1 Ne Paulus nfon mangtetak agamar ma nfalak, “Wangur! Yakw kufai feti na ningw momorip e, dalangw a nlerap na Ratu soun lury terik lere ye. 2 Mangsomp silai Ananias ndengar Paulus a nfalak farane e nluan tomwatar ma rtef sukan. 3 Ne Paulus nbali mangsomp silai ne ma nfalak, “Hei susuk tarfule ko keta Ratu ntef ko! Ko farlan tembok ma racat ma nangafel nempa dalam e narai. Ko mumtoran ye ma mswidang yakw mlwarat Musa ni faretar, safo ko a nbal e to mlwarat, ma mfwalak ma rtef yakw!”
4 Ne Tomwatar ma ramin a ne rfalak, “Ko mbwaran desar ma murikan Ratu Ni mangsomp silai!” 5 Ne i nfalak, “Wangur, yakw to kufai feti mangsomp silai i. Ma yakw kufai botuan na Kitap Lelerap dalam rarengi feti, ‘Ka kete mirikan mir mangfarete.”*
6 Mpe Paulus a nafai feti mangtetak agamar a ne ketnir e rof faburat Saduki ma ketnir e rof faburat Farisi. Mpa nfalak ber mangtetkar a ne, “Wangur! Yakw ye tomwat Farisi ma kof dasdalam Farisi nbal. Ma rsidang yakw na ye fali kulele feti mangmwatar keta rmorip a rbali.” 7 Lama nfalak farane, tomwat Sadukyar ma tomwat Farisyar rabangal, nwayat ma rakes e sir. 8 Fali Sadukyar to ralele feti mangmwatar keta rmorip a rbali, ma rfalak feti to malaekat ma smwangat nempa Farisyar e ralele monuk a ne. 9 Iane nwayat ma mimiri silai desar. Ne Mangaftutu Musa ni faretar ketnir rof faburat Farisi ramdir ma rbangal desar ma rfalak, “Tomwate ye to ni sal sasaf! Nre kete malaekat nre smwangat ma natanuk ber i!” 10 Mpe kafreye ne ntafal desar nwayat ma komandan a ne namtaut, feti keta rbabal a rfen Paulus. Mpa nluan ni suldadwar ma ral Paulus rof tomwatar a ne ma ror i far markas.
11 Ni nronram e, Tuhan Yesus nma ma namdir Paulus serin ma nfalak, “Kete mumtaut! Fali ko mbwaran ma mufwibar na Yakw na Yerusalem lo, mpa keta mtwi mufwibar farane nbal na kote Roma.”
Tomwat Yahudyar reng ma rfen Paulus
12-13 Ni bobolisin e, tomwat Yahudyar rafburat sir ma rfat ma lese ma rsompe feti, keta to rtame renum terik ma rfen Paulus. Sir monuk a ne tomwate buty fat resnir. 14 Sir rti rakmat mangsompar ulnir ma mangfaret Yahudyar ma rfalak, “Kam msompe lo feti, keta kam to mtame menum titerik ma mfen Paulus. 15 Mpa amngur miktem mangtetak agamar mirengi surtar sa ber suldad Romar nir ulun ma mtyak ma ror a rbali Paulus ber a kmi. Mlyepusuk motak i feti myose ma minriak fengamone ni sale. Ma keta na dalamtene lety e mfen i.”
16 Nempa Paulus uran anaky nafai tomwatar a ne nir rerengyar, mpa i nti markas ma nafbotin ber Paulus. 17 Ne Paulus ntar suldadwar nir ulun sa ma nfalak ber i, “Mor tabweri ye ber mir komandan, fali i nose ma nfalak kabar sa ber i.” 18 Suldadwar nir ulun ne nor i ber nir komandan ma nfalak, “Paulus ma rnau i a na sel a ne ntar yakw ma kor tabweri ye ber ko, fali i nose ma nfalak kabar sa.” 19 Mpe komandan nor i far serin betno nenrat, “Safe ne?” 20 Ne i nfalak, “Amangw, tomwat Yahudyar rfat ma rtak ko ma keta bobole e mor Paulus ber mangtetak agamar, rose farane nema tomwatar rafliak feti ranriak ni sale fengamone.” 21 Nempa kete mlwarat nir tatake ne, fali tomwate buty fat resnir rof sir rdaf a na dalamtene lety ma rfen i. Sir rsompe lo feti, keta to rtame renum titerik ma rfen Paulus. Mpe rasusan monuk sir lo, ma rdaf lan tetetak nof amangw. 22 Ne komandan nfalak ber tabweri ne, “Ka kete mfwalak ber kekes feti ko mufbotin ngrie ye ber yakw lo.” Ne nluan ma nbali i.
Ror Paulus ber Gubernur Feliks
23 Mpene komandan a ne ntar suldadwar nir ulun du ma nfalak, “Mifburat suldadu raty du, ma suldadu buty itw ror nir kudar, numur suldadu raty du ror nir solnar nema rasusan sir ma nronram jam sembilan e ral far Kaisarea. 24 Msyalan kudar sa nbal ber Paulus ma nfangat, ma myor i fengamone ber Gubernur Feliks.”
25 Ma komandan a ne narengi surat ber Gubernur Feliks farye,
26 Salam nof Klaudius Lisias ber Gubernur Feliks ngamone ko. 27 Tomwat Yahudyar romat tomwate ye ma ketla rfen i, nempa daing feti kor ningw suldadwar ma mtampu sir, fali kdwengar feti tomwate ye tomwat Roma. 28 Ma kpweang ma kufai feti safe nwayat ma rfasale i. Mpe kor i ber nir mangtetak Agamar. 29 Nempa to ktwungan ni sale ma bise kal tetetak mamate nre knau i a na sel. Fali rfasale i a na lan nir tetetak Agame. 30 Mpene tomwatar rma rafbotin ber yakw feti, tomwat Yahudyar reng ma rfen i. Iane nwayat ma kusnyalik ma klwuan ma ror i ber ko. Ma kfwalak a nbal ber tomwatar ma rfasale i a ne ma rti rmagadu ni sale ber ko. Nater lan ye.
31 Mpene suldadwar a ne rlarat safe ma nir komandan nfalak ber sir, ma ror Paulus nronram a ne nbal far kote Antipatris.
32 Ni bobole ne suldadwar ma rmpan bab a ne rbali sir far nir markas, mla mangfangat kudar a ne raktem Paulus raloran far kote Kaisarea. 33 Lama rait kote Kaisarea, suldadwar a ne ral surat ber Gubernur, ma ranrenre Paulus ber i. 34 Lama Gubernur nbaca monuk surat a ne, i nenrat feti Paulus nof mpe. Ne Paulus nfalak feti i nof yampren Kilikia. Noak ma Gubernur ndengar farane, 35 i nfalak, “Farlan tomwatar ma rfasale ko a ne rma lo e, la yak kurus nim ngrie.” Ne nluan ma rtayan i ma rajake i a na Herodes ni istana.