Kete tose tlarat tomwat Israelar nir langtwar
1 Wangur, kmi minremi nre tate, safe ma luryain e Ratu nose ber empninrar-nusninrar noak ma rlarat Musa na ain letkyape. Noak a ne Ratu nose mutan ma nteri sir. Ma sir bise ma ralyole tasik memeye terik ma rait monuk balisya ror ngamone. 2 Noak ma mutan nteri sir monuk ma ralyole tasik memeye ne iane farlan ma radiris sir ror mutan ma tasik. Ma iane nfatutu feti sir reluk Musa ni tomwatar lo. 3-4 Ma Ratu nal Ni kuase ma nose tnyame ma weye ber sir. Tnyamar ma sir rane ma weye ma renum a ne feleles. Weye ne nlale nof bat silayar sa. Ma bati ne nfatutu ninr Ray Silai ma nor dedesar sir. 5 Boloka Ratu nose kabain ngamonar ber sir nempa to npeang yadin nof sir a ne nir adat. Iane nwayat ma I nose ma sir rmat ma raluat a na mpenempen na ain letkyape ne.
6 Wangur, kabanir monuk ma diat tomwat Israelar a ne neluk contoh ber kit ma ka tanremi dedesar, nema kete tpeang ma tose kabain yatkar far ma rose luryain a ne. 7 Ma ka kete tbalak ketnir nof sir a ne ma rsampayang ber ratwawatar. Iane farlan ma rarengi na Kitap Lelerap dalam, “Tomwatar a ne raosfesta ma rtame-renum, ma rmenari ber ratwawatar.” 8 Ma ka kete tanronr tbalak ketnir nof sir a nbal. Sir rose farane nwayat ma na lere ne Ratu nukun tomwate ribun buty du resin tel ma rmat. 9 Ma ka kete tbalak ketnir nof sir a ne ma tateman Ray Silai. Sir rose farane nwayat ma kasi ntuky a nfen sir. 10 Ma ka kete nroke nraki kit ber Ratu tbalak ketnir nof sir a ne. Sir rose farane mpa Ratu nluan Ni malaekat ma non mamate ma nfen sir.
11 Ngriar monuk ma diat tomwat Israelar a ne neluk contoh ber kit ma kete tose tbalak sir. Ma rarengi ngriar monuk a ne nema ka tajake kit fali tmorip a na saryamprene ye ma to dodo a nbal e namsos. 12 Tomwate ma ndaun feti i namkoran ma nalele Yesus, ka najake i nema kete nfufw far sale dalam. 13 Smwangat yatkar nir ulun ne dedesar ma nateman kit. Ma safe-safe ma i nose la nteman kit a ne, farlan ma biase i nose ber tomwatar monuk. Nempa Ratu dedesar ma nlarat safe ma nyoding. Safe ma I nyoding a ne, iane feti keta to nsalan lonri kmi ma mtyungan anteman ma nlengan nof ma bomir myal ma mibare. Mpa keta nal dalamten ngamone ber a kmi, ma nose ma bomir myal ma mibare anteman a ne.
Ka tsatngur ber Ratu ma kete tsampayang ber rat wawatar
14 Mpa wangur ma kwamis a kmi, ka kete desar ma msyampayang ber ratwawatar. 15 Yak kufai feti mir andaun nangafel, mpa yakw kfwalak ber a kmi ma koko kmi mdyaun feti safe ma kfwalak ye botuan nre tate! 16 Noak ma kit tenum anggur na kompi ne, tanremi Yesus ma nmat na katutun sangwalu, mpa tose terimakasi ber Ratu. Anggur ma tenum a ne nfatutu feti dalminrar lese tor Yesus ninr Ray Silai fali darany a rtarbui ber kit lo. Ma noak ma tapuse roti ma tane, iane nfatutu feti kit teluk tene lese, iane Yesus ninr Ray Silai tenany. 17 Mpa boloka yadin kit nempa tabut kit na lan tene lese, fali roti ma tapuse ma tane ne lan lese.
18 Wangur, no mdyaun safe ma tomwat Israelar rose luryain a ne. Noak ma rfen binatngar ma rloik ber Ratu neluk snyompe, sir ral isnir ma rnau na anir sa betno rane. Ain a ne ma biase tomwatar rapu nir snyompar a na.a Sir rose farane la rfatutu feti dalmir lese ror Ratu. 19 Yak kfwalak farane ma kuftutu kmi na tnyamar ma tomwatar rloik ber ratwawatar a ne. Iane feti ratwawatar a ne to nir kuase sasaf ma tnyamar ma rloik ber sir a ne to uban. 20 Yakw kfwalak farane fali safe ma tomwatar rloik neluk snyompe na snyomp anir a ne, iane to rloik ber Ratu nempa ber smwangat yatkar. Ma to kpweang ma dalmir lese myor smwangat yatkar a ne.
21 Kmi to bise ma myenum nof ninr Mangnrur Silai Ni kompi, ma myenum a mbyal nof smwangat yatkar nir kompi. Kmi to bise ma mine ninr Mangnrur Silai Ni roti, ma mine mbyal tnyamar ma rloik ber smwangat yatkar a ne. 22 Kit tose farane iane feti tose ma Ratu narese kit. Ma Ratu Ni kuase ne nlengan kit mpa bise motak ma I nukun kit.
Ka kete tnyamar rwayat ma tomwatar rfufw far sale dalam
23 Tomwatar rfalak, “Kit bise ma tose safe-safe motak tlarat ninr mpempeang.” Iane botuan nempa to safe-safe monuk ma tose ne uban ber kit. Ma botuan feti bise motak ma tose safe-safe monuk nempa to safe-safe monuk ma tose ne bise ma ntulung soranyar la nafkoran sir. 24 Farlan myose kabanir e ka kete mdyaun lan tenmir nempa ka mdyaun tomwat walyetar nir ngamone.
25 Kmi bise ma mine daging safe-safe motak ma rfenri na pasar, ma kete myenrat feti rloik daging ne ber ratwawatar lo nre lolone. Kmi myose farane nema kete mdyaun feti safe ma myose ne sale. 26 To tnyame fen lese ma Ratu to nose mpa bise ma mine safe-safe motak. Fali rarengi na Kitap Lelerap dalam, “Ratu ne Mangkuase saryamprene numur ni mparetar.”
27 Contoh sa farye: tomwatar sa ma to nalele Ratu nundang a kmi ma mtyame. Ma myoding ma mtyi mtyame na ni das. Lama myait ni das, ka mine safe-safe motak ma nal ber a kmi a ne. Ma ka kete myenrat feti tnyamar a ne nof mpe, nema kete mdyaun feti myose sale lo. 28 Nempa farlan tomwatar sa nfalak ber a kmi, “Tnyamar a ne rloik ber ratwawatar lo.” Ne kete mine tnyamar a ne. Kmi myose farane la myalang tomwate ma nfalak a ne. Ma myose ma to ndaun feti i nose sale lo. 29 Yak kfwalak ber a kmi ma kete mine tnyamar a ne, iane to feti to kyoding mir andanwar nempa ka mdyaun tomwat walyetar nir andanwar a nbal.
Nempa nre kete tomwatar ketnir nof a kmi a ne rfalak: “Yakw bise ma kose safe-safe motak, mpa safema ka kose klwarat tomwatar nir andanwar ? 30 Noak ma yak ktwame, kose terimakasi ber Ratu na tnyamar a ne. Mpa safema tomwatar rfasale yakw na tnyamar ma kune ne? Safo yak ktwak Ratu ma nberkat tnyamar a ne lo.”
31 Wangur, mdyengar ma kfwalak ye: Noak ma mtyame nre myenum nre myose safe-safe motak, ka myose fengamone nema tomwatar rdangin Ratu. 32 Ka mijake kmi ma kete myayat ma tomwat walyetar rfufw far sale dalam, boloka sir a ne tomwat Yahudyar nre tomwatar ma to Yahudi sir nre tomwatar ma ralele Yesus. 33 Ka myorip a mbyalak yakw fali dedesar ma kureke la kufsenange tomwatar monuk dalmir na safe-safe motak ma kose. Iane feti to kdwaun lan tenangw nempa kdwaun tomwat walyetar nir ngamone nbal. Yakw kose farane ma ktwulung sir nema Ratu nfair sir.