Tomwat yatkar sa ma nbangal desar Ratu
1 Wangur mir kateman, kam mpeang ma mfalyole ber a kmi feti keta Yesus ninr Ray Silai nma ma nafburat kit tor I. Ma kam mtak a kmi: 2 Farlan mdyengar ibar feti Yesus ninr Mangrure nma lo kete mimtaut ma dalmir suse. Ma kete milele sir boloka rfalak feti Ratu Smwangtany ma nafbotin ibar a ne ber tomwatar sa, nre rdengar ibar a ne rof tomwatar ketnir nir anftutwar, ma ketnir e rfalak a nbal feti kam ye ma marengi ibar a ne na surat ber a kmi. 3 Mpa ka mijake kmi nema tomwatar kete rma ma rfule kmi ror nir fafalkar a ne. Fali to ni tewat ma Yesus nma nbali saryamprene fuky e keta tomwatar yadin ratliur I ma rbangal I, ma keta tomwat sa ma nbangal desar Ratu, nbalun ma nfatutu i. Nempa keta nonri ni wayat na neraka. 4 Tomwate ne keta nafdas i ma nbangal kabanir monuk, ma ratwawatar ma tomwatar rsatngur ber sir a ne. Ma keta i namtoran Ratu Ni Das Silaia nbal ma nfalere feti Ratu i.
5 Minremi nre tate noak ma kor a kmi a na kote Tesalonika e kfwalak kabanir monuk ye ber a kmi lo. 6 Ma kmi mifai feti lere ye kabanir sa nose nteri tomwat yatak a ne, nwayat ma to nma fuky nempa keta ndaf ni tewat ma Ratu ntetak ber i betno nbotin. 7 Botuan feti smwangat yatkar nir ulun ntabw ma nkarya lo, nempa lolone nkarya namudim. Ma tomwat yatak ma nbangal Ratu ne to bise nbotin fali tomwatar sa nose nteri i. Nempa keta Ratu nalin tomwate ma nose nteri i a ne. 8 Na lere ne betno nafbotin i. Nempa noak ma Yesus ninr Mangnrure nma nbali saryamprene keta nafufu i desar terik ma to ni kuase sasaf ma keta natanukb motak e nmat desar.
9 Noak ma tomwate ma nbangal desar Ratu ne nma, keta nal smwangat yatkar nir ulun ni kuase ma nose fanikar ma kabain mpasalan la nfule tomwatar. 10 I keta nlepusuk ma nfule tomwatar ma ronri nir wayat na neraka ne, nor matan ribun. Sir rti neraka fali to rlangun ibar botuan na Yesus ninr Ray Silai feti Ratu keta nfair sir. 11 Fali to rlangun ibar botuan a ne mpa Ratu nsalan lonri motak ma tomwate ne nfule sir ma keta ralele ni lepuskwar a ne. 12 Ratu nose farane nema keta nukun tomwatar ma rpeang lan ma rose kabain yatkar ma to ralele ibar botuan na Yesus ninr Ray Silai ne.
Ratu nfil kmi nema nfair kmi
13 Soranyar mir kateman ma ninr Mangnrure nkamis a kmi! Kam dedesar ma mose alang ber Ratu, fali nof luryain e I nfil a kmi ma nfair a kmi nof mir salar. Ma I nfair a kmi nalyole Ni Smwangtany. Ni Smwangtany a ne nose ma dalmir a rlerap, ma nose nbal ma milele ibar botuan na Yesus ninr Ray Silai. 14 Fali Ratu npeang ma nfair a kmi mpa nose ma milele Ibar Ngamone ma kam mfalak ber a kmi a ne, nema nti a nti e mir momorip feleles farlan Yesus ninr Ray Silay.
15 Mpa ka dedesar ma milele, ma myose mlyarat anftutwar ma kam maftutu ne lo ma marengi na surtar ber a kmi ye.
16-17 Kam mtak Yesus ninr Ray Silai ma Amninrar Ratu, ma nafkoran dalmir nema bise ma myose kabain ngamonar ma mfyalak lan kabain ngamonar. Fali Ratu nkamis kit, ma dalam ngamone ber kit mpa dedesar nafsenange ma naftesi dalminrar, ma nose ma talele botuan safe ma I nyoding ber kit a ne.