Yesus nsiduk Ni manglarat buty itw
1 Mpene Tuhan Yesus nfil Ni manglarat buty itw.a Ne I nsiduk tomwatar dudu mpane ma rbalun far kotar ma keta I nlole ne. 2 * I nfalak tnyanuk pupular sa ber sir, “Lete isiny e yadin nempa mangkaryayar lan du. Mpa mtyak myof lete Nruan, nema ntafal mangkaryayar ketnir a nbal. 3 * Mtyi lo! Nempa ka minremi feti Yak kswiduk a kmi farlan domba anaky ma nti nor aswalas tair. 4 * Ka mtyi e kete myonr lufu, kodnar nre sabatwemar. Ma kete misaur kabain dodo myor tomwatar na dalamtene lety.
5 Farlan msyung dasar sa, ka mfyalak ber tomwatar na das dalam a ne fuky feti, ‘Maline ber a kmi.’ 6 Ma farlan rlangun a kmi ma nangafel e, keta Ratu nal maline ber sir. Nempa farlan tate e, keta Ratu to nal maline ber sir. 7 * Ka mimin lan das a ne, kete myof dasar sa mtyi dasar sa. Mtyame myenum safe-safe motak ma ral ber a kmi, fali iane mir sewe ne lo. Ma nangafel feti tomwatar ma rkarya e ronri sewe.
8 Farlan mtyi kotar sa ma tomwatar rlangun a kmi e, mine motak tnyamar ma ral ber a kmi. 9 Mifngamone mangafansar na kote ne ma mifwibar ber tomwatar na iane feti, ‘Nait ni tewat lo ma Ratu neluk Rai ma nfarete kmi.’ 10 Nempa farlan mtyi kotar sa ma tomwatar to rlangun a kmi e ka mtyi dalamten matnir ma mfyalere feti: 11 ‘Kam mbali kam ye lo ma keta to monr mir kabanir fen lese boloka mir ompak masun ma ramin emyamar ye nbal, keta matetar na somir lury. Iane neluk faniak feti Ratu to nlangun a kmi. Nempa ka minremi: Nait ni tewat lo ma Ratu neluk Rai ma nfarete kmi.’ 12 * Yak kfwalak ber a kmi: Na lere ma Ratu nukun saryamprene e, keta nukun tomwatar na kote ne maberat a nlengan nof tomwatar na kote Sodom noak a ne!”
Ratu keta nukun tomwatar ma rasipur I
13 * “Yore desar tomwat Khorazim ma Betsaidar a kmi. Keta Ratu nukun a kmi maberat desar! Yak kose ngrimpasalnar ber kmi lo nempa to mtyate mir salar. Farlan ma Yak kose ngrimpasalan noak a ne ber tomwatar na kote Tirus ma Sidon, botuan feti rtate nir salar doan ye lo ma rwolw kadut nurarb na sir, betno rnau afu na ulnir. 14 Nait ma Ratu nukun saryamprene e, keta nukun a kmi maberat a nlengan nof tomwatar na Tirus ma Sidon. 15 * Tomwat Kapernaum a kmi a nbal! Mdyaun feti keta Ratu nfair a kmi far surga e? Tate! Ratu keta nyebas kmi far naraka!”
16 * Ne Yesus nfalak ber Ni manglartar a ne, “Tomwatar ma rdengar safe ma kmi mfyalak, iane rdengar Yakw. Tomwatar ma rasipur a kmi, sir a ne rasipur Yakw. Tomwatar ma rasipur Yakw, sir a ne rasipur Ratu ma nsiduk Yakw nbal.”
Manglarat buty itw rbali sir ber Yesus
17 Manglarat buty itw a ne, rbali sir ber Yesus. Rampumpuki sir ma rfalak, “Tuhan, kam mal Ko ngaram la matian kalin smwangat yatkar mpa sir monuk rlarat desar.”
18 Ne Yesus nfalak ber sir, “Kswalan smwangat yatkar nir ulun nfuf nof langit farlan fitik. 19 * Kfwalak ber a kmi: Yak kal kuase ber a kmi lo ma mtyai kasi ma seplakrue, terik ma mifufu mir kanrar monuk. Mpa keta to sasaf ma rafngal a kmi. 20 Boloka farane kete mimpumpuki kmi fali smwangat yatkar rlarat a kmi desar. Nempa ni ngafele e mimpumpuki kmi, fali Ratu narengi ngarmir na surga lo.”
Yesus nose alang ber Ratu
21 Na lere ne nbal Ratu Smwangtany nose ma Yesus nsenang resi ma nfalak, “Amo, Ko ye Tuhan ma mkwuase langit numur saryamprene. Yak kose alang ber Ko fali mfwatutu kabanir monuk a ne ber tomwatar ma farlan kangkir ma to rafai sasaf, nempa mumudim ber mangafayar ma nir andaun ngamonar. Amo, Ko dalam a nsenang ma mose farane.
22 * Amo mwal safe-safe monuk ber Yakw lo. To tomwate fen lese ma nafai Anaky, lan Amangw. Farlan a nbal, to tomwate fen lese ma nafai Amangw, lan Anaky. Ma keta kufbotin a nbal ber tomwatar feti Amangw ye ise, klwarat ningw mpempeang.”
23 Yesus nmange i ma nfalak ber lan Ni manglartar, “Ngamone ber a kmi fali msyalan monuk kabanir ma kose ne lo. 24 Yak kfwalak ber a kmi, luri ne nabyar ma rayar yadin rmpeang ma rsalan safe ma kmi msyalan ye, nempa to bise. Sir rmpeang ma rdengar safe ma kmi mdyengar, nempa to rdengar.”
Tnyanuk pupule na tomwat Samaria ma dalamy ngamone
25 * Ni ler sa e mangaftutu Musa ni faretar sa namdir ma nateman Yesus ma nfalak, “Tuangguru, ka kose safe nema bise ma kmworip dedesar?”
26 Ne Yesus nfalak ber i, “Rarengi safe na Musa ni tetetkar? Ma mbwaca safe na iane?”
27 * Tomwate ne nfalak, “rarengi farye:
‘Ka mkwamis nim Tuhan ma nim Ratu mor dalam kateman:
safe-safe monuk ma ko mose, ma mdwaun ka nfatutu feti mkwamis I,
ma mwal monuk nim fakoran la mkwamis I.’
Ma ‘ka mkwamis tomwatar farlan ma mkwamis ko a nbal.’”
28 * Yesus nfalak ber i, “Ko mfwalak ne botuan, mpa mose farane nema bise ma mworip dedesar.”
29 Nempa mangaftutu Musa ni faretar ne nose ma nafdiat i, mpa nenrat Yesus, “Ka kwamis mpear?”
30 Ne Yesus nasaur tnyanuk pupule farye, “Na ler sa e, merwan Yahudyar sa nrunrur nof kote Yerusalem far kote Yerikho. Na dalamtene lety e natungan nor mangamnangar. Rbabal i terik ma ketla nmat ma ral monuk ni kabanir, betno rti a rtate i motak. 31 To dodo a nbal e Yahudyar nir mangsompar sa nlanre nof a ne. I nsalan tomwate ne, nempa nlanre far dalamtene balisya ma nmpan naloran. 32 Mpene tomwat Lewiarc sa nma ma nlanre nof dalamtene ne nbal. Noak ma nsalan tomwate ne, nti nlosir i ma nlolak i. Nempa nlanre far balisya betno nmpan naloran. 33 To dodo e tomwat Samariard sa nlanre dalamtene ne nbal ma nti anir sa. Noak ma nsalan tomwate ne nlompang resi i. 34 Ne nti nlosir tomwate ne, betno nal anggur ma naflerap ni mngalar ma naftasak nor ngule, betno nlele nteri. Mpene nfair tomwate ne na ni keledai, betno nor i far dasar sa ma nsewe kamar. Ma najake i ma nangafel. 35 Ni bobole ne nal doit dinare du ber das nruan ma nfalak, ‘Mujake i ma farlan doit ne to dengan, keta kbwali yakw betno kbwaras a kbwali ber ko.’”
36 Yesus nasaur monuk e, nenrat mangaftutu Musa ni faretar ne, “Nof nim andaun e, nof tomwatar tel a ne ise ma nkamis tomwatar farlan ma nkamis i?”
37 Mangaftutu Musa ni faretar ne nfalak, “Tomwate ma ni lolompang ma ntulung tomwate ne.”
Mpene Yesus nfalak, “Mbwali ko ma mose mlwarat farane nbal.”
Yesus namin Marta ma Maria nir das
38 * Mpene Yesus nor Ni manglartar raloran nir mpampane rti rait pnu sa. Na pnue ne bat sa ngarany Marta. I ma nlangun Yesus na ni das. 39 Marta wainy ngarany Maria. I namtoran nlosir Yesus ma ndengar Ni anftutu. 40 Nempa Marta nalsou ma nsalan lan olyar. Mpa i nti nlosir Yesus ma nfalak, “Tuhan, farpe ye, Maria nsalan lonri motak ma koko yak kwarya e, mfwalak ber i ma ntulung yakw!”