Timootee sɩʋ Pɔɔlɩ nɛ Silaasɩ yɔ
16
1 Pɔɔlɩ nɛ Silaasɩ paatɩŋnɩ Dɛɛrbɩ nɛ powolo Listrɩ. Patalaa lɛ, pamaɣnɩ Krɩstʋ wayɩ tɩŋɩyʋ nɔɔyʋ, payaɣ-ɩ se Timootee. E-ɖoo kɛ Yuda tʋ, ɛlɛ wɛnɩ lidaʋ Krɩstʋ yɔɔ. Ɛ-caa ñɛkɛ Grɛɛkɩ tʋ. 2 Listrɩ taabalaa nɛ Ikoniyɔm ñɩma palɩzaɣ aseɣɖe kɩbanɖɛ ɛ-yɔɔ. 3 Pɔɔlɩ liu kɛwɛɛ se ɛkpɛndɩnɩ-ɩ. Pʋ-yɔɔ ɛkpaɣ-ɩ nɛ ɛpɛlɩ-ɩ, mbʋ pʋyɔɔ yɔ, Yuda ñɩma mba paawɛ ageeta ana a-taa yɔ, pana patɩŋa se ɛ-caa kɛ Grɛɛkɩ tʋ.
4 Pɛɖɛɣaɣ nɛ patɩŋnɩ tɛtʋ ndʋ ndʋ tɩ-taa yɔ, peheyaɣ tɩ-taa ñɩma mba pɛwɛnɩ lidaʋ Krɩstʋ yɔɔ yɔ tɔm ndʋ e-*tiyiyaa nɛ Yeruusalɛm Krɩstʋ ɛgbɛyɛ taa *sɔsaa paaɖʋwa yɔ. Paakam pa-ñʋŋ taa se pɔɖɔ tɩ-yɔɔ. 5 Alɩwaatʋ ndʋ lɛ, Krɩstʋ agbaa taa ñɩma tɛzaɣ kpaʋ ɖoŋ pe-lidaʋ wɛnaʋ taa nɛ pɛtɛzɩɣ ɖɔʋ kɩyakɩŋ tɩŋa.
Pɔɔlɩ ɖozuu Trowaasɩ yɔ
6 Ɛsɔ Kalɩzaɣ taaha Pɔɔlɩ nɛ ɛ-taabalaa nʋmɔʋ se posusi Ɛsɔtɔm Aazii egeetiye taa. Pʋ-yɔɔ pakpaɣ nʋmɔʋ nɛ patɩŋnɩ Frijii egeetiye nɛ Galaasii ɛjaɖɛ pa-taa se pɛɖɛɣ. 7 Pɔñɔtɩnɩ Miisii egeetiye lɛ, pala ka ka se powoki Bitinii ñɩnɖɛ taa, ɛlɛ, Yesu Kalɩzaɣ taha-wɛ nʋmɔʋ. 8 Peeye pɛtɛzɩ Miisii ñɩnɖɛ taa tɩŋnaʋ nɛ powolo Trowaasɩ. Tɛtʋ ndʋ tɩ-taa mɛlɛnaa sɩŋɩɣ. 9 Ɖoo yuwa lɛ, Pɔɔlɩ ɖozi se Masedonii tʋ nɔɔyʋ wobi ɛsɩŋ ɛ-yɔɔ nɛ etendi-i se: “Kʋyɩ ŋtɛzɩ ɖɛ-tɛ nɛ ŋsɩnɩ-ɖʋ.” 10 Pɔɔlɩ tɛm ɖozuu mbʋ lɛ, ɛ nɛ ɛ-taabalaa nɛ ma Luka ɖɩtɩkʋyɩ nɛ ɖɩpazɩ ñɩnʋʋ ɛzɩma mbʋ ɖɩɩla nɛ ɖiwolo Masedonii egeetiye taa yɔ. Mbʋ pʋyɔɔ yɔ, ɖɩtɛm naʋ se Ɛsɔ yaɣnɩ-ɖʋ se ɖiwolo peeye nɛ ɖisusi Laŋhɛzɩyɛ Tɔm.
Pɔɔlɩ wokuu Masedonii egeetiye taa yɔ
11 Peeye ɖɩsʋ mɛlɛ Trowaasɩ nɛ ɖɩɖɛɛ Samootrasɩ ɛjaɖɛ nɖɩ lɩm cɔ-ɖɩ kondiko yɔ ɖɩ-hɔɔlʋʋ taa kpaagbaa. Tɛʋ fema lɛ, ɖiwolo Neyapoliisi. 12 Ɖɩkʋyɩ Neyapoliisi lɛ, ɖiwolo Room ñɩma tɛtʋ taa Masedonii egeetiye taa, payaɣ-tʋ se Filiipu. Ndʋ kakɩlɩnɩ wazaɣ. Tɩ-taa peeye ɖɩcaɣ kɩyakɩŋ cabɩ.
13 Pɩtalɩ *kɩyakʋ kɩhɛzʋʋ lɛ, ɖɩlɩnɩ tɩ-taa nɛ ɖiwolo pɔɔ nɔɔ ɖenɖe ɖɩmaɣzaɣ se Yuda ñɩma Ɛsɔ ɖɩsɛyɛ naɖɩyɛ wɛɛ yɔ. Ɖɩtalaa lɛ, ɖɩmaɣnɩ halaa kpeɣlaa, ɛlɛ ɖɩcaɣ pɔ-cɔlɔ nɛ ɖiheyiɣ-wɛ Ɛsɔtɔm. 14 Halaa mba, payaɣ pa-taa lɛlʋ se Liidii, ɛkɛ Tiyaatiiri tʋ nɛ ɛpɛdɩɣ pɩsaŋ kɩsɛmɩŋ. Ɛñaŋaɣ Ɛsɔ, Kɩpaɣlʋ kuli ɛ-lɩmaɣza yɔɔ se ɛnɩnɩ Pɔɔlɩ camɩyɛ. 15 Peeye ɖɩlabɩ-ɩ *lɩm sɔʋ sɔnzɩ nɛ pɩkpɛndɩnɩ ɛ-hɔʋ taa ñɩma tɩŋa. Pʋwayɩ lɛ, ɛyaa-ɖʋ nɛ eheyi-ɖʋ se: “Ye toovenim taa itisaa se mɛwɛnɩ lidaʋ Kɩpaɣlʋ Ɛsɔ yɔɔ yɔ, ɩkɔɔ ɩwɛɛ mɛn-tɛ.” Ɛlɛ ɛcɛyɩ-ɖʋ nɛ ɖitisi.
Paɖʋʋ Pɔɔlɩ nɛ Silaasɩ salaka Filiipu tɛtʋ taa yɔ
16 Nakʋyʋ wiye ɖa nɛ Pɔɔlɩ ɖiwokaɣ Ɛsɔ ɖɩsɛyɛ taa lɛ, pɛlɛ nɔɔyʋ katɩ-ɖʋ, ɛkɛ tʋmlaɖʋ. Ekem eleeu nɔɔyʋ nɛ ɛcɔʋ ɛtɩyɩɣ nɛ eheyiɣ ɛyaa mbʋ pʋkɔŋ labʋ yɔ nɛ ɛkɔŋnɩ ɛ-caanaa liidiye sakɩyɛ. 17 Pɛlɛ ɛnʋ, ɛna-ɖʋ mbʋ lɛ, ɛtɩŋɩɣ-ɖʋ nɛ ɛmakɩ kubusi se: “Ɛyaa panɛ pɛkɛ Ɛsɔ Caabiyuu tʋmlaɖaa, posusuu-mɩ ñʋʋ yabʋ tɔm.” 18 Ɛmakaɣ kubusi mbʋ kɩyakɩŋ sakɩyɛ. Pʋkɔm pɩɖɛɛ Pɔɔlɩ lɛ, ɛpɩsɩnɩ pɛlɛ ɛnʋ ɛ-yɔɔ nɛ eholini eleeu weyi ɛwɛ ɛ-wayɩ yɔ se: “Yesu Krɩstʋ ɖoŋ taa lɛ, meheyiɣ-ŋ se ŋse pɛlɛ ɛnʋ ɛ-wayɩ!” Kpaagbaa mbʋ lɛ, eleeu ɛnʋ ese.
19 Pɛlɛ ɛnʋ ɛ-caanaa nawa se ɛɛtasɩɣ-wɛ liidiye cazʋʋ lɛ, pakpa Pɔɔlɩ nɛ ɛ-taabalʋ Silaasɩ nɛ pɔhɔm-wɛ nɛ powoni ɛyaa samaɣ ɖikpeɣliye tɛtʋ ñʋŋ tɩnaa cɔlɔ. 20 Patanɩ-wɛ Room ñʋŋ tɩnaa cɔlɔ lɛ, peheyi-wɛ se: “Ɛyaa panɛ, pɛwɛɛ nɛ pɛwɛɛkɩɣ ɖɛ-tɛtʋ. Pɛkɛ Yuda ñɩma 21 nɛ pawɩlɩɣ-ɖʋ sɔnzɩ nzɩ pɩtaha ɖa Room ñɩma nʋmɔʋ se ɖitisi yaa ɖɩla yɔ.” 22 Peeye ɛyaa samaɣ kʋyɩ pɔ-yɔɔ ɖɔɖɔ nɛ ñʋŋ tɩnaa ha nɔɔ se pacɩyɩ pɔ-yɔɔ wondu nɛ piyele polu-wɛ agbazɛɛ. 23 Pɛtɛm-wɛ luu siŋŋ lɛ, powoni-wɛ paɖʋ salaka nɛ peheyi weyi ɛɖaŋɩɣ kɔ-nɔnɔɔ yɔ se ɛɖaŋ-wɛ camɩyɛ kpam. 24 Pʋ-yɔɔ ɛlɛ kpaɣ-wɛ nɛ ɛsʋnɩ ɖooo pɩ-taa kuduyuu taa nɛ ɛka pa-naŋgbanzɩ ɖaŋ pɔŋ taa.ILLUSTRATION 23
25 Pɩkɛdɩ ɖoo hɛkʋ taa lɛ, Pɔɔlɩ nɛ Silaasɩ pɛsɛɣ Ɛsɔ nɛ pasaŋ-ɩ nɛ hendu nɛ salaka tɩnaa lɛlaa welesiɣ. 26 Pɩkɛdaa lɛ, tɛtʋ tɩñamsɩ siŋŋ nɛ pɩkpɛndɩnɩ salaka kuduyuu nɛ kʋ-nɔnɔsɩ tɩŋa tɩtʋlɩ yem nɛ yoŋgbasɩ nzɩ paaɖɩ salaka tɩnaa tɩŋa yɔ sɩtɩcɛbʋ. 27 Peeye kɔ-yɔɔ ɖaŋɩyʋ fema nɛ ɛnaɣ kɔ-nɔnɔsɩ tɩŋa tʋlɩ yem haaa. Pʋ-yɔɔ ɛlɩzɩ ɛ-sɩɣa se ɛtɛzɩɣ ɛ-tɩ kʋʋ nɛ ɛhɛzɩ. Mbʋ pʋyɔɔ yɔ, ɛmaɣzaɣ se paa pɩɩla ɛzɩma yɔ, salaka tɩnaa tɩŋa lɩwa pese.
28 Ɛlɛ, Pɔɔlɩ ma kubuka leɣ leɣ se: “Ɖatɩŋa ɖɩwɛɛ yooo, taakʋ ña-tɩ!” 29 Peeye ɖaŋɩyʋ ɛnʋ ɛtɔm se pɔkɔnɩ-ɩ miŋ. Pɔkɔnɩ-ɩ lɛ, ɛtɩsʋʋ ɖooo pɩ-taa ɖenɖe ɛɖɩɣ Pɔɔlɩ nɛ Silaasɩ yɔ nɛ eluŋ pɛ-tɛɛ. Sɔɔndʋ kakpa-ɩ nɛ ɛ-nandʋ paɣ. 30 Ɛlɛ ɛlɩzɩ-wɛ nɛ awayɩ nɛ ɛpɔzɩ-wɛ se: “Caawaa! Ɛbɛ pʋwɛɛ se mala nɛ mehiɣ ñʋʋ yabʋ?” 31 Paba cosi-i se: “Wɛnɩ lidaʋ Kɩpaɣlʋ Yesu yɔɔ nɛ ɛya ña-ñʋʋ nɛ pɩkpɛndɩnɩ ñɔ-hɔʋ taa ñɩma.” 32-33 Peeye ɛkpaɣ-wɛ nɛ ɖoo ana nɛ ewoni ɛ-tɛ nɛ peheyi ɛ nɛ ɛ-hɔʋ taa ñɩma tɩŋa Kɩpaɣlʋ tɔm. Pɛtɛm-wɛ heyuu lɛ, ɛñalɩ pa-kɩcɩkpɩŋ taa. Pʋwayɩ lɛ, Pɔɔlɩ nɛ Silaasɩ pala ɛ nɛ ɛ-ñɩma mba patɩŋa *lɩm sɔʋ sɔnzɩ. 34 Ɛlɛ ewoni-wɛ e-kuduyuu tɛɛ nɛ ɛha-wɛ tɔɔnaɣ nɛ pɔtɔɔ nɛ ɛ nɛ ɛ-hɔʋ taa ñɩma tɩŋa payɩ pa-taa hʋlʋmɩ pɩtɩɩfɛyɩ, mbʋ pʋyɔɔ yɔ, pɛwɛnɩ lidaʋ Ɛsɔ yɔɔ.
35 Tɛʋ fema lɛ, Room ñʋŋ tɩnaa tiyi karɩsɩ nasɩyɩ se siwolo siheyi salaka yɔɔ ɖaŋɩyʋ ɛnʋ se ɛlɩzɩ Pɔɔlɩ nɛ Silaasɩ salaka taa. 36 Peeye ɛkʋyɩ hɛɛɛ nɛ ewolo eheyi Pɔɔlɩ se: “Ñʋŋ tɩnaa tiyaa nɛ peheyi-m se malɩzɩ-mɩ salaka taa. Pʋ-yɔɔ lɛ, ɩlɩɩ ikpemni laŋhɛzɩyɛ.” 37 Ɛlɛ, pɩtamaɣ Pɔɔlɩ nɛ eheyi karɩsɩ nzɩ se: “Mɩ-ñʋŋ tɩnaa yeba nɛ pamabɩ-ɖʋ ɛyaa tɩŋa hɛkʋ taa nɛ patahʋʋ ɖɔ-tɔm natʋyʋ kaʋ nɛ powoni-ɖʋ paɖʋ salaka. Ŋgʋ ɖa ɖɔɖɔ ɖɩkɛ Room ñɩma*fc*. Lɛɛlɛɛyɔ petiyiɣ mɛsaɣ tɛɛ se peyebi-ɖʋ yaa we? Pɩɩlakɩ mbʋ kpem! Iwolo iheyi-wɛ se pɔkɔɔ pa-maɣmaɣ nɛ palɩzɩ-ɖʋ.” \fm c \fr (16.37) \fk Room ñɩma: \f Room ñɩma paɣtʋ taa lɛ, pɩtaha nʋmɔʋ se poluu Room tʋ agbazɛɛ. Ɩcɔnɩ Tʋma 22.23-29.
38 Paba pɩsaa peheyi-wɛ se Pɔɔlɩ nɛ Silaasɩ pɛkɛ Room ñɩma ɖɔɖɔ lɛ, sɔɔndʋ kpa-wɛ. 39 Peeye pakʋyɩ pa-maɣmaɣ nɛ powolo pɛhɛzɩ pa-laŋa nɛ palɩzɩ-wɛ salaka taa nɛ petendi-wɛ se pakʋyɩ tɛtʋ ndʋ tɩ-taa. 40 Pɔɔlɩ nɛ Silaasɩ palɩ salaka taa peeye lɛ, powolo Liidii tɛ. Peeye pana taabalaa nɛ peyele pɩla paba hʋnʋm. Pʋwayɩ lɛ, pɛɖɛɛ.