19
Yoonaataanɩ huuzuu Daaviidi yɔɔ yɔ
1 Alɩwaatʋ ndʋ tɩ-taa Sawʋlɩ ɖʋwa se ɛkʋʋ Daaviidi lɛ, heyi-tʋ ɛ-pɩyalʋ Yoonaataanɩ nɛ ɛ-tʋmlaɖaa tɩŋa payɩ. Ŋgʋ, ɛ-pɩyalʋ Yoonaataanɩ kɔsɔɔlɩ Daaviidi pɩtɩɩfɛyɩ. 2 Ɛkɔm ɛnɩɩ ḿbʋ lɛ, eheyi Daaviidi se, ɛnʋ caa Sawʋlɩ caɣ se ɛkʋ ɛ́lɛ. Se, ye ḿbʋ, kifem tanaŋ tɛɛ lɛ, ɛkpa ɛ-tɩ! Se, ewolo ɛmɛlɩ ɖoli nɔɔyʋ nɛ ɛwɛɛ peeye! 3 Se, piyele ɛnʋ lɛ, ɛnʋ kaɣ sɩʋ ɛnʋ caa nɛ ɛ nɛ ɩ powolo hayɩm ḿbʋ pɩ-taa ɛmɛlaa yɔ. Se ɛnʋ yɔɔdʋʋnɩ ɛ-caa ɛ́lɛ tɔm nɛ ɛna mbʋ ɛlakɩ yɔ lɛ, ewolo ɛkɛdɩ-ɩ.
4 Yoonaataanɩ wobi ɛ-caa Sawʋlɩ cɔlɔ lɛ, ɛyɩɣyɩ Daaviidi nɛ ɛtɛ eheyi-i se, ɛnʋʋ wiyaʋ lɛ, pɩfɛyɩ se ɛyʋsɩnɩ ɛ-tʋmlaɖʋ Daaviidi. Se, ɛ́lɛ tayʋsɩnɩ-ɩ pʋyʋ, ɛlɛ, mbʋ pɩwɛ ɖeu yɔ́ɔ ɛlabɩ-ɩ. 5 Elema ɛ-tɩ sɩm nɔɔ taa nɛ ɛkʋ Filisitii tʋ Gooliyaatɩ. Kɩyakʋ ŋgʋʋ KƖPAƔLƲ yeba nɛ Izirɛɛlɩ ñɩma wa kpaagbaa kpem. Se, ɛnʋʋ ɛ-caa ɛna ḿbʋ nɛ pɩkɛdɩnɩ-ɩ. Se, ye ɛkpɛdɩ Daaviidi calɩm ɖulum, ye ɛ́lɛ ɛtala pʋyʋ nɛ ɛkʋ-ɩ yɔ, pʋbʋ, ɛyʋsaa. Se, ɛbɛ yɔɔ ɛtɩɩlakɩ ḿbʋ kpem? 6 Ɛyɔɔdɔ ḿbʋ lɛ, Sawʋlɩ nɩɩ nɛ eɖuuni KƖPAƔLƲ se, paatasɩɣ Daaviidi kʋʋ. 7 Peeye Yoonaataanɩ wobi ɛñɩnɩ Daaviidi nɛ eheyi-i ndʋ ɛ nɛ Sawʋlɩ pɔyɔɔdaa yɔ, tɩ-tɩŋa nɛ piyele Daaviidi pɩsɩ wiyaʋ tʋmɩyɛ taa ɛzɩ ɖooo lɛ yɔ.
Miikaalɩ yabʋ Daaviidi ñʋʋ yɔ
8 Pʋkɔma lɛ, you ɖaɣnɩ pazʋʋ nɛ Daaviidi wolo nɛ ɛkʋyɩ Filisitii ñɩma yɔɔ nɛ ɛwabɩ-wɛ kpaagbaa kpem nɛ piyele pese. 9 Nakʋyʋ wiye lɛ, KƖPAƔLƲ ɖaɣnɩ tiyuu kalɩzaɣ kɩtɛkɛdaɣ nɛ ketii Sawʋlɩ yɔɔ. Ŋgʋ, ɛɛwɛ ɛ-tɛ, ɛɖɔkɩ ɛ-kɩkpɛzɛŋ e-nesi taa. Daaviidi ñaawɛɛ nɛ ɛmakɩ cɩmʋʋ. 10 Pɩkɛdaa lɛ, Sawʋlɩ lɔ Daaviidi ɛ-kɩkpɛzɛŋ se, ɛyaɣ-ɩ nɛ ɛkam-ɩ nɛ koloŋa. Ɛlɛ, Daaviidi wɛlɩ ɛ-tɩ nɛ kɩkpɛzɛŋ ŋ́gʋ, kuwolo kisiɣ koloŋa yɔɔ ca. Piyele Daaviidi ñese nɛ ɛtʋlɩ ɖoó ana a-taa. 11 Pɩlabɩ ḿbʋ lɛ, Sawʋlɩ tiyi feŋiyaa Daaviidi tɛ se, paɖaŋ nɛ kifem tanaŋ lɛ, pakʋ-ɩ a. Ɛlɛ, Daaviidi halʋ Miikaalɩ heyi-i se, ye etese ɖoó ana yɔ, kifeŋ yɔ, pakʋʋ-ɩ! 12 Mbʋ yebina nɛ Miikaalɩ tisi Daaviidi nɛ mundoɖe pɔʋ nɛ ɛ́lɛ se nɛ ɛtʋlɩ. 13 Ɛlabɩ ḿbʋ lɛ, ɛkpaɣ ɖɩɣa ɛgɔlɩmɩyɛ sɩʋkpeɣleɣ nɛ ɛhɛzɩ Daaviidi ɖɩhɛnɩyɛ taa nɛ ɛɖʋ ka-ñʋʋ pʋnʋ tɔnɛ, nɛ ehuuzi kɔ-yɔɔ pɩsaʋ nakʋyʋ. 14 Pɩkɛdaa lɛ, Sawʋlɩ tiyi feŋiyaa ḿba yɔ, patalɩ se pakpaɣ Daaviidi. Peeye Miikaalɩ heyi-wɛ se, pɩwɩɣ-ɩ. 15 Powobi peheyi Sawʋlɩ ḿbʋ lɛ, ɛ́lɛ́ ɖaɣnɩ-wɛ kitinaʋ se powolo pana Daaviidi nɛ pakpaɣ-ɩ nɛ ɛ-ñalʋʋ nɛ powona nɛ ɛnʋ kʋ-ɩ.
16 Feŋiyaa kɔm papɩsɩ nɛ pasʋʋ Daaviidi tɛ lɛ, sɩʋkpeleɣ pamaɣnɩ Daaviidi ñalʋʋ yɔɔ, nɛ pʋnʋ tɔnɛ ɛ-ñʋʋ ɖeɖe. 17 Pʋwayɩ lɛ, Sawʋlɩ pɔzɩ Miikaalɩ se, pɩlabɩ ɛzɩma nɛ ɛcɛtɩ ɛnʋʋ ḿbʋ? Se, pɩlabɩ ɛzɩma nɛ eyele ɛnʋ koyindu nɛ ɛtʋlɩ ḿbʋ kpem? Miikaalɩ cosi-i se, ɛ́lɛ heyi-i se, ye eteyebi-i nɛ ɛɖɛɛ yɔ, ɛ́lɛ kʋʋ-ɩ.
Sawʋlɩ tɩŋʋʋ Daaviidi wayɩ Naayɔɔtɩ tɛtʋ taa yɔ
18 Palɩzɩ Daaviidi lɛ, ɛpɩzɩ ese nɛ ɛtʋlɩ, nɛ ɛkɔɔ ɛtalɩ Raamaa tɛtʋ b taa, Samʋyɛɛlɩ tɛ, nɛ ɛkɛdɩ-ɩ mbʋ Sawʋlɩ labɩ-ɩ yɔ pɩ-tɩŋa payɩ. Daaviidi heyi Samʋyɛɛlɩ ḿbʋ lɛ, ɛ nɛ ɩ pakʋyɩ nɛ powolo pacaɣ ɖenɖe payaɣ se, Naayɔɔtɩ yɔ. 19 Sawʋlɩ kɔm ɛtɩnɩʋ se, Daaviidi wɛ Naayɔɔtɩ lɛ, 20 ɛtasɩ feŋiyaa lɛlaa tiyuu se powolo nɛ pakpa-ɩ. Paba talaa lɛ, pamaɣnɩ lɔɔyɩsɩ tɩnaa tikaɣ nakɛyɛ nɛ pa-ñʋʋdʋ Samʋyɛɛlɩ, lɔɔyaɣ kʋyɩnɩ-wɛ. Paba na-wɛ ḿbʋ lɛ, Ɛsɔ Kalɩzaɣ tii pɔ-yɔɔ nɛ lɔɔyaɣ ŋ́ga, kakpa pɔ-yɔɔ ɖɔɖɔ ḿbʋ. 21 Sawʋlɩ tɩnɩ ḿbʋ lɛ, etiyi ɖɔɖɔ feŋiyaa lɛlaa. Paba talaa lɛ, lɔɔyaɣ ŋ́ga kakpa pɔ-yɔɔ ɖɔɖɔ. Sawʋlɩ tasɩ tiyuu tozo ñɩma, nɛ pɩtasɩ labʋ ḿbʋ ɖɔɖɔ. 22 Peeye ɛkʋyɩ ɛ-maɣmaɣ se ewoki Raamaa. Ɛkɔm ɛtalɩ kujomuu sɔsɔʋ ŋgʋ kɩwɛ ɖenɖe payaɣ se Seku yɔ kʋ-cɔlɔ lɛ, ɛpɔzɩ se, le Samʋyɛɛlɩ nɛ Daaviidi pɛwɛɛ? Pocosi-i se, pɛwɛ Naayɔɔtɩ, Raamaa tɛtʋ cɔlɔ. 23 Ɛkʋyɩ ɖɩnɛ lɛ, ɛkpaɣ Naayɔɔtɩ nʋmɔʋ. Ɛɖɛɣaɣ lɛ, Ɛsɔ Kalɩzaɣ tii ɖɔɖɔ ɛ-yɔɔ, nɛ lɔɔyaɣ ŋ́ga kakpa ɛ-yɔɔ nɛ ɛkɔɔ ɛtalɩ peeye. 24 Ɛnʋ ɖɔɖɔ ɛhɔzɩ e-wondu ɖɔɖɔ ɛzɩ lɛlaa yɔ nɛ kakpa ɛ-yɔɔ ɖɔɖɔ Samʋyɛɛlɩ ɛsɩndaa. Pɩkɛdaa lɛ, ɛtɔlɩ ŋtaaakpeɖe mbʋ nɛ ɛwɛɛ peeye kɩyakʋ nɛ kɩ-tɛɛ pilim. Mbʋ yebina nɛ pɔpɔzʋʋ se, pɩkpɛndɩnɩ Sawʋlɩ ɖɔɖɔ nɛ ɛ́lɛ ñɛkɛ lɔɔyaɣ tʋ naa we?