Pɔɔlɩ nɛ Silaasɩ palabʋ tʋmɩyɛ Tesalooniki yɔ
17
1 Pɔɔlɩ nɛ Silaasɩ pakʋyɩ Liidii tɛ lɛ, patɩŋnɩ Amfipolii nɛ Apolooni pɛ-tɛtʋ taa nɛ pɔkɔɔ patalɩ Tesalooniki ñɩndʋ taa, Yuda ñɩma Ɛsɔ ɖɩsɛyɛ naɖɩyɛ kɛwɛ peeye. 2 Patalaa nɛ pɩtalɩ *kɩyakʋ kɩhɛzʋʋ lɛ, Pɔɔlɩ wolo Ɛsɔ ɖɩsɛyɛ taa ɛzɩ ɛtɩɩlakʋʋ yɔ. Peeye ɛ nɛ Yuda ñɩma palabɩ lɩmaɣza Ɛsɔtɔm Takayaɣ taa tɔm yɔɔ kɩyakɩŋ kɩhɛzɩŋ naadozo. 3 Ɛlɩzɩ-wɛ tɩ-tɔbʋʋ nɛ ɛtɩŋnɩ tɩ-yɔɔ nɛ eheyi-wɛ se *Weyi Ɛsɔ Lɩzaa Yɔ, pɩɩwɛ mbʋ se ɛtɔɔ kʋñɔŋ siŋŋ nɛ ɛkɔɔ ɛsɩ nɛ efe nɛ ɛlɩnɩ sɩɖaa taa. Eheyi-wɛ se Yesu weyi ɛkɛdɩɣ-wɛ ɛ-tɔm yɔ, ɛnʋ lɛ Weyi Ɛsɔ Lɩzaa Yɔ. 4 Ɛyaa mba, pa-taa lɛlaa tisi tɔm ndʋ nɛ patɩŋ Pɔɔlɩ nɛ Silaasɩ pa-wayɩ nɛ pɩkpɛndɩnɩ Grɛɛkɩ ñɩma sakɩyɛ mba pañaŋaɣ Ɛsɔ yɔ nɛ abila naayɛ.
5 Peeye Yuda ñɩma labɩ ɛzɩsɛmɩyɛ nɛ pekpeɣli tɔɔyemwaa nabɛyɛ nɛ pa nɛ wɛ peyele ɛyaa kpeɣli Tesalooniki tɛtʋ ndʋ tɩ-taa nɛ peseɣti-wɛ. Halɩ paaku ɖama nɛ powolo abalʋ weyi payaɣ se Yaasɔɔ yɔ ɛ-tɛ nɛ pañɩnɩɣ Pɔɔlɩ nɛ Silaasɩ se pakpa-wɛ nɛ pahʋnɩ-wɛ samaɣ ɛsɩndaa. 6 Ɛyaa mba powoba lɛ, patana-wɛ. Peeye pakpa Yaasɔɔ nɛ pɛkpɛndɩnɩ taabalaa nabɛyɛ nɛ pɔhɔm-wɛ nɛ powoni tɛtʋ ñʋŋ tɩnaa cɔlɔ nɛ poholuu se: “Ɛyaa panɛ, pɛwɛɛkɩɣ kedeŋa kpeekpe, lɛɛlɛɛyɔ, patalɩ ɖɛ-tɛ cɩnɛ 7 nɛ Yaasɔɔ mʋ-wɛ nɛ pɛwɛɛ ɛ-tɛ! Pa-taa nɔɔyʋ ɛɛɖɔŋ mbʋ Room wiyaʋ sɔsɔ ɖʋwa yɔ pʋ-yɔɔ, pɔyɔɔdʋʋ se nɔɔyʋ wɛɛ ɖɔɖɔ, ɛkɛ wiyaʋ sɔsɔ, ɛnʋ lɛ Yesu.” 8 Tɔm ndʋ, tɩɩcɛyɩ ñʋŋ tɩnaa mba nɛ ɛyaa samaɣ siŋŋ. 9 Ɛlɛ pɛpɛlɩ Yaasɔɔ nɛ ɛ-taabalaa kɩmɩyɛ nɛ pɛhɛyɩ-ɖɩ nɛ pʋcɔ peyebi-wɛ.
Pɔɔlɩ nɛ Silaasɩ palabʋ tʋmɩyɛ Beree yɔ
10 Ɖoo tɩyuwa lɛ, taabalaa heyi Pɔɔlɩ nɛ Silaasɩ se pɛɖɛɛ Beree tɛtʋ taa. Patalaa lɛ, powolo Yuda ñɩma Ɛsɔ ɖɩsɛyɛ taa. 11 Peeye Yuda ñɩma lɩmaɣza kɛwɛ ɖeu nɛ pɩkɩlɩ Tesalooniki ñɩma, mbʋ pʋyɔɔ yɔ, paatisi Ɛsɔtɔm nɛ pa-laŋɩyɛ tɩŋa pilim. Paa ɖooye pañɩnaɣ Ɛsɔtɔm Takayaɣ taa se pana se tɔm ndʋ Pɔɔlɩ yɔɔdʋʋ yɔ, tɩkɛ toovenim na. 12 Pa-taa ɛyaa sakɩyɛ kɛwɛnɩ lidaʋ Yesu yɔɔ, pɩkpɛndɩnɩ Grɛɛkɩ ñɩma: abila nɛ abalaa sakɩyɛ nɛ petisi se tɩkɛ toovenim.
13 Yuda ñɩma mba pɛwɛ Tesalooniki yɔ, panɩwa se Pɔɔlɩ wɛɛ nɛ esusuu Ɛsɔtɔm Beree mbʋ lɛ, pakʋyɩ powolo peeye nɛ peseɣtiɣ ɛyaa nɛ peliɣtiɣ pa-lɩmaɣza. 14 Pʋ-yɔɔ taabalaa tɩheyi Pɔɔlɩ se ɛɖɛɛ teŋgu hɔɔlʋʋ taa. Ɛlɛ, Silaasɩ nɛ Timootee paba ñacaɣ peeye. 15 Ɛɖɛɣaɣ lɛ, nabɛyɛ sɩɩ-ɩ nɛ patanɩ-ɩ Atɛɛnɩ tɛtʋ taa. Papɩsaɣ lɛ, eheyi-wɛ se patalaa lɛ, peheyi Silaasɩ nɛ Timootee se pakʋyɩ kpaka nɛ patɩŋ ɛ-wayɩ.
Pɔɔlɩ labʋ tʋmɩyɛ Atɛɛnɩ yɔ
16 Pɔɔlɩ kaawɛ Atɛɛnɩ nɛ ɛɖaŋ Silaasɩ nɛ Timootee lɛ, ɛna se agɔlɩma coka ɖeke suni tɩ-taa. Pʋ-yɔɔ pɩwɩzɩ-ɩ 17 nɛ ɛtɛzɩ ɖɛʋ ewolo Yuda ñɩma Ɛsɔ ɖɩsɛyɛ taa nɛ ɛ nɛ Yuda ñɩma nɛ mba pɛtɛkɛ Yuda ñɩma nɛ pañaŋ Ɛsɔ yɔ, palakɩ lɩmaɣza Yesu tɔm yɔɔ. Paa ɖooye, ewokaɣ ɛyaa samaɣ ɖikpeɣliye nɛ ɛ nɛ mba pɛwɛ peeye yɔ pɔyɔɔdʋʋ.
18 Peeye lɔŋsɩnɖaa mba pɛkɛ Epikuri nɛ Sitoyiisi pa-agbaa taa ñɩma yɔ, powobi Pɔɔlɩ cɔlɔ nɛ pa nɛ ɩ pɔyɔɔdʋʋ nɛ pa-taa lɛlaa tɔŋ se: “Abalʋ kɔkɔɖɛ yaɖʋ ɛnɛ, se we ɛyɔɔdʋʋ yee?” Lɛlaa ñanɩ ɛyɔɔdaɣ Yesu sɩm nɛ e-fem pɔ-tɔm mbʋ lɛ, paba ñɔtɔŋ se: “Paa pɩɩla ɛzɩma agɔlɩma kɩfana tɔm ɛyɔɔdʋʋ.” 19 Pʋ-yɔɔ pakpaɣ-ɩ powoni ɛyaa samaɣ ɖikpeɣliye ɖenɖe payaɣ se Areyoopajɩ yɔ nɛ pɔpɔzɩ-ɩ se: “Tɔm kɩfatʋ ndʋ ŋwɩlɩɣ ɛyaa ɛzʋnɔ yɔ, tʋtʋ lɛ ndʋ kpem? 20 Mbʋ pʋyɔɔ yɔ, tɔm ndʋ ŋheyiɣ-ɖʋ yɔ, ɖɩtanɩdɩ-tʋ kaʋ, pʋ-yɔɔ ɖɩcaɣ se ɖɩnɩɩ tɩ-tɔbʋʋ.” 21 Toovenim lɛ, Atɛɛnɩ ñɩma tɩŋa payɩ nɛ agɔma mba pɛwɛ peeye yɔ, pa-tʋmɩyɛ lɛ se tɛʋ efema lɛ, pɛwɛɛ tɔm sɔŋʋʋ yɔɔ.
22 Mbʋ hanɩ Pɔɔlɩ waɖɛ nɛ ewolo ɛsɩŋ Areyoopajɩ hɛkʋ taa nɛ eheyi-wɛ se: “Atɛɛnɩ ñɩma mɩ! Manawa se ɩkɛ agɔlɩma tɛɛ luŋiyaa siŋŋ. 23 Mbʋ pʋyɔɔ yɔ, mɔncɔwaɣ mɩ-tɛtʋ taa lɛ, mana agɔlɩma wena a-tɛɛ iluŋaɣ yɔ a-coka. Halɩ mana ɖoli nɔɔyʋ cokiye naɖɩyɛ, pama ɖɩ-yɔɔ se: ‘Ɛgɔlɩmɩyɛ nɖɩ ɖɩtasɩm-ɖɩ yɔ ɖi-cokiye yɔ.’ Tɔɔ! Pʋwɛ ɖeu, mbʋ iluŋuu pɩ-tɛɛ nɛ ɩtasɩm-pʋ yɔ, pʋ-tɔm ma Pɔɔlɩ mɔnkɔm-mɩ heyuu: mbʋ lɛ 24 Ɛsɔ. Ɛnʋ labɩnɩ kedeŋa kpeekpe nɛ mbʋ pɩtɩŋa pʋwɛ kɔ-yɔɔ yɔ, ɛnʋ lɛ Kɩpaɣlʋ ɛsɔdaa nɛ tataa. Ɛɛcakɩ coka wena ɛyaa manɩ pe-nesi yɔ a-tɛɛ. 25 Ɛfɛyɩ kɛtɛɖaɣ taa nɛ pʋpɔzʋʋ se ɛyaa ɛlabɩ-ɩ pʋyʋ. Mbʋ pʋyɔɔ yɔ, ɛnʋ hanɩ patɩŋa payɩ wezuu nɛ mbʋ pɩtɩŋa pʋwɛ kedeŋa yɔɔ yɔ. 26 Ɛtɩŋnɩ ɛyʋ kʋɖʋm weyi ɛlayɩ labʋ yɔ ɛ-yɔɔ nɛ ɛla ɛyaa kpeekpe kedeŋa yɔɔ. Ɛɖʋ-wɛ alɩwaatʋ ndɩ ndɩ nɛ ɛtayɩ-wɛ ajɛɛ. 27 Ɛlabɩ mbʋ se ɛyaa ɛñɩnɩ-ɩ kpeɣu taa kpeɣu taa nɛ pʋtɔmaɣ yɔ, pana-ɩ. Ŋgʋ, Ɛsɔ toposini ɖa-taa nɔɔyʋ. 28 Mbʋ pʋyɔɔ yɔ, ɛ-yɔɔ ɖɩwɛ wezuu nɛ ɖɩlakɩ pɩtɩŋa. Mbʋ ɖɔɖɔ mɩ-tɛ hendu teyaa nabɛyɛ kɔyɔɔdaa. Pɔyɔɔdaa se: ‘Ɖa ɖɔɖɔ ɖɩkɛ e-liɖe taa ñɩma.’
29 Ye mbʋ, pɩfɛyɩ se ɖɩmaɣzɩ se papɩzɩɣ pakpaɣ-ɩ nɛ pɛkɛdɩnɩ sɩʋ kpeleɣ ŋga ɛyaa maɣzaa nɛ polubini sika yaa liidiye yaa pɩyɛ nɛ pacanɩ-kɛ yɔ. 30 Ɛsɔ ɛɛtasɩɣ kpaɣʋ mbʋ ɛyaa kalabɩ ɖooo lɔŋ nɛ patatɩlɩ yɔ nɛ ɛlabɩnɩ tʋmɩyɛ. Ɛlɛ, lɛɛlɛɛyɔ eheyiɣ patɩŋa payɩ paa le se pɛlɛɣzɩ wɛtʋ. 31 Mbʋ pʋyɔɔ yɔ, ɛtɛm ɖʋʋ kɩyakʋ ŋgʋ ɛkɔŋ hʋnaʋ kedeŋa kpeekpe yɔɔ ɛyaa nɛ toovenim yɔ. Ɛyʋ weyi ɛlɩzaa yɔ, ɛ-yɔɔ ɛtɩŋɩɣna nɛ ɛhʋnɩ-wɛ. Mbʋ ɛwɩlɩnɩ paa weyi se ɛkɔŋ-pʋ labʋ yɔ lɛ se efezi-i nɛ sɩɖaa taa.”
32 Mba pɛwɛ peeye yɔ, panɩ Pɔɔlɩ yɔɔdaɣ sɩɖaa fem tɔm mbʋ lɛ, pa-taa lɛlaa woŋ-i nɛ lɛlaa ñɔtɔŋ se: “Wiɖiyi lɛ, ŋŋtasɩ kɔm nɛ ŋheyi-ɖʋ-tʋ.” 33 Peeye ɛkʋyɩ pɛ-hɛkʋ taa nɛ ɛɖɛɛ.
34 Paa mbʋ yɔ, nabɛyɛ kanɩnɩ-ɩ nɛ petisi ɛ-tɔm nɛ pɛwɛnɩ lidaʋ Krɩstʋ yɔɔ. Pa-taa yɔ: Denisi weyi ɛkɛ Areyoopajɩ tɔm hʋyaa taa lɛlʋ yɔ nɛ halʋ weyi payaɣ se Damaari yɔ nɛ lɛlaa ɖɔɖɔ.