Luka 12

Tɛɛ nɛ pʋ-yɔɔ lakasɩ kizuu tɔm

(Mat 10.26-27)

¹ Alɩwaatʋ ndʋ tɩ-yɔɔ lɛ, ɛyaa kpeɣli kamaɣ fɛyɩ nɛ pɛfɛyɩɣ ɖama naŋgbanzɩ yɔɔ. Ɛlɛ Yesu calɩnɩ paɣʋ ɛ-tɔmkpɛlɩkɩyaa se: “Ɩɖɔkɩ mɩ-tɩ nɛ *Farɩsɩ ñɩma sɔsɔɔna. Pɛ-tɛɛ nɛ pʋ-yɔɔ lakasɩ tɔm mɔyɔɔdʋʋ mbʋ. ² Mbʋ pɩtɩŋa pʋwɛ mɛsaɣ tɛɛ yɔ, pɔkɔŋ pʋ-yɔɔ kuluu nɛ paa weyi ɛna. ³ Pʋ-yɔɔ lɛ, tɔm ndʋ tɩtɩŋa ɩwɛɛtɩɣ ɖama mi-kuduyiŋ tɛɛ nɛ cɩkpɛndʋʋ taa yɔ, pɔkɔŋ-tʋ susuu paa le nɛ paa weyi ɛnɩɩ.”

Weyi pʋmʋnaa se ɩsɔɔndɩ yɔ

(Mat 10.28-31)

⁴ “Mba mɩ ɩkɛ man-taabalaa yɔ, meheyiɣ-mɩ se ɩtaasɔɔndɩ mba pakʋʋ tomnaɣ nɛ pʋwayɩ lɛ, paapɩzɩɣ patasɩ pʋyʋ labʋ yɔ. ⁵ Mawɩlɩɣ-mɩ weyi pʋmʋnaa se ɩsɔɔndɩ yɔ: ɩsɔɔndɩ Ɛsɔ, mbʋ pʋyɔɔ yɔ, e-ɖeke ɛpɩzɩɣna ɛkʋ ɛyʋ nɛ ɛtɛ ɛɖʋ-ɩ ɖenɖe kʋñɔŋ pɩɩtɛŋ wɛɛ yɔ. Meheyiɣ-mɩ se ɛnʋ pʋmʋnaa se ɩsɔɔndɩ.

⁶ Paa kobanaa naalɛ pɛpɛdɩɣ sumasɩ cɩʋcɩʋwaa kagbaanzɩ yɔ, Ɛsɔ ɛɛsɔʋ pa-taa nɔɔyʋ yɔɔ kaʋ. ⁷ Halɩ mɩ-ñʋŋ taa ñɔsɩ wɛʋ yɔ, Ɛsɔ kalɩ sɩtɩŋa payɩ. Pʋ-yɔɔ lɛ, ɩtaasɔɔndɩ. Ɩkɩlɩ sumasɩ cɩʋcɩʋwaa sakɩyɛ wazaɣ.”

Weyi ɛkaɖɩɣ se Yesu tɩnɩ-ɩ yɔ nɛ weyi ɛkpɛzɩɣ se pɩtɛkɛ ɛnʋ tɩnɩ-ɩ yɔ pɔ-tɔm

(Mat 10.32-33; 12.32; 10.19-20)

⁸ “Meheyiɣ-mɩ se weyi ɛkaɖɩɣ ɛyaa taa se mantɩnɩ-ɩ yɔ, *Ɛyʋ Pɩyalʋ ma mankaɖɩɣ ɖɔɖɔ Ɛsɔ *tiyiyaa ɛsɩndaa se mantɩnɩ-ɩ. ⁹ Ɛlɛ, weyi ɛkpɛzɩɣ ɛyaa ɛsɩndaa se pɩtɛkɛ mantɩnɩ-ɩ yɔ, mɔnkɔŋ kpɛzʋʋ ɖɔɖɔ Ɛsɔ tiyiyaa ɛsɩndaa se pɩtɛkɛ mantɩnɩ-ɩ.

¹⁰ Ye nɔɔyʋ ɛtʋ Ɛyʋ Pɩyalʋ ma yɔ, Ɛsɔ kpeɣiɣ-i. Ɛlɛ, ye ɛyʋ ɛwɛɛkɩ Ɛsɔ Kalɩzaɣ hɩɖɛ yɔ, Ɛsɔ eekpeɣiɣ-i kaʋ.

¹¹ Ye paya-mɩ se pahʋʋnɩ-mɩ Ɛsɔ ɖɩsɛyɛ taa yaa ñʋŋ tɩnaa cɔlɔ yɔ, ɩtaanɩɣzɩ tɔm ndʋ ɩɩhʋʋ nɛ ɩlɩɩ yɔ tɩ-yɔɔ. ¹² Mbʋ pʋyɔɔ yɔ, Ɛsɔ Kalɩzaɣ wɩlɩɣ-mɩ ndʋ pʋmʋnaa se ɩyɔɔdɩ alɩwaatʋ ndʋ yɔ.”

Ñɩm tʋ kɩmɛlɛŋ tɔm

¹³ Yesu yɔɔdaɣ mbʋ lɛ, nɔɔyʋ kʋyɩ ɛyaa samaɣ taa nɛ eheyi-i se: “Wɩlɩyʋ! Heyi man-ɖalʋ se ma nɛ ɩ ɖɩtayɩ ñɩm mbʋ ɖa-caa yebini-ɖʋ yɔ.” ¹⁴ Peeye Yesu pɩsɩnɩ-ɩ se: “Man-taabalʋ ña! Aɖʋ-m se mahʋʋ mɩ-tɔm nɛ mantayɩ-mɩ mɩ-ñɩm?” ¹⁵ Pʋwayɩ lɛ, eheyi patɩŋa se: “Ɩɖɔkɩ mɩ-tɩ camɩyɛ nɛ ñɩm laɣzaɣ. Mbʋ pʋyɔɔ yɔ, paa ɛyʋ ɛwɛnɩ ñɩm ɛzɩma yɔ, e-wezuu caɣʋ ɛɛlɩɣnɩ pʋ-cɔlɔ.” ¹⁶ Peeye etuu-wɛ eduuye se: “Ñɩm tʋ nɔɔyʋ kɛwɛnɩ hayɩm nɛ pɩlakɩ tɔɔnaɣ pɩtɩɩfɛyɩ. ¹⁷ Ɛlɛ, ɛcaɣ nɛ ɛmaɣzɩ ɛ-taa se: ‘Mala ɛzɩma lee? Kpoŋ ɛɛtalɩɣ-m se monsuu mɔn-tɔɔnaɣ tɩŋa.’ ¹⁸ Peeye ɛtɔm se: ‘Mana mbʋ malakɩ yɔ. Mɔyɔkʋʋ mon-kpoŋ ɩnɛ nɛ manɖaɣnɩ maʋ sɔsɔŋ nɛ monsuu mɔn-tɔɔnaɣ tɩŋa nɛ ma-ñɩm lɛɛbʋ tɩŋa. ¹⁹ Pʋwayɩ lɛ, meheyi man-tɩ se: lɛɛlɛɛyɔ mɛwɛnɩ ñɩm pɩŋŋ, pɩtalɩɣ-m pɩnzɩ sakɩyɛ. Mancakɩ mɛhɛzɩ nɛ mɔntɔɔ nɛ mɔñɔɔ nɛ mamayɩ amaya.’ ²⁰ Ɛlɛ, Ɛsɔ heyi-i se: ‘Kɩmɛlɛŋ ña! Sɔnɔ ɖoo anɛ a-taa maɣmaɣ ŋsɩkɩ. Ɛlɛ akaɣ kpaɣʋ mbʋ pɩtɩŋa ŋɖaɣnaa nɛ ŋsɩɩ ña-tɩ yɔ?’ ” ²¹ Peeye Yesu tasɩ yɔɔdʋʋ se: “Mbʋ ɖɔɖɔ pʋwɛnɩ weyi ɛcazɩɣ kedeŋa yɔɔ cɩnɛ ñɩm nɛ ɛsɩɣ ɛ-tɩ yɔ. Ɛtɛkɛ ñɩm tʋ Ɛsɔ ɛsɩndaa.”

Ɛsɔ yɔɔ lidaʋ wɛnaʋ

(Mat 6.25-34)

²² Pʋwayɩ lɛ, Yesu heyi ɛ-tɔmkpɛlɩkɩyaa se: “Pʋ-yɔɔ meheyiɣ-mɩ se ɩtaanɩɣzɩ tɔɔnaɣ ŋga ɩɩtɔɔ yaa wondu ndʋ iisuu mi-wezuu caɣʋ taa yɔ pʋ-yɔɔ. ²³ Mbʋ pʋyɔɔ yɔ, wezuu kɩlɩ tɔɔnaɣ wazaɣ nɛ tomnaɣ ñakɩlɩ wondu wazaɣ. ²⁴ Ɩcɔnɩ sumasɩ nɛ ɩna: siiɖuu, sɩɩkʋŋ. Sɩfɛyɩnɩ kpoŋ yaa tɔɔnaɣ ɖɩzɩyɛ. Ɛlɛ, Ɛsɔ calɩɣ-sɩ. Ŋgʋ, mɩkɩlɩ sumasɩ wazaɣ tɔm sakɩyɛ. ²⁵ Mɩ-taa weyi ɛyɔkʋʋ ɛ-ñʋʋ nɛ ɛpɩzɩ etuzi ɛ-sɩm kɩyakʋ? ²⁶ Ye ɩɩpɩzɩɣ pʋyʋ cikpelu ɛnɛ labʋ lɛ, ɛbɛ yɔɔ ɩyɔkʋʋ mɩ-ñʋŋ lɛɛbʋ mbʋ pɩkazaa yɔ pʋ-yɔɔ yɔ? ²⁷ Ɩcɔnɩ tɛyɛ ñɩtʋ lɩzɩɣ hɛtʋ ndʋ yɔ nɛ ɩna. Ñɩtʋ ndʋ, tɩɩlakɩ tʋmɩyɛ, tɩɩlʋʋ wondu. Ɛlɛ, meheyiɣ-mɩ se halɩ wiyaʋ sɔsɔ Salomɔɔ nɛ ɛ-ñɩm tɩŋa yɔ, ɛtaawɛnɩ wonuu nakʋyʋ nɛ kɩtalɩ hɛtʋ ndʋ tɩ-taa nakʋyʋ ɖeu. ²⁸ Lidaʋ pazɩ tɩnaa mɩ! Ɛsɔ tekizi haʋ ñɩtʋ ndʋ tɩwɛ hayɩm taa sɔnɔ nɛ cee pɔkɔŋ-tʋ ɖʋʋ miŋ taa yɔ ɖeu nɛ pɩcandɩnɩ mɩ na! ²⁹ Mɩ-ɛza ɛtaasɛnɩ mbʋ ɩɩtɔɔ nɛ ɩñɔɔ yɔ pɩ-ñɩnʋʋ nɛ lɩmaɣza kʋ-mɩ. ³⁰ Mbʋ pʋyɔɔ yɔ, keɖeŋa yɔɔ cɩnɛ mba paañaŋ Ɛsɔ yɔ, pañɩnɩɣnɩ pɩtɩŋa payɩ mbʋ. Ɛlɛ mɩ yɔ, mɩwɛnɩ Caa, ɛnʋ sɩmna mbʋ pɩtɛɖɩɣ-mɩ yɔ. ³¹ Pʋ-yɔɔ lɛ, pʋwɛɛ se ɩcalɩnɩ ñɩnʋʋ Ɛsɔ Kewiyaɣ nɛ ɛtɛzɩ-mɩ haʋ mbʋ pɩtɛɖɩɣ-mɩ yɔ pɩtɩŋa payɩ.”

Ɖenɖe pʋwɛɛ se ɛyʋ ɛsɩɩ ɛ-ñɩm yɔ

(Mat 6.19-21)

³² Yesu tasɩ ɛ-tɔmkpɛlɩkɩyaa heyuu se: “Mba mɩ ɩtɔɖɔɔ yɔ, ɩtaasɔɔndɩ. Mbʋ pʋyɔɔ yɔ, mɩ-Caa sɔɔlaa se ɩsʋʋ e-Kewiyaɣ taa. ³³ Ɩpɛdɩ mɩ-ñɩm nɛ ɩtayɩ kʋñɔndɩnaa pi-liidiye. Ɩwɛnɩ liidiye huyiŋ weyi ɩɩtʋlʋʋ wiɖiyi kaʋ yɔ nɛ ñɩm mbʋ pɩɩtɛŋ yɔ ɛsɔdaa ɖenɖe mɩlaa ɛɛmɩlɩɣ nɛ pʋyʋ ɛɛpɩzɩɣ pɩwɛɛkɩ-pʋ kaʋ yɔ. ³⁴ Mbʋ pʋyɔɔ yɔ, ɖenɖe ña-ñɩm wɛɛ yɔ, peeye ɖɔɖɔ ña-lɩmaɣza wɛɛ.”

Tʋmlaɖaa kɩbama tɔm

³⁵ Yesu tasɩ-wɛ heyuu se: “Ɩñɔɔzɩ mɩ-tɩ camɩyɛ nɛ ɩsɔ mɩ-kanɖʋnaa ³⁶ ɛzɩ tʋmlaɖaa mba paɖaŋ pa-caa kpam se ɛlɩɣnɩ halɩkpaɣyɛ ɖeɖe nɛ ɛkɔɔ ɛma pɔɔyʋʋ lɛ, patɩŋ patʋlɩ-ɩ yɔ. ³⁷ Toovenim lɛ, mankaɖɩɣ-mɩ se: ye tʋmlaɖaa mba pa-caa ɛtalaa nɛ ɛmaɣnɩ pacaɣnɩ pɛ-ɛza nɛ paɖaŋ-ɩ yɔ, pehiɣ pa-tɩ! Ɛñɔɔzʋʋ ɛ-tɩ nɛ ɛwɩlɩ-wɛ ɖɩjaɣyɛ se pacaɣ nɛ ɛɖʋ-wɛ tɔɔnaɣ. ³⁸ Paa ɖoo hɛkʋ taa yaa tanaŋ cu ɛkɔm ɛmaɣnɩ-wɛ mbʋ nɛ pɛ-ɛza yɔ, pehiɣ pa-tɩ. ³⁹ Ɩtɩlɩ ɖɔɖɔ se ye ɖɩɣa tʋ nɔɔyʋ ɛɛsɩm alɩwaatʋ ndʋ tɩ-yɔɔ mɩlʋ kɔŋ yɔ yɔ, ɛtaayebi-i se ɛsʋʋ ɛ-ɖɩɣa taa. ⁴⁰ Pʋ-yɔɔ lɛ, mɩ ɖɔɖɔ ɩñɔɔzɩ mɩ-tɩ, mbʋ pʋyɔɔ yɔ, *Ɛyʋ Pɩyalʋ kɔŋ alɩwaatʋ ndʋ ɩtamaɣzɩ yɔ tɩ-yɔɔ.”

Tʋmlaɖʋ kɩbanʋ nɛ tʋmlaɖʋ ɛzaɣʋ pɔ-tɔm

(Mat 24.45-51)

⁴¹ Yesu yɔɔdɩ mbʋ lɛ, Pɩyɛ pɔzɩ-ɩ se: “Kɩpaɣlʋ! Ɖe-ɖeke ŋtuu eduuye nɖɩ yaa ɛyaa tɩŋa?” ⁴² Ɛlɛ ɛpɩsɩnɩ-ɩ se: “Akɛ tʋmlaɖʋ kɩbanʋ weyi ɛwɛ lɛɣtʋ yɔ? Ɛnʋ lɛ weyi ɛ-caa yekini-i ɖɩɣa se ɛcɔŋnɩ kɔ-yɔɔ nɛ ɛcɛlɩɣ tʋmlaɖaa lɛlaa tɔɔnaɣ alɩwaatʋ ndʋ pʋmʋnaa yɔ. ⁴³ Tʋmlaɖʋ weyi ɛ-caa pɩsɩɣ nɛ ɛmaɣnɩ-ɩ ɛɖɔŋ ɛ-tʋmɩyɛ labʋ yɔ, ehiɣ ɛ-tɩ! ⁴⁴ Toovenim lɛ, mankaɖɩɣ-mɩ se: ɖɩɣa tʋ ɛnʋ eyekini-i ɛ-ñɩm tɩŋa se ɛcɔnɩ pʋ-yɔɔ. ⁴⁵ Ɛlɛ, ye pɩcɩbɩ tʋmlaɖʋ ɛnʋ nɛ ɛɖʋ ɛ-taa se ɛ-caa ɛɛkaɣ kɔm lɔŋ nɛ ɛtɔkɩ nɛ ɛñɔʋ nɛ pʋkʋʋ-ɩ nɛ ɛsʋʋ tʋmlaɖaa lɛlaa halaa ñɩma nɛ abalaa ñɩma pa-mabʋ yɔɔ yɔ, ⁴⁶ ɖɩɣa tʋ ɛnʋ, ɛkɔŋ kɩyakʋ nakʋyʋ ñɩɣyʋʋ ŋgʋ ɛtatɩlɩ yɔ kʋ-yɔɔ nɛ etudi-i nɛ ɛɖʋ-ɩ kʋñɔŋ siŋŋ ɛzɩ palakʋʋ mba paañaŋ Ɛsɔ yɔ.

⁴⁷ Tʋmlaɖʋ weyi ɛsɩm mbʋ ɛ-caa liu wɛɛ yɔ nɛ ɛtɔñɔɔzɩ ɛ-tɩ se ɛlabɩ-pʋ yɔ, poluu-i agbazɛɛ ɖeu siŋŋ. ⁴⁸ Ɛlɛ, tʋmlaɖʋ weyi ɛlɛ taasɩ mbʋ ɛ-caa liu wɛɛ yɔ nɛ ɛla mbʋ pɩfɛyɩ ɖeu yɔ, pamakɩ-ɩ pazɩ. Weyi paha-ɩ sakɩyɛ yɔ, pɔkɔŋ-ɩ pɔzʋʋ sakɩyɛ. Weyi paɖʋzɩ ɛlɛ nesi taa sakɩyɛ yɔ, pɔkɔŋ-ɩ pɔzʋʋ nɛ pɩkɩlɩ mbʋ.”

Yesu kɔm nɛ tayʋʋ wɛɛ ɛyaa hɛkʋ taa yɔ

(Mat 10.34-36)

⁴⁹ “Mɔnkɔm se manɖʋ kedeŋa miŋ. Ɩna ɛzɩma mbʋ mɔnsɔɔlaa se ɛtɛ pazʋʋ mʋʋ yɔ? ⁵⁰ Pʋwɛɛ se mansʋʋ kʋñɔŋ taa ɛzɩ pamɩɩsʋʋ ɛyʋ lɩm yɔ. Ɩna ɛzɩma mbʋ mɛwɛɣ ɛsɛñɩŋɩyɛ taa nɛ pʋkɔɔ pɩsɩnɩ alɩwaatʋ ndʋ pɩlabɩ mbʋ yɔ! ⁵¹ Ɩmaɣzɩɣ se laŋhɛzɩyɛ mɔnkɔnɩ kedeŋa yɔɔ yaa we? Meheyiɣ-mɩ se pɩtɛkɛ mbʋ. Ɛlɛ, tayʋʋ mɔnkɔnaa. ⁵² Pɩkpaɣʋnɩ lɛɛlɛɛyɔ yɔ, ɛyaa ɛwɛ kagbaanzɩ hɔʋ nakʋyʋ taa yɔ, patayɩɣ ɖama: naadozo kʋyʋʋ naalɛ yɔɔ nɛ naalɛ ñakʋyɩ ɖɔɖɔ naadozo yɔɔ. ⁵³ Caja kʋyʋʋ ɛ-pɩyalʋ yɔɔ nɛ pɩyalʋ ñakʋyɩ ɛ-caa yɔɔ. Ɖoyo kʋyʋʋ ɛ-pɛlɛ yɔɔ nɛ pɛlɛ ñakʋyɩ e-ɖoo yɔɔ. Waŋ kʋyʋʋ e-wolu yɔɔ nɛ wolu ñakʋyɩ ɛ-waŋ yɔɔ.”

Alɩwaatʋ ɖiɣzinaʋ tɔm

(Mat 16.2-3)

⁵⁴ Pʋwayɩ lɛ, Yesu tasɩ ɛyaa samaɣ heyuu se: “Ye ɩna tɛʋ piyini wɩsɩ ɖɩɖʋyɛ yɔ, ɩyɔɔdʋʋ kpaagbaa se: ‘Sɔnɔ tɛʋ nɩɣ,’ mbʋ lakɩna. ⁵⁵ Alɩwaatʋ ndʋ ɩnaɣ heɣlim makɩ kpaʋ yɔɔ lɛ, ɩyɔɔdʋʋ se: ‘Sɔnɔ soŋaɣ wɛɣ,’ mbʋ lakɩna. ⁵⁶ Tɛɛ nɛ pʋ-yɔɔ ñɩma mɩ! Pɩlabɩ ɛzɩma ɩnaɣ mbʋ pɩlakɩ ɛsɔdaa nɛ tataa yɔ nɛ ɩnɩɣ pʋ-tɔbʋʋ nɛ ɩnaɣ mbʋ Ɛsɔ lakɩ mɩ-hɛkʋ taa lɛɛlɛɛyɔ yɔ nɛ ɩɩnɩɣ pʋbʋ tɔbʋʋ?”

Ɛyʋ nɛ e-koyindu peceɣuu yɔ

(Mat 5.25-26)

⁵⁷ “Pɩlabɩ ɛzɩma nɛ mɩ-maɣmaɣ iiɖiɣziɣni mbʋ pʋtʋʋzaa yɔ? ⁵⁸ Ye ŋyʋsɩnɩ nɔɔyʋ nɛ ewokini-ŋ wiyaʋ tɛ yɔ, cɛyɩ ña-tɩ nɛ ña nɛ ɩ ɩñɔɔzɩ tɔm ndʋ nʋmɔʋ taa nɛ ɛtaatanɩ-ŋ tɔm hʋyʋ tɛ. Pɩtɛkɛ mbʋ, ɛlɛ cɛlɩɣ-ŋ sɔɔjanaa nɛ paɖʋ-ŋ salaka. ⁵⁹ Toovenim lɛ, meheyiɣ-ŋ se: paɖʋ-ŋ-kɛ yɔ, ŋwɛɣ peeye mbʋ ka ka nɛ pʋkɔɔ pɩsɩnɩ kɩyakʋ ŋgʋ ŋhɛyɩ ña-kɩmɩyɛ tɩŋa payɩ nɛ pɩtakazɩ paa koba yɔ.”