17
Ɛsɔ kʋʋ ɛ-samaɣ lɔkɔtʋ Maasa nɛ Meeriiba pɛ-tɛtʋ taa yɔ
1 Pʋwayɩ lɛ, Izirɛɛlɩ ñɩma samaɣ tɩŋa kʋyɩ Siini lakʋ taa nɛ pɔɖɔmnɩ caɣʋ caɣʋ ɛzɩ KƖPAƔLƲ ɖʋʋ yɔ nɛ kowolo patalɩ Refiidim a tɛtʋ taa. Patalɩ peeye lɛ, pesiɣ pa-ɖikpeɣliye, ɛlɛ lɩm fɛyɩ se pɔñɔɔ. 2 Ɖɩnɛɛ, Izirɛɛlɩ ñɩma ca Mooyiizi tɔm. Pɔpɔzɩ-ɩ se, ɛcɛlɩ-wɛ lɩm nɛ pɔñɔɔ. Pɔpɔzɩ Mooyiizi mbʋ lɛ, ecosi-wɛ se, pɩlabɩ ɛzɩma nɛ pacaɣ ɛnʋʋ tɔm? Se, pɩlabɩ ɛzɩma nɛ patakɩɣ KƖPAƔLƲ? 3 Lɔkɔtʋ ɖɛ samaɣ lɛ, kakaɖɩnɩ Mooyiizi nɛ kɔtɔŋ se, ɛbɛ yɔɔ ɛlɩzɩ-kɛ Ejipiti ɛjaɖɛ taa? Se, ewoni-wɛ peeye se ɛkʋ pa nɛ pe-piya nɛ po-wondu lɔkɔtɔ naa we? 4 Peeye, Mooyiizi wini KƖPAƔLƲ se, ɛ́lɛ ewolo nɛ ɛsɩnɩ-ɩ. Ɛpɔzɩ-ɩ se, ɛbɛ ɛnʋ lakɩ samaɣ ŋga? Se, pɩkazɩ pazɩ yem, kayakɩ ɛnʋʋ pɛ. 5 Ɖɩnɛɛ, KƖPAƔLƲ heyi Mooyiizi se, ɛlɩzɩ sɔsaa nabɛyɛ Izirɛɛlɩ ñɩma taa nɛ ɛ nɛ wɛ pɛɖɛɛ samaɣ ɛsɩndaa. Se, ɛɖɔkɩ e-nesi taa ɖaʋ ŋgʋ ɛɛmabɩnɩ Niili pɔɔ taa lɩm yɔɔ yɔ. 6 Se, ɛnʋʋ KƖPAƔLƲ, ɛsɩŋɩɣ ɛ-ɛsɩndaa Horɛɛbɩ pʋʋ taa, ɛwaɣ nakɛyɛ yɔɔ. Se, ɛ́ma ɛwaɣ ŋga kɔ-yɔɔ nɛ lɩm lɩɩ nɛ samaɣ ñɔɔ. Mbʋʋ la ɛzɩ paɣtʋ ndʋ tɩpɔzʋ yɔ, Izirɛɛlɩ ñɩma sɔsaa ɛsɩndaa.
7 Pʋ-yɔɔ, paya peeye se, Maasa nɛ Meeriiba, pʋ-tɔbʋʋ lɛ se, takʋʋ nɛ tɔm caʋ. Toovenim lɛ, peeye Izirɛɛlɩ ñɩma ca Mooyiizi tɔm nɛ patakɩ KƖPAƔLƲ. Pɔpɔzaɣ pa-tɩ se, KƖPAƔLƲ wɛ pɔ-cɔlɔ yaa ɛfɛyɩ?
Amalɛɛkɩ ñɩma kʋyʋ Izirɛɛlɩ ñɩma yɔɔ yɔ
8 Pʋwayɩ lɛ, Amalɛɛkɩ ñɩma b wolo pakʋyɩ Izirɛɛlɩ ñɩma yɔɔ Refiidim tɛtʋ taa.***voir Juges 3.13 9 Ɖɩnɛɛ, Mooyiizi heyi Yoosuwee se, ɛtɔɔzɩ you laɖaa kɩbama nɛ powolo pakʋyɩ Amalɛɛkɩ ñɩma yɔɔ. Se, kifeŋ lɛ, ɛnʋ ɖɔkʋʋ Ɛsɔ ɖaʋ e-nesi taa nɛ ɛnʋ sɩŋ piyaɣ ñʋʋ taa. 10 Mbʋʋ, Yoosuwee wobi ɛkʋyɩ Amalɛɛkɩ ñɩma yɔɔ ɛzɩ Mooyiizi keheyuu-ɩ, piyele Mooyiizi nɛ Aarɔɔnɩnɩnɩ nɛ Huuri, ñakpa pasɩŋ piyaɣ ñʋʋ taa. 11 Alɩwaatʋ ndʋ Mooyiizi kpazɩɣ e-nesi ɛsɔdaa lɛ, Izirɛɛlɩ ñɩma wakɩna. Ɛkɔŋ nɛ etisi e-nesi lɛ, Amalɛɛkɩ ñɩma wakɩna. 12 Pɩkɔm pɩnɩɩ Mooyiizi nɛ e-nesi nzɩ sɩ-naalɛ sɩla yuŋ lɛ, Aarɔɔnɩnɩnɩ nɛ Huuri pakpaɣ pɩyɛ naɖɩyɛ pasɩɩ Mooyiizi cɔlɔ nɛ ɛ́lɛ caɣ ɖɩ-yɔɔ. Ɖɩnɛɛ, Aarɔɔnɩnɩnɩ nɛ Huuri pasɩŋ lɛlʋ Mooyiizi nɩwaŋ yɔɔ nɛ lɛlʋ ɛ-nnɩmɩyɛ yɔɔ, nɛ patɩlɩ e-nesi nzɩ sɩ-naalɛ nɛ sɩsɩŋnɩ ɛsɔ pɩkɔɔ pɩtalɩ wɩsɩ ɖʋʋ. 13 Pɩlabɩ mbʋ lɛ, Yoosuwee wa Amalɛɛkɩ ñɩma cáɣ́ cáɣ́.
14 Pʋwayɩ lɛ, KƖPAƔLƲ heyi Mooyiizi se, ɛ́ma-tʋ takayaɣ taa, pɩtaakɔɔ nɛ pɔsɔɔ tɩ-yɔɔ. Se, eheyi Yoosuwee se, ɛnʋ kʋʋ Amalɛɛkɩ ñɩma tɩŋa cáɣ́ cáɣ́, nɔɔyʋ ɛɛkaɣ pɔ-yɔɔ tɔzʋʋ tɛtʋ yɔɔc . 15 Pʋwayɩ kɛ, Mooyiizi ma kɩlaʋ ɖɩlayɛ naɖɩyɛ nɛ ɛha-ɖɩ hɩɖɛ se, KƖPAƔLƲ lɛ ɛnʋ wabʋtʋ. 16 Peeye, ɛkaɖɩ kpayɩ se, ɖenɖe ɛzɩ Amalɛɛkɩ ñɩma kpazɩ nesi KƖPAƔLƲ kpelaɣ yɔɔ yɔ, KƖPAƔLƲ kaɣ pɔ-yɔɔ kʋyʋʋ paa ɛzɩma taa.