Yesus ninr Ray Silai nalin kit nof tetetkar ma Ratu nal ber Musa
1 Wangur, Yesus ninr Ray Silai nalin kit nof tetetkar ma Ratu nal ber Musa ne. Mpa ka tajake dalminrar ma ramkoran ma kete tinrang tetetkar a ne rakawar a rbali kit.
2 Mdyengar fengamone safe ma kfwalak ye: farlan mpyeang lan ma rsunat a kmi nema Ratu nafdiat kmi, keta safe ma Yesus ninr Ray Silai nose ne to ubany ber a kmi. 3 Yak kfwalak a nbal ber a kmi, tomwate ma rsunat i a ne ka nose nlarat monuk tetetkar ma Ratu nal ber Musa. 4 Mpa kmi ma mireke ma Ratu nafdiat kmi myof ma mlyarat tetetkar a ne, ni botuan e kmi mikleti myof Yesus ninr Ray Silai ma keta mitliur Ratu Ni dalam ngamone. 5 Nempa kit ye, talele lan Yesus ninr Ray Silai fali Ratu Smwangtany nkarya na dalminrar mpa keta tdaf dedesar ma Ratu nafdiat kit na sounlury. 6 Ma dalminrar lese tor Yesus ninr Ray Silai lo, mpa boloka rsunat kit nre to rsunat kit e keta to ubany. Lan ye ma ubany iane feti talele Yesus ninr Ray Silai. Ma tomwatar bise ma rsalan feti talele Yesus nof ma takamis kit.
7 Luryain e kmi mngyabo desar ma mlyarat anftutw botunar. Ma mpear ma rfule kmi nwayat ma to mlyarat anftutw botunar lo? 8 Ni botuan e nir anftutwar a ne to nof Ratu ma nfil a kmi ma myeluk Ni tomwatar a ne. 9 Tomwatar rfalak feti ragi ma lan rufuky a ne bise nose ma adonan a nbar, mpa ka mijake kmi fali nir anftutwar a ne feleles farlan ragia. 10 Boloka farane yakw kulele feti kmi to mlyarat anftutwar ma to feleles nor safe ma kufwibar ber a kmi a ne fali kit monuk dalminrar lese tor Yesus ninr Mangnrure. Mpa ise motak ma rma ma rfule kmi nwayat ma to mifai feti anftutw mpeye ma botuan, keta Ratu nukun sir.
11 Soranyar, farlan yakw lolone kufwibar ma rsunat a kmi e, botuan feti keta tomwatar to rsiksa yakw. Ma farlan yakw lolone kufwibar farane, keta tomwatar to rbangal ningw anftutwar na Yesus ma nmat na katutun sangwalu ne. 12 Ni ngafele e tomwatar ma rfule ma rsunat a kmi a ne rfeal a rbali sir.
13 Soranyar, Ratu nfil a kmi ma nalin a kmi mbyie myof tetetkar ma Ratu nal ber Musa. Iane to feti kmi bise motak ma myose safe-safe mlyarat mir makeus. Nempa ka mikamis a kmi ma mitulung a kmi. 14 Fali tetekar monuk ma Ratu nal ber Musa ne ramin lan farete lese ye: “Ka mkyamis tomwatar monuk farlan ma mkyamis a mbyali kmi.” Mpa farlan myose farete ye, iane feti myose monuk faretar lo. 15 Nempa kete mkyafre dedesar farlan asu ma site, nema kete mifene kmi.
Kete myorip a mlyarat tomwatar nir makeus nempa ka mlyarat Ratu Smwangtany Ni mpempeang
16 Wangur, mdyengar ma kfwalak ye: ka myorip a mlyarat Ratu Smwangtany Ni mpempeang. Farlan myorip farane keta to myose kabain yatkar mlyarat mir makeus lo. 17 Fali tomwatar nir makeus dedesar ma to nordeng nor Ratu Smwangtany Ni mpempeang. Ngriar du ye to nordeng mpa farlan Ratu Smwangtany nrure kmi, keta to bise myose kabain yatkar mlyarat mir makeus. 18 Mpa farlan Ratu Smwangtany nrure kmi, keta to mpyerlu a mbyal ma myose mlyarat tetetkar ma Ratu nal ber Musa ne.
19 Kit bise ma tsalan tomwatar nir makeus yatkar nof safe ma sir rose. Contoh farye: ranronr, to rtayan ral nir makeus mpa raosangry bolar motak. 20 Rsampayang ber kabanir ma rdaun feti nir kuase, rasnyange, rakedan sir, rkafre, ramkeus tomwat walyetar nir kabanir, rares, rdaun lan tenir, raale sir mpa rakes e sir. 21 Sir dalmir maninik tomwatar, ranabuk, dedesar ma raosfesta, ma rose nir adat yatak walyetar a nbal. Luryain e yak kfwalak ber a kmi lo ma lere ye yak kfwalak a nbal: tomwatar ma nir adat farane keta to reluk Ratu Ni tomwatar noak ma I nfarete saryamprene ye. 22 Nempa tomwatar ma Ratu Smwangtany nrure sir keta rmorip e rakamis sir, rsenang resi, rmorip e rangamon motak, rsabar, rfatutu nir dalam ngamone, dedesar ma rtulung tomwatar, ma tomwatar bise ma ralele sir fali dedesar ma rose rlarat safe ma koko sir rfalak. 23 Sir rmakein, ma rtayan ral nir makeus. Farlan tmorip farane keta tomwatar to bise ma ral tetetak fen lese la rukun kit. 24 Tomwatar ma reluk Yesus ninr Ray Silai Ni tomwatar a ne, to rlarat nir makeus yatkar lo. Iane farlan rpaku nir adat yatkar monuk na katutun sangwalu. 25 Ma Ratu Smwangtany nal momorip beberi ber kit lo, mpa ka dedesar ma tmorip a tlarat Ratu Smwangtany Ni mpempeang. 26 Ma kete tafdas kit, kete tose ma tomwatar rkafre ma kete dalmir maninik tomwatar ma rlengan rof kit.