18
Mooyiizi nɛ ɛ-yɩtɩ Yetiroo, pɔ-tɔm
1 Nakʋyʋ wiye Mooyiizi yɩtɩ Yetiroo, Maadiyaanɩ ɛjaɖɛ taa cɔjɔ kɔm ɛnɩɩ pɛkɛdaɣ mbʋ mbʋ KƖPAƔLƲ Ɛsɔ labɩ Mooyiizi nɛ Izirɛɛlɩ ñɩma, ɛ-samaɣ yɔ. Ɛnɩ ɖɔɖɔ ɛzɩma KƖPAƔLƲ lɩzɩ-wɛ Ejipiti ɛjaɖɛ taa yɔ. 2 Pʋwayɩ lɛ, Mooyiizi yɩtɩ Yetiroo kpaɣ ɛ-pɛlɛ Ciporaa, Mooyiizi halʋ weyi ɛ́lɛ ñaaɖɔɔnaa yɔ, 3 nɛ ɛ-pɩyalaa mba pa-naalɛ. Mooyiizi ya sɔsɔ se, Gɛɛrɩsɔɔnɩ, pʋ-tɔbʋʋ se, ɛgɔm peeye. Toovenim lɛ, ɛtɔŋaɣ se, ɛnʋ wobi ɛcaɣ caɣyɩtʋ ɛjaɖɛ ɛgɔm naɖɩyɛ taa. 4 Mooyiizi yaa cikpelu se, Eliyɛzɛɛrɩ, pʋ-tɔbʋʋ se, ɛnʋ Ɛsɔ woki ɛ-sɩnaʋ. Se, ɛlɩzɩ ɛnʋʋ nɛ ɛɖaŋ ɛnʋ yɔɔ nɛ Ejipiti wiyaʋ takʋ ɛnʋ.
5 Pʋwayɩ lɛ, Yetiroo ɖɛɛ ɛ nɛ Mooyiizi piyaa nɛ ɛ́lɛ halʋ nɛ powolo Mooyiizi cɔlɔ lakʋ taa, ɖenɖe Izirɛɛlɩ ñɩma kekpeɣli Ɛsɔ pʋʋ a cɔlɔ yɔ. 6 Mbʋʋ Yetiroo tiyaa peheyi Mooyiizi se, ɛnʋʋ ɛ-yɩtɩ wɛɛ ewoki ɛ-cɔlɔ, ɛ nɛ ɛ-halʋ nɛ ɛ-pɩyalaa mba pa-naalɛ. 7 Peheyi Mooyiizi mbʋ lɛ, ɛkʋyɩ se ɛkatɩɣ-ɩ. Ɛkatɩ-ɩ lɛ, eluzi ɛ-tɩ ɛ-yɩtɩ tɛɛ nɛ ɛ nɛ ɩ pekpikini ɖama. Pɔpɔzɩ ɖama alaafɩa yɔɔ nɛ pɩtɛ wyɩ lɛ, Mooyiizi kpaɣ-wɛ nɛ ewoni e-kizinziku tɛɛ. 8 Ɖɩnɛɛ, Mooyiizi kɛtɩ ɛ-yɩtɩ ɛzɩma KƖPAƔLƲ labɩ Farawɔɔ nɛ Ejipiti ñɩma, Izirɛɛlɩ ñɩma yɔɔ yɔ. Ɛkɛtɩ-ɩ ɖɔɖɔ ɛzɩma KƖPAƔLƲ lɩzɩ ɛ-samaɣ kʋñɔmɩŋ tɩŋa taa yɔ, nʋmɔʋ taa yɔ. 9 Peeye, Yetiroo taa labɩ leleŋ nɛ kɩbandʋ ndʋ KƖPAƔLƲ labɩ Izirɛɛlɩ ñɩma yɔ, nɛ ɛlɩzɩ-wɛ Ejipiti ñɩma nesi taa yɔ, tɩ-tɩŋa tɩ-yɔɔ 10 nɛ ɛtɔ se, pʋwɛɛ se pɛsɛɛ KƖPAƔLƲ weyi ɛlɩ-wɛ Farawɔɔ nɛ Ejipiti ñɩma, pe-nesi taa yɔ b. 11 Se, lɛɛlɛɛyɔ lɛ, ɛnʋ tɛzɩ naʋ se KƖPAƔLƲ kɩlɩ agɔlɩma tɩŋa payɩ. Se, eyebi nɛ pana-tʋ alɩwaatʋ ndʋ Ejipiti ñɩma nazaɣ Izirɛɛlɩ ñɩma yɔ.
12 Pʋwayɩ lɛ, Yetiroo láa KƖPAƔLƲ kɩlaʋ ŋgʋ pɔhɔkɩ nɛ pɩñaɣ yɔ nɛ kʋɖʋm kpɛndʋʋ kɩlaŋ. Ɖɩnɛɛ, Aarɔɔnɩnɩnɩ nɛ Izirɛɛlɩ Sɔsaa powoba nɛ pa nɛ Mooyiizi yɩtɩ pɔtɔɔ kɔtaɣ taa tɔɔnaɣ.
Mooyiizi sɩʋ awiya se ahʋʋ tɔm yɔ
13 Kifema lɛ, Mooyiizi caɣ nɛ samaɣ taa mba mba poyowa yɔ, powolo ɛ-cɔlɔ nɛ ɛhʋʋ pɔ-tɔm. Ɖooo tanaŋ halɩ ɖanaɣ ɖanɩ, ɛyaa kaɖaŋaa se pɩtalɩnɩ-wɛ nɛ papɩzɩ powolo ɛ-ɛsɩndaa. 14 Ɛ-yɩtɩ na ɛzɩma tʋmɩyɛ kɩlɩ-ɩ yɔ lɛ, ɛpɔzɩ-ɩ se, pɩlabɩ ɛzɩma nɛ ɛlakɩ mbʋ? Se, ɛbɛ yɔɔ ɛlakɩ tʋmɩyɛ nɖɩ́ e-ɖeke nɛ eyeki ɛyaa sɩŋɩɣ ɛ-cɔlɔ ɖooo tanaŋ nɛ kʋ-ñʋʋ halɩ ɖanaɣ nɛ kaɖanʋʋ se papɩzɩʒ powolo ɛ-ɛsɩndaa nɛ pɩnɩɣ-wɛ? 15 Mooyiizi cosi-i se, pʋwɛɛ se powolo ɛnʋ cɔlɔ nɛ panɩɩ ndʋ Ɛsɔ heyiɣ-wɛ nɛ ɛnʋ nɔɔ yɔ. 16 Se, tɔm natʋyʋ ɛwɛ pɛ-hɛkʋ taa se pɔñɔɔzɩ-tʋ yɔ, powoki nɛ pana-ɩ. Se, ɛnʋ ñɔɔzʋʋ tɔm ndʋ tuyozuu-wɛ yɔ, nɛ ɛnʋ wɩlɩ-wɛ Ɛsɔ paɣtʋ nɛ ndʋ ndʋ ɛ́lɛ́ ɖʋwa yɔ.
17 Ɖɩnɛɛ ɛ-yɩtɩ cosi-i se, pɩfɛyɩ camɩyɛ se ɛhʋʋ tɔm ɛzɩ ɛhʋʋ yɔ. 18 Se, ɛ nɛ samaɣ ŋga kowoki ɛ-cɔlɔ yɔ, pakʋʋ pa-tɩ kʋkʋʋ. Se, tʋmɩyɛ nɖɩ ɖɩpaɣlɩ pɩtɩɩfɛyɩ, ɛɛpɩzɩɣ nɛ ɛlabɩ-ɖɩ́ ɛ-ɖeke! 19 Se, ewelesi ɖeu ndʋ ɛnʋ heyiɣ-i yɔ nɛ Ɛsɔ ɛwɛɛ ɛ-cɔlɔ. Se, ɛ-tʋmɩyɛ lɛ se, ɛcaɣ samaɣ lone taa Ɛsɔ ɛsɩndaa nɛ ɛkpaɣ samaɣ kʋñɔmɩŋ ɛɖʋ ɛ́lɛ́ ɛsindaa. 20 Se, ɖɔɖɔ lɛ, pʋwɛɛ se ɛwilɩ ɛyaa Ɛsɔ paɣtʋ nɛ ndʋ ndʋ ɛ́lɛ́ ɖʋwa yɔ. Se, pʋwɛɛ se ɛwɩlɩ-wɛ ɛzɩma mbʋ pɔɖɔ yɔ, nɛ mbʋ pʋmʋnaa se pala yɔ. 21 Se, pɩkazɩ mbʋ yɔ, ɛlɩzɩ samaɣ taa ɛyaa mba pɛwɛ yuŋ nɛ pañaŋ Ɛsɔ yɔ, ɛyaa mba pɔsɔɔlɩ toovenim nɛ paapɩzɩɣ paya pa-maɣzɩm yɔ. Se, ɛsɩɩ-wɛ ɛyaa kutoku (1000) yaa mɩnʋʋ (100) yaa nɩɩnʋwa (50) yaa hiu (10), pa-ñʋndɩnaa c . 22 Se, mba pɩwɛnɩ se paa efemiye nɖɩ lɛ, pacaɣ pahʋʋ samaɣ tɔm, nɛ powokini-i tɔm ndʋ tikili ɖoŋ yɔ. Se, tɔm ndʋ tɩfɛyɩ ɖoŋ yɔ, pa-maɣmaɣ pɔñɔɔzɩ-tʋ. Se, pʋbʋ, ɛ-tʋmɩyɛ pasɩɣ, mbʋ pʋyɔɔ yɔ, pa nɛ ɩ pakaɣnɩ tʋmɩyɛ labʋ. 23 Se, ye ɛlabɩ mbʋʋ na yɔ nɛ pɩkɛ toovenim mbʋ Ɛsɔ pɔzʋʋ-ɩ yɔ yɔ, ɖɩnɛɛ lɛ, pɩɩtasɩ-ɩ nɩʋ. Ɖɔɖɔ lɛ, ɛyaa tɩŋa kaɣ pɩsʋʋ d pɛ-tɛ nɛ laŋhɛzɩyɛ. 24 Mooyiizi nɩ mbʋ lɛ, ɛɖɔ lɔŋ weyi ɛ-yɩtɩ sɔzɩ-ɩ yɔ ɛ-yɔɔ. 25 Ɛlɩzɩ Izirɛɛlɩ ñɩma taa ɛyaa mba pɛwɛ yuŋ yɔ nɛ ɛsɩɩ-wɛ samaɣ ñʋndɩnaa, ɛyaa kutoku (1000) yaa mɩnʋʋ (100) yaa nɩɩnʋwa (50) yaa hiu (10) yɔɔ. 26 Ñʋndɩnaa mba, pɩɩwɛɛ se paa efemiye nɖɩ lɛ, pacakɩ nɛ pahʋʋ samaɣ tɔm. Powokinaɣ tɔm ndʋ tɩkɩlɩ ɖoŋ yɔ, piyele nɛ pa-maɣmaɣ pahʋʋ ndʋ tɩfɛyɩ ɖoŋ yɔ.
27 Pʋwayɩ lɛ, Mooyiizi yele ɛ-yɩtɩ nɛ ɛ́lɛ́ pɩsɩ ekpe ɛ-ɛjaɖɛ taa.