16
Ɛsɔ lɩzʋʋ Daviidi se ɛkɛ wiyaʋ kɩfalʋ yɔ
1 Nakʋyʋ wiye KƖPAƔLƲ pɔzɩ Samʋyɛɛlɩ se, ewiɣ Sawʋlɩ se pɩsɩnɩ ɖooye? Se, ŋgʋ, ɛnʋ ñɔlɔ-ɩ nɛ ɛtatasɩ kɛʋ Izirɛɛlɩ wiyaʋ. Se, ɛ́kpaɣ num hɩlʋʋ nɛ ɛ́kpaɣ Bɛtɩlɛhɛm nʋmɔʋ. Se, ɛnʋ tiyiɣ-i peeye, abalʋ weyi payaɣ se Yeesee yɔ, ɛ-tɛ. Mbʋ pʋyɔɔ yɔ, ɛnʋ na ɛ́lɛ pɩyalaa taa, wiyaʋ weyi ɛnʋ liu wɛɛ yɔ. 2 Samʋyɛɛlɩ pɔzɩ-ɩ se, ɛsɩna ɛnʋ lakɩ nɛ ewolo peeye? Se, ye ɛwoba yɔ, Sawʋlɩ kɔŋ ɛnɩɩ nɛ piyele ɛkʋ ɛnʋ! Ɛlɛ, KƖPAƔLƲ heyi-i se, ɛkpaɣ neɣye naɖɩyɛ nɛ ɛkpɛndɩna nɛ ɛtɔ se, ewoki se ɛlaa ɛnʋʋ KƖPAƔLƲ ɖɩ. 3 Se, éwoba lɛ, ɛ́yaa Yeesee, Kɩlaʋ ŋ́gʋ ki-ɖeɖe, nɛ piyele ɛnʋ maɣmaɣ wɩlɩ-ɩ mbʋ pʋwɛɛ se ɛla yɔ. Se, ɛkpaɣ num nɛ ɛ́la weyi ɛnʋ wɩlɩɣ-ɩ yɔ́ɔ sɔnzɩ nɛ ɛ́lɛ kɛ wiyaʋ nɛ ɛla ɛnʋ tʋmɩyɛ.
4 KƖPAƔLƲ heyi Samʋyɛɛlɩ ḿbʋ lɛ, ɛ́lɛ la ɖɔɖɔ ḿbʋ. Ɛkɔm ɛtalɩ Bɛtɩlɛhɛm lɛ, tɛtʋ taa sɔsaa wolo ɛ-cɔlɔ nɛ peseliɣ nɛ pɔpɔzʋʋ-ɩ se, alaafɩya lɛ? 5 Ecosi se, ɛɛɛ. Se, ɛnʋ woba se ɛlaa KƖAPAƔLƲ kɩlaʋ nakʋyʋ. Se, pála cɩɖɩcɩɖɩ wɛtʋ sɔnzɩ nɛ powolo ɛnʋ cɔlɔ kɩlaʋ ŋ́gʋ ki-ɖeɖe.
Samʋyɛɛlɩ keheyi ɖɔɖɔ Yeesee nɛ ɛ-pɩyalaa se, pala cɩɖɩcɩɖɩ wɛtʋ sɔnzɩ nɛ powolo ɖɔɖɔ kɩlaʋ ŋ́gʋ ki-ɖeɖe. 6 Yeesee nɛ ɛ-pɩyalaa pɔkɔm patalɩ, nɛ Samʋyɛɛlɩ na Eliyaavɩ lɛ, ɛɖʋ ɛ-taa se, paa pɩɩla ɛsɩna, ɛnʋʋ KƖPAƔLƲ lɩzaa. 7 Ɛlɛ, KƖPAƔLƲ heyi-i se, ɛtaayele nɛ ɛ́lɛ ɛsɩndaa nɛ ɛ-paɣlɩka peyili-i, se, pɩtɛkɛ ɛnʋʋ ɛnʋ lɩzaa. Se, ɛnʋ ɛɛnaɣ ɛzɩ ɛyaa naɣʋ yɔ, se, panaɣ ɛsɛ yɔɔ yem, ɛlɛ, ɛnʋʋ KƖPAƔLƲ ɛnʋ ñanaɣ halɩ ɖooo hɔyɛ taa. 8 Pʋwayɩ lɛ, Yeesee yaa Avinaadaavi nɛ ewoni-i Samʋyɛɛlɩ cɔlɔ, nɛ ɛ́lɛ ñeheyi-i ɖɔɖɔ se, KƖPAƔLƲ talɩzɩ-ɩ ɖɔɖɔ. 9 Yeesee yaa Saama, ɛlɛ, Samʋyɛɛlɩ tasɩ se, KƖPAƔLƲ talɩzɩ-ɩ ɖɔɖɔ. 10 Mbʋʋ Yeesee ya ɛ-pɩyalaa lʋbɛ (7) nɛ ewoni-wɛ Samʋyɛɛlɩ cɔlɔ, ɛlɛ, ɛ́lɛ heyi-i se, KƖPAƔLƲ talɩzɩ pa-taa nɔɔyʋ. 11 Pʋwayɩ lɛ, Samʋyɛɛlɩ pɔzɩ Yeesee se, ɛ-pɩyalaa tɩŋa lɛ yaa we? Ɛ́lɛ ñocosi se, pɩkazɩ pa-tɩnʋʋ Daaviidi, ɛ́lɛ tɩŋ wondu. Peeye, Samʋyɛɛlɩ heyi Yeesee se, étiyi nɛ payaa-ɩ. Se, ye etowolo peeye yɔ, ḿba eewoki kɩlaʋ tɔɔnaɣ ɖɩtɔɔyɛ. 12 Kpaagbaa ḿbʋ lɛ, Yeesee tiyi nɛ payaa Daaviidi nɛ ɛ́lɛ wolo. Ɛkɛ ɛyʋ kɩsɛm, ɛ-ɛsɛ cɛba nɛ ɛ-ɛsɩndaa ɖe. Ɛtalaa lɛ, KƖPAƔLƲ heyi Samʋyɛɛlɩ se, ɛnʋʋ lɛ, se, ɛlabɩ-ɩ sɔnzɩ nɛ ɛkɛ wiyaʋ. 13 Peeye Samʋyɛɛlɩ kpaɣ num nɛ ɛpɩyɩ Daaviidi ñʋʋ taa nɛ ɛlabɩ-ɩ sɔnzɩ ɛ-ɖalaa ɛsɩndaa. Ɛlabɩ-ɩ-sɩ lɛ, KƖPAƔLƲ Kalɩzaɣ tii kɛwɛɛ ɛ-yɔɔ kpaɣ kɩyakʋ ŋ́gʋ nɛ pɩɖɛɛ. Pʋwayɩ lɛ, Samʋyɛɛlɩ pɩsɩ Raamaa tɛtʋ taa.
14 Ŋgʋ KƖPAƔLƲ Kalɩzaɣ kakʋyɩ Sawʋlɩ yɔɔ nɛ ɛ́lɛ tiyi kalɩzaɣ kɩtɛkɛdaɣ nakɛyɛ nɛ kɔcɔzʋʋ-ɩ. 15 Peeye Sawʋlɩ tʋmlaɖaa heyi-i se, ḿba nawa se, Ɛsɔ tiyi kalɩzaɣ kɩtɛkɛdaɣ nakɛyɛ nɛ kɔcɔzʋʋ-ɩ. 16 Se, ɛñɩtɩ ɛha mbaa nɔɔ, se ḿba lakɩ ndʋ eheyiɣ-wɛ yɔ. Se, ḿba ñɩnɩɣ nɔɔyʋ weyi ɛsɩm cɩmʋʋ mabʋ yɔ, nɛ ye kalɩzaɣ kɩtɛkɛdaɣ ewoba ketii ɛ-yɔɔ nɛ konuutuu-i lɛ, ɛ́lɛ ma cɩmʋʋ nɛ pɩlabɩ-ɩ weewee. 17 Peeye Sawʋlɩ heyi ɛ-tʋmlaɖaa se, ye ḿbʋ, pañɩnɩ-ɩ cɩmʋʋ maɖʋ kɩbanʋ nɔɔyʋ nɛ powoni-i ɛnʋ. 18 Ɛyɔɔdɩ ḿbʋ lɛ, ɛ-tʋmlaɖaa taa lɛlʋ heyi-i se, ɛnʋ na Bɛtɩlɛhɛm tʋ Yeesee pɩyalaa taa nɔɔyʋ. Ɛsɩm cɩmʋʋ mabʋ, ɛwɛ abalɩtʋ, nɛ ɛtɛ ɛkɛ you laɖʋ sɔsɔ. Ɛyɔɔdʋʋnɩ lɛɣtʋ, ɛ-ɛsɩndaa wɛ ɖeu. Ɖɔɖɔ lɛ, KƖPAƔLƲ wɛ ɛ-cɔlɔ. 19 Ɖɩnɛɛ Sawʋlɩ tiyi nabɛyɛ Yeesee cɔlɔ se, powolo pehehi-i se, etiyini ɛnʋʋ ɛ-pɩyalʋ Daaviidi weyi ɛɖaŋɩɣ heŋ yɔ. 20 Peheyi Yeesee ḿbʋ lɛ, ɛ́lɛ kpaɣ kpaŋaɣ nakɛyɛ nɛ ɛsʋʋ-kɛ tindine nɛ sʋlʋm nɛ pimbiɣa nakɛyɛ nɛ ɛcɛlɩ pɩ-tɩŋa Daaviidi nɛ eheyi-i se ewona ɛcɛlɩ Sawʋlɩ. 21 Daaviidi kɔm ɛtalɩ Sawʋlɩ cɔlɔ lɛ, ɛwɛɛ peeye nɛ ɛpɩsɩ ɛ́lɛ tʋmlaɖʋ. Sawʋlɩ kɔsɔɔlɩ Daaviidi pɩtɩɩfɛyɩ nɛ ɛɖʋ-ɩ se, ɛ́hɔɔlʋʋ-ɩ e-you wondu. 22 Pʋ-yɔɔ Sawʋlɩ tiyaa se peheyi Yeesee se, enʋ liu wɛɛ se Daaviidi ɛcaɣ ɛnʋ cɔlɔ nɛ ɛlakɩ ɛnʋʋ tʋmɩyɛ, mbʋ pʋyɔɔ yɔ, ɛnʋ liu sʋ-ɩ. 23 Pɩkpaɣnɩ alɩwaatʋ ńdʋ lɛ, kalɩzaɣ kɩtɛkɛdaɣ ŋga Ɛsɔ tiyaa nɛ kɔcɔzʋʋ Sawʋlɩ yɔ, ketiki ɛ-yɔɔ lɛ, Daaviidi kpakɩɣ cɩmʋʋ nɛ ɛmakɩ. Ɛlakɩ ḿbʋ lɛ, pɩlakɩ Sawʋlɩ weewee nɛ ɛ-laŋɩyɛ hɛɣ nɛ kalɩzaɣ kɩtɛkɛdaɣ ŋga, kɛɖɛɣ.