19
ƐSƆ YEBU SE NƆƆ HAƲ ƐWƐƐ Ɛ NƐ IZIRƐƐLƖ SAMAƔ PƐ-HƐKƲ TAA YƆ 19-24
Nɔɔ haʋ mbʋ Ɛsɔ ɖʋwa se pʋwɛɛ ɛ nɛ Izirɛɛlɩ ñɩma pɛ-hɛkʋ taa yɔ
1-2 Pʋwayɩ lɛ, Izirɛɛlɩ ñɩma kʋyɩ Refiidim a tɛtʋ taa nɛ pɛɖɛ powolo lakʋ ŋgʋ payaɣ se Sinayii yɔ, kɩ-taa. Fenaɣ naadozo ñɩŋga tɛ kɩyakʋ kajalaɣ ñɩŋgʋ wiye, ɛzɩ palɩʋ Ejipiti ɛjaɖɛ taa yɔ, pasʋ Sinayii lakʋ taa. Patalɩ peeye lɛ, pesiɣ pa-ɖikpeɣliye Sinayii pʋʋ cɔlɔ. 3 Pɛwɛ peeye lɛ, Mooyiizi kpa pʋʋ yɔɔ se ɛkatɩ Ɛsɔ.
KƖPAƔLƲ yaa Mooyiizi pʋʋ ñʋʋ taa nɛ eheyi-i se eheyi Izirɛɛlɩ ñɩma, Yaakɔɔbʋ sɛyɩnaa se, 4 pana ɛzɩma ɛnʋ labɩ Ejipiti ñɩma yɔ nɛ ɛzɩma ɛnʋ kpaɣ-wɛ ɛzɩ keziye kpaɣkɩɣ ɖi-piyaa ɖi-siɣye wayɩ nɛ ɛnʋ woni-wɛ ɛ-cɔlɔ peeye yɔ. 5 Se, lɛɛlɛɛyɔ ye pewelesiɣ camɩyɛ ndʋ ɛnʋ heyiɣ-wɛ nɛ pɔɖɔkʋʋ ɛnʋ nɔɔ haʋ yɔ, pɛkɛɣ ñɩm samaɣ ŋga ɛnʋ lɩzɩ kedeŋa kpeekpe samaɣ taa yɔ. Se, toovenim lɛ, ɛnʋ ɛtɩna tɛtʋ tɩŋa, 6 piyele nɛ pakaɣ ɛnʋʋ kɛʋ cɔjɔnaa kiwiyaɣ, ɛjaɖɛ nɖɩ ɖɩwɛ ɛnʋ tʋmɩyɛ taa yɔ b. Se, ndʋ́ pʋwɛɛ se eheyi Izirɛɛlɩ ñɩma.
7 Pʋwayɩ lɛ, Mooyiizi pɩsɩ ewolo ɖikpeɣliye taa nɛ ɛyaa Izirɛɛlɩ sɔsaa nɛ eheyi-wɛ ndʋ KƖPAƔLƲ ɖʋ-ɩ yɩ, tɩ-tɩŋa payɩ. 8 Ɖɩnɛɛ, samaɣ kpɛndɩ nɔɔ kʋɖʋmaɣ nɛ kɔtɔ se, mba lakɩ mbʋ KƖPAƔLƲ ɖʋwa yɔ, pɩ-tɩŋa.Pʋwayɩ lɛ, Mooyiizi wolo eheyi KƖPAƔLƲ ndʋ samaɣ cosaa yɔ. 9 Peeye, KƖPAƔLƲ kaɖaa se, ɛnʋ woki ɛ-cɔlɔ mɩndʋ c ndʋ tɩwɛ yuŋ kɛm yɔ, tɩ-taa. Ɖɩnɛɛ lɛ, samaɣ pɩzɩɣ kanɩɩ ɛ nɛ ɩ pɔ-yɔɔdaɣ nɛ kata-ɩ liu tam. Mooyiizi ɖaɣnɩ KƖPAƔLƲ heyuu ndʋ samaɣ cosaa yɔ.
Ɛsɔ katɩʋ Mooyiizi Sinayii pʋʋ yɔɔ yɔ
10 Pʋwayɩ lɛ, KƖPAƔLƲ tasɩ Mooyiizi heyuu se, ekiti samaɣ cɔlɔ nɛ eheyi-kɛ se pála cɩɖɩ cɩɖɩ wɛtʋ sɔɔnzɩ kɩyakʋ ŋgʋ nɛ kɩ-tɛ kifemuu. Se, ɖɔɖɔ lɛ, pɔ́cɔtɩ po-wondu. 11 Se, pɔñɔzɩ pa-tɩ nɛ paɖaŋ kpam kɩyakʋ tozo ñɩŋgʋ wiye, mbʋ pʋyɔɔ yɔ, kɩyakʋ ŋgʋ ki-wiye ɛnʋ tiki Sinayii pʋʋ yɔ, samaɣ tɩŋa ɛsɩndaa. 12 Se, ɛdʋ kámásɩ nɛ pɩcɔɔ pʋʋ kpɛɛɛ nɛ ekizini Izirɛɛlɩ samaɣ se, nɔɔyʋ ɛtaakpa pʋʋ yɔɔ, yaa ɛtaawolo kʋ-cɔlɔ. Se, ye nɔɔyʋ ewobi kʋ-cɔlɔ yɔ, pʋdʋ ɛnʋ, pakʋʋ-ɩ. 13 Se, paa ɛyʋ yaa kpɩnɛ, pataayele nɛ pʋdʋ caɣnɩ wezuu. Se, pataatukuni-i, ɛlɛ, payaɣaɣ pʋdʋ pɛ yaa ñɩmɛ nɛ ɛsɩ. Se, pɔkɔŋ nɛ pahʋlɩ ñɔndɔʋ lɛ, pa-taa nabɛyɛ d pɩzɩɣ nɛ pakpa pʋʋ yɔɔ. 14 Ɛsɔ tɛm-ɩ yɔɔdɩnʋʋ lɛ, Mooyiizi pɩsɩ etii samaɣ cɔlɔ. Ɖɩnɛɛ eyeba nɛ Izirɛɛlɩ ñɩma la cɩɖɩ cɩɖɩ wɛtʋ sɔɔnzɩ nɛ pɔcɔtɩ po-wondu. 15 Pʋwayɩ lɛ, eheyi-wɛ se, pɔñɔzɩ pa-tɩ nɛ paɖaŋ kɩyakʋ tozo ñɩŋgʋ wiye kpam. Se, pataatukuni pa-halaa.
16 Kɩyakʋ tozo ñɩŋgʋ wiye pɩkɔm se pɩñandɩɣ lɛ, panaɣ tɛʋ ñɩlɩzʋʋ nɛ mɩndʋ sɔsɔtʋ natʋyʋ huuzi pʋʋ yɔɔ nɛ panɩɣ tɛʋ nazʋʋ lɩɣaɣnɩ kʋ-yɔɔ. Panɩɣ pahʋlaɣ ɖɔɖɔ nʋndɔʋ nakʋyʋ ɖɔŋ pʋʋ yɔɔ. Ɖɩnɛɛ, sɔɔndʋ natʋyʋ kpa ɛyaa ɖikpeɣliye taa nɛ peseliɣ. 17 Pɩlabɩ mbʋ lɛ, Mooyiizi lɩzɩ ɛyaa samaɣ nɛ eyele nɛ powolo Ɛsɔ cɔlɔ. Powoba lɛ, pasɩŋ pʋʋ liu tɛɛ. 18 Ŋgʋ, Sinayii pʋʋ tɩŋa kɛñɛyɩ ñɔsɩ tiɣ tiɣ nɛ kʋsʋʋ seluu yɔɔ, mbʋ pʋyɔɔ yɔ, KƖPAƔLƲ kitibi kʋ-yɔɔ. Ñɔsɩ nzɩ sɩkpaɣaɣ yɔ, sɩwɛ ɛzɩ ñɔsɩ nzɩ sɩlɩwaɣnɩ miŋ momoɖe taa yɔ. 19 Ɖɩnɛɛ, pahʋlaɣ nɔndɔʋ hʋlʋʋ mbʋ yɔ, pɩtɛzɩɣ ɖoŋ kpaʋ kɩkpaʋ, nɛ Mooyiizi yɔɔdʋʋ nɛ Ɛsɔ cosi tɛʋ nazʋʋ taa.
20 KƖPAƔLƲ tibi Sinayii pʋʋ ñʋʋ taa lɛ, ɛyaa Mooyiizi nɛ ɛ́lɛ́ kpa ɛ-cɔlɔ peeye. 21 Ɛ́lɛ́ kpawa lɛ, KƖPAƔLƲ heyi-i se, ewolo eheyi samaɣ se kataakpetesi se kanaɣ-ɩ. Se, pɩtɛkɛ mbʋ yɔ, ka-taa sakɩyɛ sɩkɩ. 22 Se, halɩnɩ cɔjɔnaa mba papɩzɩɣ nɛ powolo ɛnʋ cɔlɔ yɔ, pʋwɛɛ se pala cɩɖɩ cɩɖɩ wɛtʋ sɔɔnzɩ nɛ ɛnʋ ɛtaakʋyɩ pɔ-yɔɔ. 23 Peeye, Mooyiizi cosi-i se, samaɣ ɛɛpɩzɩɣ kakpa Sinayii pʋʋ yɔɔ. Se, ɛ-maɣmaɣ heyi mba se paɖʋ kámásɩ nɛ pɩcɔɔ pʋʋ kpɛɛɛ nɛ paɖaŋ samaɣ se kataakpɩtɩnɩ pʋʋ. 24 Peeye, KƖPAƔLƲ heyi Mooyiizi se, ɛpɩsɩ samaɣ ɖikpeɣliye taa nɛ pʋwayɩ ɛ nɛ Aarɔɔnɩnɩnɩ paakpa. Se, ɛlɛ cɔjɔnaa nɛ samaɣ pataakpetesi se pakpaɣ ɛnʋ cɔlɔ nɛ ɛnʋ kʋyɩ po-yɔɔ. 25 Pʋwayɩ lɛ, Mooyiizi kiti samaɣ cɔlɔ nɛ ɛyɔɔdɩnɩ-kɛ.