RUUTI
TAKAYAƔ
1
Nawoomii walʋ nɛ ɛ-pɩyalaa pasɩbʋ Mowaabɩ ɛjaɖɛ taa yɔ.
1-2 Ñɔɔsɩ nasɩyɩ lɩnɩ Izirɛɛlɩ ɛjaɖɛ taa alɩwaatʋ ndʋ you nɔɔɖɛyaa cɔŋaɣnɩ ɖɩ-yɔɔ yɔ tɩ-taa nɛ sɩkɔɔ sɩtalɩ tɛtʋ cikpetu ndʋ payaɣ se Bɛtɩlɛhɛm yɔ tɩ-taa. Tɩwɛ egeetiye nɖɩ payaɣ se Yuuda yɔ ɖɩ-taa. Abalʋ nɔɔyʋ kɛwɛ tɛtʋ cikpetu ndʋ tɩ-taa, payaɣ-ɩ se Eliimelɛɛkɩ nɛ ɛ-halʋ se Nawomii. Palʋlɩ abalɩbiya naalɛ, payaɣ lɛlʋ se Maalɔɔ nɛ lɛlʋ se Kiiliyɔɔ. Pɛkɛ Efɩraataa liɖe taa ñɩma. Ñɔɔsɩ nzɩ sɩ-yɔɔ lɛ, abalʋ ɛnʋ ɛ-ñɩma pakʋyɩ Bɛtɩlɛhɛm nɛ powolo pacaɣ ɛjaɖɛ nɖɩ payaɣ se Mowaabɩ yɔ ɖɩ-taa. Pɛwɛ peeye ḿbʋ lɛ, 3 Eliimelɛɛkɩ sɩ nɛ piyele Nawomii nɛ e-piya naalɛ pe-ɖeke. 4 Ɛ-pɩyalaa mba, pa-naalɛ pakpaɣ halaa Mowaabɩ ɛjaɖɛ taa. Payaɣ pa-taa lɛlʋ se Ɔɔrɩpa nɛ lɛlʋ se Ruuti. Pacaɣ peeye pɩnzɩ hiu lɛ, 5 Maalɔɔ nɛ Kiiliyɔɔ paba ñasɩ ɖɔɖɔ. Piyele Nawomii ɛ-ñʋʋ ɖeke, pɩɣa fɛyɩ, walʋ fɛyɩ. 6 Pɩlabɩ ḿbʋ lɛ, Nawomii nɩɩ se Kɩpaɣlʋ labɩ ɛlɛ ñɩma lootiye nɛ eyele nɛ tɔɔnaɣ la ɛ-tɛ. Peeye ɛñɔɔzɩ ɛ-tɩ se ɛ nɛ e-wolaa mba pa-naalɛ pakʋyɩ Mowaabɩ ɛjaɖɛ taa nɛ papɩsɩ ɛ-tɛ.
Nawomii nɛ Ruuti papɩsʋʋ Bɛtɩlɛhɛm yɔ
7 Peeye Nawomii nɛ e-wolaa pakʋyaa se papɩsɩɣ Yuuda ɛjaɖɛ taa. Palɩ nʋmɔʋ taa lɛ, 8 eheyi-wɛ se, lɛɛlɛɛyɔ, paa anɩ ɛpɩsɩ ɛ-ñɩma ɖɩɣa taa. Ɛlɛ etendi Kɩpaɣlʋ se ɛlabɩ-wɛ ɖeu ɛzɩ palabʋ ɛ-maɣmaɣ nɛ mba pasɩba yɔ. 9 Etendi-i ɖɔɖɔ se ɛha paa pa-taa anɩ walʋ nɛ ɛ-laŋɩyɛ hɛɛ ɛlɛ tɛ.Pʋwayɩ lɛ, ɛsɛɛ e-wolaa mba pa-naalɛ se pɩlabɩ wiɖiyi. Peeye paba pazɩ wiluu wooo 10 nɛ pɔtɔŋ se: "Pɩlɩ, ɖiikitiɣ! Ɖa nɛ ŋ ɖiwokini ñɛ-ɛjaɖɛ taa."
11 Ɛlɛ, Nawomii kitini-wɛ se: "Mɛm-pɛlaa! Pɩtakɩlɩ weewee se ɩpɩsɩ mɩ-tɛ yaa we? Pɩlabɩ ɛzɩma nɛ ɩcaɣ se ɩtɩŋ-m? Mampɩzɩɣ mantasɩ piya lʋlʋʋ ɖɔɖɔ nɛ ɩwalɩ-sɩ yaa we? Mantasa! 12 Mɛm-pɛlaa, ɩpɩsɩ mɩ-tɛ, mankpadɩyaa nɛ mɛnɖɛɛ walʋʋ yɔɔ. Paa maatɩɩtɔm se mantaɣ liu se ɖoó anɛ a-taa maɣmaɣ mehikiɣ walʋ nɛ ma nɛ ɩ ɖɩcaɣ nɛ malʋlɩ piya, 13 mɩ mɩpɩzɩɣ itisi nɛ ɩcaɣ mbʋ nɛ sɩpaɣlɩ sɩmaɣnɩ-mɩ yaa we? Iyeki walʋʋ pʋ-yɔɔ yaa we? Mem-pɛlaa, mantasa! Man-kʋñɔŋ ñakɩlɩ mɩ-ñɩŋgʋ kpaagbaa kpem, mbʋ pʋyɔɔ yɔ, ma Kɩpaɣlʋ laba." 14 Ɛyɔɔdɩ ḿbʋ lɛ, e-wolaa mba pa-naalɛ pɛtɛzɩ wiluu wooo nɛ Ɔɔrɩpa sɛɛ ɛ-waŋ ɛnʋ se pɩlabɩ wiɖiyi nɛ ɛcaŋ ɛɖɛɛ. Ɛlɛ, Ruuti ñekizi nɛ ɛñɔnɩ ɛ-waŋ ɛnʋ kpaŋ.
15 Peeye Nawomii heyi Ruuti se: "Cɔnɩ ŋna, ño-woliɖa pisi ɛ-ñɩma nɛ ɛ-agɔlɩma pɔ-cɔlɔ. Pɩsɩ ñɛ-tɛ ɖɔɖɔ ɛzɩ ɛnʋ yɔ." 16 Ruuti ñekitini-i se:
"Taakpa-m nɛ ɖoŋ se mampɩsɩ mɛn-tɛ nɛ meyebi-ŋ.
Ɖenɖe ŋwoki yɔ, peeye mowoki;
Ɖenɖe ŋcakɩ yɔ, peeye mancakɩ.
Ña-ñɩma kɛɣ ma-ñɩma
nɛ ñɛ-Ɛsɔ kɛ mɛ-Ɛsɔ.
17 Ɖenɖe ŋsɩkɩ yɔ, peeye mansɩkɩ.
Peeye ɖɔɖɔ pepiŋ-m.
Sɩm ɖeke koŋ yasɩɣnɩ ma nɛ ŋ ɖɛ-hɛkʋ taa, pɩtɛkɛ mbʋʋ yɔ, Kɩpaɣlʋ ɛlabɩ-m mbʋ e-liu wɛɛ yɔ.
18 Nawomii kɔm ɛna se Ruuti ɛsɩyɛ sɛwa se ɛtɩŋɩɣ-ɩ lɛ, ɛtɛzɩ sum 19 nɛ ɛ nɛ ɩ pɛɖɛɛ nɛ pɔkɔɔ patalɩ Bɛtɩlɛhɛm.
Patalɩ Bɛtɩlɛhɛm nɛ ɛyaa na-wɛ lɛ, piseɣti-paba yem. Nɛ halaa ñɔpɔzʋʋ pa-tɩ se Nawomii toovenim naa nɔɔyʋ? 20 Nawomii cosi se: "Ɛtɛm naʋ se Nawomii tɔbʋʋ se: 'Weyi ehiɣ ɛ-tɩ yɔ.' Pʋ-yɔɔ lɛ, ɩtaatasɩ-m yaʋ ḿbʋ, ɩya-m se Maaraa. Mbʋ pʋyɔɔ yɔ, Ɛsɔ ɖoŋ tɩŋa tʋ yeba nɛ manɩɣ siziŋ siŋŋ. 21 Maakʋyɩ cɩnɛ se mɛnɖɛɣ lɛ, me-nesi taa kɛwɛɛ, ɛlɛ, Kɩpaɣlʋ yeba nɛ mampɩsɩ nesi kpɛɖɛ. Pʋ-yɔɔ lɛ, ɩtaatasɩ-m yaʋ se Nawomii, mbʋ pʋyɔɔ yɔ, Kɩpaɣlʋ ɖoŋ tɩŋa tʋ kʋyɩ mɔ-yɔɔ nɛ ɛcam-m."
22 Ɛzɩ pɛkɛdʋʋ yɔ, mbʋʋ Nawomii nɛ e-wolu Mowaabɩ tʋ Ruuti pakʋyɩ Mowaabɩ ɛjaɖɛ taa nɛ powolo Bɛtɩlɛhɛm. Patalɩ peeye alɩwaatʋ ndʋ papazɩ kʋm tɔɔnaɣ nakɛyɛ ɛzɩ mɩla yɔ, payaɣ-kɛ se: Ɔrɩjɩ.