Paulus ni surat ber Titus
Salam
1 Ye surat nof yakw Paulus ber Titus ko. Yakw ye Ratu Ni mangkaryae ma Yesus ninr Ray Silai Ni mangsiduk. Ratu nfil yakw ma ktwulung tomwatar ma nfil sir a ne, nema rtafal ma ralele Yesus. Ma kuftutu sir ma rkaul ral anftutw botunar nof Ratu nema rmorip a rlarat Ni mpempeang. 2 Ma nof anftutw botunar a ne sir bise ma ralele feti keta rmorip dedesar ror Ratu. Fali Ratu nyoding momorip dedesar a ne lo noak ma to nose saryamprene fuky ma keta nafdiat desar safe ma nyoding a ne. 3 Ma lere ye ni tewat ma I ntetak lo ma nafbotin Ni snyurat a ne. Ma Ratu ma nfair kit a ne nalele yakw ma kufwibar ibar a ne.
4 Titus, yakw kal ko fen anakw, fali ko mulele Yesus ninr Ray Silay feleles farlan yakw. Yak ktwak ma weni Amninrar Ratu ma Yesus ninr Ray Silay ma nfair kita a ne rfatutu nir dalam ngamone ma nir lolompang, ma ral maline ber ko.
Titus ni karyayar na yampren Kreta
5 Titus, yakw ktwi a ktwate ko na yampren Kreta nema bise msworu karyayar ma to omp a fuky. Ma mfwil mangnrur gerejar a nbal na kotar mpane ma tomwatar ma ralele Yesus ramin, far ma kfwalak ber ko ye: 6 Farlan mfwil tomwate ma neluk mangnrur gereja, ka ni momorip nanglerap, ma sawan bate lan lese. Ma angkir e ka ralele Yesus ninr Ray Silai nema tomwatar kete rfalak sir feti kanak ulw makornar ma rpeang lan ma rbangal enir amnir. 7 Mangnrur gereja ye tomwate ma nurus Ratu Ni karyayar mpa tomwate ne ka to ni sal, to nafdas i, to nares rut, to manganabuk i, to npeang ma nkafre ma to nmate doit. 8 Ma ka nsenang ma nlangun tomwatar na ni das, npeang ma nose kabain ngamonar, bise ma ntayan ni makeus, ka dalam a nlerap ma namlonry a na safe kabain, ma nose kabanir nlarat Ratu Ni mpempeang. 9 Ka dedesar ma nlarat anftutw botunar ma taftutu ber i a ne. Nema boan nal ma nsurat tomwatar nlarat anftutw botunar a ne, ma bise ma nfatutu tomwatar ma rbangal anftutwar a ne nir salar.
10 Yak kfwalak farane fali tomwatar yadin rof soranyar to rpeang ma rlarat anftutw botunar a ne. Sir a ne ma biase rfalak kabanir ma to ubnir ma rfule tomwatar. Nlengan a nbal e sir ma luryain e rpafe agame Yahudi. 11 Tomwatar ma farane ka tsingat babnir. Fali rti mpane dasar ma rfule tomwatar ma ramin a ne ror nir anftutw lepuskwar nwayat ma dasdalmir yadin ratliur Yesus ninr Ray Silai, ma sir ronri doit rof nir lepuskwar a ne. 12 Luryain e tomwat Kretar nir mangafayar sa nfalak farye, “Tomwat Kretar kit ye biase tlepusuk rut, ma ninr momorip farlan binatang mangaresar, ma rkampres, ma rsisrat.” 13 Safe ma nabi nfalak ne diat, mpa ka mdotar sir nema dedesar ma rlarat anftutw botunar a ne. 14 Ma kete rlarat Yahudyar nir ansaur lepuskwar ma yayatrwar nof tomwatar ma rbangal Ratu Ni anftutw botunar a ne. 15 Tomwatar ma ralele Yesus e dalmir a rlerap ma to ramoli sasaf, sir bise ma rane safe safe motak. Nempa tomwatar ma to ralele Yesus e dalmir rarai, ma to bise ma rose sasaf ma raflerap dalmir fali nir andanwar ma dalmir a ne rfen ber kabain yatkar lo. 16 Sir rfalak feti rafai Ratu, nempa nir adat nfatutu feti ramsoal I. Ratu namkini sir fali nir adat ne. Sir to rpeang ma rlarat Ratu ma to bise ma rose kabain ngamonar.