Pɔɔlɩ wobu Masedonii nɛ Grɛɛsɩ yɔ
20
1 Ñaɖʋʋ cɛbɩ Efɛɛzɩ peeye lɛ, Pɔɔlɩ kpeɣli Krɩstʋ wayɩ tɩŋɩyaa nɛ ɛyɔɔdɩnɩ-wɛ se pɩlabɩ-wɛ hʋnʋm. Pʋwayɩ lɛ, ɛsɛɛ-wɛ nɛ ɛcaŋ ɛɖɛɛ Masedonii ɛjaɖɛ taa. 2 Ɛtalaa lɛ, ɛɖɔŋnɩ sɩŋʋʋ sɩŋʋʋ nɛ ɛkɛdɩɣ Ɛsɔtɔm sakɩyɛ nɛ pɩlakɩ ɛyaa hʋnʋm. Pʋwayɩ lɛ, ewolo Grɛɛsɩ ñɩnɖɛ taa 3 nɛ ɛcaɣ peeye fenasɩ naadozo. Ɛkʋyaa lɛ, ewolo se ɛsʋʋ kpɩyʋʋ nɛ ɛɖɛɛ Siirii ɛjaɖɛ taa. Ɛlɛ ɛnɩɩ se Yuda ñɩma nabɛyɛ tam ɛ-yɔɔ nɔɔ se pakʋʋ-ɩ. Peeye ɛtɩlɛɣzɩ lɩmaɣza nɛ ekiti ɛtɩŋnɩ Masedonii. 4 Ɛ nɛ mba pɔɖɔŋaɣ yɔ, mba yɔ: Beree abalʋ weyi payaɣ se Piruusi yɔ ɛ-pɩyalʋ Sopatɛɛrɩ nɛ Tesalooniki tɛtʋ taa ñɩma: Aristaarkɩ nɛ Sekundusi nɛ Dɛɛrbɩ tʋ Gayuusi nɛ Timootee nɛ Aazii ñɩma: Ticiiki nɛ Trofim. 5 Mba kɛɖɛnɩ ma nɛ ɩ nɔɔ nɛ powolo paɖaŋ-ɖʋ Trowaasɩ tɛtʋ taa. 6 Sɔsɔɔna Fɛyɩ Tindine *Kazandʋ ɖɛwa lɛ, ɖɩkʋyɩ ɖiwolo Filiipu nɛ ɖɩsʋʋ mɛlɛ. Kɩyakɩŋ kagbaanzɩ wayɩ lɛ, ɖɩtalɩ pɔ-cɔlɔ Trowaasɩ nɛ ɖa nɛ wɛ ɖɩcaɣ peeye kɩyakɩŋ lʋbɛ.
Pɔɔlɩ tɛzʋʋ tʋmɩyɛ labʋ Trowaasɩ yɔ
7 *Kujuka wiye lɛ, ɖikpeɣli ɖama se ɖɩlakɩ tindine tayʋʋ sɔnzɩ. Kifeŋaɣ se Pɔɔlɩ ekpe. Pʋ-yɔɔ ɛɛwɛɛ nɛ ɛyɔɔdʋʋnɩ mba pɛwɛ peeye yɔ nɛ pʋkɔɔ pɩtalɩ ɖoo hɛkʋ. 8 Ɛsɔdaa kuduyuu nakʋyʋ taa ɖiikpeɣlaa, paasɩ kanɖʋnaa sakɩyɛ kɩ-taa. 9 Alɩwaatʋ ndʋ lɛ, evebu weyi payaɣ se Eticii yɔ, ɛɛcaɣ mundoɖe yɔɔ. Pɔɔlɩ wɛɛ ɛyɔɔdʋʋ ka ka mbʋ lɛ, ɖom kpaɣ-ɩ. Pɩkɛdaa lɛ, pɩlabɩ-ɩ liii nɛ ɛlɩnɩ ɖɩ-yɔɔ ɖooo ɛsɔdaa kuduyuu naadozo ñɩŋgʋ taa nɛ etii ɛfalɩ tataa. Powobi pakʋsɩ-ɩ lɛ, e-fezuu tɛm ɖɛʋ. 10 Peeye Pɔɔlɩ tɩlɩwa etii nɛ eluŋ ɛ-yɔɔ nɛ ɛkpaɣ-ɩ e-nesi taa nɛ ɛtɔ se: “Sɔɔndʋ ɛtaakpa-mɩ: ɛ nɛ ɛ-ɛza!” 11-12 Ɛyɔɔdɩ mbʋ lɛ, evebu ɛnʋ efe nɛ pekpeni-i nɛ ɛ-alaafɩya tɩŋa. Ɛyaa na-ɩ mbʋ lɛ, patɩŋa pa-laŋa hɛɛ niɣ niɣ. Peeye Pɔɔlɩ pɩsaa ɛkpa nɛ ɛcɩyɩ tindine nɛ pala sɔnzɩ nzɩ. Pɛtɛma lɛ, ɛɖaɣnɩ yɔɔdʋʋ ka ka nɛ tɛʋ kɔɔ kife. Pʋwayɩ lɛ, ɛɖɛɛ.
Pɔɔlɩ wobu Miilɛɛ yɔ
13 Pɔɔlɩ ɖɛwa nɛ piyebi-ɖʋ lɛ, ɖɩsʋʋ mɛlɛ nɛ ɖɩɖɛɛ nɔɔ nɛ ɖiwolo ɖɩɖaŋ-ɩ Asoosi tɛtʋ taa. Ɛɛɖʋwa se ɛɖɔŋ naŋgbanzɩ nɛ ɖɩkatɩ-ɩ peeye. 14 Ɛkatɩ-ɖʋ lɛ, ɛkpa ɖɔ-cɔlɔ mɛlɛ taa nɛ ɖiwolo Mitiilɛɛnɩ ñɩndʋ taa. 15 Ɖɩkʋyɩ peeye lɛ, ɖɩtalɩ Ciyoo tɛtʋ cɔlɔ tɛʋ kifemuu. Tozo wiye lɛ, ɖɩtalɩ Samɔɔsɩ ñɩndʋ taa. Naza wiye lɛ, ɖɩtalɩ Miilɛɛ ñɩndʋ taa lɛ. 16 Pɔɔlɩ kaɖʋwa se ɛɛsɩŋɩɣ Efɛɛzɩ Aazii egeetiye taa, pɩtɛkɛ mbʋ, elesiɣ alɩwaatʋ yem. Ekpedesaɣ se pʋwɛɛ yɔ, ɛtalɩ Yeruusalɛm Kʋmtʋ *Kazandʋ wiye.
Pɔɔlɩ yɔɔdɩnaʋ Efɛɛzɩ Krɩstʋ ɛgbɛyɛ taa *sɔsaa yɔ
17 Pɔɔlɩ talɩ Miilɛɛ lɛ, etiyi Efɛɛzɩ se payaa Krɩstʋ ɛgbɛyɛ taa *sɔsaa. 18 Paba talɩ ɛ-cɔlɔ lɛ, eheyi-wɛ se: “Man-taabalaa! Ɩtɛm sɩm mɔn-ɖɔnɛ alɩwaatʋ ndʋ ma nɛ mɩ ɖɩɩwɛɛ kpaɣ ɖooo kɩyakʋ ŋgʋ mancalɩ fɛyʋʋ mɩ-tɛ Aazii egeetiye taa yɔ. 19 Mentisi man-tɩ nɛ mala Kɩpaɣlʋ tʋmɩyɛ nɛ ɛzɩtɛɣlɩm nɛ kʋñɔŋ ŋgʋ mɔntɔɔ Yuda ñɩma nesi taa yɔ kɩ-taa. Mba katamnɩ mɔ-yɔɔ nɔɔ tɔm sakɩyɛ. 20 Mɛntɛmɛsɩ-mɩ natʋyʋ. Maakɛdɩ-mɩ nɛ mawɩlɩ-mɩ mbʋ pɩtɩŋa payɩ pʋwɛ-mɩ wazaɣ yɔ samaɣ nɛ mɩ-ɖɩsɩ pa-taa. 21 Meheyi Yuda ñɩma nɛ mba pɛtɛkɛ Yuda ñɩma yɔ se pɛlɛɣzɩ wɛtʋ Ɛsɔ ɛsɩndaa nɛ pɛwɛnɩ lidaʋ ɖa-Kɩpaɣlʋ Yesu yɔɔ.
22 Lɛɛlɛɛyɔ, pɩkɛnɩ-m kɩcɛyʋʋ se mowolo Yeruusalɛm ɛzɩ Ɛsɔ Kalɩzaɣ heyuu-m yɔ. Ɛlɛ, mantana mbʋ pɩkaɣ-m tɛmnaʋ peeye yɔ. 23 Ndʋ manawa yɔ lɛ se: paa tɛtʋ ndʋ tɩ-taa mantalaa yɔ, Ɛsɔ Kalɩzaɣ wɩlɩɣ-m nɛ keheyiɣ-m se salaka nɛ kʋñɔŋ sɔsɔʋ pɩtɛŋnɩ-m. 24 Ɛlɛ, mañɩtaa mɛntɛ man-tʋmɩyɛ nɖɩ Kɩpaɣlʋ Yesu ɖʋ-m yɔ yɔ, me-wezuu tɛkɛnɩ-m pʋyʋ. Nɖɩ lɛ se: monsusi Ɛsɔ lootiye Laŋhɛzɩyɛ Tɔm.
25 Lɛɛlɛɛyɔ, manawa se mba mɩ mɩtɩŋa payɩ mɔnkɔm mɩ-hɛkʋ taa nɛ monsusi Ɛsɔ Kewiyaɣ tɔm yɔ, mɩ-taa nɔɔyʋ ɛɛtasɩɣ naʋ mɛ-ɛzɩbiye taa kaʋ. 26 Pʋ-yɔɔ mankaɖɩɣ-mɩ sɔnɔ kɩyakʋ kʋnɛ se: ye mɩ-taa nɔɔyʋ eleba yɔ, ma-ñɩndʋ natʋyʋ fɛyɩ pɩ-taa. 27 Mbʋ pʋyɔɔ yɔ, meheyi-mɩ mbʋ Ɛsɔ ɖʋwa se ɛkɔŋ labʋ yɔ pɩtɩŋa payɩ, mɛntɛmɛsɩ-mɩ natʋyʋ. 28 Ɛsɔ Kalɩzaɣ lɩzɩnɩ-mɩ se ɩkɛ *sɔsaa nɛ ɩcɔnɩ Krɩstʋ ɛgbɛyɛ taa ñɩma yɔɔ. Pʋ-yɔɔ meheyiɣ-mɩ se ɩcɔnɩ mɩ-maɣmaɣ mɩ-tɩ yɔɔ camɩyɛ nɛ ɩcɔnɩ ɖɔɖɔ mba pɛwɛ ɖɩ-taa yɔ patɩŋa pɔ-yɔɔ ɛzɩ ninɖiɣyu cɔŋʋʋnɩ e-heŋ yɔɔ yɔ. Ɛsɔ tɩŋnɩnɩ ɛ-maɣmaɣ ɛ-Pɩyalʋ calɩm yɔɔ nɛ ɛpɩsɩ-wɛ ɛ-ñɩma.
29 Ma Pɔɔlɩ mɛntɛm naʋ se ma-wayɩ lɛ, mba pɛwɛ ɛzɩ kpemtɔɔyɩsɩ nzɩ ñɔɔsɩ wɩɣ-sɩ yɔ, pɔkɔŋ lɩʋ mɩ-ɛgbɛyɛ taa, paakaɣ sɔm nɔɔyʋ kaʋ. 30 Halɩ mɩ-maɣmaɣ mɩ-taa lɛlaa kɔŋ pɩsʋʋ cɛtɩyaa nɛ pepeɣzi Krɩstʋ wayɩ tɩŋɩyaa nɛ paba tɩŋ-wɛ. 31 Pʋ-yɔɔ lɛ, ɩcɔnɩ mɩ-tɩ yɔɔ nɛ ɩtɔzʋʋ se pɩnzɩ naadozo yɔ, menteyele mɩ-taa nɔɔyʋ paɣʋ wɩsɩ nɛ ɖoo nɛ halɩ mentisi ɛzɩtɛɣlɩm.
32 Lɛɛlɛɛyɔ, manɖʋzʋʋ mɩtɩŋa payɩ Ɛsɔ nɛ e-lootiye tɔm pe-nesi taa. Ɛlabɩ-mɩ lootiye. Ɛnʋ pɩzɩɣnɩ eyele nɛ ɩkpa ɖoŋ nɛ ɛha-mɩ ñɩm mbʋ ɛsɩwa se ɛhaɣ mba patɩŋa payɩ eyeba nɛ papɩsɩ ɛ-ñɩma yɔ. 33 Nɔɔyʋ liidiye yaa e-sika yaa e-wondu talabɩ-m liu. 34 Mɩ-maɣmaɣ ɩnawa se malabɩ tʋmɩyɛ nɛ ma-maɣmaɣ me-nesi nɛ mehiɣ mbʋ pɩtɛɖaɣ ma nɛ man-taabalaa yɔ. 35 Mawɩlɩ-mɩ pɩtɩŋa pɩ-taa se mbʋ pʋwɛɛ se ɩla tʋmɩyɛ nɛ ɩsɩnɩ kʋñɔndɩnaa nɛ ɖatɩŋa ɖɩtɔzɩ tɔm ndʋ Kɩpaɣlʋ Yesu maɣmaɣ yɔɔdaa yɔ tɩ-yɔɔ. Ndʋ lɛ se: ‘Ɛyʋ haɣʋ lɛlʋ pʋyʋ yɔ, pɩlakɩ-ɩ leleŋ pɩŋŋ nɛ pɩkɩlɩ ɛzɩ pahaɣʋ ɛ-maɣmaɣ yɔ.’ ”