1 Yohanes i

Yohanes ni surat luryain

Ngribatin luryanir

Yohanes ye Yesus Ni mangsidkwar sa. I narengi ni surat luryain ye na kote Efesus ber soranyar ma ralele Yesus.

Yohanes narengi surat ye nema: 1. Nafkoran soranyar ma ka rmorip e dalmir lese ror Ratu ma Anak Yesus ninr Ray Silai. 2. Kete rlarat anftutw lepuskwar ma nwayat ma to ralele Ratu ma Anak Yesus ninr Ray Silai.

Noak a ne tomwatar ketnir raftutu anftutw lepuskwar ber soranyar a ne. Tomwatar a ne luryain e reluk soranyar a na Efesus, nempa to ralele botuan Yesus mpa rti a rtate soranyar, ma rbangal Yesus ninr Ray Silai. (1 Yohanes 2:19). Sir rlepusuk tomwatar ma ralele Yesus ror nir anftutw lepuskwar a ne (1 Yohanes 2:26).

Tomwatar a ne rfalak feti Yesus to nma saryamprene ye neluk tomwate. Nempa Yohanes nbangal sir ma nfalak, ise ma naftutu anftutwar farane, iane feti nbangal Yesus. Ma nir anftutwar a ne to nof Ratu Smwangtany nempa nof smwangat yatkar nir ulun smwangtany ( 1 Yohanes 4:2-3, 6). Yohanes nfalak a nbal feti koko sir a rsalan Yesus, ma romat desar I (1 Yohanes 1:1-4). Ma noak ma neluk tomwate na saryamprene, I daran a ntarbuy na katutun sangwalu la ntebus tomwatar nir salar (1 Yohanes 5:6).

Ma ketnir a rfalak a nbal feti boloka tomwatar rose sale keta smwangtir to rmat, mpa bise motak ma rose sale. Ne Yohanes nbangal sir ma nfalak, tomwatar ma rfalak feti dalmir lese ror Ratu nempa dedesar ma rose sale, iane rlepusuk ma to rlarat Ratu Ni anftutw botunar (1 Yohanes 1:6). Sir ka rmorip e rbalak Yesus ninr Ray Silai ma to Ni sal (1 Yohanes 2:5-6; 3:3). Ma ketnir a nbal e raftutu feti Yesus ne to Ratu I, ma tomwat biase motak. Nempa Yohanes nfalak a nbal, tomwatar ma rfalak feti Yesus ye to neluk Ray Mangtebus ma Ratu nfil I, sir a ne rlepusuk. Noak ma saryamprene to namin a fuky e, Yesus ye namin lo ma nor Amninrar Ratu (1 Yohanes 1:1; Yohanes 1:1).

Surat isin farye:

1:1-4 Ratu Ni ngribatnir ma nal momorip ber kit

1:5-10 Ratu neluk ngaodir ber kit

2:1-6 Yesus ninr Ray Silai neluk lenre ma nafdiat kit a na Ratu sounlury

2:7-14 Farlan tmorip a na ngaodir dalam ka takamis kit

2:15-17 Ka kete mkyamis kabain saryamprenar

2:18-27 Tomwat sa ma nbangal Yesus ninr Ray Silai

2:28-3:10 Kit teluk Ratu Angkir

3:11-18 Tomwatar ma ralele Yesus ka rakamis sir

3:19-24 Ka tbali Ratu tor dalminrar lelerap

4:1-6 Ratu Smwangtany ma tomwate ma nbangal Ratu Smwangtany

4:7-21 Ratu nose ma tmorip e, takamis kit

5:1-5 Ise ma nalele Yesus bise ma nafufu kabain saryamprenar

5:6-12 Ngriar tel ye ma rfatutu feti Yesus ye Ratu Anaky

5:13-21 Kit tonri momorip dedesar fali dalminrar lese tor Ratu