6
1 Mooyiizi yɔɔdɩ ḿbʋ́ lɛ, KƖPAƔLƲ cosi-i nɛ eheyi-i se, lɛɛlɛɛyɔ ɛkaɣ naʋ ḿbʋ́ ɛnʋ́ lakɩ Farawɔɔ yɔ. Se, ɖoŋ ɛnʋ́ cɛyɩɣnɩ-ɩ nɛ eyele Izirɛɛlɩ ñɩma nɛ pɛɖɛɛ. Se, halɩ ɛɖɔɔnʋʋ-wɛ kɩɖɔɔnʋʋ se pálɩ́ɩ́ ɛ-ɛjaɖɛ taa.
Ɛsɔ heyuu Mooyiizi se eholuu Izirɛɛlɩ ñɩma yɔ
2 Pʋwayɩ lɛ, Ɛsɔ tasɩ Mooyiizi heyuu se, ɛnʋ́ʋ́ lɛ KƖPAƔLƲ. 3 Se, halɩ ɛnʋ́ kaatɛm ɛnʋ́-tɩ lɩzʋʋ nɛ ɛwɩlɩ Abɩraham nɛ Izaakɩ nɛ Yaakɔɔbʋ se ɛnʋ́ʋ́ lɛ, Ɛsɔ Ɖoŋ Tɩŋa Tʋ. Ɛlɛ, patatɩlɩ se, ɛnʋ́ʋ́ lɛ, KƖPAƔLƲ. 4 Se, ɛnʋ́ ɖʋ ɛnʋ́ nɔɔ-haʋ ɛ nɛ wɛ pɛ-hɛkʋ taa. Se, ɛnʋ́ ɖʋwa se ɛnʋ́ haɣ-wɛ Kanaanɩ ɛjaɖɛ nɖɩ ɖɩ-taa paacaɣ caɣyɩtʋ yɔ se ɖɩkɛ pa-ñɩnɖɛ. 5 Se, lɛɛlɛɛyɔ ɛnʋ́ na yomiye nɖi Ejipiti ñɩma ɖʋ Izirɛɛlɩ ñɩma nɛ paba wii yɔ. Se, ɛnʋ́ tɔzɩ ɛnʋ́ nɔɔ-haʋ ḿbʋ́ pʋwɛ ɛnʋ́ nɛ wɛ pɛ-hɛkʋ taa yɔ. 6 Se, pʋ-yɔɔ ɛnʋ́ pɔzʋʋ-ɩ se eheyi-wɛ se, ɛnʋ́ʋ́ lɛ KƖPAƔLƲ! Se, ɛnʋ́ lɩwɩɣ-wɛ yomiye nɛ tʋma ɖoŋ ñɩna wena Ejipiti ñɩma wɛɛ paɖʋ-wɛ yɔ, a-taa. Se, ɛnʋ́u ɖoŋ sɔsɔŋ taa lɛ, ɛnʋ́ kaɣ Ejipiti ñɩma nɩŋgbaŋʋʋ hɔm ɛzɩ pʋpɔzʋ yɔ nɛ ɛnʋ́ lɩzɩ Izirɛɛlɩ ñɩma po-yomiye taa. 7 Se, ɛnʋ́ yeki nɛ pɛkɛ ɛ-samaɣ nɛ ɛnʋ́ kɛ pɛ-Ɛsɔ. Se, pakaɣ ɖiizinuu se, ɛnʋ́ KƖPAƔLƲ pɛ-Ɛsɔ, ɛlɩzɩɣnɩ-wɛ tʋma ɖoŋ ñɩna wena Ejipiti ñɩma ɖʋwaɣ-wɛ yɔ, a-taa. 8 Se, pɔwayɩ lɛ, ɛnʋ́ wokini-wɛ ɛjaɖɛ ńɖɩ ɛnʋ́ yɔɔdɩ kpayɩ se, ɛhaɣ-ɖɩ́ Abɩraham nɛ Izaakɩ nɛ Yaakɔɔbʋ yɔ. Se, ɛnʋ́ cɛlɩɣ-wɛ ɖɩ́ nɛ patɩɣyɩ-ɖɩ́. Se, ɛnʋ́ʋ́ KƖPAƔLƲ ɛyɔɔdɩnɩ ḿbʋ́. 9 Pɩlabɩ ḿbʋ́ lɛ, Mooyiizi kpaɣ tɔm ńdʋ́ nɛ ɛkɛdɩ-tʋ Izirɛɛlɩ ñɩma. Ɛlɛ, paba ñekizi tɔm ńdʋ́ʋ́ mʋʋ, ḿbʋ́ yʋyɔɔ yɔ, po-yomiye tʋma kɩlaɣ-wɛ nɩʋ pɩtɩɩfɛyɩ.
10 Pʋwayɩ lɛ, KƖPAƔLƲ tasɩ Mooyiizi yɔɔdɩnaʋ nɛ eheyi-i se, 11 ewolo Ejipiti wiyaʋ Farawɔɔ cɔlɔ nɛ eheyi-i se, eyele Izirɛɛlɩ ñɩma nɛ palɩɩ ɛ-ɛjaɖɛ taa. 12 Mooyiizi cosi KƖPAƔLƲ se, ɛnʋ́ weyi ɛɛsɩŋ yɔɔdʋʋ camɩyɛ yɔ, halɩ nɛ Izirɛɛlɩ ñɩma maɣmaɣ ñetitisi ɛ-tɔm yɔɔ, nɛ pɩcandɩnɩ Farawɔɔ? 13 Ɖɩnɛɛ yɔɔdɩnɩ Mooyiizi nɛ Aarɔɔnɩnɩnɩ nɛ eheyi-wɛ se, powolo pa-naalɛ nɛ pana Izirɛɛlɩ ñɩma nɛ Ejipiti wiyaʋ Farawɔɔ nɛ peheyi ɛ́lɛ́ se, pʋwɛɛ se eyele Izirɛɛlɩ ñɩma nɛ palɩ́ɩ́ Ejipiti ɛjaɖɛ taa.
Mooyiizi nɛ Aarɔɔnɩnɩnɩ pɔ-cɔzɔnaa hɩla tɔm
14 Izirɛɛlɩ ñɩma cɔzɔnaa mba pɛkɛ ɖɩsɩ ñʋndɩnaa yɔ, pa-hɩla yɔ.
Yaakɔɔbʋ pɩyalʋ kajalaɣ ñɩnʋ Ruubɛɛnɩ pɩyalaa yɔ, Hanɔɔkɩ nɛ Paaluu nɛ Hɛɛcɩrɔɔ nɛ Kaarɩmii. Ḿbáá lɛ Ruubɛɛnɩ cejewiye taa ɖɩsɩ taa ñɩma cɔzɔnaa.
15 Ruubɛɛnɩ wayɩ ñɩnʋ Siimeyɔɔ pɩyalaa yɔ: Yeemuwɛɛlɩ nɛ Yaamiini nɛ Ohaadɩ nɛ Yaakiini nɛ Cohaarɩ nɛ Sawuuli. Ḿbáá lɛ Siimeyɔɔ cejewiye taa ɖɩsɩ taa ñɩma cɔzɔnaa.
16 Siimeyɔɔ wayɩ ñɩnʋ Leevii pɩyalaa hɩla yɔ ɛzɩ palʋlʋ-wɛ yɔ: Gɛɛrɩsɔɔnɩ nɛ Kehaatɩ nɛ Meraarɩ. Leevii caɣ wezuu pɩnsɩ mɩnʋʋ nɛ niidozo nɛ lʋbɛ.
17 Gɛɛrɩsɔɔnɩ pɩyalaa hɩla yɔ: Livinii nɛ Cimeyii. Ḿbáá lɛ, pa-ɖɩsɩ taa ñɩma cɔzɔnaa. 18 Kehaatɩ pɩyalaa yɔ: Amɩram nɛ Yicihaarɩ nɛ Hɛbɩrɔɔnɩ nɛ Uziyɛɛlɩ. Kehaatɩ caɣ wezuu pɩnsɩ mɩnʋʋ nɛ niidozo nɛ naadozo. 19 Pɩkazɩ Meraarɩ pɩyalaa yɔ: Mahɩlii nɛ Muusii. Ḿbáá lɛ Leevii cejewiye taa ɖɩsɩ taa ñɩma cɔzɔnaa, paya pa-hɩla nɛ pamaɣzɩnɩ pe-wezuu caɣʋ alɩwaatʋ.
20 Amɩram kpaɣ e-neŋ Yɔkɛvɛɛdɩ nɛ ɛ́lɛ́ ñalʋlɩ-ɩ abalɩbiyaa naalɛ Aarɔɔnɩnɩnɩ nɛ Mooyiizi. Amɩram caɣʋ wezuu yɔ, pɩkpɛndɩ pɩnsɩ mɩnʋʋ nɛ niidozo nɛ lʋbɛ.
21 Isaakaarɩ pɩyalaa hɩla yɔ: Koree nɛ Nɛfɛɛgɩ nɛ Ziikii. 22 Pɩkazɩ Uziyɛɛlɩ pɩyalaa hɩla yɔ: Misayɛɛlɩ nɛ Elisaafaani nɛ Sitiirii.
23 Aarɔɔnɩnɩnɩ ɛ́lɛ́ ñakpaɣ abalʋ weyi payaɣ se Nacooni yɔ e-neu Elizaabɛɛtɩ nɛ ɛ́lɛ́ lʋlɩ-ɩ abalibiyaa naanza. Paba yɔ: Naadaabɩ nɛ Abiihuu nɛ Elaazaarɩ nɛ Itaamaarɩ. Elizaabɛɛtɩ kɛ abalu weyi payaɣ se Aminaadaabɩ yɔ, ɛ-pɛlɛ.
24 Koree pɩyalaa hɩla yɔ: Asiiri nɛ Ɛlɩkaanaa nɛ Abiyaasaafɩ. Ḿbáá lɛ, Koree cejewiye taa ɖɩsɩ taa ñɩma cɔzɔnaa.
25 Aarɔɔnɩnɩnɩ pɩyalʋ Eleyaazaarɩ kpaɣ abalʋ weyi payaɣ se Putiyɛɛɩ yɔ, ɛ-pɛlɛ nɔɔyʋ nɛ ɛ́lɛ́ lʋlɩ-ɩ Pinihaasɩ.
Ḿbá paya pa-hɩla lɛɛlɛɛyɔ yɔ, ḿbáá lɛ Leevii cejewe taa ɖɩsɩ taa ñɩma cɔzɔnaa.
26 Aarɔɔnɩnɩnɩ nɛ Mooyiizi KƖPAƔLƲ tɔma se, peyele nɛ Izirɛɛlɩ ñɩma lɩɩ nɔɔ kʋɖʋmaɣ Ejipiti ɛjaɖɛ taa. 27 Ḿbá pɔyɔɔdɩnɩnɩ Farawɔɔ, ɛjipiti wiyaʋ nɛ peheyi-i se, eyele Izirɛɛlɩ ñɩma lɩɩ ɛ-ɛjaɖɛ taa nɛ pɛɖɛɛ.
Ɛsɔ tasʋʋ Mooyiizi heyuu se, eholuu Izirɛɛlɩ ñɩma yɔ