Canaɣ nakɛyɛ yɔɔ cɛbʋ yɔ
(Mrk 1.40-45; Luk 5.12-16)
8
1 Pʋwayɩ lɛ, Yesu lɩnɩ pʋʋ taa nɛ etiki nɛ ɛyaa sakɩyɛ tɩŋɩɣ ɛ-wayɩ. 2 Pɩkɛdaa lɛ, canaɣ nakɛyɛ wolo ɛ-cɔlɔ nɛ koluŋ ɛ-ɛsɩndaa nɛ kɔtɔ se: “Kɩpaɣlʋ! Ye ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.” 3 Peeye Yesu posi e-nesi nɛ etukuni-kɛ nɛ eheyi-kɛ se: “Mentisaa! Pɩsɩ ɛyʋ weyi ɛmʋnaa yɔ.” Ɛyɔɔdɩ mbʋ lɛ, kɔ-yɔɔ tɩcɛbʋ. 4 Ɛlɛ Yesu heyi-i se: “Taaheyi-tʋ nɔɔyʋ. Ɛlɛ, wolo *cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ *Mooyiizi kaɖʋʋ yɔ nɛ pɩwɩlɩ ɛyaa tɩŋa se ñɔ-yɔɔ cɛba.”
Room sɔɔja sɔsɔ nɔɔyʋ tʋmlaɖʋ yɔɔ cɛbʋ yɔ
(Luk 7.1-10)
5 Pʋwayɩ lɛ, Yesu kʋyɩ se ewoki Kapɛrnayum. Ɛsʋwaɣ tɛtʋ ndʋ tɩ-taa lɛ, Room sɔɔja sɔsɔ nɔɔyʋ wolo ɛ-cɔlɔ nɛ etendi-i se: 6 “Hayɩ Kɩpaɣlʋ! Man-tʋmlaɖʋ pɩsɩ kalɩkalaɣ nɛ ɛwɛɛ ñalʋʋ yɔɔ ɖɩɣa nɛ ɛlakɩ kʋñɔŋ siŋŋ.” 7 Peeye Yesu cosi-i se: “Mowoki mala nɛ ɛ-yɔɔ cɛ.” 8 Ɛlɛ, sɔɔja sɔsɔ ɛnʋ eheyi Yesu se: “Kɩpaɣlʋ! Mantamʋna se ŋsʋʋ man-ɖɩɣa taa. Pʋ-yɔɔ lɛ, mentendiɣ-ŋ se ŋyɔɔdɩ tɔm kʋɖʋmtʋ koŋ nɛ man-tʋmlaɖʋ yɔɔ cɛ. 9 Ma lɛ, ma-ñʋʋ yɔɔ ñɩma wɛɛ nɛ mañaŋ-wɛ. Ɛlɛ, mɛn-tɛɛ ñɩma wɛɛ ɖɔɖɔ. Meheyi pa-taa nɔɔyʋ se ewolo peeye yɔ yɔ, ewoki. Maya lɛlʋ se ɛkɔɔ yɔ, ɛkɔŋ ɖɔɖɔ. Meheyi man-tʋmlaɖʋ se ɛla nabʋyʋ yɔ, ɛlɛ ñalakɩ-pʋ ɖɔɖɔ.”
10 Yesu nɩ sɔɔja ɛnʋ ɛyɔɔdɩ mbʋ lɛ, ɛyɩɣyɩ-ɩ nɛ ɛkɛzɩ ɛ-tɩ nɛ ɛyaa mba patɩŋaɣ-ɩ yɔ pɔ-yɔɔ nɛ ɛtɔ se: “Toovenim lɛ, meheyiɣ-mɩ se paa Izrɛɛlɩ ɛjaɖɛ taa maɣmaɣ yɔ, mantanadɩ weyi ɛwɛnɩ lidaʋ nɛ pɩtalɩ-ɩ yɔ. 11 Mankaɖɩɣ-mɩ se ɛyaa sakɩyɛ kɔŋ lɩnaʋ wɩsɩ ɖɩlɩyɛ nɛ sɩ-ɖɩɖʋyɛ nɛ powolo pa nɛ ɖɔ-cɔzɔnaa *Abraham nɛ Izaakɩ nɛ Yakɔɔbʋ pɛkpɛndɩ pacaɣ Ɛsɔ Kewiyaɣ taa nɛ pɔtɔkɩ kpɛdɛlɛɛ. 12 Ɛlɛ, mba pɩɩwɛɛ se pɛkɛ Ɛsɔ Kewiyaɣ taa ñɩma yɔ, pɔlɔʋ-wɛ nɛ awayɩ cɩkpɛndʋʋ taa. Peeye pewiliɣ nɛ pasalɩ pe-kela.”
13 Peeye eheyi sɔɔja sɔsɔ ɛnʋ se: “Wolo ŋkpe. Ɛzɩma mbʋ ŋwɛnɩ lidaʋ mɔ-yɔɔ yɔ, malakɩ-ŋ mbʋ ŋpɔzɩ-m yɔ.” Ɛtɩyɔɔdɩ mbʋ lɛ, tʋmlaɖʋ ɛnʋ ɛ-yɔɔ cɛ.
Kʋdɔndɩnaa sakɩyɛ yɔɔ cɛbʋ yɔ
(Mrk 1.29-34; Luk 4.38-41)
14 Pʋwayɩ lɛ, Yesu wolo Pɩyɛ tɛ nɛ ɛmaɣnɩ kɩnamɩyɛ kpa Pɩyɛ yɔsɔ nɛ ɛhɛnɩ. 15 Peeye ewobi ɛ-cɔlɔ nɛ etukuni e-nesi nɛ ɛ-yɔɔ cɛ nɛ ɛkʋyɩ ɛha-wɛ lɩm.
16 Ɖanaɣ ɖanaa lɛ, ɛyaa kpaɣ aluukenaa sakɩyɛ nɛ powoni Yesu cɔlɔ nɛ ɛyɔɔdɩ nɛ alewaa se pa-wayɩ nɛ ɛla nɛ kʋdɔndɩnaa tɩŋa payɩ yɔɔ cɛ ɖɔɖɔ.
17 Pʋnɛ yɔ, pɩlabɩ mbʋ se pɩla ɛzɩ *lɔɔyaɣ tʋ Ezaayii yɔɔdʋʋ se: “Ɛmʋ-ɖʋ ɖɛ-ɛjandʋ nɛ ɖa-kʋdɔmɩŋ” yɔ.
Yesu wayɩ tɩŋʋʋ tɔm
(Luk 9.57-62)
18 Kɩyakʋ nakʋyʋ Yesu wɛ Galilee teŋgu nɔɔ nɛ ɛyaa samaɣ woki ɛ-cɔlɔ. Peeye eheyi ɛ-tɔmkpɛlɩkɩyaa se ɛ nɛ wɛ pɛtɛzɩ teŋgu kidiiliŋ lɛɛkʋ yɔɔ. 19 Ɛlɛ, paɣtʋ wɩlɩyaa taa nɔɔyʋ wolo ɛ-cɔlɔ nɛ eheyiɣ-i se: “Wɩlɩyʋ! Paa le ŋwoki yɔ, mantɩŋɩɣ-ŋ.” 20 Yesu cosi-i se: “Putanaa ñɛwɛnɩ pɔŋ nɛ sumasɩ ñɛwɛnɩ ɖandʋ. Ɛlɛ, Ɛyʋ Pɩyalʋ ma mɛnfɛyɩnɩ ñʋʋ ɖɩɖʋyɛ.” 21 Peeye ɛ-tɔmkpɛlɩkɩyaa taa lɛlʋ heyi-i ɖɔɖɔ se: “Kɩpaɣlʋ! Yele mowolo menpi man-caa nɛ pʋcɔ mɔnkɔɔ mantɩŋ-ŋ.” 22 Yesu cosi-i se: “Kɔɔ ŋtɩŋ-m, yele sɩɖaa nɛ pepi pa-sɩɖaa.”
Yesu hɛzʋʋ heɣlim sɔsɔm nabʋyʋ yɔ
(Mrk 4.35-41; Luk 8.22-25)
23 Yesu kpa kpɩyʋʋ taa lɛ, ɛ-tɔmkpɛlɩkɩyaa tɩŋ ɛ-wayɩ. 24 Pɛɖɛɣaɣ lɛ, heɣlim sɔsɔm nabʋyʋ pazɩ mabʋ ɖoŋ nɛ lɩm sʋʋ kpɩyʋʋ taa. Ɛlɛ, Yesu ɖowaɣ. 25 Peeye ɛ-tɔmkpɛlɩkɩyaa wobi ɛ-cɔlɔ nɛ pefezi-i se: “Hayɩ Kɩpaɣlʋ! Ya ɖa-ñʋʋ! Ɖɩtɛŋɛlɩɣ cɩnɛ!” 26 Ɛlɛ, ɛkʋyɩ nɛ ɛpɔzɩ-wɛ se: “Pɩlabɩ ɛzɩma nɛ sɔɔndʋ kpaɣ-mɩ mbʋ? Mi-lidaʋ wɛ kpaagbaa ñɩɩɩ!” Ɛlɛ eholini heɣlim nɛ lɩm nɛ pɩhɛɛ pɩtɩŋa niɣ niɣ. 27 Peeye ɛ-tɔmkpɛlɩkɩyaa mba payɩɣyɩ-ɩ siŋŋ nɛ pɔpɔzʋʋ pa-tɩ se: “Ɛbɛ ɛnɛ ɛkɛnaa kpem nɛ pɩkpɛndɩnɩ heɣlim nɛ lɩm nɛ pañaŋ-ɩ?”
Aluukenaa naalɛ nabɛyɛ yɔɔ cɛbʋ yɔ
(Mrk 5.1-20; Luk 8.26-39)
28 Pʋwayɩ lɛ, patalɩnɩ pa-kpɩyʋʋ Gadaraa ɛjaɖɛ taa kidiiliŋ lɛɛkʋ yɔɔ nɛ petii. Peeye ɛyaa naalɛ nabɛyɛ lɩnɩ pɩlaŋ taa nɛ pakatɩɣ Yesu. Pekem alewaa. Nɔɔyʋ takatɩɣ se ɛtɩŋnɩ pɔ-cɔlɔ, mbʋ pʋyɔɔ yɔ, paawɛ kañatʋ siŋŋ. 29 Pakatɩ-ɩ mbʋ lɛ, pamakɩ kubusi se: “Ɛsɔ Pɩyalʋ! Ɖa nɛ ŋ se we? Ŋkɔm se ŋɖʋ-ɖʋ kʋñɔŋ nɛ pʋcɔ alɩwaatʋ ndʋ Ɛsɔ ɖʋwa se ɛhʋʋnɩ-ɖʋ yɔ tɩtalɩ yaa we?” 30 Afanaa tikaɣ sɔsɔɔ nakɛyɛ kɛwɛ peeye alɩwaatʋ ndʋ nɛ kacazɩɣ tɔɔnaɣ. Kaaposini-wɛ pazɩ. 31 Peeye alewaa mba petendi-i se: “Ye ŋɖɔɔnʋʋ-ɖʋ ɛyaa panɛ pa-wayɩ lɛ, ŋha-ɖʋ nʋmɔʋ nɛ ɖiwolo ɖɩsʋʋ afanaa tikaɣ ŋga yɔ ka-taa.” 32 Ɛlɛ eheyi-wɛ se: “Ise ɩɖɛɛ!” Peeye pesewa nɛ powolo pasʋʋ afanaa mba pa-taa nɛ paba kpaɣ seya nɛ pʋʋ yɔɔ nɛ pɛkpɛndɩnɩ-wɛ petii pafalɩ teŋgu taa nɛ pɔñɔɔ lɩm nɛ pasɩ patɩŋa payɩ. 33 Mba pɔcɔŋaɣnɩ afanaa mba pɔ-yɔɔ yɔ, paba se nɛ powolo tɛtʋ taa nɛ pɛkɛdɩ ɛyaa mbʋ pɩtɩŋa payɩ pɩlaba yɔ. 34 Peeye tɛtʋ taa ɛyaa kpɛzaa nɛ powolo Yesu cɔlɔ nɛ petendiɣ-i se ɛkʋyɩ pɛ-ɛjaɖɛ taa nɛ ɛɖɛɛ.