Paulus a ka rtak soranyar na Tesalonika ma rsampayang ber sir
1 Wangur mir kateman, kam mtak a kmi ma msampayang dedesar ber kam, nema tomwatar na mpenempen weni rdengar ma rlangun Ibar Ngamone na Yesus ninr Mangnrure ye feleles farlan luryain ma kmi mlyangun a ne. 2 Msyampayang a nbal nema ninr Mangnrure najake kam nof tomwatar ma nir adat nayatak desar. Fali lan tomwatar ketnir ma ralele ibar na ninr Mangnrure ne.
3 Nempa ninr Mangnrure ne dedesar ma nafdiat safe ma nyoding ber kit a ne mpe keta nafkoran ma najake kmi nof kabain yatkar. 4 Ma kam malele desar feti ninr Mangnrure ne keta ntulung a kmi ma myose mlyarat safe ma kam mfalak a ne. Ma kam malele nbal feti keta dedesar ma myose mlyarat. 5 Kam mtak ninr Mangnrure ma nal andaun ngamone ber a kmi, nema ntafal ma mkyaul myal feti Ratu nkamis a kmi. Ma mtak a nbal nema boloka mkyoman suse nempa dedesar ma myose mlyarat Ratu Ni mpempeang farlan Yesus ninr Ray Silai.
Tomwatar monuk ka rkarya
6 Wangur mir kateman, Yesus ninr Ray Silai ne ntutu yakw ma kweluk mangnrure ber a kmi mpa kfwalak, kete mitbwarin myor soranyar ma rsisrat ma to rlarat safe ma maftutu ber kmi a ne. 7 Fali koko kmi a mifai feti ka myose mlyarat contoh ma kam mose ne lo, iane feti noak ma kam mor a kmi e to msisrat ma mkarya. 8 Farlan kam mtame e, kam mbayar tnyamar a ne fuky. Ma lere nronram e kam mkarya ma mat a mlai desar, nema kete mose suse kmi. 9 Ni botuan e kam mkarya ber Ratu mpa bise motak ma mtak safe ma kam mperlu mof a kmi nempa kam to mpeang ma mose farane nema bise ma kam meluk contoh ber a kmi. 10 Noak ma lolone mor a kmi e, kam dedesar ma mfalak yayatur ne ber a kmi feti, “Ise ma to nkarya, kete mfyane i.” 11 Kam mfalak farye fali kam mdengar feti tomwatar ketnir rof a kmi ye rsisrat, ma to rpeang ma rkarya. Ma rpeang lan ma rurus tomwat walyetar nir ngriar. 12 Nempa kit to tose farane fali dalminrar lese tor Yesus ninr Ray Silai lo mpa kam mfalak ber tomwatar ma farane, ma ka rngabo ma rkarya nema bise ma rmorip. 13 Ma wangur a kmi, kete mifelingat ma myose kabain ngamonar. 14 Ma ka mijake kmi myof tomwatar ma to rlarat safe ma mfalak na surat ye, ma kete mitbwarin myor i nema nmeat. 15 Nempa kete myose i far mir musu, ma ka msyurat i far wamir.
Salam
16 Lan Yesus ninr Mangnrure ma nal maline ber kit mpa kam mtak ma nal dedesar Ni maline ber a kmi na safe-safe monuk na mir momorip. Ma ka weni I nor kmi monuk. 17 Salam nof yakw Paulus. Surat mangtan tabun ye koko yakw ma kurengi neluk faniak feti surtar monuk ye nof yakwa. 18 Ma ka weni Yesus ninr Ray Silai nfatutu Ni dalam ngamone ber kmi monuk. Nater ye.