Tʋma Labʋ 21

Pɔɔlɩ wokuu Yeruusalɛm yɔ

¹ Ɖa nɛ mba pasɩ Pɔɔlɩ yɔ ɖɩyasɩ ɖama lɛ, ɖɩsʋʋ mɛlɛ nɛ ɖɩɖɛɛ Kɔɔsɩ ɛjaɖɛ taa kpaagbaa. Kifema lɛ, ɖɩkʋyɩ peeye nɛ ɖiwolo Roodi ñɩnɖɛ taa nɛ ɖɩkʋyɩ ɖɩɖɩ taa nɛ ɖiwolo Pataraa tɛtʋ taa. ² Ɖɩtalɩ peeye lɛ, ɖɩmaɣnɩ mɛlɛ ŋgʋ kuwoki Fenisii ɛjaɖɛ taa yɔ nɛ ɖɩsʋʋ-kʋ nɛ ɖɩɖɛɛ. ³ Ɖɩkɔm ɖɩtalɩ Ciiprɩ ɛjaɖɛ nɖɩ lɩm cɔ-ɖɩ Kondiko yɔ ɖɩ-hadɛ kiŋ lɛ, ɖiyebi-ɖɩ nɩmɩyɛ yɔɔ nɛ ɖiwolo Tiiri tɛtʋ taa Siirii ɛjaɖɛ taa. Mbʋ pʋyɔɔ yɔ, peeye pʋwɛɛ se palɩzɩ mɛlɛ taa wondu. ⁴ Ɖɩtalaa lɛ, ɖɩmaɣnɩ Krɩstʋ wayɩ tɩŋɩyaa nɛ ɖa nɛ wɛ ɖɩcaɣ kpɩtaʋ nɛ kɩ-tɛɛ. Alɩwaatʋ ndʋ tɩ-taa Ɛsɔ Kalɩzaɣ yɔɔdɩnɩ-wɛ nɛ peheyi Pɔɔlɩ se ɛtaatasɩ pɩsʋʋ Yeruusalɛm. ⁵ Ɛlɛ, kpɩtaʋ ŋgʋ kʋkɔm kɩɖɛɛ lɛ, ɖɩɖaɣnɩ ɖa-nʋmɔʋ pazʋʋ. Ɖɩɖɛɣaɣ lɛ, pasɩɩ-ɖʋ patɩŋa, pa nɛ pa-halaa nɛ pe-piya nɛ palɩnɩ-ɖʋ tɛtʋ wayɩ. Peeye ɖiluŋ ɖa-nʋmbɔla yɔɔ teŋgu nɔɔ nɛ ɖɩsɛɛ Ɛsɔ. ⁶ Pʋwayɩ lɛ, ɖa nɛ wɛ ɖɩsɛɛ ɖama nɛ ɖa ɖasʋʋ mɛlɛ nɛ piyele mba ñapɩsɩ pɛ-tɛ.

⁷ Ɖɩkʋyɩ Tiiri peeye lɛ, ɖɩtɛzɩ ɖa-nʋmɔʋ teŋgu yɔɔ nɛ ɖɩkɔɔ ɖɩtalɩ Pitolemayisi tɛtʋ taa. Ɖɩtalaa lɛ, ɖɩsɛɛ taabalaa nɛ ɖa nɛ wɛ ɖɩcaɣ kɩyakʋ nɛ kɩ-tɛɛ. ⁸ Kifema lɛ, ɖɩkpaɣ nʋmɔʋ nɛ ɖɩkɔɔ ɖɩtalɩ Sezaaree. Peeye ɖiwobi ɖɩwɛɛ Laŋhɛzɩyɛ Tɔm susiyu Filiipu tɛ. Abalʋ ɛnʋ, ɛɛkɛ ɛyaa lʋbɛ mba palɩzɩ Yeruusalɛm se pɛkɛ Krɩstʋ ɛgbɛyɛ taa tayɩyaa yɔ pa-taa lɛlʋ. ⁹ Ɛɛwɛnɩ pɛlaa naanza, patawalɩda, pɛkɛ lɔɔyɩsɩ tɩnaa.

¹⁰ Ɖɩɩwɛ peeye kɩyakɩŋ cabɩ mbʋ lɛ, nakʋyʋ wiye *lɔɔyaɣ tʋ weyi payaɣ se Agaabusi yɔ, ɛlɩnɩ Yudee egeetiye taa nɛ ɛkɔɔ ɖɔ-cɔlɔ. ¹¹ Ɛtalaa lɛ, ɛkpaɣ Pɔɔlɩ tambaɖɛ nɛ ɛhɔkɩ ɛ-naŋgbanzɩ nɛ e-nesi pa-taa nɛ ɛtɔ se: “Iwelesi nɛ ɩnɩɩ ndʋ Ɛsɔ Kalɩzaɣ tiyi-m se mɔnkɔɔ meheyi-mɩ yɔ. Ndʋ lɛ se: weyi ɛtɩnɩ tambaɖɛ ɖɩnɛ yɔ, ɛzʋnɔ Yuda ñɩma kɔŋ-ɩ hɔkʋʋ Yeruusalɛm nɛ paɖʋzɩ-ɩ mba pɛtɛkɛ Yuda ñɩma yɔ pe-nesi taa.” ¹² Ɖa nɛ Sezaaree ñɩma ɖɩnɩ mbʋ lɛ, ɖitendi Pɔɔlɩ se ɛtaatasɩ pɩsʋʋ Yeruusalɛm. ¹³ Peeye ɛlɛ kitini-ɖʋ se: “Pɩlabɩ ɛzɩma nɛ iwiliɣ nɛ ɩñɩnɩɣ se itisi mon-toma taa mbʋ? Ma lɛ, pɩtɛkɛ hɔkʋʋ yɔɔ ɖeke mɔñɔɔzɩ man-tɩ nɛ manɖaŋ. Ɛlɛ, manɖaŋaa ɖɔɖɔ se paa sɩm yɔ, mansɩ Kɩpaɣlʋ Yesu yɔɔ Yeruusalɛm.” ¹⁴ Ɖɩtapɩzɩ ɛ-tɔm lɛ, ɖɩtɛzɩ-ɩ yebu nɛ ɖɩtɔ se: “Mbʋ Kɩpaɣlʋ liu wɛɛ yɔ, mbʋ ɛlabɩna!”

¹⁵ Ɖɩcaɣ Sezaaree peeye kɩyakɩŋ cabɩ lɛ, ɖɩñɔɔzɩ ɖa-tɩ se ɖiwoki Yeruusalɛm. ¹⁶ Ɖɩɖɛɣaɣ lɛ, Krɩstʋ wayɩ tɩŋɩyaa nabɛyɛ sɩɩ-ɖʋ nɛ powoni-ɖʋ Yeruusalɛm peeye Ciiprɩ tʋ weyi ɛ-tɛ paaɖʋwa se ɖɩsʋʋ yɔ ɛ-tɛ. Payaɣ-ɩ se Mɩnaasɔɔ, ɛkɛ Krɩstʋ wayɩ tɩŋɩyʋ ɖooo lɔŋ.

Pɔɔlɩ wobu Yakubu tɛ yɔ

¹⁷ Ɖɩtalɩ Yeruusalɛm lɛ, taabalaa mʋ-ɖʋ nɛ laŋhʋlʋmɩyɛ. ¹⁸ Kifema lɛ, ɖa nɛ Pɔɔlɩ ɖiwolo Yakubu tɛ. Krɩstʋ ɛgbɛyɛ taa *sɔsaa lɛlaa tɩŋa kekpeɣli peeye. ¹⁹ Ɖɩtalaa lɛ, Pɔɔlɩ sɛɛ-wɛ nɛ ɛkɛdɩ-wɛ mbʋ Ɛsɔ tɩŋnɩ ɛ-yɔɔ nɛ ɛla mba pɛtɛkɛ Yuda ñɩma yɔ pɛ-hɛkʋ taa yɔ pɩtɩŋa pʋ-tɔm piye piye. ²⁰ Panɩ-tʋ lɛ, pasa Ɛsɔ pɩŋŋ. Pʋwayɩ lɛ, peheyi-i se: “Taabalʋ! Ŋnaɣ, Yuda ñɩma ɛgbaŋ ɛgbaŋ mba pɛwɛnɩ lidaʋ Yesu yɔɔ yɔ, patɩŋa payɩ pɔɖɔkɩ paɣtʋ nesi naalɛ kpam. ²¹ Ŋgʋ, peheyi-wɛ se ŋwɩlɩɣ Yuda ñɩma mba pɛwɛ mba pɛtɛkɛ Yuda ñɩma yɔ pɛ-tɛ se paha *Mooyiizi paɣtʋ siɣye nɛ ŋheyiɣ-wɛ se pataapɛlɩ pe-piya nɛ pataaɖɔ pɔ-sɔnzɩ yɔɔ ɖɔɖɔ. ²² Ɛzɩma ɖɩlakɩ yɔ? Paa pɩɩla ɛzɩma ɛyaa nɩɣ se ŋkɔma. ²³ Pʋ-yɔɔ lɛ, la mbʋ ɖiheyiɣ-ŋ yɔ. Abalaa naanza nabɛyɛ wɛ ɖɛ-hɛkʋ taa cɩnɛ, pa nɛ Ɛsɔ paapɛlɩ ñɩyʋʋ. ²⁴ Kpaɣ-wɛ nɛ ña nɛ wɛ iwolo ɩla cɩɖɩcɩɖɩ wɛtʋ sɔnzɩ nɛ ŋhɛyɩ liidiye pɔ-yɔɔ nɛ papɩzɩ powolo pahʋ pa-ñʋŋ. Pʋbʋ, pɩwɩlɩɣ se ña ɖɔɖɔ ŋɖɔŋ Mooyiizi paɣtʋ yɔɔ. Peeye ɛyaa tɩŋa ɖiɣziɣni se ñɔ-tɔm ndʋ pɔyɔɔdaɣ yɔ, tɩtɛkɛ toovenim. ²⁵ Piyele mba pɛtɛkɛ Yuda ñɩma nɛ pɛwɛnɩ lidaʋ Yesu yɔɔ yɔ, ɖɩma-wɛ takayaɣ nɛ ɖiheyi-wɛ mbʋ ɖɩɖʋwa yɔ. Mbʋ lɛ se pataatɔɔ kɩlaʋ nandʋ yaa calɩm yaa kpɩna wena pɛtɛcɛ a-liŋ tɛɛ yɔ a-nandʋ. Peyele ɖɔɖɔ hayitu.”

²⁶ Pɔyɔɔdɩ mbʋ nɛ kife lɛ, Pɔɔlɩ kpaɣ-wɛ nɛ ɛ nɛ wɛ powolo nɛ palakɩ sɔnzɩ nzɩ. Pʋwayɩ lɛ, ewolo Ɛsɔ ɖɩɣa taa nɛ eheyi ɛyaa alɩwaatʋ ndʋ sɔnzɩ nzɩ sɩtɛŋ yɔ. Pʋ-tɔbʋʋ se alɩwaatʋ ndʋ papɩzɩɣ palaa paa pa-taa weyi ɛ-yɔɔ yɔ.

Pakpaʋ Pɔɔlɩ Ɛsɔ ɖɩɣa taa yɔ

²⁷ Kɩyakɩŋ lʋbɛ palakɩnɩ sɔnzɩ nzɩ. Kɩyakɩŋ ɩnʋ ɩkɔm se ɩɖɛɣ, ŋgʋ, Yuda ñɩma nabɛyɛ kɛwɛ peeye. Palɩnɩ Aazii egeetiye taa. Pana Pɔɔlɩ Ɛsɔ ɖɩɣa taa mbʋ lɛ, pasazɩ ɛyaa samaɣ tɩŋa se kakpa-ɩ. ²⁸ Paawɛɛ pamakɩ kubusi se: “*Izrɛɛlɩ ñɩma, ɩkɔɔ ɩsɩnɩ-ɖʋ! Ɛyʋ weyi esusuu ɛyaa tɩŋa paa le se pataaɖɔ *Mooyiizi paɣtʋ yɔɔ nɛ ɛyɔɔdʋʋ Izrɛɛlɩ ñɩma nɛ Ɛsɔ ɖɩɣa pɔ-yɔɔ tɔm ɛzaɣtʋ yɔ, ɛnʋ yɔ. Halɩ ɛkpaɣ mba pɛtɛkɛ Yuda ñɩma yɔ nɛ ewoni Ɛsɔ ɖɩɣa taa nɛ pepisi-kɛ!” ²⁹ Pɔyɔɔdɩ mbʋ, mbʋ pʋyɔɔ yɔ, paana ɛ nɛ Efɛɛzɩ tʋ Trofim tɛtʋ taa nɛ pamaɣzɩ se paa pɩɩla ɛzɩma, ɛsʋnɩ-ɩ Ɛsɔ ɖɩɣa taa. ³⁰ Piiseɣti ɛyaa tɩŋa payɩ tɛtʋ hɔɔlɩŋ tɩŋa taa nɛ pese powolo pakpa Pɔɔlɩ ɛnʋ Ɛsɔ ɖɩɣa taa peeye nɛ pɔhɔm-ɩ palɩzɩnɩ awayɩ nɛ patɩɖɩʋ nɔnɔsɩ.

³¹ Pañɩnaɣ se pakʋ-ɩ. Ɛlɛ, nɔɔyʋ wolo eheyi Room sɔɔjanaa ñʋʋ tʋ se pɩsa miŋ Yeruusalɛm tɛtʋ tɩŋa. ³² Kpaagbaa mbʋ lɛ, ɛlɛ kpaɣ ɛ-sɔɔjanaa nabɛyɛ nɛ paba ñʋŋ tɩnaa nɛ ɛ nɛ wɛ pese powolo ɛyaa mba pa-wayɩ. Paba na-wɛ lɛ, peyele Pɔɔlɩ mabʋ. ³³ Peeye sɔɔjanaa ñʋʋ tʋ ɛnʋ etuzi ɛ-tɩ Pɔɔlɩ cɔlɔ nɛ ɛha nɔɔ se pakpa-ɩ pɔhɔkɩ-ɩ yoŋgbasɩ naalɛ. Pɛtɛm-ɩ hɔkʋʋ lɛ, ɛpɔzɩ se: ɛnʋ lɛ anɩ? Ɛbɛ ɛlaba? ³⁴ Alɩwaatʋ ndʋ lɛ, ɛyaa samaɣ wɛɛ kokou yem: paa weyi nɛ ɛ-ñɩndʋ. Sɔɔjanaa ñʋʋ tʋ ɛnʋ, ɛtapɩzɩɣ se ɛnɩɩ kɔkɔɖɛ nɖɩ ɖɩ-taa. Peeye eheyi ɛ-sɔɔjanaa se powoni Pɔɔlɩ pa-pɩlɩʋ taa. ³⁵ Patalɩ tendemee yɔɔ lɛ, pʋpɔzɩ se sɔɔjanaa ɛkpaɣ-ɩ ɛyaa samaɣ helu helu lakasɩ yɔɔ. ³⁶ Mbʋ pʋyɔɔ yɔ, katɩŋaɣ ɛ-wayɩ nɛ kamakɩ kubusi se: “Pʋwɛɛ se pakʋ-ɩ!”

Pɔɔlɩ yɔɔdɩnaʋ Yeruusalɛm ɛyaa samaɣ yɔ

³⁷ Pasʋwaɣnɩ Pɔɔlɩ pɩlʋʋ ŋgʋ kɩ-taa lɛ, ɛpɔzɩ sɔɔjanaa ñʋʋ tʋ ɛnʋ nɛ Grɛɛkɩ taa se: “Manpɩzɩɣ mɔyɔɔdɩ tɔm natʋyʋ yaa we?” Peeye ɛlɛ ñɔpɔzɩ-ɩ se: “Naze ŋnɩɣ Grɛɛkɩ tɔm nɩɩ? ³⁸ Ye mbʋ, pɩtɛkɛ ña lɛ *Ejiptɩ tʋ weyi ɛkɔm kɩyakɩŋ ɩnɛ ɩ-taa nɛ ɛlɩzɩ ñaɖʋʋ nɛ ɛkpaɣ ɛyaa kʋyaa kutokiŋ naanza nɛ ewoni lakʋ taa yɔ?” ³⁹ Pɔɔlɩ cosi-i se: “Ma mɛnkɛ Yuda tʋ, palʋlɩ-m Taarsɩ tɛtʋ taa Siliisii ɛjaɖɛ taa, tɩ-hɩɖɛ sɛwa, mɛnkɛ tɩ-taa tʋ. Mentendiɣ-ŋ se ŋha-m nʋmɔʋ nɛ mɔyɔɔdɩnɩ samaɣ.” ⁴⁰ Peeye ɛlɛ ha-ɩ nʋmɔʋ se ɛyɔɔdɩ. Ɛlɛ Pɔɔlɩ sɩŋ tendene yɔɔ nɛ ɛñɩɣ samaɣ nesi se kosu. Kosum ɖiɣ ɖiɣ lɛ, ɛpazɩ-wɛ yɔɔdɩnaʋ nɛ pɛ-tɛ Ebree taa. Ndʋ ɛyɔɔdaa yɔ, ndʋ lɛ se: