Tʋma Labʋ 19

Pɔɔlɩ labʋ tʋmɩyɛ Efɛɛzɩ yɔ

¹ Apoloosi wɛ Kɔrɛntɩ mbʋ lɛ, Pɔɔlɩ ñatɩŋnɩ pʋŋ hɔɔlɩŋ taa nɛ ɛkɔɔ ɛtalɩ Efɛɛzɩ. Peeye ɛkatɩ Krɩstʋ wayɩ tɩŋɩyaa nabɛyɛ ² nɛ ɛpɔzɩ-wɛ se: “Ɛsɔ ha-mɩ ɛ-Kalɩzaɣ alɩwaatʋ ndʋ ɩwɛnɩ lidaʋ Krɩstʋ yɔɔ yɔ yaa we?” Paba cosi-i se: “Aayɩ! Wiɖiyi ɖɩtanɩɩ se Ɛsɔ Kalɩzaɣ nakɛyɛ wɛɛ.” ³ Ɛlɛ Pɔɔlɩ tasɩ-wɛ pɔzʋʋ se: “Sɔnzɩ nzɩ palabɩ-mɩ yɔ?” Pocosi-i se: “Yohanɛɛsɩ *lɩm sɔʋ sɔnzɩ palabɩ-ɖʋ.” ⁴ Peeye eheyi-wɛ se: “Toovenim lɛ, Yohanɛɛsɩ ñalakaɣ *Izrɛɛlɩ ñɩma *lɩm sɔʋ sɔnzɩ se pɩwɩlɩ se pɛlɛɣzɩ wɛtʋ. Eeheyi-wɛ se ɛ-wayɩ lɛ, nɔɔyʋ kɔŋ, pɛwɛnɩ lidaʋ ɛ-yɔɔ. Ɛnʋ lɛ Yesu.” ⁵ Pɔɔlɩ yɔɔdɩ mbʋ nɛ panɩɩ lɛ, peyele nɛ palabɩ-wɛ lɩm sɔʋ sɔnzɩ Kɩpaɣlʋ Yesu hɩɖɛ taa. ⁶ Peeye Pɔɔlɩ tɩnɩ pɔ-yɔɔ nesi nɛ Ɛsɔ Kalɩzaɣ tii pɔ-yɔɔ nɛ papazɩ yɔɔdʋʋ kʋnʋmɩŋ ndɩ ndɩ nɛ tɔm ndʋ tɩlɩnɩ Ɛsɔ cɔlɔ yɔ. ⁷ Paatalɩ ɛzɩ ɛyaa hiu nɛ naalɛ yɔ.

⁸ Pʋwayɩ lɛ, Pɔɔlɩ wolo Yuda ñɩma Ɛsɔ ɖɩsɛyɛ taa nɛ esusi Ɛsɔtɔm kaalɛyɩtʋ. Fenasɩ naadozo ɛɛlabɩ mbʋ. Eheyaɣ-wɛ Ɛsɔ Kewiyaɣ tɔm nɛ ɛñɩnɩɣ ɛzɩma mbʋ ɛɛla nɛ petisi-tʋ yɔ. ⁹ Ɛlɛ, pa-taa sakɩyɛ la laŋa kpɩzɩŋ nɛ pekizi-tʋ faŋŋ nɛ peniɣziɣ Kɩpaɣlʋ wayɩ tɩŋʋʋ tɔm ɛyaa tɩŋa ɛsɩndaa. Peeye Pɔɔlɩ nɛ Krɩstʋ wayɩ tɩŋɩyaa peyebi-wɛ nɛ pekpeɣliɣ ɖama abalʋ weyi payaɣ se Tiraanuusi yɔ e-sukuli taa nɛ esusuu ɛyaa Kɩpaɣlʋ tɔm kɩyakɩŋ tɩŋa. ¹⁰ Ɛlabɩ mbʋ pɩnzɩ naalɛ. Pʋ-yɔɔ Yuda ñɩma nɛ Grɛɛkɩ ñɩma mba paawɛ Aazii egeetiye taa yɔ, patɩŋa payɩ panɩ tɔm ndʋ.

Seva pɩyalaa tɔm

¹¹ Alɩwaatʋ ndʋ lɛ, Ɛsɔ tɩŋaɣnɩ Pɔɔlɩ yɔɔ nɛ ɛlakɩ hama lakasɩ sɔsɔsɩ. ¹² Halɩ pakpakɩɣ tokonaa nɛ kɛdɛɛkasɩ mba potukuni-i yɔ nɛ potukuuni kʋdɔndɩnaa nɛ pɔ-yɔɔ cɛkɩ nɛ alewaa seɣ pa-wayɩ.

¹³ Peeye Yuda ñɩma mba pɔcɔwaɣ nɛ pɔɖɔɔnʋʋ alewaa ɛyaa wayɩ yɔ, pakʋyaa ɖɔɖɔ se payaɣ Kɩpaɣlʋ Yesu hɩɖɛ nɛ pɔɖɔɔnɩnɩ alewaa ɛyaa wayɩ nɛ pɔtɔŋ se: “Yesu weyi Pɔɔlɩ susuu ɛ-tɔm yɔ ɛ-hɩɖɛ taa lɛ, alewaa mɩ! Ɖiheyiɣ-mɩ se ise ɛyaa panɛ pa-wayɩ!” ¹⁴ *Yuda ñɩma *cɔjɔnaa *sɔsaa taa lɛlʋ weyi payaɣ se Seva yɔ, ɛ-pɩyalaa lʋbɛ lakaɣnɩ tʋmɩyɛ nɖɩ. ¹⁵ Patalɩ eluukenu nɔɔyʋ tɛ lɛ, ɛlɛ pɩsɩnɩ-wɛ se: “Yesu lɛ, mansɩm-ɩ nɛ mantɩlɩ mbʋ Pɔɔlɩ kɛnaa yɔ. Mɩ yɔ, mɩ lɛ mba kpem?” ¹⁶ Peeye ekpibi-wɛ nɛ ɛwɩlɩ patɩŋa tɔɔzɩm taaña-m nɛ pamʋ heŋ nɛ pese yem yem nɛ palɩɩ ndaakpela.

¹⁷ Efɛɛzɩ ñɩma tɩŋa nɛ Yuda ñɩma nɛ mba pɛtɛkɛ Yuda ñɩma yɔ panɩ tɔm ndʋ patɩŋa payɩ mbʋ lɛ, sɔɔndʋ kpa-wɛ nɛ peyele Kɩpaɣlʋ Yesu hɩɖɛ sɛɛ. ¹⁸ Pa-taa mba paapazɩ wɛnaʋ lidaʋ Krɩstʋ yɔɔ yɔ, pa-taa sakɩyɛ heyaɣ pa-kɩwɛɛkɩm ɛyaa ɛsɩndaa keɣlee ¹⁹ nɛ fadɩŋ laɖaa taa sakɩyɛ ñɔkɔnɩ pa-fatɩŋ takayɩsɩ nɛ pañaɣzɩ-sɩ miŋ ɛyaa ɛsɩndaa. Patʋʋzɩ si-liidiye lɛ, ɖɩɖɔwa pɩtɩɩfɛyɩ: ɖɩɩtalɩ ɛzɩ pe-liidiye pɔɔyɩsɩ kutokiŋ nɩɩnʋwa yɔ. ²⁰ Mbʋ pɩtɩŋnɩ Kɩpaɣlʋ ɖoŋ yɔɔ nɛ ɛ-tɔm tɛzɩ cɔʋ siŋŋ.

²¹ Pʋwayɩ lɛ, Pɔɔlɩ la lɩmaɣza se ɛkʋyʋʋ ɛtɩŋnɩ Masedonii nɛ Akayɩ pa-ageeta taa nɛ ewolo Yeruusalɛm. Ɛtɔm se ɛtalaa yɔ, pʋwɛɛ se ewolo ɖɔɖɔ Room nɛ ɛna. ²² Peeye ɛkʋsɩ mba pasɩŋaɣnɩ-ɩ tʋmɩyɛ yɔ pa-taa ɛyaa naalɛ nɛ etiyi-wɛ Masedonii nɛ piyele ɛtasɩ caɣʋ alɩwaatʋ cabɩ Aazii egeetiye taa. Mba lɛ Timootee nɛ Eraastɩ.

Ñaɖʋʋ ŋgʋ kɩlɩ Efɛɛzɩ yɔ

²³ Alɩwaatʋ ndʋ Pɔɔlɩ wɛ Efɛɛzɩ tɛtʋ taa mbʋ yɔ, pɩɩkɔnɩ ñaɖʋʋ sɔsɔʋ nakʋyʋ Kɩpaɣlʋ wayɩ tɩŋʋʋ nʋmɔʋ yɔɔ. ²⁴ Abalʋ nɔɔyʋ kɛwɛ peeye, payaɣ-ɩ se Demetriyuusi, ɛkɛ nɩŋgbacaɣlɩnaa luɖu. Elukaɣ ɛgɔlɩmɩyɛ halɩñɩnɖɛ nɖɩ payaɣ se Artemiisi yɔ ɖɩ-ɖɩɣa lɛzɩŋ cikpeŋ nɛ liidiye ñɩɣyʋʋ nɛ ɛpɛdɩɣ. Mbʋ yebina nɛ ɛ nɛ ɛ-tʋmlaɖaa pehiɣ pa-tɩ siŋŋ. ²⁵ Nakʋyʋ wiye lɛ, ekpeɣli pa nɛ mba palakɩ tʋmɩyɛ nɖɩ ɖɩ-lɛzʋʋ yɔ nɛ eheyi-wɛ se: “Taabalaa! Ɩtɛm sɩm se ɖa-tʋmɩyɛ yɔɔ ɖihikiɣ ɖa-tɩ. ²⁶ Lɛɛlɛɛyɔ, mɩ-maɣmaɣ ɩnaɣ nɛ ɩnɩɣ nɛ mɩ-nɩŋgbaaŋ ndʋ mɩ-Pɔɔlɩ ɛnʋ ɛwɛɛ esusuu Efɛɛzɩ nɛ pɩkpɛndɩnɩ Aazii egeetiye hɔɔlɩŋ sakɩyɛ taa yɔ. Ndʋ lɛ se agɔlɩma wena ɛyaa manɩ pe-nesi yɔ, atɛkɛ pʋyʋ kpem. Tɔm ndʋ ɛcɛtɩɣnɩ ɛyaa sakɩyɛ nɛ paba tisiɣ-tʋ ɖɔɖɔ. ²⁷ Manaʋ yɔ, ye ɖɩtakʋyɩ ɖɩsɩŋ tɔm ndʋ tɩ-yɔɔ yɔ, ɖa-tʋmɩyɛ ɖɩnɛ ɖɩsɩɣ tɩnaɣ! Ɖɔɖɔ lɛ, ɖɛ-ɛgɔlɩmɩyɛ sɔsɔɖɛ Artemiisi nɖɩ Aazii ñɩma tɩŋa nɛ ajɛɛ kpeekpe ɛyaa poluŋuu ɖɩ-tɛɛ yɔ, peniɣziɣ ɖɩ-ɖɩɣa nɛ nɔɔyʋ ɛɛtasɩɣ-ɖɩ kpaɣʋ nɛ ɛyaa pʋyʋ!”

²⁸ Ɛyaa mba paakpeɣlaa yɔ, panɩ tɔm ndʋ mbʋ lɛ, pa-pana kpa siŋŋ nɛ pamakɩ kubusi se: “Efɛɛzɩ ñɩma ɛgɔlɩmɩyɛ Artemiisi kɩlɩnɩ pɩtɩŋa payɩ!” ²⁹ Peeye pɩñɩŋnɩ Efɛɛzɩ tɛtʋ tɩŋa. Ɛlɛ tɩ-taa ñɩma kpa Masedonii ñɩma naalɛ nabɛyɛ: Gayuusi nɛ Aristaarkɩ mba pa nɛ Pɔɔlɩ pɔɖɔŋaɣ yɔ, nɛ pɔhɔm-wɛ ɖinɖa ɖinɖa nɛ powoni Efɛɛzɩ ñɩma mba pa-ɖikpeɣliye ɖenɖe palakɩ aleɣya yɔ. ³⁰ Pɔɔlɩ caɣaɣ se ɛlɩɩ ɛyaa samaɣ ɛsɩndaa. Ɛlɛ, Krɩstʋ wayɩ tɩŋɩyaa lɛlaa kizini-i. ³¹ Halɩ pɩkpɛndɩnɩ Aazii karɩsɩ sɔsɔsɩ nasɩyɩ nzɩ sɩkɛ ɛ-ɛgbaadɩnaa yɔ nɛ sɩkʋsɩ ɛyaa se powolo peheyi-i se pɩtaacɩbɩ-ɩ se ewoki ɛyaa samaɣ ɖikpeɣliye taa peeye.

³² Ɛyaa samaɣ kpeɣlaa lɛ, ɛyaa wɛɛ pokou yem: paa weyi nɛ ɛ-ñɩndʋ. Mbʋ pʋyɔɔ yɔ, piliɣtaɣ-wɛ. Pa-taa sakɩyɛ tatasɩ ɖiɣzinaʋ mbʋ pʋ-yɔɔ paakpeɣlaa yɔ. ³³ Peeye Yuda ñɩma nabɛyɛ lɩ ɛyaa samaɣ taa nɛ powolo pɛwɛɛtɩ weyi payaɣ se Alɛksandrɩ yɔ tɔm nɛ pɔhɔm-ɩ palɩzɩ ɛyaa tɩŋa ɛsɩndaa se ɛyɔɔdɩnɩ pɔ-nɔɔ. Pʋ-yɔɔ ɛlɛ kpazɩ nesi se paha-ɩ nʋmɔʋ nɛ ɛyɔɔdɩ. ³⁴ Ɛlɛ, peɖiɣzini se Alɛksandrɩ ɛnʋ, ɛkɛ Yuda tʋ. Pʋ-yɔɔ ɛyaa samaɣ pazɩ kou katɩŋa payɩ se: “Efɛɛzɩ ñɩma ɛgɔlɩmɩyɛ Artemiisi kɩlɩnɩ pɩtɩŋa payɩ!” Pɛwɛɛ kou yɔɔ mbʋ nɛ pʋkɔɔ pɩtalɩ ɛzɩ ñɩɣtʋ naalɛ yɔ.

³⁵ Pɩkɛdaa lɛ, takayaɣ taa mayʋ susi-wɛ nɛ ɛpɔzɩ-wɛ se: “Efɛɛzɩ ñɩma mɩ! Anɩ pɩsɛɣ kedeŋa yɔɔ cɩnɛ se eteɖiɣzini se ɛgɔlɩmɩyɛ sɔsɔɖɛ Artemiisi nɛ ɖɩ-sɩʋ kpeleɣ ŋga kalɩnɩ ɛsɔdaa nɛ ketii yɔ, ɖɛ-tɛ Efɛɛzɩ ñɩma cɔŋnɩnɩ pa-ɖɩɣa yɔɔ? ³⁶ Tɔm ndʋ tɩfɛyɩ kpɛzʋʋ. Pʋ-yɔɔ lɛ, pʋwɛɛ se iyele nɛ mɩ-yɔɔ hɛɛ, ɩtaakpedesi nabʋyʋ taa kaʋ. ³⁷ Ɩkɔnɩ ɛyaa panɛ cɩnɛ, ŋgʋ, patakpaɣ pʋyʋ ɖɛ-ɛgɔlɩmɩyɛ ɖɩɣa taa, pɔtɔyɔɔdɩ ɖɩ-yɔɔ tɔm ɛzaɣtʋ natʋyʋ ɖɔɖɔ. ³⁸ Ye nɩŋgbacaɣlɩnaa luɖu Demetriyuusi nɛ ɛ-tʋmlaɖaa pa-taa ɛwɛnɩ nɔɔyʋ yɔ, kɩyakɩŋ weyi paɖʋwa se pahʋʋ tɔm yɔ, ɩwɛɛ. Ñʋŋ tɩnaa ñɛwɛɣ i-wiye ɖɔɖɔ. Ɩ-taa nakʋyʋ wiye papɩzɩɣ powolo payaa pʋdʋ! ³⁹ Ye ɩwɛnɩ natʋyʋ ɖɔɖɔ yɔ, ɩpɩzɩɣ iwoni-tʋ tɔm ɖɩhʋyɛ nɛ pɔñɔɔzɩ-mɩ-tʋ ɛzɩ paɖʋʋ ɖa-paɣtʋ taa yɔ. ⁴⁰ Pɩtɛkɛ mbʋ, tɔm ndʋ tɩtɩŋa tɩlabɩ sɔnɔ yɔ, Room ñɩma kɔŋ pakʋyɩ ɖɔ-yɔɔ se ɖalɩzɩnɩ ñaɖʋʋ nɛ ɖɩkɔɔ ɖihiɣ tɔm sɔsɔtʋ natʋyʋ yem. Mbʋ pʋyɔɔ yɔ, ɖɩfɛyɩnɩ natʋyʋ se ɖiiheyi-wɛ mbʋ pʋ-yɔɔ ɖikpeɣlaa yɔ.”

⁴¹ Ɛtɛm-wɛ yɔɔdɩnaʋ mbʋ lɛ, ɛɖɔɔnɩ ɛyaa samaɣ ŋga.