Timotius nlarat Paulus ma Silas
1 Na ler sa e Paulus ma Silas rti kote Derbe betno rti kote Listra. Na iano tomwat sa ma nalele Yesus ngarany Timotius. Enany e tomwat Yahudyar sa i ma nalele Yesus a nbal, nempa amany e tomwat Yunani i. 2 Tomwat anlelar na Listra ma Ikonium ralang resi i fali nangamon. 3 Ma Paulus nmpeang ma Timotius norang i. Nempa tomwat Yahudyar na iane rafai feti Timotius ye amany nof Yunani. Mpa Paulus nluan ma rsunat i.a 4 Lama rsunat i, raktem Paulus a ka rmpan a rlole kotayar ma rafbotin ber soranyar na tetetkar ma mangsidkwar mla mangonbain gerejar rtetak na Yerusalem a ne. Ma rsurat sir ma rlarat tetetkar a ne. 5 Mpe soranyar a ne nir anlele ntafal ma namkoran, ma lerar mpane e rtafal ma yadin sir.
Ratu nfatutu kabar sa ber Paulus na kote Troas
6 Paulus ma Silas raloran nir mpampane far nus Frigia ma Galatia nempa sir to rafwibar Ratu Ni ngribatnir na provinsi Asia fali Ratu Smwangtany nose nteri sir. 7 Noak ma rait yampren Misia snyap e, sir rose ma rti yampren Bitinia, nempa Yesus Smwangtany nose nteri sir. 8 Mpa rmpan ralyole yampren Misia ma rti kote Troas. 9 Ni nronram e Paulus nkeban kabar sa feti tomwat Makedoniar sa ntak desar i ma nfalak, “Amangw, mwa ye fuky ma mtwulung kam.” 10 Lama Paulus nsalan farane, masusan kam ma mti Makedonia fali mdaun motak feti Ratu nsiduk kam ma mafwibar Ibar Ngamone na iano.b
Lidia nalele Ratu
11 Mpe maflolwain mor kabal mof Troas, ma maloran far Samotrake, ma ni bobole e mait kote Neapolis. 12 Mof a ne mti kote Filipi ma namin distrik luryain na Makedonia.c Kote Filipi ye ma tomwat Romar rfarete. Kam mamin iano lerar fir a ne. 13 Na Yahudyar nir ler sanari e, kam mti kote ne ni finru matan. Betno malyole kewas serin ma mti msalan Yahudyar nir das sampayang fali mdaun feti namin a ne. Na iano kam mamtoran ma matanuk mor batar ma rafburat sir. 14 Nof batar ma rdengar ma kam matanuk a ne bat sa ngarany Lidia nof kote Tiatira. I ye mangfenri maloly weympuse daran ma kotkyan, ma i nsampayang dedesar ber Ratu. Noak ma ndengar Paulus natanuk e Ratu nodir dalamy nwayat ma nlangun ni anftutwar. 15 Lama radiris monuk i nor ni dasdalam e, i nfalak, “Amngur, farlan mdyaun feti yakw ye kulele botuan Tuhan lo e, mya ma mimin ningw das a fuky.” Ne ntak naloloi ber kam terik ma mlarat ni tatake ne.
Tomwatar rnau Paulus ma Silas na sel
16 Na ler sa e kam mti das sampayang ne, ma matungan mor bat karwar sa. Bate ne smwangat yatak nsung i nwayat ma bise natnyose. Nof ni tnyose ne i nonry dotyar yadin ber ni bosar. 17 Bate ne nmpan a nlarat kam a ma Paulus ma nafwayak dedesar, “Tomwatar ye Ratu mangamin medase ni mangkaryayar. Sir rma ma rafbotin dalamten malonri ber kmi nema Ratu to nukun a kmi.” 18 Lerar fir a ne bate ne nafwayak dedesar, nwayat ma Paulus to nsar lo mpa nfon i ma nfalak ber smwangat yatak ma nsung bate ne, “Kor Yesus Kristus ngarany, mbwie ko mof bate ye!” Ne smwangat ne nbie desar. 19 Nof a ne bate ne ni bosar rafai feti keta to ronri doit lo, mpa romat Paulus ma Silas, ma rakei sir far inarut ma rbali mangfaretar. 20 Lama rait mangfaret Romar a ne sir rfalak, “Tomwatar ye tomwat Yahudyar, sir rma ma rose mimiri na ninr kote ye. 21 Sir raftutu nir wewelmpampanar ma to nordeng ror tomwat Romar kit ninr yayatrwar.” 22 Lama bosar a ne rfalak farane tomwat ngayadin na iane rlarat ma rkanre radu a nbal. Ne mangfaretar na kote ne rluan tomwatar ma rbis nir rabtyar betno raus a rbabal sir. 23 Lama raus a rbabal sir ma nlie nlengan, rakei sir far sel. Ne rluan sel ulun ma najake sir fengamone. 24
Sir raskwatam Paulus radu Silas emnir ror balkar (16:24)
25 Fafa nronram fetwalan e radu a rsampayang ma rbeu la rdangin Ratu. Ma tomwatar ma ramin sel a ne rdengar sir. 26 Metryat e ruku silai desar, nwayat ma sel a ne nawawan, ma ni fofoltar rtakbanril. Mpa rewar ma rkete tomwatar monuk na sel a ne ramtatar. 27 Ne sel ulun a ne npote i, ma nsalan farye e fofoltar rtakbanril monuk lo, mpa nal smade ma nose ma nfen a nbali i fali nafliak feti tomwatar ma ramin sel a ne rafla monuk lo. 28 Nempa Paulus nafwayak, “Kete mose farane! Kam monuk mamin ye!” 29 12 Sel ulun ne ntak damar ma nafla nti dalam e ngangasar ma nsangitil a na Paulus ma Silas sonir lury. 30 Ne nor sir far burit ma nfalak, “Amngur ka kose farpe nema Ratu nfair yakw kof ningw salar?” 31 Sir rfalak, “Ka mulele Tuhan Yesus Kristus, nema keta nfair ko mor nim das dalam myof mir salar.” 32 Nof a ne radu a rafwibar Ibar Ngamone ber i numur tomwatar monuk ma ramin ni das a ne. 33 Na nromram a ne nbal, sel ulun a ne nor Paulus ma Silas ma naflerap nir mngalar. Ma nof a ne nbal radu a radiris i numur tomwatar monuk ma ramin ni das a ne. 34 Mpene nor sir far ni das ma rtame. Ma nor ni das dalam ne rampumpuki resi, fali ralele Ratu lo.
Paulus ma Silas rti a rtate kote Filipi
35 Ni bobole ne mangfaretar na kote ne rluan nir suldadwar ma rti rafbotin ber sel ulun a ne, nema ntate Paulus ma Silas. 36 Ne sel ulun nfalak ber Paulus, “Mangfaret silayar rluan ma ktwate kmi, mpa mbyali kmi myor maline!” 37 Nempa Paulus nfalak, “To bise farane! Kam ye tomwat Romar, to rtetak mamy ngrie fuky e raus a rbabal kam a na tomwatar sonir lury, ma rnau kam a na sel. Ma lere ye rose ma ralin kam farye motak e? Mfyalak ber mir mangfaretar a ne ma rma ma rtate kam.”d 38 Mpe suldadwar a ne rti rafbotin ber mangfaret Romar ne. Lama rdengar feti radu a ne tomwat Romar e ramtaut desar. 39 Ne rti rakmat Paulus ma Silas nema rlure sir, betno ralin sir rof sel ma rtak ma rti a rtate kote ne. 40 Lama radu a rbie rof sel e, rti Lidia ni das. Ne ratungan ror tomwat anlelar na iano ma rafkoran dalmir, betno rti a rtate kote ne.