkɩ-ɩ se poluu-i lɛ, ɛpɔzɩ sɔɔjanaa ñʋʋ tʋ weyi ɛlɛ kɛwɛ ɛ-cɔlɔ peeye yɔ se: “Pɩha-mɩ nʋmɔʋ se ɩma Room tʋ yem nɛ ɩtahʋnɩ-ɩ nɛ ɩkʋ ɛ-tɔm naa we?”
26 Ɛlɛ nɩ mbʋ lɛ, ewolo eheyi pa-ñʋʋ tʋ sɔsɔ se: “Abalʋ ɛnʋ ɛkɛ Room tʋ! Ɛzɩma ŋlakɩ kpem yɔ?” 27 Peeye ɛlɛ ñowobi Pɔɔlɩ cɔlɔ nɛ ɛpɔzɩ-ɩ se: “Cosi-m nɛ manɩɩ se ŋkɛ Room tʋ na?” Ɛlɛ cosi-i se: “Ɛɛɛ!” 28 Peeye ɛlɛ ñekitini-i se: “Ma lɛ, mɛhɛyɩ liidiye sɔsɔɖɛ nɛ pʋcɔ manpɩsɩ Room tʋ.” Pɔɔlɩ ñekitini-i se: “Ma lɛ, ɖooo palʋlʋʋ-m yɔ, mɛnkɛ Room tʋ.” 29 Kpaagbaa mbʋ lɛ, mba pɩɩwɛɛ se polu-i agbazɛɛ nɛ ɛyɔɔdɩ yɔ, pɛɖɛɛ peyebi-i. Pa-ñʋʋ tʋ sɔsɔ ɛnʋ ɛ-maɣmaɣ ɛnawa se ɛkɛ Room tʋ lɛ, sɔɔndʋ kpa-ɩ, mbʋ pʋyɔɔ yɔ, ɛnʋ kɔtɔmnɩ se pɔhɔkɩ-ɩ.
Powonaʋ Pɔɔlɩ tɔm hʋyaa *sɔsaa cɔlɔ yɔ
30 Tɛʋ fema lɛ, sɔɔjanaa ñʋʋ tʋ sɔsɔ ɛnʋ ɛñɩnɩɣ se ɛna mbʋ Pɔɔlɩ labɩ kpem nɛ yuda ñɩma kʋyʋʋ ɛ-yɔɔ yɔ. Pʋ-yɔɔ ekpeɣli *cɔjɔnaa *sɔsaa nɛ tɔm hʋyaa *sɔsaa tɩŋa payɩ nɛ ɛha nɔɔ nɛ palɩzɩ Pɔɔlɩ nɛ powoni-i pɛ-hɛkʋ taa.