Patam Yesu yɔɔ nɔɔ yɔ
(Mat 26.1-5; Luk 22.1-2; Yoh 11.45-53)
14
1 Pɩkazɩ kɩyakɩŋ naalɛ se pɔtɔɔ Izrɛɛlɩ ñɩma Yomiye Taa Lɩʋ *Kazandʋ ndʋ pɔtɔkɩ sɔsɔɔna fɛyɩ tindine yɔ. Pʋ-yɔɔ *Yuda ñɩma *cɔjɔnaa *sɔsaa nɛ pa-paɣtʋ wɩlɩyaa pañɩnaɣ ɛzɩma mbʋ paala nɛ pakpa Yesu hɛɛɛ nɛ pakʋ-ɩ nɛ nɔɔyʋ ɛtaana yɔ. 2 Peeye pɔyɔɔdɩnɩ ɖama se: “Ɖɩtaakpa-ɩ kazandʋ alɩwaatʋ, pɩtɛkɛ mbʋ, ɛyaa kʋyʋʋ ɖɔ-yɔɔ.”
Halʋ weyi ɛɖʋ tɩlaaɖɩ Yesu ñʋʋ taa yɔ
(Mat 26.6-13; Yoh 12.1-8)
3 Yesu kowobi Betaanii tɛtʋ cikpetu taa nɛ ɛsʋʋ Siimɔɔ weyi ɛɛkɛ canaɣ yɔ ɛ-ɖɩɣa taa. Pɔtɔkaɣ tɔɔnaɣ lɛ, halʋ nɔɔyʋ sʋʋ pɔ-cɔlɔ, ɛɖɔkɩ tɩlaaɖɩ ŋgʋ petesidi kɩ-taa pʋyʋ yɔ fiɣa kɩñɩlɩzaɣ nakɛyɛ taa. Kʋwɛ liidiye pɩtɩɩfɛyɩ. Pɩkɛdaa lɛ, ɛkpalɩ fiɣa ŋga kɔ-nɔɔ nɛ ɛpɩyɩ-kʋ Yesu ñʋʋ taa waaa. 4 Ɛlɛ mba pacaɣ peeye yɔ, pa-taa lɛlaa taa wɩnɩ halʋ ɛnʋ nɛ pɔyɔɔdʋʋ pa-taa pe-ɖeke se: “Halʋ ɛnɛ, ɛwɛɛkʋʋ tɩlaaɖɩ ŋgʋ nɛ ɛlɔ yem yɔ, pɩwazɩɣ-ɩ we? 5 Ye paapɛdɩ-kʋ, kɩtaaɖɛɛ ɛzɩ kɩyakɩŋ nasidozo tʋmɩyɛ liidiye yɔ nɛ patayɩ kʋñɔndɩnaa naa we?” Ɛlɛ pɛwɛɛ pakʋʋ halʋ ɛnʋ ɛ-tɔm. 6 Peeye Yesu heyi-wɛ se: “Iyele halʋ ɛnʋ ɖiɣ ɖiɣ. Ɛbɛ yɔɔ ɩcɛyɩɣ-ɩ mbʋ? Mbʋ ɛlabɩ-m yɔ, pʋwɛ ɖeu. 7 Mɩ nɛ kʋñɔndɩnaa ɩwɛna tam. Paa alɩwaatʋ ndʋʋ ɩsɔɔlaa yɔ, ɩpɩzɩɣ ɩsɩnɩ-wɛ. Ma lɛ, maawɛɣ mɩ-cɔlɔ mbʋ. 8 Mbʋ halʋ ɛnɛ ɛpɩzaa yɔ, mbʋ ɛlaba. Ɛɖʋ tɩlaaɖɩ mon-tomnaɣ yɔɔ kpaagbaa se ɛñɔɔzɩ-kɛ nɛ pʋcɔ pepim-m. 9 Toovenim lɛ, meheyiɣ-mɩ se paa le posusuu Laŋhɛzɩyɛ Tɔm yɔ, pɔkɔŋ kɛdʋʋ mbʋ halʋ ɛnɛ ɛlabɩ mɔ-yɔɔ yɔ pʋ-tɔm nɛ ɛyaa ɛtaasɔɔ ɛ-yɔɔ kaʋ.”
Yudaasɩ ñɩnʋʋ se ɛɖʋzɩ Yesu *cɔjɔnaa *sɔsaa nesi taa yɔ
(Mat 26.14-16; Luk 22.3-6)
10 Pʋwayɩ lɛ, Yesu tɔmkpɛlɩkɩyaa hiu nɛ naalɛ taa weyi payaɣ se Yudaasɩ Iskarɩyɔɔtɩ yɔ, ewolo eheyi *Yuda ñɩma *cɔjɔnaa *sɔsaa se ɛcaɣ ɛkpa Yesu nɛ ɛɖʋzɩ pe-nesi taa. 11 Panɩ mbʋ lɛ, pɩlabɩ-wɛ leleŋ pɩŋŋ nɛ paɖʋ se pɛcɛlɩɣ-ɩ liidiye. Peeye ɛpazɩ ñɩnʋʋ nʋmɔʋ ŋgʋ ɛɛtɩŋ nɛ ɛkpa Yesu nɛ ɛɖʋzɩ pe-nesi taa yɔ.
Yesu nɛ ɛ-tɔmkpɛlɩkɩyaa pɔtɔkʋʋ Yomiye Taa Lɩʋ *Kazandʋ yɔ
(Mat 26.17-25; Luk 22.7-14,21-23; Yoh 13.21-30)
12 Sɔsɔɔna Fɛyɩ Tindine *Kazandʋ kajalaɣ kɩyakʋ wiye Yuda ñɩma laɣ heɣsi nɛ pɔtɔkɩ po-Yomiye Taa Lɩʋ *Kazandʋ. Kɩyakʋ ŋgʋ kɩtalaa lɛ, Yesu tɔmkpɛlɩkɩyaa pɔzɩ-ɩ se: “Le ŋcaɣ se ɖiwolo ɖɩñɔɔzɩ-ŋ nɛ ŋtɔɔ Yomiye Taa Lɩʋ Kazandʋ?” 13 Peeye etiyi pa-taa ɛyaa naalɛ se: “Iwolo tɛtʋ taa, isuluuni abalʋ nɔɔyʋ, ɛsɩɣlɩ lɩm nɛ peɣa. Isuluni-i lɛ, ɩtɩŋ-ɩ. 14 Ɛsʋ ɖenɖe lɛ, ɩtɩŋ-ɩ nɛ ɩpɔzɩ ɖɩɣa tʋ se: ‘Wɩlɩyʋ tiyini-ɖʋ se ɖɩkɔɔ ŋwɩlɩ-ɖʋ kuduyuu ŋgʋ kɩ-taa ɛ nɛ ɛ-tɔmkpɛlɩkɩyaa pacakɩ nɛ pɔtɔɔ Yomiye Taa Lɩʋ Kazandʋ yɔ.’ 15 Ɖɩɣa tʋ ɛnʋ ɛwɩlɩɣ-mɩ ɛsɔdaa kuduyuu sɔsɔʋ nakʋyʋ, paɖaɣnɩ-kʋ camɩyɛ. Kɩ-taa wɛ wondu ndʋ palakɩnɩ kazandʋ yɔ tɩtɩŋa payɩ, peeye ɩlakɩ-ɖʋ tɔɔnaɣ.” 16 Ɛ-tɔmkpɛlɩkɩyaa ɖɛwa nɛ powolo tɛtʋ taa lɛ, pamaɣna ɛzɩ eeheyuu-wɛ yɔ nɛ patɩzɩ kazandʋ tɔɔnaɣ peeye.
17 Pɩlɛdaa lɛ, Yesu nɛ ɛ-tɔmkpɛlɩkɩyaa mba patalaa lɛ. 18 Pacaɣaɣ se pɔtɔkɩ lɛ, Yesu heyi-wɛ se: “Toovenim lɛ, meheyiɣ mɩ se mba mɩ ma nɛ mɩ ɖɩcaɣaɣ nɛ ɖɩtɔkɩ ɛzʋnɔ yɔ, mɩ-taa nɔɔyʋ kɔŋ-m kpaʋ nɛ ɛɖʋzɩ koyindinaa nesi taa.” 19 Peeye pɩtala ɛ-tɔmkpɛlɩkɩyaa leleŋ nɛ pɔpɔzʋʋ-ɩ kʋɖʋm kʋɖʋm se: “Ma na?” Ɛnɛ se: “Ma na?”
20 Ɛlɛ Yesu cosi-wɛ se: “Mi-hiu nɛ naalɛ mɩ-taa weyi ma nɛ ɩ ɖɩtɔkɩ ñanaɣ kʋɖʋmaɣ taa yɔ.” 21 “Ɛyʋ Pɩyalʋ kɔŋ kʋyʋʋ kedeŋa yɔɔ cɩnɛ ɛzɩ pamaʋ ɛ-tɔm Ɛsɔtɔm Takayaɣ taa yɔ. Ɛlɛ, pʋtɔɔ weyi ɛɖʋzʋʋ-ɩ koyindinaa nesi taa yɔ! Ye pataalʋlɩ pʋdʋ yɔ, pɩɩkɩlɩ-ɩ sɛʋ.”
Yesu sɩm nɛ e-fem pɔ-yɔɔ tɔzʋʋ sɔnzɩ tɔm
(Mat 26.26-30; Luk 22.15-20; 1 Kɔr 11.23-25)
22 Yesu nɛ ɛ-tɔmkpɛlɩkɩyaa pɔtɔkaɣ tɔɔnaɣ lɛ, ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ se: “Ɩmʋ nɛ ɩtɔɔ, pʋnɛ lɛ mon-tomnaɣ.” 23 Pʋwayɩ lɛ, ɛkpaɣ sʋlʋm nɛ caɖaɣ nɛ ɛsɛɛ pʋ-yɔɔ Ɛsɔ nɛ ɛcɛlɩ-wɛ nɛ pɔñɔɔ patɩŋa payɩ. 24 Ɛlɛ eheyi-wɛ se: “Sʋlʋm pʋnɛ lɛ man-calɩm mbʋ pɩkpɛdɩ ɛyaa sakɩyɛ yɔɔ yɔ. Pʋ-yɔɔ Ɛsɔ tɩŋɩɣna nɛ ɛɖʋ *nɔɔ haʋ.” 25 Yesu tasɩ-wɛ heyuu se: “Toovenim lɛ, meheyiɣ-mɩ se maatasɩɣ sʋlʋm ñɔʋ nɛ pʋkɔɔ pɩsɩnɩ kɩyakʋ ŋgʋ mɔñɔ kɩfam Ɛsɔ Kewiyaɣ taa yɔ.” 26 Ɛtɛm-wɛ heyuu mbʋ lɛ, petee kazandʋ hendu nɛ pɛɖɛɛ pakpa *Somiŋ Pʋʋ yɔɔ.
Yesu yɔɔdʋʋ se Pɩyɛ kɔŋ kpɛzʋʋ se ɛtasɩm-ɩ yɔ
(Mat 26.31-35; Luk 22.31-34; Yoh 13.36-38)
27 Yesu nɛ ɛ-tɔmkpɛlɩkɩyaa pakpa peeye lɛ, eheyi-wɛ se: “Iseɣ mɩtɩŋa payɩ nɛ iyebi-m ɖoo anɛ a-taa maɣmaɣ. Mbʋ pʋyɔɔ yɔ, Ɛsɔ yɔɔdaa se: ‘Mamakɩ ninɖiɣyu sɩbʋ yɔɔ sɩbʋ yɔɔ nɛ piyele heŋ mɩzɩ ɖama.’ Ndʋ pama ɛ-Tɔm Takayaɣ taa. 28 Ɛlɛ, alɩwaatʋ ndʋ menfeŋ yɔ, mowoki manɖaŋ-mɩ Galilee. 29 Peeye Pɩyɛ heyi-i se: ‘Paa lɛlaa eseɣ patɩŋa se peyebi-ŋ yɔ, ma maalakɩ mbʋ.’ ” 30 Yesu heyi-i se: “Toovenim lɛ, meheyiɣ-ŋ se ɖoo anɛ a-taa maɣmaɣ, pʋcɔ kalɩmɔʋ koo nɛ kɩlɛlɩ lɛ, ŋkpɛzɩɣ tɔm naadozo se ŋtasɩm-m.” 31 Peeye Pɩyɛ tasɩ yɔɔdʋʋ nɛ ɛza ñɩŋɩyɛ se: “Paa sɩm yɔ, ma nɛ ŋ ɖɩsɩ, maakpɛzɩɣ kaʋ se mantasɩm-ŋ.” Ɛ-tɔmkpɛlɩkɩyaa lɛlaa yɔɔdɩ patɩŋa mbʋ ɖɔɖɔ.
Yesu sɛɣʋ Ɛsɔ Jesemaanɩ yɔ
(Mat 26.36-46; Luk 22.39-46)
32 Pʋwayɩ lɛ, Yesu nɛ ɛ-tɔmkpɛlɩkɩyaa patalɩ ɖenɖe payaɣ se Jesemaanɩ yɔ. Peeye eheyi ɛ-tɔmkpɛlɩkɩyaa se: “Ɩcaɣ cɩnɛ nɛ mowolo mɛnsɛɛ Ɛsɔ nɛ mɔnkɔɔ.” 33 Ɛɖɛɣaɣ lɛ, ɛyaa Pɩyɛ nɛ Yakubu nɛ Yohanɛɛsɩ. Pɛɖɛ tɔmkpɛlɩkɩyaa lɛlaa yɔɔ pazɩ lɛ, pɩkpɛyɩ ɛ-yɔɔ nɛ sɔɔndʋ kpa-ɩ 34 nɛ eheyi-wɛ se: “Mɛ-ɛza ñɩŋaa pɩtɩɩfɛyɩ. Ɩcaɣ cɩnɛ ɩɖaŋ-m, ɩwɛɛ mɩ-ɛza yɔɔ.” 35-36 Ɛlɛ etuzi ɛ-tɩ ɛsɩndaa pazɩ nɛ eluŋ nɛ etendi Ɛsɔ se: “Man-Caa! Ye ŋtisiɣ yɔ, taayele nɛ kʋñɔŋ ŋgʋ kɩtalɩ-m. Manawa se ŋpɩzɩɣ ŋla pɩtɩŋa payɩ. Mentendiɣ-ŋ se ŋla ña-tʋmɩyɛ nɛ mantaasʋʋ kʋñɔŋ ŋgʋ kɩ-taa. Ɛlɛ, la mbʋ ñe-liu wɛɛ yɔ, taala mbʋ me-liu wɛɛ yɔ.”
37 Ɛtɛm Ɛsɔ sɛʋ mbʋ lɛ, ɛpɩsɩ ɛ-tɔmkpɛlɩkɩyaa naadozo mba pɔ-cɔlɔ nɛ ɛmaɣna pɔɖɔŋ ɖou. Peeye ɛpɔzɩ Pɩyɛ se: “Siimɔɔ, ŋwɛɛ ŋɖou! Ŋtapɩzɩ ŋcaɣnɩ ñɛ-ɛza paa ñɩɩɩ! 38 Ɩcaɣnɩ mɩ-ɛza nɛ ɩsɛɛ Ɛsɔ, pɩtɛkɛ mbʋ, ɩkɔŋ ɩsʋʋ takʋʋ taa. Ɛyaa liu wɛɛ se pala mbʋ pʋwɛ ɖeu yɔ, ɛlɛ, pɛwɛnɩ kaapɩzɩtʋ.”
39 Ɛtasɩ ɛ-tɩ tuzuu lɛ, etendi Ɛsɔ nɛ ɛtasɩ tɔm kʋɖʋmtʋ ndʋ yɔɔdʋʋ. 40 Ɛtasɩ pɩsʋʋ ɛ-tɔmkpɛlɩkɩyaa cɔlɔ lɛ, ɛmaɣnɩ-wɛ pɔɖɔŋ ɖou ɖɔɖɔ. Patapɩzɩ pacaɣnɩ pɛ-ɛza nɛ paanaɣ se peheyi-i se we.
41 Ɛpɩsɩ tozo ɖeɖe lɛ, ɛpɔzɩ-wɛ se: “Ɩwɛ ɖom yɔɔ tam mbʋ? Tɔɔ, pɩmaɣaɣ! Lɛɛlɛɛyɔ alɩwaatʋ talaa se paɖʋzɩ Ɛyʋ Pɩyalʋ kɩwɛɛkɩm laɖaa nesi taa. 42 Ɩkʋyɩ ɖɩkatɩ weyi ɛkpaɣ-m se ɛɖʋzɩ pe-nesi taa yɔ! Ɛkɔŋ naɣ yɔ!”
Pakpaʋ Yesu yɔ
(Mat 26.47-56; Luk 22.47-53; Yoh 18.3-12)
43 Yesu yɔɔdaɣ mbʋ lɛ, ɛ-tɔmkpɛlɩkɩyaa hiu nɛ naalɛ taa lɛlʋ weyi payaɣ se Yudaasɩ yɔ nɛ ɛyaa samaɣ nakɛyɛ patɩtalɩ. Pɔɖɔkɩ sɛsɩ kɩɖaɣlɩsɩ nɛ pɔla. *Cɔjɔnaa *sɔsaa nɛ paɣtʋ wɩlɩyaa nɛ *Yuda ñɩma ɛgbɛyɛ taa *sɔsaa petiyini-wɛ. 44 Yudaasɩ ɛnʋ ɛkpaɣnɩ Yesu se ɛɖʋzɩ kɩwɛɛkɩm laɖaa nesi taa. Ɛɛtɛm kɛdʋʋ ɛyaa samaɣ ŋga ɛzɩma mbʋ ɛlakɩ nɛ pasɩm-ɩ nɛ pakpa-ɩ yɔ. Eheyi-wɛ se: “Ye mowobi mɛnsɛɛ nɔɔyʋ nɛ mamʋzɩ ɛ-laɣzaɣ yɔɔ lɛ, ɛnʋ lɛ. Ɩkpa-ɩ ɩɖɔkɩ-ɩ ɖeu nɛ ɩɖɛnɩ-ɩ.” 45 Ɛtɩtalaa lɛ, ewolo Yesu cɔlɔ nɛ eheyi-i se: “Wɩlɩyʋ, sɛɛ ɖeu!” Ɛlɛ ɛmʋzɩ ɛ-laɣzaɣ yɔɔ. 46 Peeye ɛyaa mba pakpa Yesu. 47 Ɛlɛ, ɛ-tɔmkpɛlɩkɩyaa taa lɛlʋ kpɛɛ sɩɣa kɩɖaɣlaɣ nɛ ɛsɛtɩ cɔjɔnaa ñʋʋ tʋ tʋmlaɖʋ nɩŋgbaŋʋʋ. 48 Peeye Yesu pɔzɩ ɛyaa mba se: “Ɩkɔm ma-wayɩ nɛ sɛsɩ kɩɖaɣlɩsɩ nɛ pɔla yɔ, mɛnkɛ mɩlʋ naa we? 49 Ma nɛ mɩ ɖɩɩwɛ Ɛsɔ ɖɩɣa taa kɩyakɩŋ tɩŋa nɛ mawɩlɩɣ Ɛsɔtɔm, ɛlɛ, ɩtakpa-m. Pɩlabɩ mbʋ se pɩla ɛzɩ pamaʋ Ɛsɔtɔm Takayaɣ taa yɔ.” 50 Peeye ɛ-tɔmkpɛlɩkɩyaa tɩŋa mɩzɩ ɖama nɛ peyebi-i.
51 Ɛlɛ, pɩsɛɣ evebu nɔɔyʋ ɖeke nɛ ɛtɩŋɩɣ ɛ-wayɩ, eehu pɩsaʋ. Pesezaa se pakpaɣ-ɩ lɛ, ɛ-pɩsaʋ cɛ nɛ 52 eyebi-kʋ nɛ ese ndaakpeɖe nɛ ɛɖɛɛ.
Yuda ñɩma hʋʋnɩ Yesu tɔm yɔ
(Mat 26.57-68; Luk 22.54-55, 63-71; Yoh 18.13-14, 19-24)
53 Pʋwayɩ lɛ, pakpa Yesu se powokini-i Yuda ñɩma cɔjɔnaa ñʋʋ tʋ tɛ ɖenɖe *cɔjɔnaa *sɔsaa nɛ pɛ-ɛgbɛyɛ taa *sɔsaa nɛ pa-paɣtʋ wɩlɩyaa pekpeɣlaa yɔ. 54 Pɛɖɛɣaɣnɩ-ɩ lɛ, Pɩyɛ wɛɛ mɛlʋʋ taa mɛlʋʋ taa nɛ ɛtɩŋɩɣ ɛ-wayɩ. Ɛtalɩ cɔjɔnaa ñʋʋ tʋ ɛnʋ ɛ-taɣ yɔɔ lɛ, ɛ nɛ Ɛsɔ ɖɩɣa yɔɔ ɖaŋɩyaa pacaɣ nɛ pohoyuu miŋ.
55 Peeye *cɔjɔnaa *sɔsaa nɛ tɔm hʋyaa lɛlaa tɩŋa pañɩnaɣ aseɣɖe tɩnaa se pɔkɔɔ pɛcɛtɩnɩ Yesu taa nɛ pehiɣ-i pakʋ-ɩ. Ɛlɛ, petehiɣ nɔɔyʋ. 56 Ɛyaa sakɩyɛ wobi pɛcɛtɩnɩ ɛ-taa. Ɛlɛ, pɔ-tɔm tɛkɛ kʋɖʋmtʋ. 57 Pa-taa lɛlaa kʋyaa nɛ pɛcɛtɩnɩ ɛ-taa se: 58 “Ɛyɔɔdaa se ɛyɔkʋʋ Ɛsɔ ɖɩɣa ŋga ɛyaa mawa yɔ nɛ ɛɖaɣnɩ maʋ kɩfalaɣ ŋga ɛyaa ɩɩpɩzɩɣ pama yɔ nɛ kɩyakɩŋ naadozo.” 59 Halɩ tɔm ndʋ tɩ-yɔɔ, pa-aseɣɖe tɛkɛ kʋɖʋmɖɩyɛ ɖɔɖɔ.
60 Pʋwayɩ lɛ, cɔjɔnaa ñʋʋ tʋ kʋyɩ ɛsɩŋ patɩŋa pɛ-ɛsɩndaa nɛ ɛpɔzɩ Yesu se:
“Tɔm ndʋ tɩtɩŋa payɩ ɛyaa panɛ pɔtɔŋ se ŋyɔɔdaa yɔ, ŋfɛyɩnɩ natʋyʋ se ŋcosuu yaa we?” 61 Ɛlɛ, Yesu suma, etocosi natʋyʋ kaʋ. Peeye cɔjɔnaa ñʋʋ tʋ ɛnʋ, ɛtasɩ-ɩ pɔzʋʋ se: “Ña lɛ *Weyi Ɛsɔ Lɩzaa Yɔ yaa we? Ña lɛ Ɛsɔ weyi pasaŋ-ɩ yɔ ɛ-Pɩyalʋ?” 62 Yesu cosi-i se: “Ɛɛɛ! Ɖɔɖɔ lɛ, mɩtɩŋa payɩ ɩkɔŋ naʋ *Ɛyʋ Pɩyalʋ, ɛcaɣ Ɛsɔ Ɖoŋ Tɩŋa Tʋ cɔlɔ lone kɩbanɖɛ taa. Ɩkɔŋ-ɩ naʋ ɖɔɖɔ ɛsɔmɩndʋ yɔɔ, ɛɖɔŋ kɔm.”
63 Cɔjɔnaa ñʋʋ tʋ nɩ Yesu yɔɔdɩ mbʋ lɛ, ɛkʋyɩ ɛcɩyɩ ɛ-cɔjɔtʋ toko*fɣ* se pɩwɩlɩ se pɩwɩzɩ-ɩ pɩŋŋ nɛ ɛpɔzɩ ɛyaa lɛlaa se: “Ɛbɛ yɔɔ pʋwɛɛ se ɖɩtasɩ ñɩnʋʋ aseɣɖe tɩnaa yɔ? \fm ɣ \fr (14.63) \fk Ɛcɩyɩ ɛ-cɔjɔtʋ toko: \f Yuda ñɩma tɛ lɛ, lakasɩ nzɩ sɩwɩlɩɣ se pʋdʋ caɣ leɣa. 64 Mɩ-maɣmaɣ ɩnɩ ɛzɩma mbʋ ɛwɛɛkɩ Ɛsɔ hɩɖɛ yɔ. Ɩmaɣzɩɣ se we?” Patɩŋa pocosi-i se: “Ɛ-tɔm sɩba, pʋwɛɛ se pakʋ-ɩ!”
65 Peeye pa-taa lɛlaa pazɩ Yesu yɔɔ tɔʋ ndaatʋ nɛ pohuuzuu ɛ-ɛza yɔɔ nɛ pamakɩ-ɩ ŋguluma nɛ pɔpɔzʋʋ-ɩ se: “Kpeɣ se amabɩ-ŋ.” Pʋwayɩ lɛ, Ɛsɔ ɖɩɣa yɔɔ ɖaŋɩyaa tem-i kadanzɩ.
Pɩyɛ kpɛzʋʋ se ɛtasɩ Yesu yɔ
(Mat 26.69-75; Luk 22.56-62; Yoh 18.15-18, 25-27)
66 Alɩwaatʋ ndʋ Pɩyɛ wɛ taɣ yɔɔ yɔ, tɩ-taa cɔjɔnaa ñʋʋ tʋ tʋmlaɖʋ halʋ ñɩnʋ nɔɔyʋ lɩwa 67 nɛ ɛmaɣnɩ-ɩ, ehoyaɣ miŋ. Ɛcɔnɩ-ɩ pɩŋŋ lɛ, eheyi-i se: “Ña ɖɔɖɔ, ŋtɩŋaɣ Nazarɛɛtɩ tʋ Yesu wayɩ.” 68 Peeye Pɩyɛ kpɛzaa se: “Mantana, maanɩɣ ndʋ ŋcaɣ yɔɔdʋʋ yɔ.” Pʋwayɩ lɛ, ɛlɩɩ ewolo kɩjaŋ taa. Ɛlɛ kalɩmɔʋ nakʋyʋ koo. 69 Peeye tʋmlaɖʋ halʋ ñɩnʋ ɛnʋ, ɛɖaɣnɩ-ɩ naʋ nɛ eheyi mba paawɛ ɛ-cɔlɔ yɔ se: “Pa-taa lɛlʋ lɛ abalʋ ɛnɛ.” 70 Ɛlɛ, Pɩyɛ tasɩ kpɛzʋʋ.
Pɩlabɩ fele lɛ, ɛyaa mba paawɛ peeye yɔ, patasɩ-ɩ heyuu se: “Toovenim! Ŋkɛ pa-taa lɛlʋ, mbʋ pʋyɔɔ yɔ, ŋkɛ Galilee tʋ.” 71 Peeye Pɩyɛ kpɛzɩ laɣ laɣ nɛ eɖuu se: “Nɛ Ɛsɔ! Mantasɩ abalʋ weyi ɩyɔɔdʋʋ ɛ-tɔm ɛzʋnɔ yɔ!” 72 Ɛtɩyɔɔdɩ mbʋ lɛ, kalɩmɔʋ tasɩ kou. Ɛlɛ, Pɩyɛ tɔzɩ tɔm ndʋ Yesu keheyi-i se: “Pʋcɔ kalɩmɔʋ koo nɛ kɩlɛlɩ lɛ, ŋkpɛzɩɣ tɔm naadozo se ŋtasɩm-m” yɔ tɩ-yɔɔ, peeye ɛtʋlɩ nɔɔ wooo.