Samʋyɛɛlɩ Takayaɣ Kajalaɣ Ñɩŋga 15

Ɛsɔ haʋ Sawʋlɩ siɣye yɔ

¹ Nakʋyʋ wiye Samʋyɛɛlɩ heyi Sawʋlɩ se, ɛnʋʋ KƖPAƔLƲ kediyaa nɛ ɛnʋ labɩ-ɩ sɔnzɩ nɛ num nɛ ɛkɛ ɛ-samaɣ Izirɛɛlɩ ñɩma wiyaʋ. Se, lɛɛlɛɛyɔ, éwelisi nɛ ɛnɩɩ ńdʋ ɛnʋ heyiɣ-i nɛ ɛ́lɛ nɔɔ yɔ. ² Se, KƖPAƔLƲ, Kɩlɩm Ɛsɔ yɔɔdaa se, ɛnʋ kpáɣ Amalɛɛkɩ ñɩma kɩmɩyɛ, mbʋ pɔ-cɔzɔnaa kalabɩ Izirɛɛlɩ ñɩma yɔ pʋ-yɔɔ. Paba kalɩnɩ Ejipiti nɛ pɛɖɛɣ lɛ, paɖɩɣ-wɛ nʋmɔʋ . ³ Se, pʋ-yɔɔ lɛ, ewolo ɛkʋyɩ Amalɛɛkɩ ñɩma yɔɔ nɛ ɛwɛɛkɩ pa-ñɩm tɩŋa, pɩ́taalabɩ-ɩ pʋtɔdɩyɛ. Se, ɛkʋ mbʋ pɩ-tɩŋa payɩ pɩwɛ wezuu yɔ: halaa nɛ abalaa nɛ piya nɛ piya pɩcɩɩcɩɩmwaa nɛ naŋ nɛ heŋ nɛ kʋyʋndʋʋ kpaŋnaŋ nɛ kpaŋasɩ.

⁴ Peheyi Sawʋlɩ mbʋ lɛ, ekpeɣli e-youlaɖaa tɩŋa Telayim tɛtʋ taa, nɛ pɔɖɔŋ nɛ ɛcɔŋnɩ-wɛ. Paakpɛndɩ ɛyaa kutokiŋ nasɩlɛ (200.000), nɛ Yuuda hɔɔlʋʋ taa ñɩma kutokiŋ hiu (10.000). ⁵ Pekpeɣli ḿbʋ lɛ, ewoni-wɛ Amalɛɛkɩ ñɩma tɛtʋ cɔlɔ nɛ pɛmɛlɩ lɔɔwʋ taa se potudi-wɛ nɛ pakʋ-wɛ. ⁶ Patalɩ peeye lɛ, Sawʋlɩ heyi Kenii ñɩma se, palɩɩ Amaalɛɛkɩ ñɩma taa, nɛ poposini-wɛ. Se, ɛnʋ liu fɛyɩ se, ɛlabɩ-wɛ ɖɔɖɔ ɛzɩ ḿba yɔ. Mbʋ pʋyɔɔ yɔ, paalabɩ Izirɛɛlɩ ñɩma ɖeu, alɩwaatʋ ndʋ paalɩnɩ Ejipiti yɔ. Mbʋ yebina nɛ Kenii ñɩma kʋyɩ Amalɛɛkɩ ñɩma cɔlɔ. ⁷ Pɩlabɩ ḿbʋ lɛ, Sawʋlɩ kʋyɩ Amalɛɛkɩ ñɩma yɔɔ nɛ ɛwabɩ-wɛ kpaɣ Hawiilaa egeetiye nɛ puwolo pɩsɩnɩ Suuri tɛtʋ ndʋ tɩwɛ Ejipiti ɛjaɖɛ wɩsɩ ɖɩlɩyɛ hɔɔlʋʋ taa yɔ. ⁸ Ɛkʋ pa-tɩŋa payɩ nɛ piyele ɛkpa pe-wiyaʋ Agaagɩ nɛ ɛ-ɛsɛ nɛ ɛɖʋ-ɩ saɖɩka. ⁹ Sawʋlɩ nɛ e-youlaɖaa paayebi Agaagɩ nɛ wondu ndʋ ndʋ tɩkɩlɩ ɖeu yɔ: naŋ nɛ heŋ, pʋ-tɔbʋʋ se, wondu ndʋ tikpeetaa yɔ. Wondu ndʋ tɩfɛyɩ wazaɣ nakɛyɛ yɔ, ti-ɖeke pakʋwa. ¹⁰ Mbʋ yebina nɛ KƖPAƔLƲ yɔɔdɩnɩ Samʋyɛɛlɩ se, ¹¹ ɛnʋ kpiɖiɣ se, pʋ-yɔɔ ɛnʋ lɩzɩ Sawʋlɩ nɛ ɛtɔɔ kewiyaɣ. Mbʋ pʋyɔɔ yɔ, ɛha ɛnʋʋ siɣye nɛ ɛtɔɖɔ ɛnʋ paɣtʋ yɔɔ. Peeye, pitibi Samʋyɛɛlɩ tome taa nɛ etendi KƖPAƔLƲ tɛʋ nɛ kifem.

¹² Kifem tanaŋ cu lɛ, ɛkʋyɩ nɛ ewolo Sawʋlɩ cɔlɔ. Ɛtalaa lɛ, peheyi-i se, Sawʋlɩ wobi Kaarɩmɛɛlɩ tɛtʋ taa nɛ ɛma ɛ-tɩ kumoɖe nɛ pʋwayɩ lɛ, ɛkpaɣ nʋmɔʋ nɛ etii Giligaalɩ tɛtʋ taa. ¹³ Samʋyɛɛlɩ kɔm ɛtalɩ Sawʋlɩ cɔlɔ lɛ, ɛ́lɛ heyi-i se, KƖPAƔLƲ ɛwazɩ ɛ-yɔɔ! Se, ɛnʋ labɩ ndʋ KƖPAƔLƲ heyi ɛnʋ yɔ. ¹⁴ Ɛyɔɔdɩ ḿbʋ lɛ, Samʋyɛɛlɩ pɔzɩ-ɩ se, nɛ lee heŋ nɛ naŋ pewiliɣ nɛ ɛnʋ nɩɣ ḿbʋ yɔ? ¹⁵ Sawʋlɩ cosi-i se, youlaɖaa yeba Amalɛɛkɩ ñɩma kpɩna wena akpeedi camɩyɛ yɔ, nɛ powoni-yɛ peeye se palaa-yɛ ɛ-KƖPAƔLƲ Ɛsɔ. Se, piyele lɛɛbʋ lɛ, ḿba kʋ pɩ-tɩŋa. ¹⁶ Ɛyɔɔdaɣ ḿbʋ lɛ, Samʋyɛɛlɩ cɛ ɛ-nɔɔ yɔɔ se, eyele ḿbʋ, se, pɩmaɣaɣ! Se, ɛnʋ heyiɣ-i ndʋ KƖPAƔLƲ heyi ɛnʋʋ ɖoó taa yɔ. Sawʋlɩ heyi-i se, ɛyɔɔdɩ. ¹⁷ Peeye Samʋyɛɛlɩ heyi-i se, ɖooo lɛ, ɛnʋʋ Sawʋlɩ, ɛkpakaɣaɣ ɛ-tɩ se, ɛfɛyɩ wazaɣ, ɛlɛ, lɛɛlɛɛyɔ, ɛkɛ Izirɛɛlɩ cejewe taa ñɩma wiyaʋ. Se, KƖPAƔLƲ labɩnɩ-ɩ sɔnzɩ nɛ num nɛ ɛkɛ Izirɛɛlɩ ñɩma wiyaʋ. ¹⁸ Se, KƖPAƔLƲ tiyi-i lɛ, eheyi-i nʋmɔʋ ŋgʋ ɛɛtɩŋ yɔ. Se, eheyi-i se ewolo ɛkʋyɩ Amalɛɛkɩ ñɩma, kɩwɛɛkɩm laɖaa ḿba, pɔ-yɔɔ nɛ ɛkʋ mbʋ pɩ-tɩŋa pɩwɛ peeye yɔ payɩ. ¹⁹ Nɛ pɩla ɛsɩna nɛ ɛtaña KƖPAƔLƲ? Se, pɩlabɩ ɛzɩma nɛ ɛsʋʋ ñɩm mbʋ pehiɣ you taa yɔ pʋ-yɔɔ nɛ piyele ɛla ḿbʋ pɩtɛkɛdɩnɩ KƖPAƔLƲ yɔ? ²⁰ Sawʋlɩ cosi Samʋyɛɛlɩ se, ŋgʋ, ɛnʋ ñam KƖPAƔLƲ nɛ ɛnʋ la ɛzɩ ɛ́lɛ heyuu-i yɔ. Se, ɛnʋ yeba nɛ pakʋ Amalɛɛkɩ ñɩma tɩŋa, se, pe-wiyaʋ Agaagɩ ɖeke koŋ ɛnʋ kpaɣaɣ nɛ ewoni peeye. ²¹ Se, piyele ɛnʋ youlaɖaa lɛ, ye palɩzɩ kpɩna kɩbana wena akɩlɩ ɖeu yɔ wondu ndʋ pɩɩwɛɛ se pakʋ yɔ tɩ-taa yɔ́ɔ yɔ, palɩzɩ-yɛ se, powoni-yɛ Giligaalɩ peeye nɛ palaa-yɛ ɛ-KƖPAƔLƲ Ɛsɔ. ²² Ɛyɔɔdɩ ḿbʋ lɛ, Samʋyɛɛlɩ kitini-i se, KƖPAƔLƲ liu wɛ kɩlaʋ nɛ pɩkɩlɩ pɔɖɔŋʋʋ ɛ-paɣtʋ yɔɔ yɔ yaa we? Pɩtɛkɛ mbʋ! Ɛnʋʋ KƖPAƔLƲ lɛ, e-liu wɛ pɔɖɔŋʋʋ ɛ-paɣtʋ yɔɔ yɔ, nɛ pɩkɩlɩ palaɣʋ-ɩ kpɩna wena akɩlɩ num yɔ. ²³ Toovenim lɛ, kaañamtʋ kɛ kɩwɛɛkɩm ɖɔɖɔ ɛzɩ piye pɔzʋʋ, nɛ weyi eeluzuu ɛ-tɩ yɔ, ɛ́lɛ ñala kɩwɛɛkɩm ɖɔɖɔ ɛzɩ agɔlɩma kpɛyɩyʋ yɔ. Se, ye mbʋ, ɖenɖe ɛlɔ KƖPAƔLƲ tɔm yɔ, ɛ́lɛ ɖɔɖɔ ñɔlɔ-ɩ. Se, ɛɛtasɩɣ kɛʋ ɛ-samaɣ wiyaʋ! ²⁴ Sawʋlɩ nɩ ḿbʋ lɛ, ɛma kubuka se, ɛyʋsaa! Se, ɛtɔɖɔ KƖPAƔLƲ tɔm nɛ ndʋ ɛnʋʋ Samʋyɛɛlɩ eheyi-i yɔ tʋ-yɔɔ. Mbʋ pʋyɔɔ yɔ, sɔɔndʋ kpa-ɩ nɛ youlaɖaa nɛ ɛla ndʋ paba heyi-i yɔ. ²⁵ Se, lɛɛlɛɛyɔ, ɛnʋ tendi-i se, ekpeɣ-i ɛ-kɩwɛɛkɩm ḿbʋ, nɛ ɛtɩŋ ɛnʋ wayɩ nɛ piyele ɛnʋ pɩzɩ nɛ ewolo eluŋ KƖPAƔLƲ tɛɛ. ²⁶ Ɛlɛ, Samʋyɛɛlɩ kizi se, ɛɛtɩŋɩɣ Sawʋlɩ wayɩ, mbʋ pʋyɔɔ yɔ, ɛlɔ KƖPAƔLƲ tɔm nɛ ɛ́lɛ ñɔlɔ-ɩ ɖɔɖɔ. Se, ɛtatasɩ kɛʋ Izirɛɛlɩ ñɩma wiyaʋ.

²⁷ Samʋyɛɛlɩ yɔɔdɩ ḿbʋ nɛ ɛha nímaɣ se ɛɖɛɣ lɛ, Sawʋlɩ sesi nɛ ɛɖɔkɩ e-toko sɔsɔʋ nɔɔ nɛ pɩcɩyɩ. ²⁸ Peeye Samʋyɛɛlɩ heyi-i se, mbʋʋ KƖPAƔLƲ mʋ ɛ-cɔlɔ Izirɛɛlɩ ñɩma kewiyaɣ puwiye nɖɩ nɛ ɛcɛlɩ lɛlʋ weyi ɛ́lɛ kɩlɩ-ɩ weewee yɔ. ²⁹ Se, KƖPAƔLƲ weyi ɛkɛ Izirɛɛlɩ ñɩma koboyaɣ yɔ, ɛɛcɛtɩɣ, ɛɛlɛɣzɩɣ mbʋ ɛɖʋwa yɔ ɖɔɖɔ, ɛzɩ ɛyaa lakʋʋ yɔ. ³⁰ Peeye Sawʋlɩ tasɩ yɔɔdʋʋ se, ɛnʋ yʋsaa! Ɛlɛ, paa mbʋʋ yɔ, ɛnʋ tendi-i se, ɛ́ɖʋ ɛnʋʋ hɩɖɛ Izirɛɛlɩ samaɣ taa sɔsaa ɛsɩndaa. Se, ɛ́tɩŋ ɛnʋ wayɩ nɛ piyele ɛnʋ wolo eluŋ ɛnʋʋ Samʋyɛɛlɩ ɛ- KƖPAƔLƲ Ɛsɔ tɛɛ. ³¹ Peeye Samʋyɛɛlɩ sɩ Sawʋlɩ nɛ ɛ́lɛ wolo eluŋ KƖPAƔLƲ tɛɛ.

³² Pɩlabɩ ḿbʋ lɛ, Samʋyɛɛlɩ tɔ se pakpaɣ Amalɛɛkɩ ñɩma wiyaʋ Agaagɩ nɛ powoni-i. Mbʋʋ Agaagɩ kɔm ɛtalɩ ɛ-cɔlɔ kaalɛyɩtʋ, mbʋ pʋyɔɔ yɔ, ɛmaɣzaɣ se, paatasɩɣ-ɩ kʋʋ! ³³ Ɛtalaa lɛ, Samʋyɛɛlɩ heyi-i se,

Ɛsɩna mbʋ pɩtɩŋnɩ ɛ-sɩɣa yɔɔ nɛ halaa lesi pebiya yɔ,

Ḿbʋ ɖɔɖɔ e-ɖoo lesiɣ ɛ-pɩɣa.

Peeye, Samʋyɛɛlɩ kʋ Agaagɩ KƖPAƔLƲ ɛsɩndaa, Giligaalɩ tɛtʋ taa.

³⁴ Pʋwayɩ lɛ, Samʋyɛɛlɩ kʋyɩ nɛ ɛpɩsɩ Raamaa tɛtʋ taa nɛ piyele Sawʋlɩ ñekpe ɛ-tɛ Giveyaa tɛtʋ taa. ³⁵ Samʋyɛɛlɩ nɛ ɛ-sɩm, ɛtatasɩ Sawʋlɩ naʋ. Toovenim lɛ, Samʋyɛɛlɩ wiɣaɣ Sawʋlɩ, ŋgʋ, KƖPAƔLƲ maɣmaɣ ñekpiɖaɣ se, pʋ-yɔɔ eyeba nɛ Sawʋlɩ kɛ Izirɛɛlɩ ñɩma wiyaʋ.