Yohanes ni surat kedua
Salam
1 Ye surat nof yakw ma kweluk mangnrur gereja. Yakw kurengi surat ye ber batmakenea ma Ratu nfil ko, ma angkamar ma kwamis a kmi. To lan yakw ma kwamis a kmi nempa tomwatar monuk ma rafai Ratu Ni anftutw botunar a ne rkamis kmi a nbal. 2 Ma kam mkamis a kmi fali tamkoran ma talele anftutw botunar a ne na dalminrar, ma keta talele anftutwar a ne titerik ma dedesar. 3 Ma ktwak ma weni Amninrar Ratu ma Anaky Yesus ninr Ray Silai ne rfatutu Nir dalam ngamone ma nir lolompang, ma weni ral a nbal maline ber kit monuk. Ma ktwak sir ma rose farane ber kit ma tmorip a tlarat anftutw botunar ma takamis kit.
Ka tlarat Ratu Ni anftutw botunar ma takamis kit
4 Yak kswenang resi fali kdwengar feti angkamar ketnir rmorip a rlarat anftutw botunar, farlan safe ma Amninrar Ratu nal ber kit. 5 Ma lere ye yak ktwak kof batmakene ko nema kit monuk takamis kit. Safe ma kfwalak ye to faret beberyar sa, nempa klwarat farete ma Ratu nal ber kit nof luryain a ne. 6 Farlan kit tfalak feti tkamis Ratu iane feti ka kit tmorip a tlarat Ratu Ni faretar. Ma Ratu Ni farete ne feti ka tmorip e takamis kit. Ma farete ne kmi mdyengar noak ma betno milele Yesus.
7 Yak kfwalak farane fali tomwat lepuskwar yadin rbotin lo, ma ramin monuk saryamprene. Sir a ne ma raftutu feti Yesus ninr Ray Silai to lain sa ma nma saryamprene ye neluk tomwate. Tomwatar ma farane tomwat lepuskwar ma rbangal Yesus ninr Ray Silai. 8 Mpa ka mijake kmi myof tomwatar a ne ma kete rfule kmi, nema safe ma kam mose ne to nti letkyape. Farlan kmi myose farane keta myonri monuk sewe ma Ratu nyoding ber a kmi. 9 Tomwate ma to nlarat Yesus ninr Ray Silai Ni anftutwar, ma nlarat anftutw walyetar, i to nmorip dalam lese nor Ratu. Nempa tomwate ma nlarat dedesar Yesus Ni anftutwar a ne, i nmorip dalam lese nor Amninrar Ratu ma Anaky. 10 Mpa farlan tomwatar sa nma ma naftutu anftutwar ma to nlarat Yesus ninr Ray Silai Ni anftutwar, ka kete mlyangun i a na mir das ma kete lirmir i desar. 11 Fali ise ma nlangun i ma lirin i, iane feti norang i na kabain yatkar ma nose ne.
Penutup
12 Ni botuan e lolone ngriar yadin ma kufbotin ber a kmi, nempa ni ngafele e to kurengi na surat ye dalam. Ma yakw kulele feti bise ma kutungan desar kor a kmi, ma taktem a tatanuk nema dalminrar rsenang resi.
13 Batmaken, waim angkir ma Ratu nfil sir a na ye, rkirim salam ber a kmi a nbal. Nater lan ye. Salam nof yakw Yohanes. b