Kalɩkalaɣ nakɛyɛ yɔɔ cɛbʋ yɔ
(Mrk 2.1-12; Luk 5.17-26)
9
1 Pʋwayɩ lɛ, Yesu kpa kpɩyʋʋ taa nɛ ɛtɛzɩ teŋgu se ɛpɩsɩɣ ɛ-tɛ. 2 Ɛtalaa lɛ, ɛnaɣ ɛyaa nabɛyɛ, powokaɣnɩ kalɩkalaɣ nakɛyɛ ɛ-cɔlɔ, kɛhɛnɩ ka-ñalʋʋ yɔɔ. Powokaɣnɩ-kɛ se ɛla nɛ kɔ-yɔɔ cɛ. Ɛnawa se ɛyaa mba pɛwɛnɩ lidaʋ ɛ-yɔɔ lɛ, eheyi kalɩkalaɣ ŋga se: “Man-taabalʋ! Ɖɔkɩ ña-tɩ, mbʋ pʋyɔɔ yɔ, menkpeɣ-ŋ ña-kɩwɛɛkɩm.” 3 Peeye paɣtʋ wɩlɩyaa nabɛyɛ yɔɔdaɣnɩ ɖama se: “Abalʋ ɛnɛ ɛwɛɛkɩɣ Ɛsɔ hɩɖɛ!” 4 Yesu na pa-lɩmaɣza mbʋ lɛ, ɛpɔzɩ-wɛ se: “Pɩlabɩ ɛzɩma nɛ ɩwɛnɩ lɩmaɣza kɩdɛkɛdɛɛ mbʋ? 5 Ye meheyi kalɩkalaɣ ŋga se menkpeɣ-kɛ ka-kɩwɛɛkɩm yaa kakʋyɩ kɔɖɔ, tɩ-naalɛ tɩ-taa lɛ, ndʋ tɩfɛyɩ kaɖɛ? 6 Mancaɣ mawɩlɩ-mɩ se Ɛyʋ Pɩyalʋ wɛnɩ ɖoŋ se ekpeɣ ɛyaa pa-kɩwɛɛkɩm kedeŋa yɔɔ cɩnɛ.”
Peeye eheyi kalɩkalaɣ ŋga se: “Ña! Kʋyɩ ŋkpaɣ ña-ñalʋʋ nɛ ŋkpe.” 7 Abalʋ ɛnʋ ɛkʋyɩ nɛ ekpe ɛ-tɛ. 8 Ɛyaa sakɩyɛ mba paawɛɛ yɔ pana mbʋ lɛ, sɔɔndʋ kpa-wɛ nɛ pasa Ɛsɔ ɛzɩma mbʋ ɛha ɛyaa ɖoŋ ɛnʋ yɔ pʋ-yɔɔ.
Yesu yaʋ Maatiyee yɔ
(Mrk 2.13-17; Luk 5.27-32)
9 Pʋwayɩ lɛ, Yesu tasɩ wobu nɛ ɛsɩndaa nɛ ɛna abalʋ weyi payaɣ se Maatiyee yɔ, ɛcaɣ *tikee ɖɩmʋyɛ. Peeye Yesu heyi-i se: “Kʋyɩ ŋtɩŋ-m!” Ɛlɛ kʋyɩ ɖɔɖɔ nɛ ɛtɩŋ-ɩ.
10 Pɩkɛdaa lɛ, Yesu wolo ɖɩɣa nɛ ɛcaɣ tɔɔnaɣ ɖɩtɔɔyɛ. *Tikee mʋyaa sakɩyɛ nɛ kɩwɛɛkɩm laɖaa lɛlaa paawɛ peeye nɛ pa nɛ ɩ nɛ ɛ-tɔmkpɛlɩkɩyaa pɔtɔkɩ tɔɔnaɣ. 11 Ŋgʋ, *Farɩsɩ ñɩma nabɛyɛ kana-wɛ mbʋ. Peeye pɔpɔzɩ Yesu tɔmkpɛlɩkɩyaa se: “Pɩlabɩ ɛzɩma nɛ mɩ-caa nɛ *tikee mʋyaa nɛ kɩwɛɛkɩm laɖaa lɛlaa pɛkpɛndɩ nɛ pɔtɔkɩ?” 12 Yesu nɩ mbʋ lɛ, ecosi-wɛ se: “Pɩtɛkɛ alaafɩya tɩnaa pʋpɔzʋʋ se powolo fɛɖaa tɛ, kʋdɔndɩnaa pʋpɔzʋʋ se powolo. 13 Iwolo ɩñɩnɩ Ɛsɔtɔm Takayaɣ taa tɔm ndʋ pamawa yɔ tɩ-tɔbʋʋ. Ndʋ lɛ se:
‘Ma Ɛsɔ mɔntɔsɔɔlɩ mɩ-kɩlaŋ,
ɛlɛ, me-liu wɛɛ se ɩna ɖama pʋtɔdɩyɛ.’ ”
Yesu tasɩ yɔɔdʋʋ se: “Pɩtɛkɛ mba pamaɣzɩɣ se pɛkɛ kʋtʋʋzaa yɔ pa-wayɩ mɔnkɔma. Ɛlɛ, mba pasɩm pa-tɩ se pɛkɛ kɩwɛɛkɩm laɖaa yɔ pa-wayɩ mɔnkɔm se pɛlɛɣzɩ wɛtʋ.”
*Nɔɔ hɔkʋʋ tɔm
(Mrk 2.18-22; Luk 5.33-39)
14 Yesu tɛm yɔɔdʋʋ mbʋ lɛ, Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa wolo ɛ-cɔlɔ nɛ pɔpɔzʋʋ-ɩ se: “Pɩlabɩ ɛzɩma ɖa nɛ *Farɩsɩ ñɩma ɖɩhɔkʋʋ *nɔɔ tam nɛ ñɔ-tɔmkpɛlɩkɩyaa ñaahɔkʋʋ?”
15 Peeye Yesu cosi-wɛ se: “Ɩmaɣzɩɣ se mba paya-wɛ halɩkpaɣyɛ kazandʋ ɖeɖe yɔ, powoki pacaɣnɩ ɛza ñɩŋɩyɛ nɛ pɔhɔkɩ nɔɔ halʋ kɩfalʋ walʋ ɛsɩndaa yaa we? Pɩɩlakɩ mbʋ! Ɛlɛ, pɔkɔŋ lɩzʋʋ walʋ ɛnʋ pɛ-hɛkʋ taa alɩwaatʋ natʋyʋ. Tɩ-taa pɔkɔŋ nɔɔ hɔkʋʋ.”
16 Yesu tasɩ-wɛ heyuu se: “Paakpakɩɣ pɩsaʋ kɩfalʋʋ hɔɔlaɣ nɛ pɔtɔnɩ wonuu kɩbɩnʋʋ. Pɩtɛkɛ mbʋ, pɔcɔtʋʋ lɛ, hɔɔlaɣ ŋga kasʋʋ nɛ kɔhɔ kɩbɩnʋʋ nɛ kɩtɛzɩ cɩyʋʋ.”
17 Ɛtasɩ yɔɔdʋʋ ɖɔɖɔ se: “Paasuu sʋlʋm pɛŋ weyi ɩtɔwaa yɔ ɩ-taa. Pɩtɛkɛ mbʋ, pʋkɔŋ se pɩpɩɣ yɔ, pɩyasɩɣ-ɩ nɛ sʋlʋm wɛɛkɩ pikpe tataa yem. Ɛlɛ, pɛŋ weyi ɩtɔtɔɔ yɔ, ɩ-taa posuu nɛ pɩtɩŋa payɩ pʋwɛɛ pi-ɖeɖe camɩyɛ.”
*Yuda ñɩma *sɔsɔ nɔɔyʋ pɛlɛ nɛ halʋ weyi calɩm kpeŋaɣnɩ-ɩ yɔ
(Mrk 5.21-43; Luk 8.40-56)
18 Yesu yɔɔdaɣnɩ *Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa mbʋ lɛ, *Yuda ñɩma *sɔsɔ nɔɔyʋ wolo eluŋ ɛ-tɛɛ nɛ ɛtɔ se: “Mɛn-pɛlɛ sɩba naɣ yɔ lɛɛlɛɛyɔ. Ɛlɛ, kɔɔ ɖiwolo nɛ ŋtɩnɩ ñe-nesi ɛ-yɔɔ nɛ efe.” 19 Peeye Yesu nɛ ɛ-tɔmkpɛlɩkɩyaa pakʋyaa patɩŋ-ɩ. 20 Pɛɖɛɣaɣ mbʋ lɛ, halʋ nɔɔyʋ wobini Yesu wayɩ nɛ etukuni e-toko ndomiye. Halʋ ɛnʋ, calɩm kɛwɛɛ pikpeŋni-i nɛ pɩcɛyɩɣ-ɩ pɩŋŋ pɩnzɩ hiu nɛ naalɛ yɔ. 21 Etukuni-i mbʋ, mbʋ pʋyɔɔ yɔ, ɛɖʋ ɛ-taa se: “Ye manpɩzaa mehiɣ e-toko nɛ montukina yɔ, mɔ-yɔɔ cɛkɩ.” 22 Ɛlabɩ mbʋ lɛ, Yesu kisi nɛ ɛ-wayɩ nɛ ɛna-ɩ nɛ eheyi-i se: “Mɛn-pɛlɛ! Ɖɔkɩ ña-tɩ! Lidaʋ ŋgʋ ŋwɛnɩ mɔ-yɔɔ yɔ, kɩlɩzɩ-ŋ pɩ-taa.” Kpaagbaa mbʋ lɛ, halʋ yɔɔ cɛ.
23 Yesu ɖɛwa nɛ ɛtalɩ *Yuda ñɩma *sɔsɔ ɛnʋ ɛ-tɛ lɛ, ɛmaɣnɩ yɩsɩ hʋlɩyaa nɛ ɛyaa samaɣ posuni ɖɩɣa nɛ pamakɩ kubusi. 24 Peeye eheyi-wɛ se: “Ɩlɩɩ cɩnɛ, pɛlɛ ɛnʋ eɖou kuɖou, ɛtasɩ kɩsɩbʋ.” Ɛyɔɔdɩ mbʋ lɛ, powoŋ-i.
25 Palɩzɩ ɛyaa awayɩ lɛ, Yesu sʋʋ kuduyuu tɛɛ nɛ ɛɖɔkɩ pɛlɛ ɛnʋ e-nesi taa nɛ ɛlɛ kʋyɩ.
26 Pɩlabɩ mbʋ lɛ, tɔm ndʋ tɩcɔɔ egeetiye nɖɩ ɖɩ-taa payɩ.
Yʋlʋmaa naalɛ nabɛyɛ yɔɔ cɛbʋ yɔ
27 Pʋwayɩ lɛ, Yesu kʋyɩ Yuda ñɩma *sɔsɔ ɛnʋ ɛ-tɛ se ekpeŋ. Ekpeŋaɣ lɛ, yʋlʋmaa naalɛ nabɛyɛ tɩŋɩɣ ɛ-wayɩ nɛ pamakɩ kubusi se: “Wiyaʋ Daaviidi Sayɩ! Na ɖa-pʋtɔdɩyɛ.”
28 Ɛtalɩ ɖɩɣa lɛ, yʋlʋmaa mba powolo ɛ-cɔlɔ. Peeye ɛpɔzɩ-wɛ se: “Ɩwɛnɩ lidaʋ mɔ-yɔɔ se manpɩzɩɣ malabɩ-mɩ mbʋ mi-liu wɛɛ yɔ yaa we?” Paba cosi-i se: “Ɛɛɛ, Kɩpaɣlʋ ŋpɩzɩɣ.” 29 Peeye etukuni pɛ-ɛza nɛ eheyi-wɛ se: “Pɩla ɛzɩ ɩwɛnaʋ lidaʋ yɔ.”
30 Ɛyɔɔdɩ mbʋ lɛ, pɛ-ɛza kuli. Ɛlɛ ɛka pa-ñʋŋ taa se: “Ɩkpa mɩ-tɩ ɖeu, ɩtaaheyi-tʋ nɔɔyʋ.” 31 Patɩlɩ peeye lɛ, pamanɩ Yesu tɔm yɔɔ nɛ pɔcɔɔ pe-egeetiye tɩŋa taa payɩ nɛ pasaŋ-ɩ.
Kaayɔɔdaɣ nakɛyɛ yɔɔ cɛbʋ yɔ
32 Yʋlʋmaa mba pɛɖɛɣaɣ lɛ, nɔɔyʋ woni abalʋ nɔɔyʋ Yesu cɔlɔ. Eleeu nɔɔyʋ wɛ ɛ-wayɩ nɛ ɛpɩsɩ-ɩ kaayɔɔdaɣ. 33 Yesu ɖɔɔnɩ eleeu ɛnʋ nɛ abalʋ ɛnʋ ɛpazɩ yɔɔdʋʋ nɛ ɛyaa samaɣ yɩɣyɩɣ-ɩ nɛ kɔtɔŋ se: “Ɖooo yɔ, nabʋyʋ talabɩdɩ Izrɛɛlɩ ɛjaɖɛ taa ɛzʋnɔ!” 34 Peeye *Farɩsɩ ñɩma tɔm se: “Alewaa caa hanɩ-ɩ ɖoŋ nɛ ɛɖɔɔnʋʋnɩ alewaa.”
Yesu naʋ ɛyaa samaɣ pʋtɔdɩyɛ yɔ
35 Yesu cɔwaɣ tɛtʋ sɔsɔtʋ nɛ cikpetu patɩŋa pa-taa nɛ eheyiɣ ɛyaa Ɛsɔ Kewiyaɣ Laŋhɛzɩyɛ Tɔm Ɛsɔ ɖɩsɛyɛ taa nɛ ɛlakɩ nɛ kʋdɔndɩnaa ndɩ ndɩ nɛ ajamaa ndɩ ndɩ patɩŋa pɔ-yɔɔ cɛkɩ. 36 Ɛna ɛyaa samaɣ lɛ, pɩlabɩ-ɩ pʋtɔdɩyɛ nɛ kɛ. Mbʋ pʋyɔɔ yɔ, pɩɩkɩlɩ-wɛ nɛ pekiitiɣ yem ɛzɩ heŋ weyi ɩfɛyɩnɩ ninɖiɣyu yɔ. 37 Peeye eheyi ɛ-tɔmkpɛlɩkɩyaa se: “Kʋmtʋ ɖɔwa, ɛlɛ, kʋnɖaa tɔɖɔɔ. 38 Pʋ-yɔɔ lɛ, itendi tɩ-tʋ nɛ ɛsɔzɩ kʋnɖaa sakɩyɛ nɛ pasɩnɩ-mɩ kʋm.”