40
KƖPAƔLƲ pɔzʋ se pesiɣ kɩɖanɖʋʋ nɛ pawazɩ kʋ-yɔɔ yɔ
1 KƖPAƔLƲ heyi Mooyiizi se, 2 kajalaɣ fenaɣ kɩyakʋ kajalaɣ ñɩŋgʋ wiye lɛ, ésiɣ ɛnʋʋ KƖPAƔLƲ ɛ-ɖɩcaɣyɛ, kɩɖanɖʋʋ kɩ-tɛɛ pakatɩɣ yɔ. 3 Se, pásɩ kɩɖanɖʋʋ ŋ́gʋ kɩ-tɛɛ aɖakaɣ ŋga ka-taa nɔɔ haʋ takayaɣ wɛɛ yɔ. Pasɩ-kɛ pɩsaʋ ŋgʋ kɩtayɩ kaɖɛ lonɛ nɛ nɖɩ ɖɩkɩlɩ kaɖɛ pɛ-hɛkʋ taa yɔ, kɩ-wayɩ se ɛyaa ɛtaana-kɛ. 4 Powoni Ɛsɔ taabɩlɩ kɩɖanɖʋʋ ŋ́gʋ kɩ-tɛɛ nɛ pɔñɔɔzɩ kpɔnɔnaa mba paha-ɩ nɛ pasɩɩ kʋ-yɔɔ. Pasɩ kɩ-tɛɛ ɖɔɖɔ mbʋ pʋ-yɔɔ paɖʋ kanɖʋnaa nɛ pɔsɔ kaŋɖʋnaa ḿba. 5 Se, pásɩɩ kɩ-tɛɛ ɖɔɖɔ kɩlaŋ ɖɩlayɛ nɖɩ palabɩnɩ sika yɔ. Ɖɩ-yɔɔ pɔhɔkɩ tulaaɖi nɔɔ haʋ aɖakaɣ ɛsɩndaa. Pʋwayɩ lɛ, paɖʋ pɩsaʋ nakʋyʋ Ɛsɔ ɖɩcaɣyɛ nɔnɔɔ taa. 6 Se, pásɩɩ kɩlaŋ ɖɩlayɛ nɖɩ ɖɩ-yɔɔ palaɣ kɩlaŋ yɔ, kɩɖanɖʋʋ ŋgʋ kɩ-tɛɛ pakatɩɣ yɔ, kɛ-ɛsɩndaa. 7 Se, pákpaɣ ñɩnaɣ ŋga ka-taa paɖʋʋ cɩɖɩ cɩɖɩ wɛtʋ sɔŋzɩ labʋ lɩm yɔ nɛ pasɩɩ-kɛ kɩɖanɖʋʋ ŋgʋ kɩ-tɛɛ pakatɩɣ yɔ nɛ kɩlaŋ ɖɩlayɛ pɛ-hɛkʋ taa. Se, páɖʋ lɩm ñɩnaɣ ŋ́ga, ka-taa. 8 Se, pʋwayɩ lɛ, pákpaɣ pɩsaŋ nɛ pɔcɔzɩ Ɛsɔ ɖɩɣa kadaɣ tɩŋa tɩnaɣ yɔɔ kpɛɛɛ, nɛ páɖʋ kadaɣ nɔnɔɔ yɔɔ, pɩsaʋ.
9 Ɛtɛma lɛ, ɛ́kpaɣ num mbʋ palakɩnɩ sɔnzɩ yɔ nɛ ɛpɩyɩ-pʋ Ɛsɔ ɖɩcaɣyɛ nɛ mbʋ pɩ-tɩŋa payɩ pʋwɛ ɖɩ-taa yɔ, pɔ-yɔɔ. Se, mbʋʋ ɛlakɩ nɛ Ɛsɔ ɖɩcaɣyɛ nɛ ɖi-wondu lɛɛtʋ tɩŋa, pɩkɛ Ɛsɔ pʋyʋ. Se, toovenim lɛ, pɩkpaɣ nɛ mbʋ yɔ ɖɩcaɣyɛ-ɖɩ ɖɩkɛ ɛnʋ ñɩŋɖɛ. 10 Se, pápɩyɩ ɖɔdɔ num mbʋ palakɩnɩ sɔnzɩ yɔ kɩlaŋ ɖɩlayɛ nɛ ɖi-wondu lɛɛtʋ tɩŋa pɑyɩ, pɔ-yɔɔ. Se, ɛ́la mbʋ nɛ kɩlaŋ ɖɩlayɛ ńɖɩ ɖɩkɛ ɛnʋ ñɩnɖɛ nɛ palakɩ ɖɩ-yɔɔ, ɛnʋ tʋmɩyɛ ɖeke. 11 Se, pápɩyɩ ɖɔɖɔ num ḿbʋ ñɩnaɣ ŋga ka-taa paɖʋʋ cɩɖɩ cɩɖɩ wɛtʋ sɔŋzɩ labʋ lɩm yɔ nɛ mbʋ pʋ-yɔɔ pasɩɣ ñɩnaɣ ŋ́ga yɔ, pɔ-yɔɔ nɛ pɩkɛ Ɛsɔ pʋyʋ.
12 Se, ewoni Aarɔɔnɩnɩnɩ nɛ ɛ-pɩyalaa kɩɖanɖʋʋ ŋgʋ kɩ-tɛɛ pakatɩɣ yɔ kʋ-nɔnɔɔ taa, nɛ eyele nɛ pala cɩɖɩ cɩɖɩ wɛtʋ sɔnzɩ nɛ pɛwɛɛ cɩɖɩ cɩɖɩ. 13 Pɛtɛŋ cɩɖɩ cɩɖɩ sɔnzɩ labʋ lɛ, ɛ́kpaɣ cɔjɔtʋ wondu nɛ esuu Aarɔɔnɩnɩnɩ nɛ ɛpɩyɩ ɛ-ñʋʋdaa num nɛ ɛlabɩ-ɩ sɔnzɩ nɛ ɛkɛ cɔjɔ nɛ ɛwɛɛ ɛnʋ tʋmɩyɛ taa. 14 Se, ɛ́yaa Aarɔɔnɩnɩnɩ pɩyalaa nɛ powolo ɛ-cɔlɔ lɛ, esuu-wɛ pɔ-kɔdaɣ tʋmɩyɛ tokonaa. 15 Se, ɛ́kpaɣ num nɛ ɛlabɩ-ɛ sɔnzɩ ɛzɩ ɛlabʋ pa-caa Aarɔɔnɩnɩnɩ yɔ, nɛ pɛkɛ cɔjɔnaa nɛ pala ɛnʋ tʋmɩyɛ. Se, pɩtɩŋnɩ num pɩyʋʋ sɔnzɩ yɔɔ lɛ, pa nɛ pɛ-sɛyɩnaa pɛkɛɣ cɔjɔnaa tam yɔɔ.
Mooyiizi yebu nɛ pala Ɛsɔ kɩɖanɖɔʋʋ yɔ
16 Mooyiizi labɩ tʋma tɩŋa ɖeyi ɖeyi ɛzɩ KƖPAƔLƲ keheyuu-i yɔ. 17 Palɩ Ejipiti ɛjaɖɛ taa nɛ pɩkɔɔ pɩla pɩnaɣ lɛ, pesiɣ Ɛsɔ kɩɖanɖʋʋ. Pɩɩkɛ kajalaɣ fenaɣ kɩyakʋ kajalaɣ ñɩŋgʋ wiye, pesiɣ Ɛsɔ kɩɖanɖʋʋ ŋ́gʋ.
18 Mooyiizi yeba nɛ pesiɣ Ɛsɔ kɩɖanɖʋʋ. Nesi tɛɛ tʋmlaɖaa ɖʋ mbʋ pʋ-yɔɔ pesiki tilima yɔ, pesiɣ tilima nɛ paɖʋ kpooŋgbolonaa nɛ pɑkaɣ ɖasɩ. 19 Poposi pɩsaŋ nɛ pohuuzi kɩɖanɖʋʋ yɔɔ. Pɩtɛma lɛ, pakpaɣ kuntu ŋgʋ pohuuzuu kɩɖanɖʋʋ tɩŋa yɔɔ yɔ, nɛ paɖʋ kɩɖanɖʋʋ yɔɔ ɛzɩ KƖPAƔLƲ keheyuu Mooyiizi yɔ.
20 Ɖɩnɛɛ, Mooyiizi kpaɣ pɛ kpatanaa mba pɔ-yɔɔ pama Ɛsɔ paɣtʋ hiu yɔ, nɛ ɛsɩɩ-yɛ aɖakaɣ taa. Ɛkpaɣ ɖaŋ weyi pɔhɔɔlʋʋnɩ aɖakaɣ yɔ nɛ ɛtʋ-ɩ a-lona taa, nɛ posuli aɖakaɣ sulaɣ. 21 Pʋwayɩ lɛ, ɛkpaɣ aɖakaɣ nɛ ɛsʋnɩ-kɛ Ɛsɔ ɖɩcaɣyɛ taa. ɛsʋnɩ-kɛ lɛ, popuzi pɩsaʋ nɛ pikendiɣ kɔ-yɔɔ ɛzɩ KƖPAƔLƲ keheyuu Mooyiizi yɔ.
22 Pakpaɣ Ɛsɔ taabɩlɩ nɛ ɛsɩɩ-kʋ nɛ hayɔ kiŋ, kɩɖanɖʋʋ ŋgʋ kɩ-tɛɛ pakatɩɣ yɔ kɩ-tɛɛ, pɩsaʋ ŋgʋ popuzaa yɔɔ kɛ-ɛsɩndaa. 23 Pɔñɔɔzɩ kpɔnɔnaa mba paha KƖPAƔLƲ yɔ, nɛ pasɩɩ-wɛ taabɩlɩ ŋ́gʋ kʋ-yɔɔ, ɛzɩ KƖPAƔLƲ keheyuu Mooyiizi yɔ.
24 Piyele mbʋ pʋ-yɔɔ paɖʋʋ kanɖʋnaa yɔ, pasɩɩ-pʋ hadɛ kiŋ, kɩɖanɖʋʋ ŋgʋ kɩ-tɛɛ pakatɩɣ yɔ, kɩ-tɛɛ, Ɛsɔ taabɩlɩ ɛsɩndaa. 25 Pɛtɛma lɛ, pɔsɔ kanɖʋnaa ḿba KƖPAƔLƲ ɛsɩndaa, ɛzɩ KƖPAƔLƲ keheyuu Mooyiizi yɔ.
26 Pɩsaɣ kɩlaŋ ɖɩlayɛ nɖɩ palabɩnɩ sika yɔ lɛ, pasɩɩ-ɖɩ kɩɖanɖʋʋ ŋgʋ kɩ-tɛɛ pakatɩɣ yɔ kɩ-tɛɛ, pɩsaʋ ŋgʋ popuzaa nɛ kɩtayɩɣ kaɖɛ lone nɛ lone nɖɩ ɖɩkɩlɩ kaɖɛ, pɛ-hɛkʋ taa yɔ, ɖɛ-ɛsɩndaa. 27 Kɩlaŋ ɖɩlayɛ ńɖɩ ɖɩ-yɔɔ pɔhɔkɩ tulaaɖi ŋgʋ paha Ɛsɔ yɔ, ɛzɩ KƖPAƔLƲ keheyuu Mooyiizi yɔ.
28 Pʋwayɩ lɛ, popuzi pɩsaʋ Ɛsɔ kɩɖanɖʋʋ nɔnɔɔ taa, 29 nɛ pasɩɩ kɩlaŋ ɖɩlayɛ nɖɩ ɖɩ-yɔɔ pakʋʋ kpɩna nɛ pɔhɔkɩ nɛ pɩñakɩ yɔ, Ɛsɔ kɩɖanɖʋʋ nɔnɔɔ cɔlɔ. Peeye, Mooyiizi la ɖɩ-yɔɔ kɩlaʋ ŋgʋ pɔhɔkɩ nɛ pɩñakɩ yɔ, nɛ paha hayɩm taa tɔɔnaɣ, ɛzɩ KƖPAƔLƲ keheyuu Mooyiizi yɔ.
30 Pɩsa nɛ ɛyaa pɩzɩ pala cɩɖɩ cɩɖɩ wɛtʋ sɔnzɩ lɛ, paɖʋ lɩm cɩɖɩ cɩɖɩ wɛtʋ sɔŋzɩ labʋ lɩm ñɩnaɣ taa nɛ pasɩɩ-kɛ kɩɖanɖʋʋ ŋgʋ kɩ-tɛɛ pakatɩɣ yɔ nɛ kɩlaŋ ɖɩlayɛ, pɛ hɛkʋ taa. 31 Lɩm mbʋʋ, Mooyiizi nɛ Aarɔɔnɩnɩnɩ nɛ ɛ́lɛ pɩyalaa pasaŋɩɣ pe-nesi nɛ pa-nɩŋgbanzɩ. 32 Mbʋʋ palakaɣ cɩɖɩ cɩɖɩ wɛtʋ sɔnzɩ alɩwaatʋ ndʋ pasʋʋ kɩɖanɖʋʋ ŋgʋ kɩ-tɛɛ pakatɩɣ yɔ, yaa powoki kɩlaŋ ɖɩlayɛ taa, ɛzɩ KƖPAƔLƲ keheyuu Mooyiizi yɔ.
33 Pʋwayɩ lɛ, Mooyiizi yelɛ nɛ paɖʋ pɩsaŋ kadaɣ tɩnaɣ yɔɔ nɛ pɩcɔɔ Ɛsɔ ɖɩɣa nɛ kɩlaŋ ɖɩlayɛ, kpɛɛɛ; nɛ popuzi pɩsaʋ kadaɣ nɔnɔɔ yɔɔ. Mbʋʋ, Mooyiizi tɛzɩ labʋ tʋma tɩŋa.
KƖPAƔLƲ koboyaɣ suuni Ɛ-kɩɖanɖʋʋ yɔ
34 Peeye, ñɔsɩ a ñɛyaa nɛ sihuuzi kɩɖanɖʋʋ ŋgʋ kɩ-tɛɛ pakatɩɣ yɔ, kʋ-yɔɔ, nɛ KƖPAƔLƲ koboyaɣ suni ɛ-kɩɖanɖʋʋ ɖo. 35 Toovenim lɛ, ñɔsɩ kɛñɛyɩ pɩtiifɛyɩ kɩɖanɖʋʋ ŋgʋ kɩ-tɛɛ pakatɩɣ yɔ, kɩ-yɔɔ nɛ KƖPAƔLƲ koboyaɣ suni-kʋ ɖo, pʋyɔɔ Mooyiizi tapɩzɩɣ se, ɛsʋʋ kɩ-tɛɛ.
36 Alɩwaatʋ ndʋ ñɔsɩ kɔŋ nɛ sɩkʋyɩ Ɛsɔ kɩɖanɖʋʋ yɔɔ lɛ, Izirɛɛlɩ ñɩma kʋyʋʋ nɛ papazɩ nɔmɔʋ kɩfalʋʋ ɖɔm. 37 Ɛlɛ, ye ñɔsɩ ɛtɩkʋyɩ yɔ, paawoki ɖoli. Pacakɩ mbʋ nɛ paɖaŋ kɩyakʋ ŋgʋ ñɔsɩ kɔŋ nɛ sɩkʋyɩ yɔ, nɛ pʋcɔ pɛɖɛɛ.
38 KƖPAƔLƲ yekaɣ nɛ ñɔsɩ mɩnʋʋ huuzuu Ɛ-kɩɖanɖʋʋ yɔɔ wɩsɩ taa nɛ ɖoo taa lɛ, ñalɩmɩyɛ naɖɩyɛ ñañandɩɣ, nɛ pɩwɩlɩɣ se Ɛwɛ ɛ-samaɣ Izirɛɛlɩ ñɩma hɛkʋ taa. Mbʋʋ pɩlakaɣ tam, pa-nʋmɔŋ tɩŋa payɩ, ɖɔm taa.