<<    <     Yesus Ni mangsidkwar nir ansarwar     14     >    >> 
Paulus ma Barnabas na Ikonium
1 Na Ikonium Paulus ma Barnabas rti Yahudyar nir das sampayang a nbal. Na iane sir raftutu tomwat Yahudyar ma tomwatar ma to Yahudi sir nwayat ma yadin ma ralele Yesus. 2 Nempa tomwat Yahudyar ketnir ma to rlampir ma ralele Yesus raroi tomwatar ma to Yahudi sir nwayat ma dalmir maninik tomwat anlelar a ne. 3 Nempa Paulus ma Barnabas ramin iane far dodo. Sir rbaran ma raftutu tomwatar na Tuhan Yesus. I nal kuase ber sir ma rose fanikar ma kabain mpasalnar. La nfatnyot feti ibar na Ratu Ni dalam ngamone ne botuan. 4 Nempa tomwatar na kote ne rsaman sir a rmpan du. Ketnir rlarat tomwat Yahudyar ma ketnir a nbal e rlarat mangsidkwar du a ne. 5 Ne tomwat Yahudyar ror nir mangfaretar numur tomwatar ma to Yahudi sir a ne rose ma rbabal mangsidkwar du a ne ma rakjai sir ror batyar. 6 Nempa mangsidkwar dua a ne rafai nir rerengyar, mpa rafla far kote Listra ma Derbe, na yampren Likaonia ma yampren serin baldu. 7 Na iano sir rafwibar Ibar Ngamone nbal.
Paulus ma Barnabas na kote Listra ma Derbe
8 Na Listra tomwat sa ma namlukut ntabu nof ni talengankire. Mpa to nmpan desar. 9 I namtoran ma ndengar Paulus natanuk. Paulus nsalan tomwate ne bise ma nangamon fali nalele Yesus. 10 Mpa Paulus nfalak nor lirin silai, “Mumdir lo!” Ne tomwate ne namdir desar ma mpane mponi i. 11 Noak ma tomwat ngayadin rsalan safe ma Paulus nose ne, sir rafwayak ror Likaonia lirin, “Sir ye dewayar ma rose felnir far tomwatar ma rtompur saryamprene.” 12 Ne sir rafngare Barnabas na dewa Zeus, ma Paulus na dewa Hermes fali i ye ma nonri tnyanuk.a 13 
Dewa Zeus ni mangsompe nonry lembuar ma rewbungar ber Paulus ma Barnabas (14:13)
Dewa Zeus ye ni snyompe ain to dodo nof kote. Ma ni mangsompe nma e nonry lembu merwanar ma rewbungar far kote ne ni finru matan. I nor tomwat ngayadin rose ma rfen lembuar ma ral fen nir snyompar ber mangsidkwar du a ne.14 Noak ma Barnabas ma Paulus rafai safe ma keta rose, sir rabisi nir rabtyar ma rfatutu feti to rmpeang mpa rafla far tomwat ngayadin a ne ma rafwayak feti,15 “Hei, falisafe ma myose farye? Kam ye tomwat biase farlan kmi! Kam mamin ye ma mafwibar Ibar Ngamone ber a kmi, nema mtyate kabanir ma to ubnir a ne ma mlyarat Ratu ma nmorip. I ye ma nose langit, ma saryamprene numur tasik ma safe-safe monuk.16 Luryain a ne Ratu nsalan lonri tomwatar na nusar monuk ma rmpan a rlarat nir mpempeang.17 Boloka farane Ratu nfatutu dalamy ngamone ber kit dedesar. Ni dalamy ngamone ne kit tsalan tof ni tewat ma ntolar udan la naisi let isnir, ma nal tyamar dengan, ma nose ma tsenang.”18 Boloka mangsidkwar a ne rfalak lo sir dedesar rose ma rfen snyompar a ne. Nempa rareke desar ma rose rteri sir mpa famudi to ral snyompar ne ber sir.19 Nempa tomwat Yahudyar ketnir rof Antiokhia ma Ikonium rma ma rfule tomwat ngayadin a ne nema ror sir. Betno ral batyar la rakjai Paulus ma rafliak feti nmat lo mpa rakei i far kote burit.20 Nempa tomwat anlelar na iano ramdir a rkolu i, ne npote i ma nbali i far kote ne dalam. Ni bobole ne betno radu Barnabas ral far Derbe.
Paulus ma Barnabas rbali sir far kote Antiokhia
21 Paulus ma Barnabas rafwibar Ibar Ngamone na Derbe, ma tomwatar yadin ralele Yesus. Mpene rbali sir far kote Listra, Ikonium, ma Antiokhia na Pisidia. 22 Na kotayar ne sir rafkoran manglartar dalmir ma rsurat sir nema ralele Yesus dedesar. Ma rfalak feti, ‘Ka tkoman susar yadin a fuky betno tsenang a na Ratu Ni ain farete.’ 23 Ne Paulus ma Barnabas rfil mangonbain gerejar na mpane soranyar. Lama rsampayang ma rpuase, sir rtak Ratu ma ralele I a ne ma najake mangonbanir a ne. 24 Mpene Paulus ma Barnabas raloran nir mpampane ma rlole monuk nus Pisidia terik nus Pamfilia. 25 Lama rafwibar Ratu Ni ngribatnir na kote Perga, rti kote Atalia. 26 Nof a ne rfangat kabal far Antiokhia. Luryain e tomwat anlelar na kote ne rtak Ratu ma nfatutu dalamy ngamone ber sir ma rsoru nir karyae. Ma lere ye nir karyayar ne omp lo. 27 Rait Antiokhia sir rafburat soranyar a ne ma rasaur safe-safe monuk ma Ratu nose na nir karyae. Ma Ratu nfatutu dalamten ngamonar ber tomwatar ma to Yahudi sir ma ralele Yesus a nbal. 28 Paulus ma Barnabas ror tomwat anlelar na kote ne far dodo.