17
Daaviidi nɛ Gooliyaatɩ pɔ-tɔm
1 Nakʋyʋ wiye Filisitii ñɩma kpeɣli po-youlaɖaa se, powoki you nakʋyʋ. Paakpeɣli ɖama Soko tɛtʋ taa, Yuuda hɔɔlʋʋ taa, nɛ pa-ɖikpeɣliye wɛɛ Efɛɛzɩdamiim, Soko tɛtʋ nɛ Azeekaa ñɩndʋa pɛ-hɛkʋ taa. 2 Piyele Sawʋlɩ nɛ Izirɛɛlɩ youlaɖaa paba ñekpeɣli ɖama Tɩŋ Sɔsɔŋ Kajalaŋa hɔɔlʋʋ lɛɛkʋ taa, nɛ pɔñɔɔzɩ pa-tɩ se pakʋyɩ Filisitii ñɩma yɔɔ. 3 Mbʋʋ Filisitii ñɩma nɛ Izirɛɛlɩ ñɩma pɛwɛ pʋŋ yɔɔ hɔɔlʋʋ hɔɔlʋʋ nɛ kajalaŋa wɛɛ pɛ-hɛkʋ taa. 4 Pɩkɛdaa lɛ, sɔdʋʋ nakʋyʋ lɩnɩ Filisitii ñɩma ɖikpeɣliye taa. Payaɣ-kʋ se, Gooliyaatɩ, ɛ-tɛ lɛ Gaatɩ tɛtʋ b taa. Ɛɛɖaɣlaa ɛzɩ mɛtanaa naadozo (3) yɔ. 5 Ɛpam ɛ-ñʋʋ taa ñɩɣyʋʋ ŋgʋ payaɣ se bɩrɔɔzɩ yɔ ku-hulaɣ nɛ esuu toko ŋgʋ paalabɩnɩ bɩrɔɔzɩ pɔɔyɛ yɔ, kɩɩwɛ yuŋ ɛzɩ kiiloonaa nɩɩnʋwa nɛ hiu (60) yɔ. 6 Piyele esuu ɛ-nɩŋgbanzɩ ñɩɣyʋʋ ŋgʋ payaɣ se bɩrɔɔnzɩ yɔ, nɛ ɛpaa ɛ-laŋɩyɛ taa bɩrɔɔzɩ sɩɣa nakɛyɛ kotaa. 7 Ɛ-kɩkpɛzɛŋ ɖaʋ kpeetaa ɛzɩ ñɩɣyʋʋ ŋgʋ palʋʋnɩ pɩsaŋ yɔ kɩ-ɖaʋ. Kɩ-nɔɔ taa sɩɣa ñɛwɛ yuŋ ɛzɩ kiiloonaa lʋbɛ (7) yɔ. Weyi ɛɖɔkʋʋ ɛ-kpayʋʋ yɔ, ɛ́lɛ ɖɔŋaɣ ɛ-ɛsɩndaa. 8 Gooliyaatɩ ñaasɩŋaa nɛ eholuuni Izirɛɛlɩ ñɩma youlaɖaa se, ɛbɛ yɔɔ kpem palɩ you kadaɣ taa yɔ? Se, ɛnʋ kɛ Filisitii tʋ, nɛ ḿba ñɛkɛ Sawʋlɩ yomaa. Se, palɩzɩ pa-taa abalʋ nɔɔyʋ nɛ ɛkatɩ ɛnʋ! 9 Se, ye ɛ́lɛ ɛkɩlɩ-ɩ ɖoŋ nɛ ɛwa ɛnʋʋ yɔ, pʋbʋ, ḿba kɛɣ po-yomaa. Ɛlɛ, ye ɛnʋ ɛkɩlɩnɩ ɛlɛɛ ɖoŋ nɛ ɛwabɩ-ɩ yɔ, paba ñɛkɛɣnɩ ḿba yomaa. 10 Ɛtasɩ yɔɔdʋʋ se, ye mbʋ, kɩyakʋ ŋ́gʋ, ɛnʋ caɣ Izirɛɛlɩ youlaɖaa nɔɔ. Se, palɩzɩ pa-taa abalʋ nɔɔyʋ nɛ ɛ nɛ ɛ́lɛ pamaɣzɩ. 11 Sawʋlɩ nɛ e-youlaɖaa tɩŋa panɩ Filisitii tʋ ɛnʋ ɛ-tɔm ńdʋ lɛ, sɔɔndʋ kpa-wɛ nɛ pitii po-tome taa yɔɔɔ.
12 Daaviidi kɛkɛ abalʋ weyi payaɣ se, Yeesee yɔ ɛ-pɩyalʋ. Ɛ́lɛ kɛ Efiraataa liɖe taa tʋ, ɛɛwɛ Bɛtɩlɛhɛm tɛtʋ taa, Yuuda egeetiye taa. Yeesee kɛwɛnɩ piya lutozo (8). Ɛɛkɛ ɛyʋ sɔsɔ c nɔɔyʋ Sawʋlɩ alɩwaatʋ taa. 13-14 Paakpaɣ ɛ-pɩyalaa sɔsaa naadozo (3) mba ɛcalɩ lʋlʋʋ yɔ, Eliyaavɩ nɛ ɛ-wayɩ ñɩnʋ Avinaadaavɩ nɛ ɛ́lɛ wayɩ ñɩnʋ Samaa nɛ pa nɛ Sawʋlɩ pɛɖɛɛ you. Daaviidi lɛ pa-tɩnʋʋ. 15 Ɛ́lɛ wokaɣ Sawʋlɩ tɛ nɛ ɛpɩsɩɣ ɖoŋɖoŋ Bɛtɩlɛhɛm tɛtʋ taa nɛ ɛtɩŋɩɣ ɛ-caa heŋ. 16 Tɔɔ! Filisitii tʋ Gooliyaatɩ ɛnʋ, ɛlɩaɣ tanaŋ nɛ ɖanaɣ Izirɛɛlɩ ñɩma youlaɖaa ɛsɩndaa nɛ ɛwɩlɩɣ ɛ-tɩ mbʋʋ kɩyakɩŋ nɩɩnaza (40) 17 Nakʋyʋ wiye lɛ, Yeesee heyi Daaviidi se, ɛkpaɣ tɔɔnaɣ pe wena poɖoŋaa yɔ a-kutoku nɛ tindine hiu (10) nɛ ewoni lɔŋ youlaɖaa ɖikpeɣliye taa nɛ ɛcɛlɩ ɛ-ɖalaa. 18 Se, ɛkpaɣ ɖɔɖɔ waakaasɩnaa hiu (10) mba yɔ, nɛ ewona ɛha youlaɖaa ñʋʋdʋ. Se, ewoba lɛ, ɛna se ɛ-ɖalaa wɛ alaafɩya nɛ ɛkpɛndɩnɩ nabʋyʋ nɛ ewona nɛ ɛwɩlɩnɩ ɛnʋ se alaafɩya wɛ peeye. 19 Se, ewokuu yɔ, ɛmakɩnɩ pa nɛ Sawʋlɩ nɛ Izirɛɛlɩ youlaɖaa tɩŋa. Pɛwɛ Tɩŋ Sɔsɔŋ Kajalaŋa taa.
20 Tɛʋ fem tanaŋ tɛɛ lɛ, Daaviidi kʋyɩ tanaŋ cu nɛ eyebini e-heŋ nenɖiɣyʋ nɔɔyʋ nɛ piyele ɛkpaɣ wondu ńdʋ nɛ ɛɖɛɛ ɛzɩ ɛ-caa Yeesee heyuu-i yɔ, nɛ ɛkɔɔ ɛtalɩ Izirɛɛlɩ ñɩma ɖikpeɣliye taa. Alɩwaatʋ ndʋ lɛ, po-youlaɖaa ñɔɔzaɣ pa-tɩ se pasʋʋ you taa nɛ papazɩ youkubusi mabʋ. 21 Izirɛɛlɩ ñɩma nɛ Filisitii ñɩma paañɔɔzɩ pa-tɩ nɛ papa ɖama nɛ ɛza se poyoo. 22 Piyele Daaviidi ñowoni e-wondu ndʋ ɛɛsɩɣlaa yɔ nɛ ɛcɛlɩ wondu ɖaŋɩyʋ nɛ ese lɛɛlɛɛ nɛ ɛɖɛɛ you taa nɛ ewolo ɛ-ɖalaa cɔlɔ nɛ ɛpɔzʋʋ-wɛ se ɛna se pɛwɛ alaafɩya. 23 Ɛyɔɔdaɣnɩ-wɛ ḿbʋ lɛ, Filisitii tʋ Gooliyaatɩ weyi ɛ-tɛ lɛ Gaatɩ yɔ, ɛlɩɩ e-youlaɖaa ɛsɩndaa nɛ ɛtasɩ yɔɔdʋʋ ɛzɩ ɛtɩɩlakʋʋ yɔ. Ɛyɔɔdɩ ḿbʋ lɛ, Daaviidi nɩɩ. 24 Izirɛɛlɩ ñɩma na-ɩ lɛ, sɔɔndʋ kpa pa-tɩŋa nɛ papazɩ kitinaʋ wayɩ, 25 nɛ peheyiɣ ɖama se, panaɣ ɛyʋ ɛnʋ yɔ, se ɛkpaɣnɩ pɔ-yɔɔ mbʋ se, ɛcaa pɔ-nɔɔ. Pʋ-yɔɔ lɛ, ye nɔɔyʋ ɛpɩsaa nɛ ɛkʋ-ɩ yɔ, pʋbʋ, wiyaʋ haɣ-ɩ ñɩm sakɩyɛ, nɛ ɛtɛ ɛha-ɩ ɛ-maɣmaɣ ɛ-pɛlɛ, nɛ eyele nɛ ɛ-hɔʋ taa ñɩma wɛnɩ waɖɛ siŋŋ Izirɛɛlɩ ɛjaɖɛ taa.
26 Peeye Daaviidi pɔzɩ youlaɖaa mba paawɛ ɛ́lɛ cɔlɔ yɔ se, ye nɔɔyʋ ɛkʋ Filisitii tʋ ɛnʋ nɛ ɛkpanɩ-ɩ kɩmɩyɛ tʋtʋ ndʋ ɛtʋ Izirɛɛlɩ ñɩma yɔ tʋ-yɔɔ, kʋjɔʋ ŋgʋʋ palakɩ-ɩ? Se, toovenim lɛ, Filisitii tʋ kɩtɛpɛlʋʋ ŋ́gʋ, ŋgʋʋ lɛ anɩ kpem nɛ kɩ́katɩ nɛ kʋtʋʋ Ɛsɔ wezuu tʋ youlaɖaa? 27 Paba cosi Daaviidi mbʋ wiyaʋ ɖʋwa se ɛhaɣ pɩtɛ ɛyʋ ɛnʋ yɔ. 28 Daaviidi pɔzaɣ youlaɖaa ḿbʋ lɛ, ɛ-ɖalʋ sɔsɔ Eliyaavɩ nɩɩ. Peeye ɛ́lɛ pana kpawa, nɛ ɛpɔzʋʋ Daaviidi se, pɩlabɩ ɛzɩma nɛ ewolo peeye? Se, anɩ eyebini wondu lakʋ taa? Se ɛnʋ sɩm-ɩ camɩyɛ se ɛkɛ tɩ kpazɩyʋ nɔɔyʋ. Se, ɛ-lɩmaɣza fɛyɩ ɖeu. Se, ewobi peeye se ɛna poyoou yɔ! 29 Peeye Daaviidi pɔzɩ-ɩ se, ɛbɛ ɛnʋ wɛɛkaa? Se, tɔm yem ɛnʋ pɔzaa. 30 Ɖɩnɛɛ ɛha ɛ-ɖalʋ siɣye nɛ ɛpazɩ youlaɖʋ lɛlʋ yɔɔdɩnaʋ. Ɛtasɩ pɔzʋʋ tɔm ndʋ ɛɛpɔzaa yɔ, nɛ samaɣ taa, paa anɩ ɛtasɩ-ɩ cosuu ɛzɩ kajalaɣ yɔ.
31 Daaviidi pɔzaɣ ḿbʋ lɛ, ɛyaa nɩɩ nɛ piyele Sawʋlɩ maɣmaɣ ñanɩɩ-tʋ. Peeye ɛ́lɛ tɔm se, powoni-i. 32 Powoni Daaviidi lɛ, ɛ́lɛ heyi Sawʋlɩ se,Ɖajaa! Sɔɔndʋ ɛtaakpa nɔɔyʋ nɛ Filisitii tʋ ɛnʋ. Se, ɛnʋ woki nɛ ɛnʋ kʋyɩ ɛ-yɔɔ. 33 Sawʋlɩ heyi Daaviidi se, ɛɛpɩzɩɣ nɛ ewolo ɛkʋyɩ Filisitii tʋ ɛnʋ ɛ-yɔɔ. Se, ɛkɛ pɩɣa eveleɣ yem, ŋgʋ, ɛ́lɛ ñɛkɛ youlaɖʋ ɖooo e-evebitu taa. 34 Daaviidi yaa Sawʋlɩ se Ɖajaa! Nɛ eheyi-i se, ɛnʋ tɩŋaɣ ɛ-caa heŋ lɛ, ye pɩlaba se, tɔɔyʋʋ nakʋyʋ yaa paa kpemtɔɔyaɣ nakɛyɛ ɛkpa heu nɔɔyʋ ɛnʋ kalakʋ taa yɔ, 35 ɛnʋ ɖɔɔnʋʋ-kɛ nɛ ɛmabɩ-kɛ nɛ ɛlɩzɩ-ɩ kɔ-nɔɔ taa. Se, ye kapam ɛnʋ nɛ ɛza yɔ, ɛnʋ taŋ ke-liu tɛɛ nɛ ɛkʋ-kɛ. 36 Se, mbʋʋ ɛnʋ kʋ tɔɔyɩŋ nɛ kpemtɔɔyɩsɩ. Se, tɔɔ! Ḿbʋ ɖɔɖɔ ɛnʋ lakɩ Filisitii kɩtɛpɛlʋʋ ŋgʋ yɔ. Mbʋ pʋyɔɔ yɔ, kʋtʋ Ɛsɔ wezuu tʋ youlaɖaa. 37 Daaviidi tasɩ yɔɔdʋʋ se, KƖPAƔLƲ weyi ɛlɩzɩ ɛnʋʋ tɔɔyɩŋ nɛ kpemtɔɔyɩsɩ pa-cɩkpaŋ taa yɔ, ɛlɩzɩɣ ɛnʋ ɖɔɖɔ Filisitii tʋ ɛnʋ e-nesi taa. Peeye Sawʋlɩ heyi-i se, ye ḿbʋ, ewolo yaa! Se, KƖPAƔLƲ ɛwɛɛ ɛ-cɔlɔ!
38 Ɖɩnɛɛ Sawʋlɩ kpaɣ ɛ-maɣmaɣ e-you wondu nɛ esuu Daaviidi. Ɛpam-ɩ ñɩɣyʋʋ ŋgʋ payaɣ se bɩrɔɔnzɩ yɔ, ki-filaɣ nɛ essuu-i e-toko ŋgʋ kihuuzuu e-lotu yɔɔ yɔ. 39 Pʋ-wayɩ lɛ, Daaviidi kpaɣ ɖɔɖɔ Sawʋlɩ kɩkpɛzɛŋ nɛ ɛpaa e-wondu yɔɔ, nɛ ɛkʋyɩ se ɛɖɔŋ nɛ ɛwɩɩ, mbʋ pʋyɔɔ yɔ, patamalɩsɩ-ɩ nɛ pɩ-tɛ wondu ndʋ. Peeye eheyi Sawʋlɩ se, ye wondu ndʋ, tɩwɛ ɛ-yɔɔ yɔ, ɛnʋ ɛɛpɩzɩɣ nɛ ɛɖɔ, se, pɩtamalɩnɩ ɛnʋ. Ɖɩnɛɛ Daaviidi hɔzɩ wondu ndʋ. 40 Piyele ɛkpaɣ ɛ-ɖaʋ nɛ ɛɖɔkɩ e-nesi taa, nɛ etii pɔɔ taa nɛ ɛtɔsɩ pɛ naayɛ kagbaanzɩ nɛ ɛɖʋ e-ninɖiyaa huyuu taa, a-yɔɔ wɛ losoloso. Pʋ-wayɩ lɛ, ɛkpaɣ pɩtɔɖɛ nɛ ɛɖɔŋ nɛ ewokini Gooliyaatɩ yɔɔ. 41 Gooliyaatɩ ñɔɖɔŋaɣ nɛ ɛtɛzɩɣ ñɔtɩnaʋ Daaviidi. Weyi ɛsɩɣlɩɣ e-you wondu yɔ, ɛ́lɛ ñaawɛ ɛ-nɔɔ yɔɔ. 42 Gooliyaatɩ kɔm ɛna Daaviidi lɛ, ɛna se ɛ́lɛ kɛ pɩɣa eveleɣ yem. Ɛkɛ ɛyʋ kɩsɛm, ɖɔɖɔ lɛ, ɛ-ɛsɩdaa ɖewa. Ɛlɛ, ɛtakpaɣ-ɩ ɛyaa pʋyʋ. 43 Ɛna ɛlɛɛ ḿbʋ lɛ, ɛpɔzɩ-ɩ se, ɛnʋ kɛ haɣ nɛ ɛ́lɛ woki ɛ-wayɩ nɛ ɖaʋ naa we? Ɛlɛ, eheyi-i se, Filisitii ñɩma agɔlɩma tɩŋa ɛwɩlɩ-ɩ kpalʋʋ! 44 Se, ewolo ɛnʋ cɔlɔ, pʋbʋ, ɛnʋ ɖʋʋ ɛ-nanɖʋ sumasɩ nɛ tɛtɛ kpɩna nɛ pɔtɔɔ. 45 Daaviidi ñeheyi-i se, ewoki ɛnʋ wayɩ nɛ you sɩɣa nɛ kɩkpɛzɛŋ nɛ sɩɣa kɩɖaɣlaɣ, piyele ɛnʋ ñowoki ɛ-wayɩ nɛ KƖPAƔLƲ Ɖoŋ Tɩŋa Tʋ, Izirɛɛlɩ youlaɖaa Ɛsɔ weyi ɛtʋ ɛ́lɛ yɔ ɛ-nɔɔ. 46 Se, kɩyakʋ ŋgʋʋ, KƖPAƔLƲ ɖʋzʋʋ-ɩ ɛnʋ nesi taa. Se, ɛnʋ kʋʋ-ɩ nɛ ɛsɛtɩ ɛ-ñʋʋ. Se, kɩyakʋ ŋgʋʋ, ɛnʋ kʋʋ Filisitii ñɩma youlaɖaa nɛ ɛɖʋ pa-nandʋ sumasɩ nɛ tɛtɛ kpɩna nɛ pɔtɔɔ. Peeye ɛyaa tɩŋa payɩ naɣ se, Izirɛɛlɩ ñɩma wɛnɩ Ɛsɔ, 47 nɛ ɛyaa mba pekpeɣli peeye yɔ, pana se, pɩtɛkɛ sɩɣa yaa kɩkpɛzɛŋ KƖPAƔLƲ youna nɛ ɛwa. Ɛlɛ, ɛnʋʋ lɛ youñʋʋdʋ, se, ɛkpaɣ-wɛ nɛ ɛɖʋzɩ mba nesi taa. 48 Daaviidi yɔɔdɩ ḿbʋ lɛ, Gooliyaatɩ ɖaɣnɩ pazʋʋ ɖɔm nɛ ɛtɛzɩɣ-ɩ ñɔtɩnaʋ. Peeye ɛ́lɛ ñese lɛɛlɛɛ nɛ ɛkatɩɣ Filisitii tʋ ɛnʋ. 49 Ɛkataɣ-ɩ ḿbʋ lɛ, ɛlɩzɩ pɩyɛ e-huyuu taa nɛ ɛɖʋ ɛ-pɩtɔɖɛ taa nɛ ɛlɔ-ɩ nɛ pɩyaɣ e-tokuu taa nɛ pɩsʋʋ, nɛ Gooliyaatɩ lɩɩ ɛpa ɛ-ɛza yɔɔ fi. 50 Mbʋʋ Daaviidi wabɩ Gooliyaatɩ nɛ ɛkʋ-ɩ nɛ pɩtɔɖɛ nɛ pɩyɛ naɖɩyɛ, sɩɣa fɛyɩ. 51 Pɩlabɩ ḿbʋ lɛ, Daaviidi se nɛ ewolo Gooliyaatɩ cɔlɔ nɛ ɛkpɛɛ ɛ́lɛ you sɩɣa nɛ ɛsɛtɩnɩ ɛ́lɛ ñʋʋ. Filisitii ñɩma kɔm pana se, pa-taa sɔdʋʋ sɩba lɛ, papazɩ seu. 52 Peeye Izirɛɛlɩ ñɩma youlaɖaa nɛ Yuuda ñɩma paba ñamabɩ you kubuka nɛ pɔɖɔɔnɩ Filisitii ñɩma nɛ pɔkɔɔ patalɩ Gaatɩ hɔɔlʋʋ taa ɖooo Ɛkɩrɔɔnɩ tɛtʋ ɖɩsʋyɛ taa. Filisitii ñɩma mba pakʋ-wɛ yɔ, paapɛɛdɩ Saarayim habɩyɛ yɔɔ nɛ piwolo pɩsɩnɩ Gaatɩ nɛ Ɛkɩrɔɔnɩ.
53 Patalɩ peeye lɛ, Izirɛɛlɩ ñɩma yele Filisitii ñɩma ɖɔɔnʋʋ nɛ papɩsɩ paba ɖikpeɣliye taa nɛ pakpaɣ po-wondu tɩŋa payɩ. 54 Pɩlabɩ ḿbʋ lɛ, Daaviidi kpaɣ Gooliyaatɩ ñʋʋ nɛ ewoni Yeruusalɛm, nɛ piyele ɛkpaɣ ɛ́lɛ you wondu nɛ ewona ɛsɩɩ ɛ-maɣmaɣ ɛ-kɩɖanɖʋʋ tɛɛ.
Yoonaataanɩ nɛ Daaviidi paɖʋʋ taabalɩyɛ yɔ
55 Sawʋlɩ kana Daaviidi lɩwa nɛ ewolo se ɛkatɩɣ Gooliyaatɩ lɛ, ɛpɔzɩ youlaɖaa ñʋʋdʋ Avɩnɛɛrɩ se, Avɩnɛɛrɩ! A-pɩyalʋ lɛ pɩɣa eveleɣ ŋga yɔ? Avɩnɛɛrɩ yaa-ɩ se Ɖajaa! Nɛ ecosi-i se, ɛnʋ ɖuúni e-kewiyaɣ kpelaɣ se ɛnʋ ɛɛsɩŋ natʋyʋ. 56 Peeye wiyaʋ heyi-i se, ɛñɩnɩ nɛ ɛtɩlɩ pɩ-tɛ ɛyʋ. 57 Ḿbʋ yebina nɛ Daaviidi tɛm kʋʋ Gooliyaatɩ nɛ ɛpɩsɩ Izirɛɛlɩ ñɩma dikpeɣliye taa lɛ, Avɩnɛɛrɩ kpaɣ-ɩ nɛ ewoni Sawʋlɩ cɔlɔ. Daaviidi kɔɖɔkɩ e-nesi taa Filisitii tʋ ɛnʋ ɛ-ñʋʋ ḿbʋ. 58 Peeye Sawʋlɩ ya-ɩ se ɛ-pɩyalʋ nɛ ɛpɔzɩ-ɩ se, ɛnʋʋ lɛ anɩ? Daaviidi cosi se, ɛ-tʋmlaɖʋ, Bɛtɩlɛhɛm tʋ Yeesee pɩyalʋ lɛ ɛnʋ.