Lɩm Sɔʋ Sɔnzɩ Laɖʋ Yohanɛɛsɩ sɩm tɔm
(Mrk 6.14-29; Luk 9.7-9)
14
1 Alɩwaatʋ ndʋ lɛ, wiyaʋ *Eroodi cɔŋaɣnɩ Galilee egeetiye yɔɔ. Pɩkɛdaa lɛ, ɛnɩɩ Yesu taŋ. 2 Peeye eheyi ɛ-tʋmlaɖaa se: “Lɩm Sɔʋ Sɔnzɩ Laɖʋ Yohanɛɛsɩ weyi ɛɛsɩba yɔ, ɛ-tɔm pɔyɔɔdʋʋ, ɛnʋ femna. Mbʋ yebina nɛ ɛwɛnɩ Ɛsɔ ɖoŋ nɛ ɛlakɩ hama lakasɩ mbʋ.” 3 Toovenim lɛ, Eroodi keyeba nɛ pakpa Yohanɛɛsɩ pɔhɔkɩ-ɩ nɛ paɖʋ salaka. Ɛlabɩ mbʋ se pɩkɛdɩnɩ e-neu Filiipu halʋ Eroodiyaadɩ weyi Eroodi ɛnʋ ɛɛlɛɣa yɔ. 4 Mbʋ pʋyɔɔ yɔ, Yohanɛɛsɩ heyi-i se: “Pɩtaha nʋmɔʋ se ŋkpaɣ ñe-neu halʋ.” 5 Pʋ-yɔɔ Eroodi ñɩnaɣ se ɛkʋ Yohanɛɛsɩ. Ɛlɛ, eseɣaɣ ɛyaa, mbʋ pʋyɔɔ yɔ, pɔcɔŋaɣnɩ ɛlɛ se ɛkɛ *lɔɔyaɣ tʋ.
6 Nakʋyʋ wiye pɔtɔkaɣ *Eroodi lʋlʋʋ kazandʋ. Pɩkɛdaa lɛ, Eroodiyaadɩ pɛlɛ paa ɛyaa hɛkʋ taa nɛ pɩla Eroodi leleŋ pɩtɩɩfɛyɩ 7 nɛ eɖuu ɛyaa tɩŋa ɛsɩndaa se ye ɛlɛ ɛpɔzɩ-ɩ paa ɛbɛ yɔ, ɛcɛlɩɣ-ɩ. 8 Peeye e-ɖoo tasɩ-ɩ tɔm. Pʋ-yɔɔ eheyi Eroodi se: “Ɖʋ Lɩm Sɔʋ Sɔnzɩ Laɖʋ Yohanɛɛsɩ ñʋʋ ñanaɣ taa nɛ ŋcɛlɩ-m.”
9 Eroodi nɩ mbʋ lɛ, ɛ-laŋɩyɛ wɛɛkɩ. Ŋgʋ, ɛtɛm ɖuuu ɛyaa hɛkʋ taa se paa pɛlɛ ɛnʋ ɛpɔzɩ-ɩ ɛbɛ yɔ, ɛcɛlɩɣ-ɩ. Pʋ-yɔɔ ɛha nɔɔ se 10 powolo salaka taa nɛ pɛsɛtɩ Yohanɛɛsɩ ñʋʋ. 11 Pɛsɛtɩ-kʋ lɛ, paɖʋ ñanaɣ taa nɛ pɛcɛlɩ pɛlɛ nɛ ɛlɛ woni ɛcɛlɩ e-ɖoo.
12 Peeye Yohanɛɛsɩ tɔmkpɛlɩkɩyaa wobi pakpaɣ-ɩ nɛ pepi. Pɛtɛm-ɩ pim lɛ, powolo pɛkɛdɩ Yesu mbʋ pɩlaba yɔ.
Yesu calʋʋ labʋ nɛ tindine huu yɔ
(Mrk 6.30-44; Luk 9.10-17; Yoh 6.1-14)
13 Yesu nɩ mbʋ lɛ, ewolo ɛkpa kpɩyʋʋ taa se ɛkɛsɩ ɛ-tɩ ɖenɖe ɛyaa fɛyɩ yɔ. Ɛlɛ, ɛyaa samaɣ tɛm nɩʋ. Peeye palɩ tɛtʋ ndɩ ndɩ taa nɛ pɔcɔlʋʋ teŋgu nɔɔ se pakatɩ-ɩ ɖenɖe ewoki yɔ. 14 Yesu lɩ kpɩyʋʋ taa nɛ ɛna ɛyaa pɩtɩɩfɛyɩ mbʋ lɛ, pɔ-tɔm labɩ-ɩ pʋtɔdɩyɛ nɛ ɛla nɛ kʋdɔndɩnaa mba powonaa yɔ, pɔ-yɔɔ cɛ.
15 Ɖanaɣ ɖanaa lɛ, Yesu tɔmkpɛlɩkɩyaa wolo ɛ-cɔlɔ nɛ peheyi-i se: “Lɛɛlɛɛyɔ, wɩsɩ kpema. Ŋgʋ, ñɩtʋ hɛkʋ taa ɖɩwɛɛ. Heyi ɛyaa samaɣ ŋga kɛwɛ cɩnɛ yɔ se kowolo tɛtʋ cikpetu taa nɛ kaya tɔɔnaɣ nɛ kɔtɔɔ.”
16 Peeye ecosi-wɛ se: “Pɩtɔpɔzɩ se pɛɖɛɛ. Ɩha-wɛ tɔɔnaɣ mɩ-maɣmaɣ nɛ pɔtɔɔ.” 17 Ɛlɛ peheyi-i se tindine kagbaanzɩ nɛ kpakpasɩ naalɛ ɖeke wɛnɩ pɔ-cɔlɔ. 18 Ɛlɛ cosi-wɛ se: “Ɩkɔnɩ-m kpakpasɩ nzɩ nɛ tindine ana.”
19 Powonaa lɛ, eheyi ɛyaa tɩŋa payɩ se pacaɣ ñɩtʋ yɔɔ. Peeye ɛkpaɣ tindine ana a-kagbaanzɩ nɛ kpakpasɩ nzɩ sɩ-naalɛ nɛ ɛkpazɩ ɛ-ɛza ɛsɔdaa nɛ ɛsɛɛ pʋ-yɔɔ Ɛsɔ nɛ ɛcɛdɛlɩ nɛ ɛcɛlɩ ɛ-tɔmkpɛlɩkɩyaa nɛ patayɩ ɛyaa tɩŋa payɩ 20 nɛ pɔtɔɔ pahaɣ. Ɛ-tɔmkpɛlɩkɩyaa kpeɣli hɔɔlasɩ nzɩ sɩkazaa yɔ lɛ, pusu ɖɔkɩŋ hiu nɛ naalɛ. 21 Mba pɔtɔɔ tɔɔnaɣ ŋga yɔ, abalaa ɖeke kɛkpɛndɩ ɛzɩ kutokiŋ kagbaanzɩ yɔ. Patakalɩnɩ halaa nɛ piya.
Yesu ɖɔm lɩm yɔɔ yɔ
(Mrk 6.45-52; Yoh 6.15-21)
22 Pɛtɛm tɔɔʋ lɛ, Yesu heyi ɛ-tɔmkpɛlɩkɩyaa se: “Ɩsʋʋ kpɩyʋʋ taa nɛ ɩɖɛ-m nɔɔ nɛ ɩtɛzɩ kidiiliŋ lɛɛkʋ yɔɔ nɛ meheyi ɛyaa samaɣ se kekpe nɛ mɔnkɔɔ.”
23 Ɛyaa kpem patɩŋa lɛ, ɛkʋyɩ ɛkpa pʋʋ yɔɔ se ɛsɛɣ Ɛsɔ. Ɛɛwɛ peeye mbʋ e-ɖeke nɛ ɖoo yu-i. 24 Alɩwaatʋ ndʋ tɩ-taa lɛ, kpɩyʋʋ ŋgʋ kɩtɛm talʋʋ poliŋ nɛ lɩm cɔzʋʋ-kʋ, mbʋ pʋyɔɔ yɔ, heɣlim makaɣ tuliŋa. 25 Pʋkɔma ɛzɩ kalɩmaŋ kou yɔ lɛ, Yesu kʋyɩ se ewoki ɛ-tɔmkpɛlɩkɩyaa cɔlɔ, ɛlɛ, lɩm yɔɔ ɛɖɔŋaɣ.
26 Pana-ɩ mbʋ lɛ, pɩɖɩɣzɩ-wɛ yem ɖɩɣ ɖɩɣ nɛ peheyiɣ ɖama se ñazɩñazʋʋ nakʋyʋ! Peeye sɔɔndʋ kpa-wɛ siŋŋ nɛ pamakɩ kubusi. 27 Kpaagbaa mbʋ lɛ, eheyi-wɛ se: “Ɩɖɔkɩ mɩ-tɩ kpam, sɔɔndʋ ɛtaakpa-mɩ, ma.” 28 Peeye Pɩyɛ cosi-i se: “Kɩpaɣlʋ! Ye pɩkɛ ña toovenim yɔ, ŋyele nɛ mɔnɖɔ lɩm yɔɔ nɛ mankatɩ-ŋ.” 29 Ɛlɛ, Yesu heyi-i se: “Kɔɔ!” Peeye Pɩyɛ lɩwa nɛ ɛɖɔŋ lɩm yɔɔ se ɛkatɩ-ɩ. 30 Ɛɖɔŋaɣ mbʋ lɛ, ɛna se heɣlim makɩ sɔsɔm nɛ sɔɔndʋ kpa-ɩ nɛ pɩcaɣ se pʋsʋzɩ-ɩ lɩm tɛɛ. Pʋ-yɔɔ ɛmabɩ kubuka se: “Kɩpaɣlʋ! Ya ma-ñʋʋ!” 31 Peeye Yesu tisezaa ɛkpa e-nesi taa nɛ ɛpɔzɩ-ɩ se: “Lidaʋ ñɩɩɩ tʋ ña! Pɩlabɩ ɛzɩma nɛ ŋpʋtʋʋ ña-taa mbʋ?”
32 Peeye pakpa kpɩyʋʋ taa pa-naalɛ nɛ heɣlim yele mabʋ 33 nɛ Yesu tɔmkpɛlɩkɩyaa mba paawɛ kɩ-taa yɔ, powolo poluŋ ɛ-tɛɛ nɛ pɔtɔŋ se: “Toovenim lɛ, ña lɛ Ɛsɔ Pɩyalʋ!”
Kʋdɔndɩnaa yɔɔ cɛbʋ Jeneezaarɛɛtɩ ɛjaɖɛ taa yɔ
(Mrk 6.53-56)