39
Cɔjɔnaa tokonaa tɔm
1 Heŋ hʋndʋʋ kɩbandʋ kikpɛdɩtʋ nɛ kɩsɛmtʋ nɛ kʋhʋlʋmtʋ nɛ sɩka pɩsatʋ, pakpaɣ nɛ palʋʋnɩ tokonaa sɔsaa a mba cɔjɔnaa suu pʋ-yɔɔ yɔ pa-tʋmɩyɛ taa yɔ, nɛ Aarɔɔnɩnɩnɩ Ɛsɔ tʋmɩyɛ tokonaa, ɛzɩ KƖPAƔLƲ keheyuu Mooyiizi se, ɛla yɔ.
2 Pɩsatʋ ndʋ tɩwɛ tɛyɩŋ yɔ, pakpaɣ nɛ pesidini heŋ hʋndʋ kɩkpɛdɩtʋ ɛzɩ tɔlɩm yɔ nɛ kɩsɛmtʋ cɩɩɩ nɛ kɩsɛmtʋ caʋʋ, nɛ palʋʋ toko ŋgʋ cɔjɔnaa ñʋʋdʋ tɩnɩɣ pʋ-yɔɔ yɔ. Pɛtɛma lɛ, pakpaɣ sika pɩsatʋ nɛ pacanɩnɩ toko ŋ́gʋ, kʋ-nɔsɩ yɔɔ. 3 Pamaba sika nɛ kawalɩ yem tɛkɛlɛm nɛ pɛhɛɛ-kɛ hɔɔlasɩ. Hɔɔlasɩ ńzɩ kpaaloŋgo maɖaa kpaɣ pesidini heŋ hʋndʋ kɩkpɛdɩtʋ ɛzɩ tɔlɩm yɔ nɛ kɩsɛmtʋ cɩɩɩ nɛ kɩsɛmtʋ caʋʋ ndʋ tʋwɛ camɩyɛ yɔ nɛ pɩsatʋ kʋlʋmtʋ. 4 Pɩsa nɛ papɩzɩ pata pʋ-yɔɔ toko ŋ́gʋ lɛ, paɖʋ kɩtamɩŋ naalɛ nɔsɩ yɔɔ. 5 Pɩsatʋ kʋɖʋmtʋ ńdʋ palʋnɩ pʋ-yɔɔ toko kɩtamɩŋ. Kɩtamɩŋ nɛ pʋ-yɔɔ toko pɩɩkpɛndaa pɩkɛ pʋyʋ kʋɖʋm, ɛzɩ KƖPAƔLƲ keheyuu Mooyiizi yɔ. 6 Pasaɣ ñɩlɩm pɛ naalɛ nɛ pɔcɔzɩ sika a-nɔsɩ yɔɔ. Pama Yaakɔɔbʋ pɩyalaa hɩla nɛ pataaɖɩ-yɛ pɛ ana a-yɔɔ, ɛzɩ ɛyʋ ñɩŋʋʋ nesi yɔ. 7 Pɛtɛma lɛ, pakpaɣ-yɛ nɛ patamsɩnɩ pʋ-yɔɔ toko kɩtamɩŋ se, pɩwɩlɩna Izirɛɛlɩ cejewe hiu nɛ naalɛ ɛzɩ KƖPAƔLƲ kɔpɔzʋʋ Mooyiizi yɔ.
Kɛdɛɛka tɔm
8 Pʋwayɩ lɛ, pɩsaŋ lʋyaa kpaɣ pɩsatʋ ndʋ tɩwɛ tɛyɩŋ yɔ, nɛ pesidini heŋ hʋndʋ kɩkpɛdɩtʋ ɛzɩ tɔlɩm yɔ nɛ kɩsɛmtʋ caʋʋ nɛ kɩsɛmtʋ cɩɩɩ nɛ palʋʋ kɛdɛɛka ŋga kɔ-yɔɔ paɖʋ ñɩɣlɩm pɛ yɔ nɛ pacanɩ kɔ-nɔsɩ yɔɔ nɛ sika pɩsatʋ ɛzɩ pacanʋʋ pʋ-yɔɔ toko yɔ. 9 Kɛdɛɛka ŋ́ga, kɛkɛ kabʋa ŋga kɔ-hɔɔlɩŋ naanza ɛ́nʋ ɩɩwɛ kɩmaŋ. Paa hɔɔlʋʋ ŋgʋ lɛ, kɩwɛnɩ saɣtimɛtanaa nɩɩlɛ nɛ kagbaanzɩ (25cm). 10 Mbʋʋ pacanɩ kɛdɛɛka ŋ́ga nɛ paɖʋ kɔ-yɔɔ ñɩɣlɩm pɛ, cánzɩ naanza. Kajalaɣ caŋa yɔɔ lɛ, paɖʋ pɛ anɛ yɔ: pɩyɛ nɖɩ payaɣ se Rubi yɔ nɛ nɖɩ payaɣ-ɖɩ se Topaaze yɔ, nɛ nɖɩ payaɣ-ɖɩɖɩ se Emeroodi yɔ. 11 Caŋa naalɛ ñɩŋga yɔɔ lɛ, paɖʋ pɩyɛ nɖɩ payaɣ-ɖɩ se Girenaatɩ yɔ nɛ nɖɩ payaɣ-ɖɩ se Safiiri yɔ nɛ nɖɩ payaɣ-ɖɩɖɩ se Diyaamaɣ yɔ. 12 Caŋa naadozo ñɩŋga yɔɔ lɛ, paɖʋ pɩyɛ nɖɩ payaɣ se Yasɛŋtɩ yɔ nɛ nɖɩ payaɣ-ɖɩ se Agaatɩ yɔ nɛ nɖɩ payaɣ-ɖɩɖɩ se Ametiisiti yɔ. 13 Caŋa naanza ñɩŋga yɔɔ lɛ, paɖʋ pɩyɛ payaɣ se Kiriisoliiti yɔ nɛ nɖɩ payaɣ se Korinaliini yɔ nɛ nɖɩ payaɣ-ɖɩɖɩ se Yasɩpɩ yɔ. Sika paɖʋwa nɛ pataaɖɩ paa pɩyɛ ńɖɩ lɛ. 14 Paa Yaakɔɔbʋ pɩyalaa hiu nɛ naalɛ taa weyi lɛ, paama ɛ-hɩɖɛ nɛ pataaɖɩ-ɖɩ paa pɩyɛ nɖɩ ɖɩ-yɔɔ, ɛzɩ ɛyʋ ñɩŋʋʋ nesi yɔ. Pɛ ana awɩlɩna Izirɛɛlɩ ñɩma cejewe hiu nɛ naalɛ.
15 Pákpaɣ sika siŋŋ nɛ pólu kpasɩ cikpesi naalɛ ɛzɩ palʋʋ nimiye yɔ. 16 Pólu ɖɔɖɔ sika taŋna nabɛyɛ tayɩ tayɩ naalɛ pʋ-yɔɔ toko hazasɩ yɔɔ nɛ sika kokoo naalɛ paɖʋ-yɛ kɛdɛɛka ŋga kɛwɛ pʋ-yɔɔ toko laŋɩyɛ taa yɔ, ka-kɩlɔmɩŋ ɛsɔdaa ñɩŋ taa. 17 Pakpaɣ kpasɩ cikpeci taa paa ŋ́ga lɛ, nɛ paɖɩnɩ paa laŋɩyɛ kɛdɛɛka kokoye nɖɩ lɛ. 18 Pakpaɣ hɔɔlʋʋ lɛɛkʋ kpasɩ cikpesi nɛ paɖɩnɩ sika taŋna nabɛyɛ tayɩ tayɩ naalɛ mba paɖʋ-wɛ pʋ-yɔɔ toko hazasɩ yɔɔ yɔ. Paɖɩ kɛdɛɛka kokoo nɛ pʋ-yɔɔ toko kɩtamɩŋ nɛ pʋwɛnɩ ɛsɩndaa, laŋɩyɛ taa. 19 Polubi sika kokoo lɛɛna naalɛ nɛ paɖʋ-yɛ laŋɩyɛ taa kɛdɛɛka kʋlɔmɩŋ naalɛ weyi ɛwɛnɩ hadɛ hɔɔlʋʋ ŋgʋ kutukuuni pʋ-yɔɔ toko yɔ, kɩ-taa. 20 Pʋwayɩ lɛ, polu ɖɔɖɔ sika kokoo lɛɛna naalɛ nɛ paɖʋ-yɛ pʋ-yɔɔ toko yɔɔ, kɩtamɩŋ nɛ hadɛ. Paɖʋ kokoo ana nɛ ɛsɩndaa , ɖeɖe pʋwɛɛ se paɖʋ kɩtamɩŋ yɔ, tambaɖɛ nɛ kɩ-hayo kiŋ. 21 Pɛtɛma lɛ, pakpaɣ nimaɣ kɩkpɛdaɣ nɛ paɖɩ laŋɩyɛ taa kɛdɛɛka kokoo nɛ pʋ-yɔɔ toko ñɩna. Palabɩ mbʋ se, laŋɩyɛ taa kɛdɛɛka ɛcaɣ tambaɖɛ ñʋʋ yɔɔ, nɛ kataatuu pʋ-yɔɔ toko yɔɔ, ɛzɩ KƖPAƔLƲ keheyuu Mooyiizi se ɛ́lɛ ɛla yɔ.
Cɔjɔnaa wondu lɛɛtʋ tɔm
22 Toko sɔsɔʋ ŋgʋ Aarɔɔnɩnɩnɩ suu nɛ pʋcɔ ɛtɩnɩ pʋ-yɔɔ toko yɔ, heŋ hʋndʋ kɩkpɛdɩtʋ ɛzɩ tɔlɩm yɔ ɖeke koŋ palʋnɩ-kʋ. 23 Palʋ toko ŋ́gʋ lɛ, paɖʋ ki-liu nɛ pama kpaaloŋgo nɛ pɩcɔɔ pɩta se, pɩtaacɩyɩ. 24 Pʋwayɩ lɛ, pacanɩ toko ŋ́gʋ kɩ-tɛɛ kpɛɛɛ pɩcɔ pɩta. Pakpaɣ heŋ hʋndʋ kɩkpɛdɩtʋ ɛzɩ tɔlɩm yɔ nɛ kɩsɛmtʋ caʋʋ nɛ kɩsɛmtʋ cɩɩɩ nɛ pɩsatʋ ndʋ tɩwɛ tɛyɩŋ yɔ nɛ pamabɩnɩ kpaaloŋgo kɩ-nɔsɩ kpɛɛɛ nɛ palɩzɩ tɩʋ ŋgʋ payaɣ se Girenaadiye yɔ, ki-pe. 25 Pakpaɣ ɖɔɖɔ sika siŋŋ nɛ polu agaŋgala nɛ paɖʋ-yɛ toko ŋ́gʋ kɩ-nɔsɩ hadɛ ñɩnzɩ yɔɔ, Girenaadiye pe hɛkɩŋ taa. 26 Paɖʋ girenaadiye piye lɛ, paɖʋ sika ɛgaŋgaɖɛ, mbʋ mbʋ nɛ pɩcɔɔ pɩta, ɛzɩ KƖPAƔLƲ keheyuu Mooyiizi se ɛ́lɛ ɛla yɔ.
27 Mbʋʋ pɩsaŋ lʋyaa tasɩ lʋʋ pɩsatʋ tokonaa Aarɔɔnɩnɩnɩ nɛ ɛ-pɩyalaa. 28 Palʋ ɖɔɖɔ pɩsatʋ saɣta ŋgʋ cɔjɔnaa ñʋʋdʋ taŋ ɛ-ñʋʋ yɔ nɛ pɩsatʋ tokonaa sɔsaa mba cɔjɔnaa ñʋʋdʋ suu pɩ-tɛɛ yɔ, nɛ pɩsatʋ ndʋ palʋʋnɩ hulasɩ sɔsɔsɩ nzɩ cɔjɔnaa ñʋʋdʋ paŋ yɔ. 29 Pakpaɣ ɖɔɖɔ pɩsatʋ tɛyɩŋ ñɩndʋ nɛ pesidini heŋ hʋndʋ kɩkpɛdɩtʋ ɛzɩ tɔlɩm yɔ ɛzɩ tɔlɩm yɔ nɛ kɩsɛmtʋ caʋʋ nɛ kɩsɛmtʋ cɩɩɩ nɛ palʋʋ tambaɖɛ ŋgʋ cɔjɔnaa ñʋʋdʋ taŋ ɛ-tɩnaɣ taa, pʋ-yɔɔ toko yɔɔ yɔ. Palabɩ pɩ-tɩŋa ɛzɩ KƖPAƔLƲ keheyuu Mooyiizi se ɛ́lɛ ɛla yɔ.
30 Pʋwayɩ lɛ, pakpaɣ sika siŋŋ nɛ polu Ɛsɔ yʋsaɣ nakɛyɛ, ɛzɩ tɩʋ hɛɖʋʋ yɔ, nɛ pama tɔm tʋnɛ “ ɛkɛ KƖPAƔLƲ pʋyʋ ” nɛ pataaɖɩ kɩ-yɔɔ ɛzɩ ɛyʋ ñɩŋʋʋ nesi yɔ. 31 Pɛtɛma lɛ, pakpaɣ nimaɣ ŋga palʋ-kɛ nɛ pɩsatʋ kɩkpɛdɩtʋ ɛzɩ tɔlɩm yɔ nɛ paɖʋ yʋsaɣ ŋ́ga hulaɣ ŋga cɔjɔnaa ñʋʋdʋ paŋ yɔ, kɔ-yɔɔ, ɛzɩ KƖPAƔLƲ keheyuu Mooyiizi yɔ.
Palabʋʋ tʋmɩyɛ nɛ pɩtɛ nɛ powoni Mooyiizi yɔ
32 Mbʋʋ palabɩ kɩɖanɖʋʋ ŋgʋ kɩ-tɛɛ pakatɩɣ yɔ nɛ Ɛsɔ ɖɩcaɣyɛ tʋma nɛ atɛ. Izirɛɛlɩ ñɩma labɩ tʋma ana ɖeyi deyi ɛzɩ KƖPAƔLƲ keheyuu Mooyiizi yɔ.
33 Izirɛɛlɩ ñɩma woni Mooyiizi cɔlɔ Ɛsɔ ɖɩcaɣyɛ wondu tɩŋa,
kɩɖanɖʋʋ ŋgʋ kɩ-tɛɛ pakatɩɣ yɔ nɛ ki-wondu lɛɛtʋ ɛzɩ kaŋgamasɩ nɛ kpoŋkpolonaa nɛ ɖasɩ nzɩ pakakɩ yɔ nɛ tilima nɛ tataa taŋnaa mba pɔ-yɔɔ pesiɣ tilima yɔ;
34 ɛyaŋ tɔna wena pɔlɔba, peli-yɛ tɔlɩm kɩsɛmɩm, tɔna pɔhɔ-yɛ nɛ pakpaɣ-yɛ pɔlɔbɩnɩ yɔ, nɛ pɩsaʋ ŋgʋ kɩtayɩɣ kaɖɛ lone nɛ lone nɖɩ ɖɩkɩlɩ kaɖɛ yɔ, pɛ-hɛkʋ taa;
35 aɖakaɣ ŋga ka-taa paɖʋ nɔɔ haʋ takayaɣ nɛ ka-ɖaŋ nɛ ko-sulaɣ;
36 Ɛsɔ taabɩlɩ nɛ ku-wondu lɛɛtʋ nɛ kpɔnɔnaa mba paha Ɛsɔ yɔ;
37 sika siŋŋ taŋganʋ weyi ɛ-yɔɔ pasɩɣ kanɖʋnaa yɔ nɛ ɛ-kanɖʋnaa nɛ e-wondu lɛɛtʋ nɛ num mbʋ paɖʋʋ kanɖʋnaa taa yɔ;
38 kɩlaŋ ɖɩlayɛ nɖɩ palabɩnɩ sika yɔ nɛnum mbʋ palakɩnɩ sɔnzɩ yɔ nɛ tulaaɖi ŋgʋ pɔhɔkɩ nɛ pɩñakɩ yɔ;
pisaʋ ŋgʋ paɖʋ kɩɖanɖʋ nɔnɔɔ taa yɔ;
39 Kɩlaŋ ɖɩlayɛ nɛ ɖɩ-giriyaajɩ mba palabɩnɩ bɩrɔɔzɩ ñɩɣyʋʋ yɔ, nɛ ɖɩ-ɖaŋ nɛ ɖi-wondu lɛɛtʋ;
Ñɩnaɣ ŋga ka-taa paɖʋʋ cɩɖɩ cɩɖɩ wɛtʋ sɔŋzɩ labʋ lɩm yɔ, nɛ mbʋ pʋ-yɔɔ patɩnɩɣ ñɩnaɣ ŋ́ga yɔ.
40 Pɩsaŋ weyi paɖʋ kadaɣ tɩnaɣ yɔɔ yɔ, nɛ e-tilima nɛ mbʋ pʋ-yɔɔ tilima ana asɩŋaa yɔ, nɛ pɩsaʋ ŋgʋ paɖʋ kadaɣ nɔnɔɔ yɔɔ yɔ, nɛ kadaɣ ŋ́ga ka-kaŋgamasɩ nɛ ke-nime;
Wondu ndʋ pʋwɛɛ se pakpaɣ palabɩnɩ tʋmɩyɛ, kɩɖanɖʋʋ ŋgʋ kɩ-tɛɛ pakatɩɣ yɔ nɛ Ɛsɔ ɖɩcaɣyɛ taa yɔ, pa-tɩŋa;
41 Ɛsɔ ɖɩɣa taa sɔnzɩ tokonaa b ndʋ posuu nɛ pɛsɛɣnɩ Ɛsɔ yɔ;
Kɔdʋʋ wondu ndʋ pʋwɛɛ se Aarɔɔnɩnɩnɩ nɛ ɛ-pɩyalaa posuu nɛ palabɩnɩ pɔ-cɔjɔtʋ tʋmɩyɛ yɔ;