38
Kɩlaŋ ɖɩlayɛ nɛ cɩɖɩcɩɖɩ wɛtʋ lɩm ñɩnaɣ, pɔ-tɔm
1 Pɩsa nɛ palaa kɩlaŋ lɛ a, pakpaɣ akasɩa tɩʋ ɖasɩ nɛ palabɩnɩ kɩlaŋ ɖɩlayɛ. Kɩlaŋ ɖɩlayɛ ńdɩ, ɖɩ-hɔɔlɩŋ naanza ɛnʋ, ɛwɛ kɩmaŋ, nɛ paa hɔɔlʋʋ ŋgʋ lɛ, kɩ-ɖaɣlɩkɩŋ kɛ mɛtanaa naalɛ nɛ hɔɔlʋʋ (2,5m). Kɩlaŋ ɖɩlayɛ ńɖɩ, ɖɩ-kʋkʋyɩŋ kɛ mɛta kʋɖʋmʋʋ nɛ hɔɔlʋʋ (1,5m). 2 Kɩlaŋ ɖɩlayɛ ńɖɩ, patɩnɩ ɖɛ-ɛsɔdaa kʋlɔmɩŋ naanza ɛnʋ ɛ-yɔɔ nɛ pɩkʋyɩ, ɛlɛ, pɩ-tɩŋa pɩkpɛndɩ kʋɖʋm. Bɩrɔɔzɩ ñɩɣyʋʋ pakpaɣ nɛ pohuuzi kɩlaŋ ɖɩlayɛ ńɖɩ, ɖɩ-yɔɔ. 3 Pʋwayɩ lɛ, pakpaɣ bɩrɔɔzɩ ñɩɣyʋʋ nɛ palabɩnɩ kɩlaŋ ɖɩlayɛ taa wondu tɩŋa, ñanzɩ nzɩ sɩ-taa pokuu tɔlɩma wena a-taa num wɛɛ yɔ, nɛ mbʋ pokuuna yɔ, nɛ ñazɩ nzɩ sɩ-taa paɖʋʋ calɩm nɛ pamɩzɩɣ ɛyaa yɔɔ yɔ, nɛ kela lɔɔyɩsɩ nzɩ papɩsɩɣnɩ nandʋ yɔ, nɛ ñanzɩ nzɩ sɩ-taa pɔhɔkɩ tulaaɖi yɔ. 4 Pɛtɛma lɛ, pakpaɣ bɩrɔɔzɩ ñɩɣyʋʋ nɛ polu giriyaajɩ nakʋyʋ. Paalabɩ hɛɛŋa nakɛyɛ kɩlaŋ ɖɩlayɛ hɛkʋ taa nɛ pɩ-tɛɛ yɔɔ pazɩ nɛ pakpaɣ giriyaajɩ ŋ́gʋ nɛ paɖʋ hɛɛŋa ŋ́ga ka-taa. 5 Polubi ɖɔɖɔ kokoo naanza nɛ paɖʋ-yɛ giriyaajɩ ŋ́gʋ kʋ-kʋlɔmɩŋ naanza taa nɛ kokoo ana awɛɛnɩ kɩlaŋ ɖɩlayɛ aɖakaɣ nɛ ka-wayɩ. Kokoo ana a-taa patʋʋ ɖaŋ. 6 Paakpaɣ akasɩa tɩʋ ɖasɩ nɛ pasaɣ ɖaŋ naalɛ nɛ pohuuzi ɩ-yɔɔ bɩrɔɔzɩ ñɩɣyʋʋ. 7 Pɩsa nɛ papɩzɩ pɔhɔɔlɩ kɩlaŋ ɖɩlayɛ ńɖɩ lɛ, pakpaɣkɩɣ ɖaŋ ɛnʋ nɛ pasʋzɩ-ɩ kokoo wena awɛ kɩlaŋ ɖɩlayɛ aɖakaɣ kpɛnzɩ yɔɔ yɔ, a-taa. Kpoŋgbolonaa palabɩnɩ kɩlaŋ ɖɩlayɛ ńɖɩ, nɛ ɖɩ-taa wɛɛ pɔʋ.
8 Pʋwayɩ lɛ, pakpaɣ bɩrɔɔzɩ ñɩɣyʋʋ nɛ polu cɩɖɩ cɩɖɩ wɛtʋ sɔnzɩ ñɩnaɣ nɛ mbʋ pʋ-yɔɔ pasɩɣ ñɩnaɣ ŋga yɔ. Halaa mba paawɛ palakɩ tʋmɩyɛ kɩɖanɖʋʋ ŋgʋ pakatɩɣ kɩ-tɛɛ yɔ, kɩ-nɔnɔɔ taa yɔ, pa-bɩrɔɔzɩ ñɩɣtʋ ndʋ tɩñɩlɩsaɣ ɛzɩ ñɩnɩŋ yɔ pakpaɣ nɛ palabɩnɩ ñɩnaɣ ŋ́ga.ŋgʋ pakatɩɣ kɩ-tɛɛ yɔ b.
Mbʋ pɔcɔzɩnɩ kataɣ yɔ
9 Paɖaɣnɩ kadaɣ nakɛyɛ nɛ kɔcɔɔ Ɛsɔ ɖɩcaɣyɛ c nɛ kata. Pakpaɣ pɩsatʋ ndʋ tʋwɛ tɛyɩŋ yɔ nɛ palʋʋ pɩsaŋ nɛ pakpaɣ-ɩ pɔcɔzɩ kataɣ tɩnaɣ yɔɔ. Hadɛ kiŋ lɛ, pɩsaŋ ɛnʋ, ɛ-ɖaɣlɩkɩŋ kɛ mɛtanaa nɩɩnʋwa (50m). 10 Pakpaɣ pɩsaŋ ɛ́nʋ nɛ paɖɩnɩ tilima nɩɩlɛ (20) wena acaɣ kila nɩɩlɛ (20) yɔɔ yɔ. Tilima ana nɛ kila ana, palabɩ-yɛ nɛ bɩrɔɔzɩ ñɩɣyʋʋ. Kaŋgamasɩ nɛ ɖaŋ pakpaɣ nɛ paɖɩnɩ pɩsaŋ ɛnʋ nɛ tilima. Kaŋgamasɩ nzɩ nɛ ɖaŋ ɛ́nʋ, palabɩ-ɩ nɛ liidiye ñɩɣyʋʋ. 11 Hayo kiŋ lɛ, pɩsaŋ ɖaɣlɩkɩŋ kɛ ɖɔɖɔ mɛtanaa nɩɩnʋwa (50m). Pɔcɔzɩ-ɩ ɖɔɖɔ ɛzɩ palabʋ hadɛ kiŋ yɔ. 12 Wɩsɩ ɖɩɖʋyɛ hɔɔlʋʋ taa lɛ, pɩsaŋ ɖaɣlɩkɩŋ kɛ mɛtanaa nɩɩlɛ nɛ kagbaanzɩ (25m). Peeye lɛ, pesiɣ tilima hiu (10) kila hiu (10) yɔɔ, nɛ pakpaɣ pɩsaŋ nɛ pɔcɔzɩnɩ-yɛ. 13 Wɩsɩ ɖɩlɩyɛ hɔɔlʋʋ taa ɖenɖe nɔnɔɔ wɛɛ yɔ lɛ, kadaɣ walanzɩ kɛ ɖɔɖɔ mɛtanaa nɩɩlɛ nɛ kagbaanzɩ (25m). 14-15 Paa kadaɣ nɔnɔɔ hɔɔlʋʋ ŋgʋ kɩ-taa lɛ, pesiɣ tilima naadozo kila naadozo yɔɔ, nɛ paɖɩnɩ-ɩ pɩsaŋ, ɛ-ɖaɣlɩkɩŋ kɛ mɛtanaa lʋbɛ nɛ hɔɔlʋʋ (7,5m).
16 Pɩsaŋ weyi ɛ-tɩŋa pocozɩ kadaɣ nɛ pɩta yɔ, pɩsatʋ ɖoŋ ñɩndʋ palʋnɩ pɩsaŋ ɛ́nʋ. 17 Bɩrɔɔzɩ ñɩɣyʋʋ palabɩnɩ tikila wena a-yɔɔ pesiɣ tilima yɔ, piyele kaŋgamasɩ nɛ ɖaŋ lɛ, liidiye ñɩɣyʋʋ palabɩnɩ paba. Hulasli cikpesi nzɩ paɖʋ tilima ñʋŋ taa yɔ, pohuzi sɩ-yɔɔ liidiye ñɩɣyʋʋ. Ɖaŋ weyi palabɩ-ɩ nɛ liidiye ñɩɣyʋʋ yɔ pakpaɣ pɔhɔkɩnɩ tilima wena asɩŋɩ kadaɣ tɩnaɣ yɔɔ kpɛɛɛ yɔ, a-tɩŋa. 18 Kpaaloŋgo maɖaa kakpaɣ pɩsatʋ kʋlʋmtʋ nɛ pesidini hʋndʋ kɩkpɛdɩtʋ ɛzɩ tɔlɩm yɔ nɛ ndʋ tɩsɛ cɩɩɩ nɛ ndʋ tɩsɛ caʋʋ yɔ nɛ palʋʋ pɩsaʋ nakʋyʋ. Ŋgʋʋ paɖʋʋ kadaɣ nɔnɔɔ yɔɔ. Pɩsaʋ ŋ́gʋ, kɩ-ɖaɣlɩkɩŋ kɛ mɛtanaa hiu (10m) nɛ kɩ-walanzɩ ñɛkɛ mɛtanaa naalɛ nɛ hɔɔlʋʋ (2,5m), ɖɔɖɔ ɛzɩ pɩsaŋ weyi pɔcozɩ kadaɣ tɩnaɣ yɔɔ yɔ. 19 Pɩsaʋ ŋ́gʋ, paɖɩɣ-kʋ nɛ tilima naanza asɩŋɩ kila naanza yɔɔ. Liidiye ñɩɣyʋʋ palabɩnɩ ɖaŋ, nɛ pohuuzi tilima hulasɩ yɔɔ. 20 Bɩrɔɔzɩ ñɩɣyʋʋ palabɩnɩ Ɛsɔ ɖɩcaɣyɛ kaŋgamasɩ tɩŋa nɛ kadaɣ ñɩnzɩ tɩŋa.
Ñɩɣtʋ ndɩ ndɩ ndʋ palabɩnɩ tʋmɩyɛ yɔ, tɩ-ɖɔʋ tɔm
21 Ñɩɣtʋ ndɩ ndɩ ndʋ pakpaɣ palabɩnɩ tʋmɩyɛ nɛ pamanɩ Ɛsɔ ɖɩcaɣyɛ nɖɩ ɖɩ-taa pɔkɔŋ sɩʋ Ɛsɔ Nɔɔ Haʋ takayaɣ yɔ, tɩɖɔ ɖɔʋ mbʋ yɔ, mbʋ yɔ. Ɛzɩ Mooyiizi keheyuu Levii liɖe taa ñɩma yɔ, ḿba kaɣnɩ labʋ pʋ-tʋmɩyɛ nɛ pana ñɩɣtʋ ndɩ ndɩ ndʋn palabɩnɩ tʋmɩyɛ yɔ, tɩɖɔ ɖɔʋ mbʋ yɔ. Cɔjɔ Aarɔɔnɩnɩnɩ pɩyalʋ Itamaarɩ cɔŋnɩnɩ pɔ-yɔɔ nɛ pala tʋmɩyɛ nɖɩ. 22 Yuuda cejewiye taa tʋ Becalɛɛlɩ, weyi ɛkɛ Uurii pɩyalʋ nɛ ɛtɛ ɛkɛ Huuri sɛyɩ yɔ, kalabɩnɩ mbʋ pɩ-tɩŋa payɩ KƖPAƔLƲ keheyi Mooyiizi se pala yɔ. 23 Daanɩ cejewiye taa tʋ Oholiyaavɩ, weyi ɛkɛ Ahiisamakɩ pɩyalʋ yɔ, ɛnʋ kasɩnɩ Becalɛɛlɩ nɛ pala tʋmɩyɛ ńɖɩ. Oholiyaavɩ ɛ́nʋ, ɛkɛ weyi ɛsɩm ñɩɣlɩm pɛ saɣʋ nɛ a-manaʋ, ɛsɩm tɩʋ saɣʋ. Ɛkɛ ɖɔɖɔ anjaʋ lɩzɩyʋ nɛ weyi ɛkpaɣkɩɣ heŋ hʋndʋ kɩkpɛdɩtʋ ɛzɩ tɔlɩm yɔ nɛ kɩsɛmtʋ cɩɩɩ nɛ kɩsɛmtʋ caʋʋ nɛ pɩsatʋ nɛ amakɩ kpaaloŋgo pɩsaŋ yɔɔ yɔ.
24 Sika ŋga Izirɛɛlɩ ñɩma hawa se pɩsɩnɩ nɛ pama Ɛsɔ ɖɩɣa, ka-tɩŋa ko-yuŋ kɛ kiloonaa taŋga nɛ nasidozo nɛ nɩɩnʋwa nɛ nɩɩlɛ nɛ lʋbɛ (877kg) nɛ kɩɖamnaa nasidozo (300), ɛzɩ paɖʋ se pamaɣzɩ Ɛsɔ ɖɩɣa taa yɔ. 25 Liidiye ñɩɣtʋ d ndʋ samaɣ taa ñɩma hawa se pɩsɩnɩ, ti-yuŋ kɛ kiloonaa Kutokiŋ naadozo nɛ hiu nɛ lʋbɛ (3017kg) nɛ kɩɖamnaa taŋga nɛ nasɩlɛ nɛ nɩɩnʋwa (750g), ɛzɩ paɖʋ se pamaɣzɩ Ɛsɔ ɖɩɣa taa yɔ. 26 Ɛyaa kutokiŋ taŋga nɛ mɩnʋʋ nɛ naadozo nɛ ɛyaa taŋga nɛ nɩɩnʋwa (603.550) mba paawɛnɩ kpaɣ pɩnzɩ nɩɩlɛ (20) nɛ pɩɖɛɛ yɔ, pacanɩ liidiye ñɩɣtʋ ńdʋ. Pa-taa paa anɩ lɛ, ɛca liidiye ñɩɣtʋ ɛzɩ kɩɖamnaa kagbaanzɩ (5g) yɔ. 27 Nesi tɛɛ tʋmlaɖaa kpaɣ liidiye ñɩɣtʋ kilonaa kutokiŋ naadozo (3000kg) nɛ poyolisi-tʋ nɛ pala taŋnaa mɩnʋʋ (100) mba pɔ-yɔɔ pesiɣ lone kaɖɛ ñɩnɖɛ tilima nɛ pɩ-taa pɩsaʋ ñɩna yɔ. Paa taŋanʋ weyi lɛ, kiloonaa nɩɩdozo (30kg) pakpaɣ nɛ palabɩnɩ-ɩ. 28 Liidiye ñɩɣtʋ kiloonaa hiu nɛ lʋbɛ (17kg) nɛ kɩɖamnaa taŋga nɛ nasɩlɛ nɛ nɩɩnʋwa (750g) mba pɩsɛɣ yɔ, pakpaɣ nɛ palabɩnɩ kaŋgamasɩ nɛ mbʋ puhuuzini tilima hulasɩ yɔɔ yɔ, nɛ ɖaŋ weyi pakam nɛ pɔɖɔkʋʋ tilima yɔ.
29 Bɩrɔɔzɩ ñɩɣtʋ ndʋ Izirɛɛlɩ ñɩma kahawa yɔ, tɩkɛ kiloonaa kutokiŋ naalɛ nɛ mɩnʋʋ nɛ nɩɩlɛ nɛ naanza. 30 Bɩrɔɔzɩ ñɩɣtʋ ndʋ pakpaɣ nɛ palabɩnɩ kɩɖanɖʋʋ ŋgʋ kɩ-tɛɛ pakatɩɣ yɔ, kɩ-nɔnɔɔ taa tilima tɛɛ ñɩɣtʋ nɛ kɩlaŋ ɖɩlayɛ nɛ ki-giriyaacɩ nɛ kɩlaŋ ɖɩlayɛ taa wondu lɛɛtʋ tɩŋa payɩ. 31 Ñɩɣtʋ ndʋ ɖɔɖɔ palabɩnɩ kadaɣ tilima nɛ kadaɣ nɔnɔɔ taa ñɩna a-tɛɛ ñɩɣtʋ. Ndʋ ɖɔɖɔ palabɩnɩ Ɛsɔ ɖɩcaɣyɛ nɛ Ɛsɔ ɖɩɣa kadaɣ, pa-kaŋgamasɩ.