Yesus naftutu Ni manglartar ma rsampayang
1 Na ler sa e Yesus nsampayang na ain sa. Lama nsampayang monuk, Ni manglartar sa nfalak, “Tuhan, Yohanes mangadiris naftutu ni manglartar ma rsampayang, mpa muftutu kam a nbal.”
2 Yesus nfalak ber sir, “Ka msyampayang farye,
Kam Amyamar, ka weni tomwatar ralang Ko ngaram lelerap,
ka weni Ko mweluk Rai ma mfwarete tomwatar na saryamprene.
3 Mal tnyame dengan ber kam lerar monuk.
4 Ma mlwure kam mamy salar,
fali kam a nbal mlure tomwatar ma rose yatak e kam.
Mujake kam nema smwangat yatkar nir ulun kete nateman kam ma mose sale.”
5 Ne Yesus nfalak ber sir, “Farlan tomwatar sa nof a kmi ye, nronram fetwalan lo ma nti tbwarin ni das, ma nfalak ber i feti, ‘Atbwar, mwal rotyar fen tel ber yakw fuky, 6 fali tbwaringw nof pnu dodo a nma ma nwelat ningw das, ma to sasaf ma kal ber i!’
7 Farlan tbwarim a ne nbali nof dalam feti, ‘Kete mwayat yakw! Kwusy fofolat, ma kor angkur marwa lo. Mpa to bise kpwote yakw ma kal sasaf ber ko.’”
8 Ne Yesus nfalak, “Mdyengar fengamone ma kfwalak: Boloka tomwate ne tbwarim desar ma to nlampir ma npote i ma nal safe ma mtwak a ne, nempa fali to mufai mweat ma mtwak dedesar mof i a mpa la npote i ma nal ber ko.
9 Mpa Yak kfwalak ber a kmi: Mtyak dedesar myof Ratu, keta I nal ber a kmi; minriak dedesar myof I keta mtyungan; ma mtyar ngarany dedesar keta nbali kmi.a 10 Fali tomwate ma ntak, keta nal ber i; ma tomwate ma nanriak, keta ntungan; ma tomwate ma ntar ngarany dedesar, keta Ratu nbali i. 11 Farlan angkimir rtak ian rof a kmi, keta myal kasi ber sir e? 12 Nre rtak sife batin e, keta myal seplakrue e? 13 Tomwat yatkar a kmi e mifai ma myal kabain ngamonar ber angkimir. Ni botuan feti Amangw ma namin surga! Nafai nlengan nof a kmi a nbal keta nal Smwangtany ber sir ma rtak rof I!”
Yesus Ni kuase nlengan nof Beelzebul
14 Na ler sa e Yesus natian kalin smwangat yatak ma nose tomwat sa namomou. Noak ma smwangat yatak a ne nbie, tomwate ne natanuk desar. Mpa tomwatar yadin na iane rampriang, 15 * nempa tomwatar ketnir a rfalak, “I nal Beelzebul ni kuase ma natian kalin smwangat yatak a ne. Beelzebul ye smwangat yatkar nir ulun.”
16 * Ketnir a nbal rose ma rateman Yesus, sir rtak I ma nose kabain mpasalnar sa ber sir, nema rsalan feti Ni kuase ne nof Ratu nre tate. 17 Nempa Yesus nafai nir andanwar. Mpa I nfalak, “Farlan tomwatar na nir nuse rakedan sir, keta nuse ne namsos. Farlan tomwatar na nir das dalmir rakafreye dedesar sir, keta das dalmir a ne ramsos a nbal.
18 Farane nbal na smwangat yatkar nir ulun ni ain farete; farlan smwangat yatkar rakafreye sir, keta ain farete ne namsos. Yak kfwalak farye fali kmi mfyalak feti Yak kal Beelzebul ni kuase la kutian kalin smwangat yatkar. 19 Mpe kmi mfyalak farane e iane feti mir manglartar ral Beelzebul ni kuase nbal ma ratian kalin smwangat yatkar. Nempa keta koko sir rbangal a kmi! 20 Yak kal Ratu Ni kuase la kutian kalin smwangat yatkar, iane nfatutu feti Ratu nfarete neluk Rai na twalelenmir lo.”
21 Yesus nfalak tnyanuk pupular sa nbal farye: “Tomwat makornar sa e najake ni das nor ni demnir, nema ni kabanir kete rlay. Tomwate ne farlan smwangat yatkar nir ulun. 22 Ne tomwat makornar sa ma nlengan i nbangal a ntuni i, ma nal tomwate ne ni demnir, ne nal tomwate ne ni kabanir ma nasaman ber tomwatar. Mpe tomwate ne farlan Yakw.
23 * Ise ma to nlarat Yakw, iane nbangal Yakw, ma ise ma to norang ningw karyayar, iane nafyatak ningw karyayar!”
Smwangat yatak keta nbali i ber tomwatar ma to ralele Yesus
24 “Noak ma smwangat yatak nbie nof tomwatar sa, i nlole nus mangretwar ma nanriak ain ma namin, nempa to ntungan. Mpa, nfalak na dalamy feti, ‘Ni ngafele e kbwali yakw far tomwate ma kswung i a ne!’ 25 Ne smwangat yatak ne nbali i ma nsalan tomwate ne namkap farlan das ma rsoli rsere ma nanglerap ma rafyamping. 26 Mpene nti burit ma ntar smwangtar itw ma rayatak a rlengan i. Sir rsung tomwate ne. Mpa famudi e ni momorip nayatak a nlengan nof luryain.”
Ngamone ber tomwatar ma rmpan a rlarat Ratu Ni ngribatnir
27 Noak ma Yesus natanuk, batar sa nof tomwat ngayadin a ne nafwayak ma nfalak, “Ngamone ber bate ma namtoran bab ma nsus Ko!”
28 Nempa Yesus a nfalak, “Ngamone ber tomwatar ma rdengar Ratu Ni ngribatnir ma rmpan a rlarat!”
Tomwatar rtak Yesus ma nose ngrimpasalan
29 * Noak ma tomwatar rtafal ma yadin rkolu Yesus, I nfalak, “Tomwatar na are ye tomwat yatkar. Sir rtak ma kose ngrimpasalnar sa betno ralele Yakw, nempa keta to kose fen lese nbal, Yak kose lan ngrimpasalan farlan na are nabi Yunus. 30 * Farlan luri ne nabi Yunus neluk faniak ber tomwatar na kote Niniwe, keta Yakw, Tomwate Anaky a nbal kweluk faniak ber tomwatar na are ye. 31 * Na lere ma Ratu nukun saryamprene, rai bate nof trangan keta nmorip a nbal nor tomwatar na are ye, ma keta nfasale sir. Rai bate ye nma nof nus dodo desar ma ndengar rai Salomo ni anfai silai. Nempa na ye tomwat sa ma silai I nlengan nof Salomo, kmi to mlyampir ma mdyengar I! 32 * Nait ma Ratu nukun saryamprene, tomwat Niniwar keta rmorip a rbali ma rfasale tomwatar na are ye. Fali tomwat Niniwar a ne rtate nir salar noak ma Yunus nafbotin Ratu Ni ngribatnir ber sir. Ma na ye tomwat sa ma silai nlengan Yunus nempa kmi to mtyate mir salar noak ma nafbotin Ratu Ni ngribatnir!”
Ratu Ni ngribatnir la naflawar ninr momorip
33 * “Tomwatar to rtutun damar betno ramudim nre ral ngusib ma rsungap. Nempa keta rtikloi na impan, nema tomwatar rti das dalam e rkeban ngaodir. 34 Matmir ye farlan damar ber tenmir. Farlan matmir idak, keta mkyeban safe-safe motak. Ma farlan matmir makrokap, keta to mkyeban sasaf. 35 Mpa mijake ma ka odir ma namin dalmir a ne kete nmat ma dalmir makrokap. 36 Farlan dalmir monuk idak, keta mir momorip idak a nbal farlan damar ma nodir das dalam a ne.”
Yesus ndotar tomwat Farisyar ma mangaftutu Musa ni faretar
37 Lama Yesus naftutu monuk e tomwat Farisyar sa ntar I ma ntame na ni das, mpa Yesus nti. 38 Tomwat Farisi ne nampriang fali Yesus ntame to nbur limnir, nlarat agame ni yayatrwar.c 39 Ne Tuhan Yesus nfalak ber i, “Tomwat Farisyar a kmi, kmi ye farlan tomwate ma nbur mpinan ma gelayas burtir, nempa to mbyur dalmir mpa lolone rarai. Mpe farlan kmi a nbal ma dalmir nfen ber kabain yatkar ma mkyampres tomwatar nir kabanir. 40 He modar a kmi! To mifai feti Ratu nose tenmir ma dalmir a nbal e? 41 Mpa ka dalmir lelerap ma myal ber tomwatar ma rawatan. Farlan myose farane, keta dalmir ma mir momorip a ne nanglerap a nbal.
42 * He Farisyar a kmi! Keta mtyungan suse maberat desar. Mir let isnir farlan selasih, inggu, ma sayorar felnir mpane, myal sepersepuluh ber Ratu, safe ma myose ne diat nempa to mimlonry ber tomwatar ma to mkyamis Ratu. Ni botuan e ka myal perpuluhan ma kete mimlufe ma myose mlyarat tetetak walyetar.
43 He Farisyar a kmi! Keta mtyungan suse maberat desar! Fali mpyeang lan ma mimtoran lury na das sampayang dalam, ma mpyeang ma tomwatar ralang a kmi na nus ngayadin. 44 Keta suse maberat desar ber a kmi! Fali myose felmir farlan tomwat ngamonar, nempa dalmir e nfen ber kabain yatkar. Iane farlan kubur ma to ni faniak. Keta tomwatar rmpan a na kubur ne das, nempa to rafai feti kubur dalam ne npusuk.”
45 Ne mangaftutu Musa ni faretar sa nfalak ber Yesus, “Tuangguru, Ko mfwalak farane mufmweat kam!”
46 Yesus nfalak, “Mangaftutu Musa ni faretar a kmi, keta mtyungan suse maberat desar a nbal! Kmi mryibut tomwatar ma rlarat mir yayatur mabertar, nempa kmi desar e to mtyulung sir ma rmpan a rlarat. 47 Keta kmi mtyungan suse maberat desar! Fali mifyamping a mbyali nabyar nir kuprwar a ne, safo empwmir nusmir rfen sir.d 48 Iane nfatutu feti koko kmi mlyarat ma myoding safe ma empwmir nusmir rose ne lo; fali botuan feti sir ma rfen nabyar a ne ma kmi mifyamping a mbyali nir kuprwar. 49 Iane nwayat ma noak a ne Ratu nfalak nor Ni anfai silai feti, ‘Keta kswiduk nabyar a mla mangsidkwar ber sir; ne keta rfen ketnir a mla rsil a rbabal ketnir!’ 50 Ratu nose farane nema nukun tomwatar ma rmorip na are ye, fali rafene monuk nabyar ntabw nof saryamprene betno ni luryain, 51 * ntabw nof ma rfen Habel titerik Zakharia, ma rfen i a na Ratu Ni Das Silai ni latyompur, na snyompe ain ma Ratu Ni das let. La msyalan: keta Ratu nukun tomwatar na are ye fali ngriar monuk a ne.
52 Mangaftutu Musa ni faretar a kmi, keta mtyungan suse maberat desar! Fali kmi mnyau kukusy fofolat ma mbyanril tomwatar nir andanwar nema bise ma rafai Ratu Ni mpempeang. Nempa kmi desar e to mlyampir ma mifai. Safo sir rmpeang ma rafai Ratu Ni mpempeang nempa myose mtyeri!”
53 Lama Yesus nti a ntate ain a ne, mangaftutu Musa ni faretar ma tomwat Farisyar rkedan desar I. Ne raenrat dedesar I nema bise nfalak kabanir yadin.
Mangaftutu Musa ni faretar ma Tomwat Farisyar (11:53)