Tomwatar ma ralele Yesus ninr Ray Silai ka rkoman suse silai
1 Mpa Timoteus ko ma kal ko fen anakw! Yesus ninr Ray Silai Ni dalam ngamone ber kit a mpa, ka weni nafkoran ko dedesar. 2 Ko mdwengar ma kuftutu na Yesus na tomwat ngayadin lo, mpa ka muftutu nbal anftutwar a ne ber tomwatar ma mulele sir. Ma sir a ne nbal ma ka rafai ma raftutu tomwat walyetar.
3 Ma ka boam mal ma mubare suse farlan yakw nema mweluk Yesus ninr Ray Silai Ni suldad ngamonar sa. 4 Tomwate ma neluk suldadu, i to bise ma nurus karya walyetar noak ma raprang fali npeang ma nafsenange ni komandan mpa ka nose nlarat ni faretar. 5 Ratu Ni mangkaryae farlan tomwate ma nose ma ntanding a nbal. Farlan i to nlarat pertandingan ne ni yayatrwar e keta to nal nomor. 6 Ratu ni mangkaryae farlan mangosboe nbal. Tomwate ma naosbo ka i nanak lete isin baluan fali nawar i ma nkaryae. 7 Mdwaun fengamone safe ma kfwalak ye, ma weni Ratu ntulung ko ma mkwaul mal ngriar monuk a ne.
8 Ma ka munremi: Yesus ninr Ray Silai ye ramtoranbabe I neluk rai Daud ni dasdalam, ma I nmat nempa Ratu nafmorip a nbali I nof mangmwatar. Ibar a ne ma kufwibar neluk Ibar ngamone. 9 Ma fali kufwibar Ibar Ngamone ne mpa tomwatar rtean yakw. Ma rkete yakw ror rewe farlan tomwat yatkar sa. Boloka rkete yakw na ye nempa to tomwate fen lese ma bise ma nose nteri Ratu Ni ngribatnir. 10 Iane nwayat ma kswabar motak ma kubare susar monuk ye nema bise ma ktwulung tomwatar ma Ratu nfil sir a ne. Ma sir bise ma ralele Yesus ninr Ray Silai nema I nfair sir rof nir salar ma rmorip dedesar ror Ratu. 11 Ngribatnir ye botuan desar:
Farlan tate ninr adat yatkar iane feleles farlan tmat tor Yesus ninr Ray Silai lo,
mpa la tmorip tor I a nbal.
12 Farlan tsabar ma tabare suse lere ye,
keta taktem Yesus tfarete saryamprene ni kateman.
Nempa farlan tamsoal I,
keta namsoal kit a nbal.
13 Boloka kit to tose tlarat safe ma I nfalak,
nempa I dedesar ma nose nlarat safe ma nfalak,
fali I to bise ma to nose safe ma nyoding a ne.
Ka mujake ko mof anftutw yatkar
14 Timoteus ka mswurat tomwatar ma ralele Yesus na iane ma ka ranremi ngriar monuk ma kfwalak ber ko a ne. Ma ka mfwalak ber sir farye, “Ratu nafai safe ma kit tose ne mpa yak ktwak desar ma kete mibangal kmi a na ngribatin isnir, fali ngriar a ne to ubnir sasaf, ma keta nose ma tomwatar ma rdengar a kmi a ne to ralele Yesus lo.” 15 Ka mkwarya ma mwat a mlwai desar nema Ratu nsenang nor ko. Ma ka mufwibar fen botuan anftutw botunar na Ratu nema kete mweat na safe ma mkwaryae ne. 16 Ka mlwiak ko mof tomwatar ma rfalak kabanir ma to uban ma to rafsenange Ratu dalamy, fali ngribatnir a ne rose lan ma tomwatar rtafal ma to rafai Ratu. 17 Nir ngribatnir a ne keta nsor na mpenempen farlan maninik mpaul diat tomwatar sa ma nsor tenany. Tomwatar ma rose farane sir a ne Himeneus ma Filetus. 18 Sir radu ye to rpan a rlarat anfutw botunar. Ma raftutu tomwatar feti nait ni tewat lo ma Ratu nafmorip a nbali tomwatar. Ma nir anftutwar a ne rose ma tomwatar ketnir to ralele Yesus lo.
19 Boloka farane Ratu Ni tomwatar a ne dedesar ma ralele I. Sir a ne farlan fanderen ma namkoran. Na fanderen a ne rarengi farye: “Ratu nafai Ni tomwatar” ma rarengi nbal, “Tomwatar ma rfalak feti nir Mangnrure ber Yesus ne, ka rtate nir adat yatkar.”
20 Contoh sa farye: Na das silayar sa e kabanir felnir mpane. Kabanir ketnir e rose rof mase ma perak, ma ketnir a nbal e rose rof katutun ma ompak. Sir keta rpaki kabanir ma rose rof mase ma perak la rlangun nir oly silayar, ma kabanir ma rose rof katutun ma ompak keta rpaki lerar. 21 Tomwate ma ntate ni adat yatkar, i farlan kabanir ma kotkir a ne. Fali keta ninr Mangnrure nfil a nkese i ma nose monuk karya ngamonar. 22 Mpa ka kete mlwarat tabweryar nir makeus. Ka mureke ma mworip mlwarat Ratu Ni mpempeang, ma mulele dedesar I. Ka mkwamis tomwatar, ma mworip fengamone mor tomwatar ma rsampayang ber Yesus ninr Mangnrure ror dalmir lelerap.
23 Ka mlwiak ko mof tomwat modar ma rabangal dedesar na kabanir ma to ubnir, fali ko mufai feti kabanir monuk a ne nose lan ma tomwatar rkafre. 24 Tomwate ma nkarya neluk mangkaryae ber ninr Mangnrure kete nkafre nempa ka nmarkein. Ka i nsabar, ma nafai ma naftutu tomwatar. 25 Tomwatar ma rpeang ma rabangal a ne ka naftutu sir e nmarkein. Ka weni Ratu nal lety ber sir ma rtate nir salar ma rlarat Ni anftutw botunar. 26 Mpe keta rfenai ma rbie rof smwangat yatak nir ulun ni kuase, ma keta to nfarete sir nlarat ni mpempeang lo.