Tomwatar nir wewelmpampane na ler famudi
1 Timoteus, ka munremi feti lere ye kit tdaf motak Yesus Ni nmamae lo mpa keta tomwatar na saryamprene ye rkoman suse yadin. 2 Tomwatar keta rdaun lan tenir ma rdaun lan doit. Sir ratanuk lan medasar ma rafdas sir ma rpeang ma tomwatar rdangin sir. Sir keta rarikan tomwatar, ma rbangal enir amnir. Sir to rafai rose terimakasih nbal ma to rfaduli Ratu. 3 Sir to rkamis tomwatar, to rpeang ma rangamon, to rpeang kabain ngamonar, rpeang ma rasompun, rpeang ma rlarat dedesar nir makeus, ma rpeang ma rsiksa tomwatar. 4 Sir rpeang ma raompar tbwarnir ber nir muswar, nir andaun mabue, ma rdaun feti lan sir ma rafai safe-safe monuk. Sir to rlarat Ratu Ni mpempeang, ma rlarat lan nir makeus. 5 Tomwatar rsalan e sir rngabo ma rsampayang, nempa ni botuan e to rlangun Ratu Smwangtany Ni kuase ma nkarya na nir momorip. Safo Ratu Smwangtany Ni kuase ne ma nafbeberi nir momorip. Ka kete mutbwarin mor tomwatar farane. 6 Ketnir rof sir a ne rti tomwatar nir dasar ma rfule bat modar nema rlarat sir. Batar ye nir salar yadin ma rpeang lan ma rlarat nir makeus. 7 Sir dedesar rtak tomwatar ma raftutu sir nempa sir to rkaul ral feti anftutw mpe ye ma botuan. 8 Tomwatar ma raftutu anftutw lepuskwar, sir a ne ma rbangal anftutw botunar. Sir rdaun lan kabain yatkar ma to ralele Ratu lo, farlan nof luryain Yanes ma Yambresa ma rbangal Musa. 9 Sir rose farane nempa keta to dodo, fali keta tomwatar monuk rafai nir mode ne, farlan ma luryain tomwatar rafai safe ma Yanes ma Yambres rose.
Paulus neluk contoh ber Timoteus
10 Nempa Timoteus ko, ko mufai monuk safe ma kuftutu ne, ma mufai ningw adat, ma kabanir monuk ma kpweang ma kose na ningw momorip. Ko mufai nbal feti kulele Yesus botuan, kswabar, kwamis tomwatar, ma boang nal ma kwoman suse. 11 Ma ko mufai nbal feti tomwatar rtean yakw, nwayat ma kwoman suse desar na kote Antiokhia, Ikonium, ma Listra. Boloka susar monuk ne diat yakw nempa ninr Mangnrure nfair yakw. 12 Botuan feti tomwatar ma ralele Yesus ninr Ray Silai ma rpeang ma rmorip rlarat Ratu Ni mpempeang keta tomwatar rsiksa sir. 13 Ma tomwat yatkar ma tomwat lepuskwar keta rtafal ma rayatak. Keta sir rfule tomwatar ma tomwatar keta rfule sir a nbal. 14 Nempa Timoteus ko, ka mlwarat dedesar safe ma mulele ma raftutu ber ko a ne, fali mufai desar sir ma raftutu ko a ne. 15 Ma ka munremi feti nof nim ngarufuky e mufai Kitap Lelerap lo. Nof Kitap Lelerap a ne ko mkwaul mal feti keta Ratu nfair kit tof ninr salar farlan talele Yesus ninr Ray Silai. 16 Ni botuan e Ratu nal andaun ngamone ber tomwatar ma bise ma rarengi safe-safe monuk na Kitap Lelerap dalam. Ngribatnir a ne la ntulung desar kit ma taftutu tomwatar, tsurat tomwat salar, tafbeberi nir adat, ma taftutu tomwatar nema rmorip a rlarat Ratu Ni mpempeang. 17 Mpe Ratu Ni ngribatnir a ne ma nose ma kit ma tkarya ber Ratu ye boninrar ral ma tose monuk kabain ngamonar.